Lěe è ná zán xóɖɔɖókpɔ́ lɛ́ sín kpɔ́ndéwú gbɔn é

Azɔ̌ gěgé wɛ nɔví lɛ́ nɔ wa dó sɔ́ nǔ nú xóɖɔɖókpɔ́ lɛ́ sín kpɔ́ndéwú lɛ́, bɔ wɛnjlátɔ́ gěgé mɔ ɖɔ yě nɔ d’alɔ tawun ɖo fí e yě nɔ ɖɔ Mawuxó gbɔn lɛ́ é. É ɖo mɔ̌ có, ɖó ninɔmɛ lɛ́ má nɔ nyí ɖokpó ɔ gbɔn fí lɛ́ bǐ ǎ wútu ɔ, wɛnjlátɔ́ lɛ́ sixú zán nǔkanbyɔ́, wěmafɔ, abǐ nǔkanbyɔ́ hweɖévonu tɔn ɖěvo ɖo sinsɛnzɔ́ yětɔn mɛ, alǒ ɖɔ xó dó xóta ɖěvo e ná dɔn mɛ lɛ́ ɖo xá yětɔn mɛ lɛ́ é jí. Amɔ̌, ényí nǔjlájlá bǔnɔ ɖé hwenu wɛ ɔ, mɛ lɛ́ bǐ wɛ ɖó ná xwedó alixlɛ́mɛ e è ná d’é wú lɛ́ é. Nǔ e gbé nya wɛ mǐ ɖe é wɛ nyí ɖɔ mǐ ná w’azɔ̌ e Jezu zɔ́n mǐ é, é wɛ nyí ɖɔ mǐ ná jlá wɛn ɖagbe Axɔ́súɖuto ɔ tɔn.—Mt 24:14.

Ényí wɛnjlátɔ́ lɛ́ jló ná wa wěmaxɔmɛvízɔ́ ɖo kplé aklúnɔzángbla mɛ tɛ́ntin tɔn hwenu ɔ, yě ɖó ná zán xóɖɔɖókpɔ́ lɛ́ sín kpɔ́ndéwú sín xóta, éé ɖo Kplé Gbɛzán kpó sinsɛnzɔ́ kpó tɔn sín azɔ̌wéma mɛ é (xóta juillet kpó août kpó tɔn wɛ nyí: Linlin Mawu tɔn nú gbɛtɔ́ lɛ́). É ɖo mɔ̌ có, nú è ma sɔ́ lɛ́ wá ná alixlɛ́mɛ ɖěvo ǎ ɔ, hwenu e yě ná ɖo azɔ̌ énɛ́ wa wɛ é ɔ, yě vo bó sixú sɔ́ nǔkanbyɔ́, wěmafɔ, nǔkanbyɔ́ hweɖévonu tɔn, kpó nǔxwlémɛ kpó ɖěvo e ná w’azɔ̌ ganjí ɖo fí e agun yětɔn nɔ ɖɔ Mawuxó gbɔn lɛ́ é é. Hǔzúhúzú élɔ́ jlá alixlɛ́mɛ e è ná ɖo wěxwɛ 8gɔ́ kplé sín azɔ̌wéma juin 2020 tɔn jí é ɖó.