Nǔgbɛnúmɛ: Xlɛ̌ Wanyiyi Jehovah Tɔn Tɔn

Bo na dó kplɔ́n nǔ mɛ wu wɛ è nɔ gbɛ́ nǔ nú mɛ hwɛhwɛ, amɔ̌, è nɔ lɛ́ wà mɔ̌ dó ɖè mɛ ɖ’ali jí alǒ dɔn tó nú mɛ. Jehovah nɔ gbɛ́ nǔ nú mǐ bonu mǐ na sixu sɛn ɛ lee é ba gbɔn é. (Hlɔ 12:1; Eb 12:10, 11) Hweɖelɛnu ɔ, nǔgbɛnúmɛ sixu ɖó wuvɛ̌, amɔ̌, enyi mǐ wà nǔ sɔgbe xá ɔ, nǔjlɔjlɔwiwa kpo nyɔna gegě kpo mɛ wɛ é nɔ tɔ́n kɔ dó ɖò gudo mɛ nú mǐ. (Nǔx 10:7) Etɛ mɛ ɖěɖee nɔ gbɛ́ nǔ nú mɛ lɛ é kpo mɛ ɖěɖee è gbɛ́ nǔ na lɛ é kpo ka ɖó na nɔ flín?

Mɛ e gbɛ́ nǔ nú mɛ é. Mɛxo agun tɔn lɛ, mɛjitɔ́ lɛ, kpo mɛ ɖevo lɛ kpo nɔ dó gǎn tawun bo nɔ sɔ́ xomɛnyínyɔ́ kpo wanyiyi kpo dó gbɛ́ nǔ nú mɛ lee Jehovah nɔ bló gbɔn é. (Jel 46:28) Enyi é na bo tlɛ byɔ ɖɔ è na dɔn tó nú mɛ syɛnsyɛn ɔ, tódɔnnúmɛ ɔ ɖó na sɔgbe xá ninɔmɛ ɔ, bɔ è ɖó na lɛ́ wà mɔ̌ kpo wanyiyi kpo.—Ti 1:13.

Mɛ e è gbɛ́ nǔ na é. Nǔgbɛnúmɛ ɔ na bo cí ɖebǔ ɔ, mǐ ɖó na yí gbè na bo yawǔ wà nǔ sɔgbe xá. (Nǔx 3:11, 12) Ðó gbɛtɔ́ hwɛhutɔ́ lɛ wɛ mǐ nyí wutu ɔ, mǐ bǐ wɛ nɔ ɖó hudo nǔgbɛnúmɛ tɔn, bɔ é nɔ wá ɖò ali vovo nu. Nǔ e mǐ nɔ xà ɖò Biblu mɛ é kpo nǔ e mǐ nɔ sè ɖò kplé lɛ jí lɛ é kpo sixu gbɛ́ nǔ nú mǐ. Hweɖelɛnu ɔ, é sixu byɔ ɖɔ wěɖegbɛ́ hwɛɖiɖɔ tɔn ɖé wɛ na gbɛ́ nǔ nú mɛ. Enyi mǐ yí gbè nú nǔgbɛnúmɛ lɛ bo wà nǔ sɔgbe xá ye ɔ, gbɛ̀ mǐtɔn na nyɔ́ bɔ mǐ na nɔ gbɛ̀ kaka sɔyi.—Nǔx 10:17.

KPƆ́N VIDEO “MƐ E [JEHOVAH] YÍ WǍN NA Ɔ WƐ É NƆ KPLƆ́N” Ɔ, ENƐ GUDO HǓN, NǍ XÓSIN NÚ NǓKANBYƆ ELƆ LƐ:

• 

  Nɛ̌ gbɛzán Canon tɔn ka ɖè gbɔn ɖ’ayǐ? Nɛ̌ é ka wá ɖyɔ gbɔn?

• 

  Nɛ̌ Jehovah ka gbɛ́ nǔ n’i kpo wanyiyi kpo gbɔn?

• 

  Etɛ lɛ kpɔ́ndéwú tɔn ka kplɔ́n mǐ?