KLISÁNWUN GBƐ ZÍNZÁN
Jexóva nɔ d’alɔ mǐ ɖo wǔvɛ́ mǐtɔn lɛ́ mɛ
Wǔvɛ́ gěgé wɛ mǐ nɔ ɖí xwi xá ɖo azǎn gǔdo gúdo tɔn élɔ́ lɛ́ mɛ. Hweɖélɛ́nu ɔ, é sixú cí nú mǐ ɖɔ wǔvɛ́ mǐtɔn lɛ́ syɛ́n dín bɔ mǐ kún sixú dɛ ɖo yě nu ó. É ɖo mɔ̌ có, ényí mǐ kpo ɖo vǐvɛ́ kpó Jexóva kpó jɛ́n wɛ ɔ, é ná d’alɔ mǐ bɔ mǐ ná dɛ ɖo wǔvɛ́ lɛ́ nu, ényí yě ná bo syɛ́n gbɔn ɖěbǔ ɔ nɛ́. (Eza 43:2, 4) Ényí mǐ ɖo wǔvɛ́ lɛ́ ɖí xwi xá wɛ ɔ, nɛ̌ mǐ ka sixú vɛ́ kpó Jexóva kpó gbɔn?
Ðɛ. Ényí mǐ ɖɔ nǔ e ɖo ayi mǐtɔn mɛ lɛ́ é bǐ nú Jexóva ɔ, é ná ná mǐ fífá ayi mɛ tɔn, bɔ mǐ ná lɛ́ mɔ hlɔ̌nhlɔ́n ɖo lěe nǔ nɔ cí nú mɛ é linu, bá dó dɛ.—Flp 4:6, 7; 1Tɛ 5:17.
Kplé lɛ́. Jexóva sɔ́ nǔ nú nǔɖuɖu gbigbɔ tɔn kpó kpɔ́ninɔ xa nɔví gbigbɔ tɔn mǐtɔn lɛ́ ɖo kplé lɛ́ jí kpó nú mǐ. Mǐ ɖó hudó nǔ énɛ́ lɛ́ tɔn din tawun hú ɖ’ayǐ tɔn. (Eb 10:24, 25) Ényí mǐ nɔ sɔ́ nǔ nú kplé lɛ́ ganjí cóbó nɔ yi, bo nɔ lɛ́ ɖó alɔ ɖ’é mɛ ganjí ɔ, mǐ nɔ ɖu alɔ e gbigbɔ Jexóva tɔn nɔ dó mǐ é sín vǐví tawun.—Nǔ 2:29.
Sinsɛnzɔ́ ɔ. Ényí mǐ nɔ wa nǔ e wú mǐ kpé é bǐ bá dó sixú hɛn alɔnu mǐtɔn ján ɖo sinsɛnzɔ́ ɔ mɛ ɔ, é ná bɔ wǔ nú mǐ bɔ mǐ ná sɔ́ ayi ɖó nǔ ɖagbe lɛ́ jí. Xɔ́ntɔn e mǐ zun xá Jexóva kpó azɔ̌watɔ́gbɛ́ mǐtɔn lɛ́ kpó é ná lɛ́ vɛ́ d’é jí.—1Kɔ 3:5-10.
KPƆ́N VIDEO JEXÓVA NÁ KƐ ALƆ BO YÍ WE Ɔ, ÉNƐ́ GÚDO HǓN, NǍ XÓSIN NÚ NǓKANBYƆ́ ÉLƆ́ LƐ́:
Étɛ́ ka d’alɔ Malu bɔ é vɛ́ kpó Jexóva kpó ɖo wǔvɛ́ tɔn lɛ́ hwenu?
Malu ɖɔhun ɔ, nɛ̌ xó e ɖo Ðɛhan 34:19 mɛ lɛ́ é ka nɔ dó gbɔ nú mǐ ɖo wǔvɛ́ mǐtɔn lɛ́ mɛ gbɔn?
Nɛ̌ kpɔ́ndéwú Malu tɔn ka xlɛ́ ɖɔ Jexóva nɔ ná mǐ “hlɔ̌nhlɔ́n aditi” ɔ hwenu e mǐ ɖo wǔvɛ́ lɛ́ ɖí xwi xá wɛ é gbɔn?—2Kɔ 4:7