Mǐ ɖo mǐɖokpónɔ gbeɖé ǎ

1-2. (a) Étɛ́wú mǐ ka sixú ɖɔ ɖɔ mǐ kún nɔ ɖí xwi xá tagba lɛ́ mǐɖokpónɔ gbeɖé ó? (b) Étɛ́ jí mǐ ka ná ɖɔ xó dó ɖo xóta élɔ́ mɛ?

ÉNYÍ mǐ ɖo tagba syɛ́nsyɛ́n lɛ́ ɖí xwi xá wɛ ɔ, mǐ sixú mɔ ɖɔ é cí ɖɔ mǐ ɖo mǐɖokpónɔ ɖo tɔjíhún kpɛví e ɖo xu jí bɔ jɔhɔn ɖo ya dó ná wɛ é ɖé mɛ ɖɔhun. Amɔ̌, mǐ nɔ ɖí xwi xá tagba mǐtɔn lɛ́ mǐɖokpónɔ ǎ. Tɔ́ mǐtɔn jǐxwé tɔn wǎnyíyínɔ ɔ nɔ mɔ nǔ e ɖí xwi xá wɛ mǐ ɖe lɛ́ é kɛ́ɖɛ́ kpowun ǎ, loɔ, é lɛ́ dó akpá ɖɔ émí ná d’alɔ mǐ bɔ mǐ ná gbɔn yě mɛ dín. Jexóva ɖɔ gǎnjɛwúxó élɔ́ e sɔ́ akpakpa mɛ é nú mɛsɛntɔ́ tɔn gbejínɔtɔ́ lɛ́: “Un ná gɔ́ alɔ nú we.”—Eza. 41:10.

² Xóta élɔ́ ná ɖɔ xó dó lěe Jexóva nɔ d’alɔ mǐ gbɔn nǔ élɔ́ lɛ́ wiwa nú mǐ gblamɛ gbɔn é jí: (1) é nɔ xlɛ́ ali mǐ, (2) é nɔ sú nǔ e nɔ hudó mǐ lɛ́ é sín do nú mǐ, (3) é nɔ nya xɛ ɖo mǐ jí, (4) é nɔ dó gbɔ nú mǐ. Jexóva ná gǎnjɛwú mǐ ɖɔ nú mǐ ná bo tlɛ ɖo tagba ɖěbǔ ɖí xwi xá wɛ ɖo gbɛ mɛ ɔ, émí kún ná wɔn mǐ gbeɖé ó. É ná jó mǐ dó gbeɖé ǎ. Énɛ́ wú ɔ, mǐ ɖo mǐɖokpónɔ gbeɖé ǎ.

JEXÓVA NƆ XLƐ́ ALI MǏ

3-4. Nɛ̌ Jexóva ka nɔ xlɛ́ ali mǐ gbɔn? (Ðɛhan 48:15)

³ Xa Ðɛhan 48:15. Jexóva nɔ ɖó nukún ɖɔ mǐ ní xlɛ́ ali mǐɖée ǎ. Nɛ̌ é ka nɔ xlɛ́ ali mɛsɛntɔ́ tɔn gbejínɔtɔ́ lɛ́ ɖo égbé gbɔn? Ali e nu é nɔ wa mɔ̌ ɖe é ɖokpó wɛ nyí gbɔn Biblu gblamɛ. (Ðɛh. 119:105) Jexóva nɔ gbɔn Xó tɔn e é sɔ́ dó ayi mɛ nú mɛ lɛ́ bɔ yě wlán é gblamɛ bo nɔ d’alɔ mǐ bɔ mǐ nɔ wá gbeta ɖěɖěe ná zɔ́n bɔ mǐ ná ɖó awǎjijɛ hú gǎn din, bo lɛ́ nɔ gbɛ káká sɔ́yi ɖo sɔgúdo lɛ́ é kɔn. É nɔ lɛ́ d’alɔ mǐ bɔ mǐ nɔ ɖó jijɔ ɖěɖěe ná zɔ́n bɔ mǐ ná kpé nǔ mɔ̌hun lɛ́ wú lɛ́ é.a Ði kpɔ́ndéwú ɔ, é kplɔ́n mǐ ɖɔ mǐ ní jó mɛhɛndóxomɛ dó, nɔ ɖɔ nǔgbó ɖo nǔ bǐ mɛ, bo nɔ lɛ́ ɖó wǎnyíyí e gɔ́ngɔ́n é nú mɛ ɖěvo lɛ́ sín ayi mɛ. (Ðɛh. 37:8; Ebl. 13:18; 1 Pi. 1:22) Ényí mǐ nɔ ɖe xlɛ́ ɖɔ mǐ ɖó jijɔ Mawu tɔn mɔ̌hun lɛ́ ɔ, mǐ nɔ húzú mɛjitɔ́ ɖagbe lɛ́, asú alǒ asi ɖagbe lɛ́ kpó xɔ́ntɔn ɖagbe lɛ́ kpó.

⁴ Gɔ́ ná ɔ, Jexóva sɔ́ tan mɛ ɖěɖěe gbɔn ninɔmɛ mǐtɔn ɖɔhun mɛ, bɔ lěe nǔ nɔ cí nú mǐ é wɛ é nɔ cí nú yě lɔ lɛ́ é tɔn dó Xó tɔn mɛ. (1 Kɔ. 10:13; Ja. 5:17) Ényí mǐ xa tan mɛ énɛ́ lɛ́ tɔn lɛ́ bo zán nǔ e yě kplɔ́n mǐ lɛ́ é ɔ, é hwe bǐ ɔ, mǐ nɔ ɖu le tɔn ɖo ali we nu. Nukɔntɔn, mǐ nɔ wá ɖó ayi wú ɖɔ mǐ kún ɖo mǐɖokpónɔ ó, énɛ́ wɛ nyí ɖɔ mɛ ɖěvo lɛ́ lɔ ɖí xwi xá ninɔmɛ mǐtɔn ɖɔhun lɛ́ bo dɛ ɖo yě nu b’ɛ kpa yě. (1 Pi. 5:9) Wegɔ́, mǐ nɔ kplɔ́n lěe mǐ ná ɖí xwi xá tagba mǐtɔn lɛ́ gbɔn é.—Hlɔ̌. 15:4.

5. Mɛ̌ mɛ̌ e Jexóva ka nɔ zán dó xlɛ́ ali mǐ ɖo gbɛli ɔ jí?

⁵ Jexóva lɛ́ bló tito bɔ nǔɖitɔ́ hǎtɔ́ mǐtɔn lɛ́ ná nɔ xlɛ́ ali mǐ.b Ði kpɔ́ndéwú ɔ, nukúnkpénǔwútɔ́ lɛ̌dó tɔn lɛ́ nɔ ba agun lɛ́ kpɔ́n hwɛhwɛ bo ná dó dó wǔsyɛ́n lanmɛ nú mǐ. Xóɖiɖɔ yětɔn lɛ́ nɔ ná hlɔ̌nhlɔ́n nǔɖiɖi mǐtɔn bo nɔ d’alɔ mǐ bɔ mǐ nɔ kpo ɖo xɛ nya ɖo bǔninɔ xɔ akwɛ́ mǐtɔn jí wɛ. (Mɛ. 15:40–16:5) Ganjíninɔ wɛnjlátɔ́ lɛ́ ɖokpó ɖokpó tɔn nɔ ɖu ayi mɛ nú mɛxó agun tɔn lɛ́ lɔmɔ̌ tawun. (1 Pi. 5:2, 3) Mɛjitɔ́ lɛ́ nɔ xlɛ́ ali vǐ yětɔn lɛ́ ɖo gbigbɔ lixo, bo nɔ d’alɔ yě bɔ yě nɔ wá gbeta e nǔnywɛ́ kpé lɛ́ é kɔn lobo nɔ lɛ́ ɖó zǐnzán ɖagbe. (Nǔx. 22:6) Klisánwun nyɔ̌nu e zin lɛ́ é nɔ d’alɔ nɔví nyɔ̌nu wínnyáwínnyá lɛ́ gbɔn kpɔ́ndéwú ɖagbe sísɔ́ ɖ’ayǐ nú yě, wě tawun tawun lɛ́ ɖiɖe xá yě, gɔ́ nú wǔsyɛ́n dídó lanmɛ nú yě kpó akpakpa sɔ́ mɛ kpó gblamɛ.—Ti. 2:3-5.

6. Étɛ́ mǐ ka ɖó ná wa bá ɖu ali e Jexóva nɔ xlɛ́ mɛ é sín le?

⁶ Jexóva ko wa éé nyí étɔn é gbɔn ali e sín hudó mǐ ɖó é xíxlɛ́ mǐ gblamɛ. Nɛ̌ mǐ ka sixú ɖe xlɛ́ ɖɔ nǔ e é wa nú mǐ é su nukún mǐtɔn mɛ gbɔn? Nǔnywɛ́xó 3:5, 6 ɖɔ: ‘Ðeji dó Jexóva wú kpó ayixa towe bǐ kpó. Ma gán jɛ nǔnywɛ́ hwiɖésúnɔ tɔn wú ó.’ Ényí mǐ wa mɔ̌ ɔ, “é ná xlɛ́ ali [mǐ],” énɛ́ wɛ nyí ɖɔ é ná d’alɔ mǐ bɔ mǐ ná nyi alɔ nú tagba gěgé, bo ná ɖu gbɛzán awǎjijɛnɔ ɖé sín vǐví. É su nukún mǐtɔn mɛ tawun ɖɔ Jexóva nɔ ɖe wě xá mǐ kpó wǎnyíyí kpó, b’ɛ nɔ lɛ́ sɔgbe xá hudó mǐtɔn lɛ́.—Ðɛh. 32:8.

JEXÓVA NƆ SÚ NǓ E HU DÓ MǏ LƐ́ É SÍN DO NÚ MǏ

7. Ali tɛ́ lɛ́ nu mɔ̌ Jexóva ka nɔ sú nǔ e hudó mǐ lɛ́ é sín do nú mǐ ɖe? (Filípunu lɛ́ 4:19)

⁷ Xa Filípunu lɛ́ 4:19. Gbɔn vo nú ali e Jexóva nɔ xlɛ́ mǐ ɖo gbigbɔ lixo é ɔ, é nɔ lɛ́ kɔn nyɔ̌ná dó gǎn e dó wɛ mǐ ɖe bo ná mɔ nǔɖuɖu, nǔzínzán kpó xwé kpó e sín hudó mǐ ɖó é jí. (Mat. 6:33; 2 Tɛ. 3:12) É sɔgbe ɖɔ hudó agbaza tɔn mǐtɔn lɛ́ ní ɖó linkpɔ́n nú mǐ, amɔ̌, Jexóva dó wǔsyɛ́n lanmɛ nú mǐ ɖɔ ado ní ma hu mǐ zɛ xwé wú dó nǔ mɔ̌hun lɛ́ wú ó. (Matíe 6:25.) Étɛ́wú? Ðó Tɔ́ mǐtɔn ná jó mɛsɛntɔ́ tɔn gbejínɔtɔ́ lɛ́ dó ɖo hwenu e yě ɖo hudó mɛ é gbeɖé ǎ. (Mat. 6:8; Ebl. 13:5) Mǐ sixú ɖeji dó ɖɔ e é ɖɔ ɖɔ émí ná sú nǔ e hudó mǐ lɛ́ é sín do nú mǐ é wú.

8. Étɛ́ Jexóva ka wa nú Davídi?

⁸ Lin tamɛ dó lěe Jexóva dó alɔ Davídi gbɔn é jí. Ðo xwe ɖěɖěe mɛ Davídi ɖo wǔvɛ́ mɛ bo hɔn gbɔn gbějágbějá lɛ́ é mɛ ɔ, Jexóva sú nǔ e sín hudó é kpó mɛ tɔn lɛ́ kpó ɖó bá nɔ gbɛ é sín do nú yě. Ée Davídi lin tamɛ dó nukún e Jexóva kpé dó wǔ tɔn ɖo xwe lɛ́ vlamɛ é jí é ɔ, é wlán ɖɔ: “Un ko nɔ dɔ̌nkpɛ mɛ kpɔ́n cóbó wá kpo din; un ka mɔ Mawu jó hwɛjijɔnɔ lɛ́ dó kpɔ́n ǎ, un ka mɔ vǐ yětɔn lɛ́ ɖě byɔ́ nǔ ɖu kpɔ́n ǎ.” (Ðɛh. 37:25) Bóyá ɖo gbɛzán towe mɛ ɔ, hwi lɔ ko mɔ lěe Jexóva kpé nukún dó mɛsɛntɔ́ tɔn e sɔ́ yěɖée jó n’i lɛ́ é wú kpó wǎnyíyí kpó gbɔn é.

9. Alɔ tɛ́ lɛ́ Jexóva ka nɔ dó togun tɔn ɖo égbé hwenu e adla j’ayǐ é? (Kpɔ́n ɖiɖe lɛ́ lɔmɔ̌.)

⁹ Jexóva nɔ lɛ́ sú nǔ e hudó togun tɔn é sín do n’i hwenu e adla j’ayǐ é. Ði kpɔ́ndéwú ɔ, hwenu e adɔ ɖé tɔ́n ɖo xwe kanweko nukɔntɔn ɔ mɛ é ɔ, klisánwun e ɖo fí tɛnmɛ tɛnmɛ lɛ́ é sɛ́ nǔníná lɛ́ dó nɔví súnnu kpó nɔví nyɔ̌nu kpó yětɔn e ɖo hudó mɛ lɛ́ é. (Mɛ. 11:27-30; Hlɔ̌. 15:25, 26) Jijɔ alɔhundónánǔmɛ tɔn ɖokpó ɔ wɛ togun Mawu tɔn lɔ nɔ ɖe xlɛ́ ɖo égbé. Ényí adla j’ayǐ ɔ, Jexóva nɔ sísɛ́ togun tɔn kpó wǎnyíyí kpó b’ɛ nɔ sú dandannú lěhun lɛ́ sín do nú mɛ e ɖo xá ɖěɖěe mɛ adla ɔ j’ayǐ ɖe lɛ́ é: Nǔɖuɖu, sin, nǔzínzán kpó atínkɛ́n kpó. Gbɛ̌ta xɔgbígbá tɔn lɛ́ nɔ vɔ́ xwé ɖěɖěe xo akpa lɛ́ é kpó kpléxɔ Axɔ́súɖuto ɔ tɔn ɖěɖěe xo akpa lɛ́ é kpó jlá ɖó. Gɔ́ ná ɔ, mɛsɛntɔ́ Jexóva tɔn lɛ́ nɔ yá wǔ nɔ gǔdo nú mɛ ɖěɖěe awě xo lɛ́ é ɖo lěe nǔ nɔ cí nú mɛ é kpó gbigbɔ kpó lixo.c

10-11. Étɛ́ nǔ e jɛ dó Borys jí é ka kplɔ́n we?

¹⁰ Jexóva nɔ lɛ́ hun alɔ bo nɔ sú nǔ e hudó mɛ ɖěɖěe ma ko ɖo sinsɛn ɛ wɛ ǎ lɛ́ é sín do nú yě. Ðo ali ɖokpó ɔ nu ɔ, mǐ nɔ ba ali ɖěɖěe nu mǐ ná nyɔ́ xomɛ dó mɛ ɖěɖěe kpó mǐ kpó ma ɖi nǔ nú nǔ ɖokpó ɔ ǎ lɛ́ é wú ɖe é. (Ga. 6:10) Hwɛhwɛ ɔ, kúnnuɖiɖe ɖagbe ɖé sín ali wɛ é nɔ hun. Ð’ayi kpɔ́ndéwú Borys, éé nyí gǎn ɖo wěmaxɔmɛ ɖé bo nɔ nɔ Ukraine é tɔn wú. Borys nyí Kúnnuɖetɔ́ Jexóva tɔn ǎ có, hwebǐnu wɛ é nɔ wa nǔ xá azɔ̌mɛví tɔn e nyí Kúnnuɖetɔ́ lɛ́ é kpó xomɛnyínyɔ́ kpó, bo nɔ lɛ́ ɖó sísí nú nǔ e yě ɖi nǔ ná lɛ́ é. Hwenu e Borys wá gbeta ɔ kɔn bá hɔn sín xá e mɛ é ɖe bɔ ahwan ɖo nǔ gba ɖe wɛ é, bá yi jɛ xá e mɛ ayijayǐ ɖe hú gǎn ɖo to ɔ mɛ é ɖé mɛ é ɔ, nɔví mǐtɔn lɛ́ d’alɔ ɛ. Nukɔnmɛ ɔ, Borys wá kú Klísu tɔn flínflín domɛ. Borys lin tamɛ dó nǔ e jɛ dó jǐ tɔn é jí bo ɖɔ: “Nǔ ce ɖu ayi mɛ nú Kúnnuɖetɔ́ lɛ́ tawun, bɔ yě kpé nukún wǔtu ce. É ná cɛ nú Kúnnuɖetɔ́ Jexóva tɔn lɛ́ tawun.”

¹¹ Mǐ lɔ sixú xwedó kpɔ́ndéwú Tɔ́ mǐtɔn jǐxwé tɔn nǔbláwǔkúnúmɛtɔ́ ɔ tɔn bo nɔ ɖe wǎnyíyí xlɛ́ mɛ e ɖo hudó mɛ lɛ́ é, ényí mǐ kpó yě kpó ná bo ɖi nǔ nú nǔ ɖokpó ɔ alǒ gbɔ ɔ nɛ́. (Luk. 6:31, 36) Mǐ nɔ ɖó nukún ɖɔ gǎn e mǐ nɔ dó bo nɔ ɖe wǎnyíyí xlɛ́ mɛ lɛ́ é ná sísɛ́ yě bɔ yě ná wá húzú ahwanvú Klísu tɔn. (1 Pi. 2:12) Amɔ̌, ényí mɛ lɛ́ ná bo wa nǔ gbɔn ɖěbǔ ɔ, nǔ e nɔ dó awǎjijɛ nú mǐ hú gǎn é wɛ nyí awǎjijɛ e è nɔ mɔ ɖo nǔnámɛ mɛ é.—Mɛ. 20:35.

JEXÓVA NƆ NYA XƐ ÐO MǏ JÍ

12. Alɔcyɔ́nmɛjí tɛ́ sín akpá Jexóva ka dó nú togun tɔn blěbú? (Ðɛhan 91:1, 2, 14)

¹² Xa Ðɛhan 91:1, 2, 14. Égbé ɔ, Jexóva d’akpá ɖɔ émí ná nya xɛ ɖo mǐ jí ɖo gbigbɔ lixo. É ná lɔn gbeɖé bónú Satáan ná hɛn mawusinsɛn mímɛ́ ɔ blí ǎ. (Jaan 17:15) Gɔ́ ná ɔ, hwenu e “wǔvɛ́ ɖaxó ɔ” ná bɛ́ é ɔ, mǐ sixú ɖeji bǐ mlɛ́mlɛ́ ɖɔ Jexóva ná ɖe akpá e é dó ɖɔ émí ná nya xɛ ɖo mǐ jí ɖo gbigbɔ kpó agbaza kpó lixo é.—Nǔɖe. 7:9, 14.

13. Ali tɛ́ lɛ́ nu Jexóva ka nɔ nya xɛ ɖo mǐ mɛ ɖokpó ɖokpó jí ɖe?

¹³ Nɛ̌ Jexóva ka nɔ nya xɛ ɖo mǐ mɛ ɖokpó ɖokpó jí gbɔn? Jexóva nɔ gbɔn Biblu gblamɛ bo nɔ d’alɔ mǐ bɔ mǐ nɔ tuun nǔ ɖagbe ɖó vo nú nǔ nyanya. (Ebl. 5:14) Ényí mǐ nɔ zán gbɛ sɔgbe xá nǔgbódodó e ɖo Xó Mawu tɔn mɛ lɛ́ é ɔ, mǐ nɔ nya xɛ ɖo mǐɖée jí sín nǔ e sixú wa nǔ dó mǐ wú ɖo gbigbɔ kpó agbaza kpó kpáxwé lɛ́ é sí. (Ðɛh. 91:4) Gɔ́ ná ɔ, Jexóva nɔ nya xɛ ɖo mǐ jí gbɔn agun ɔ gblamɛ. (Eza. 32:1, 2) Ényí mǐ ɖo mɛ ɖěɖěe yí wǎn nú Jexóva bo nɔ zán gbɛ sɔgbe xá nǔgbódodó tɔn lɛ́ é tɛ́ntin ɔ, é nɔ dó wǔsyɛ́n lanmɛ nú mǐ bo nɔ d’alɔ mǐ bɔ mǐ nɔ nyi alɔ nú nǔnyanyawiwa.—Nǔx. 13:20.

14. (a) Étɛ́wú Mawu ma ka nɔ cyɔ́n alɔ mǐ jí sín tagba lɛ́ bǐ sí ǎ? (b) Gǎnjɛwú tɛ́ Ðɛhan 9:11 ka ná mǐ? (Kpɔ́n tínmɛ e ɖo do é lɔmɔ̌.)

¹⁴ Ðo hwexónu ɔ, Jexóva nya xɛ ɖo mɛsɛntɔ́ tɔn lɛ́ jí sín nǔ e sixú wa nǔ dó yě wú ɖo agbaza lixo lɛ́ é sí ɖo hweɖélɛ́nu. Amɔ̌, é wa mɔ̌ ɖo ninɔmɛ lɛ́ bǐ mɛ ǎ. Hweɖélɛ́nu ɔ, mǐ nɔ se xɔxɔ “nǔmaɖónukún lɛ́” tɔn. (Nǔt. 9:11, nwt) Gɔ́ ná ɔ, sín hwexónu ɔ, Jexóva tin bɔ mɛsɛntɔ́ tɔn lɛ́ ɖí xwi xá yadónúmɛ, bo tlɛ lɛ́ kú dó ɖe xlɛ́ ɖɔ Satáan nyí adingbannɔ. (Jɔb. 2:4-6; Mat. 23:34) Nǔ ɖokpó ɔ nɔ lɛ́ jɛ ɖo égbé. Nǔgbó wɛ ɖɔ Jexóva sixú nɔ ma ɖe tagba mǐtɔn lɛ́ síin, amɔ̌, mǐ sixú kú d’é jí ɖɔ é kún ná jó mɛ e yí wǎn n’i lɛ́ é dó gbeɖé ó.d—Ðɛh. 9:11.

JEXÓVA NƆ DÓ GBƆ NÚ MǏ

15. Nɛ̌ ɖɛ, Xó Mawu tɔn kpó klisánwun hǎtɔ́ mǐtɔn lɛ́ kpó ka nɔ dó gbɔ nú mǐ gbɔn? (2 Kɔlɛ́ntinu lɛ́ 1:3, 4)

¹⁵ Xa 2 Kɔlɛ́ntinu lɛ́ 1:3, 4. Hweɖélɛ́nu ɔ, mǐ nɔ nɔ aluwɛ mɛ, ado nɔ hu mǐ alǒ mǐ nɔ ɖó linkpɔ́n. Bóyá a ɖo ninɔmɛ e nɔ ɖó linkpɔ́n nú mɛ é ɖé mɛ gbɔn wɛ din, b’ɛ zɔ́n bɔ a mɔ ɖɔ émí zun émíɖokpó. Mɛɖé ka ɖe bo nɔ mɔ nǔ jɛ lěe nǔ cí nú we é mɛ a? Jexóva nɔ mɔ nukúnnú jɛ lěe nǔ cí nú we é mɛ. É nɔ se wǔvɛ́ e se wɛ mǐ ɖe é xá mǐ kpowun ǎ, loɔ, é nɔ lɛ́ “dó gbɔ nú mǐ ɖo mɛtɛ́nkpɔ́n mǐtɔn lɛ́ bǐ mɛ.” Gbɔn nɛ̌ é? Ényí mǐ xo ɖɛ sɛ́dó Jexóva bo sa vo n’i ɔ, é nɔ ná mǐ “fífá Mawu tɔn e zɛ nukúnnúmɔjɛnǔmɛ bǐ wú é.” (Filí. 4:6, 7) Ényí mǐ xa xó Jexóva tɔn e ɖo Biblu mɛ b’ɛ sɔ́ nǔ tɔn nú mǐ lɛ́ é ɔ, mǐ nɔ lɛ́ mɔ gbɔdónúmɛ. Xógbe wǎnyíyí, nǔnywɛ́ kpó nukúnɖíɖó kpó tɔn e Mawu sɔ́ dó ayi mɛ nú mɛ lɛ́ bɔ yě wlán b’ɛ ɖo dɔkun énɛ́ mɛ lɛ́ é sixú xo hwihwɛ́ ayi mǐtɔn. Gɔ́ ná ɔ, kplé klisánwun tɔn mǐtɔn lɛ́ nɔ dó gbɔ nú mǐ, ɖó mǐ nɔ zán hwenu ɖó kpɔ́ xá nǔɖitɔ́ hǎtɔ́ mǐtɔn lɛ́ bo nɔ lɛ́ ɖu le wǔsyɛ́n dó lanmɛ nú mɛ sín xó e jínjɔ́n Biblu jí lɛ́ é tɔn.

16. Étɛ́ nǔ e jɛ dó Nathan kpó Priscilla kpó jí é ka kplɔ́n we?

¹⁶ Bo ná dó jlɛ́ lěe Jexóva nɔ dó gbɔ nú mǐ, bo nɔ lɛ́ dó wǔsyɛ́n lanmɛ nú mǐ gbɔn Xó tɔn gblamɛ gbɔn é dó nǔɖé wú ɔ, lin tamɛ dó kpɔ́ndéwú Nathan kpó Priscilla kpó, éé nɔ nɔ États-Unis é tɔn jí. Xwe ɖé lɛ́ ɖíe ɔ, yě wá gbeta ɔ kɔn bo sɛ tɛn yi fí e è ɖó hudó wɛnjlátɔ́ Axɔ́súɖuto ɔ tɔn lɛ́ tɔn ɖe hú gǎn é ɖé. Nathan ɖɔ: “Mǐ ɖeji ɖɔ Jexóva ná kɔn nyɔ̌ná dó gǎndídó mǐtɔn lɛ́ jí.” É ɖo mɔ̌ có, ée yě bɛ́ azɔ̌ yětɔn yɔ̌yɔ́ ɔ é ɔ, lanmɛzɔn maɖónukún lɛ́ kpó akwɛ́yózo kpó wá xwetɔ́n. Wǎgbɔ tɔn ɔ, asú kpó asi kpó ɔ lɛ́ kɔ wá yi xwé, bo kpo ɖo xwi ɖí xá akwɛ́yózo wɛ. Nathan flín nǔ élɔ́: “Un kanbyɔ́ nyiɖée ɖɔ aniwú Mawu ma ka kɔn nyɔ̌ná dó mǐ jí lěe mǐ lin ɖɔ é ná bló gbɔn é ǎ é jí. Un tlɛ jɛ kinkanbyɔ́ nyiɖée jí ɖɔ nǔ nyanya ɖé wɛ un ka wa a jí.” Amɔ̌, ɖo nukɔnmɛ ɔ, Nathan kpó Priscilla kpó wá ɖ’ayi wú ɖɔ Mawu kún jó émí dó hwenu e émí ɖo hudó mɛ é ó. Nathan ɖɔ: “Ðo hwenu vɛ́ wǔ énɛ́ lɛ́ mɛ ɔ, Biblu cí xɔ́ntɔn nǔnywɛ́tɔ́ ɖé ɖɔhun bo nɔ dó wǔsyɛ́n lanmɛ nú mǐ bo nɔ lɛ́ xlɛ́ ali mǐ. Ayi e mǐ sɔ́ ɖó lěe Jexóva d’alɔ mǐ bɔ mǐ dɛ ɖo wǔvɛ́ énɛ́ nu gbɔn é jí, b’ɛ ma nyí ɖó wǔvɛ́ ɔ jí ǎ é sɔ́ nǔ nú mǐ nú mɛtɛ́nkpɔ́n nǔɖiɖi tɔn e ná wá wá ɖo nukɔnmɛ lɛ́ é.”

17. Nɛ̌ è ka dó gbɔ nú nɔví nyɔ̌nu e nɔ nyí Helga é gbɔn? (Kpɔ́n ɖiɖe ɔ lɔmɔ̌.)

¹⁷ Nɔví súnnu kpó nɔví nyɔ̌nu kpó mǐtɔn lɛ́ sixú dó gbɔ nú mǐ ɖo ali ɖěvo nu. Gbɔn nɛ̌ é? Lin tamɛ dó kpɔ́ndéwú Helga, éé nɔ nɔ Hongrie é tɔn jí. Nú xwe mɔ̌kpán ɔ, é ɖí xwi xá mɛtɛ́nkpɔ́n alɔkpa gěgé b’ɛ zɔ́n bɔ é ɖó linkpɔ́n, bo lɛ́ mɔ ɖɔ émí kún hwɛ́n nǔɖé ó. Amɔ̌, ée é kpɔ́n gǔdo sɛ́dó é ɔ, é mɔ lěe Jexóva dó gbɔ n’i gbɔn agun ɔ gblamɛ gbɔn é. É wlán ɖɔ: “Hwebǐnu wɛ Jexóva d’alɔ mì hwenu e un mɔ ɖɔ hlɔ̌nhlɔ́n ce hwe tawun ɖó agbazazɔ́, nukúnkpíkpé dó vǐ ce azinzɔnnɔ ɔ kpó tagba ɖěvo lɛ́ kpó wú é. Ayǐ ɖě hɔ́n nú é gɔn akpá e é dó ɖɔ émí ná dó gbɔ nú mì é ɖe ɖo xwe 30 e wá yi lɛ́ é mɛ ǎ. É nɔ ná hlɔ̌nhlɔ́n mì gbɔn xósin e mɛ ɖěvo lɛ́ nɔ ná kpó xomɛnyínyɔ́ kpó, nɔ lin tamɛ ganjí cóbó nɔ ná, b’ɛ nɔ lɛ́ ɖe nǔsumɛnukúnmɛ xlɛ́ lɛ́ é gblamɛ hwɛhwɛ. Hwɛhwɛ wɛ mɛ lɛ́ nɔ wlán nǔ sɛ́dó mì, nɔ sɛ́ káti ɖé dó mì alǒ nɔ kpa mì ɖo hwenu e un ɖó hudó tɔn dó hú gǎn é.”

18. Nɛ̌ mǐ ka sixú nɔ dó gbɔ nú mɛ ɖěvo lɛ́ gbɔn?

¹⁸ Wǔjɔmɛ wɛ é nyí ɖɔ mǐ ní nɔ xwedó kpɔ́ndéwú Mawu mǐtɔn tɔn bo nɔ dó gbɔ nú mɛ ɖěvo lɛ́. Nɛ̌ mǐ ka sixú wa énɛ́ gbɔn? Mǐ sixú nɔ ɖótó yě kpó sɔxwixwe kpó, nɔ ɖɔ xó dó dó gbɔ nú yě, bo nɔ lɛ́ d’alɔ yě ɖo ali tawun tawun lɛ́ nu. (Nǔx. 3:27) Mǐ nɔ tɛ́n kpɔ́n bo nɔ dó gbɔ nú mɛ e ɖo wǔvɛ́ mɛ lɛ́ é bǐ, káká jɛ mɛ ɖěɖěe ma ko ɖo Mawu sɛn wɛ ǎ lɛ́ é jí. Ényí nɔzo mǐtɔn lɛ́ ɖo aluwɛ mɛ, ɖo azɔn jɛ wɛ, alǒ ɖó linkpɔ́n ɔ, mǐ nɔ yi ba yě kpɔ́n, ɖótó yě, bo nɔ má wěmafɔ Biblu tɔn e dó wǔsyɛ́n lanmɛ nú mɛ lɛ́ é xá yě. Ényí mǐ nɔ xwedó kpɔ́ndéwú Jexóva e nyí “Mawu e nɔ dó gbɔ nú mɛ ɖo ali bǐ nu é” tɔn ɔ, nǔɖitɔ́ hǎtɔ́ mǐtɔn lɛ́ kɛ́ɖɛ́ wɛ mǐ ná d’alɔ bónú yě ná dɛ ɖo tagba yětɔn lɛ́ nu ǎ, loɔ, mǐ sixú lɛ́ d’alɔ nǔmaɖitɔ́ lɛ́ bɔ yě ná ba ná kplɔ́n nǔ dó Mawu wú.—Mat. 5:16.

JEXÓVA ÐO FÍNƐ́ NÚ MǏ HWEBǏNU

19. Étɛ́ Jexóva ka nɔ wa nú mǐ? Nɛ̌ mǐ ka sixú xwedó kpɔ́ndéwú tɔn gbɔn?

¹⁹ Mɛ e yí wǎn nú Jexóva lɛ́ é bǐ sín nǔ wɛ nɔ ɖu ayi mɛ n’i ɖésú. É nɔ jó mǐ dó hwenu e mǐ ɖo xwi ɖí xá tagba ɖé wɛ é ǎ. Lěe mɛjitɔ́ ɖé nɔ kpé nukún dó vǐ tɔn wú kpó wǎnyíyí kpó gbɔn é ɔ, Jexóva nɔ kpé nukún dó mɛsɛntɔ́ tɔn gbejínɔtɔ́ lɛ́ wú. É nɔ xlɛ́ ali mǐ, nɔ sú nǔ e hudó mǐ lɛ́ é sín do nú mǐ, nɔ nya xɛ ɖo mǐ jí, bo nɔ lɛ́ dó gbɔ nú mǐ. Ényí mǐ nɔ nɔ gǔdo nú mɛ ɖěvo lɛ́ hwenu e yě ɖo tagba lɛ́ ɖí xwi xá wɛ é bo nɔ lɛ́ dó wǔsyɛ́n lanmɛ nú yě hǔn, kpɔ́ndéwú Tɔ́ mǐtɔn jǐxwé tɔn wǎnyíyínɔ ɔ tɔn xwedó wɛ mǐ ɖe mɔ̌ nɛ́. Ðo gbɛ élɔ́ mɛ ɔ, mǐ sixú mɔ tagba lɛ́ bo lɛ́ nɔ aluwɛ mɛ, amɔ̌, mǐ sixú kú d’é jí ɖɔ Jexóva ɖo kpɔ́ xá mǐ. È ná ɖɔ ɔ, é dó akpá élɔ́ nú mǐ: “Ma ɖi xɛsi ó, ɖó un ɖo kpɔ́ xá we.” (Eza. 41:10) Énɛ́ ná jiɖe mɛ kpɔ́n! Nǔgbó ɔ, mǐ ɖo mǐɖokpónɔ gbeɖé ǎ.