“Mi sɛkpɔ́ Mawu; enɛ ɔ é na sɛkpɔ́ mi.”—Jaki 4:8
Mawu ka Nɔ Ðótó Ðɛ Mǐtɔn lɛ À?
A ka ko kanbyɔ hwiɖée ɖɔ Mawu ka nɔ ɖótó we hwenu e a ɖò ɖɛ xò wɛ é à jí kpɔ́n à? Enyi mɔ̌ hǔn, a ɖò hwiɖokpo ǎ. Mɛ gegě nɔ xoɖɛ sɛ́dó Mawu dó wuvɛ̌ ɖé lɛ takúnmɛ, amɔ̌, wuvɛ̌ yetɔn lɛ ka nɔ sɛ̀ dò ǎ. Enɛ ka nɔ xlɛ́ ɖɔ Mawu nɔ wɔn ya nú ɖɛ mǐtɔn lɛ wɛ à? Eǒ! Biblu na jiɖe mǐ ɖɔ enyi mǐ xoɖɛ sɛ́dó Mawu ganji lee è ɖó na xoɖɛ gbɔn é ɔ, é nɔ ɖótó mǐ. Mǐ ni gbéjé nǔ e Biblu ɖɔ é kpɔ́n.
MAWU NƆ ÐÓTÓ MǏ.
“Hwi wɛ nɔ sè ɖɛ, enɛ wu ɔ, gbɛtɔ́ lɛ bǐ na wá gɔ̌n towe.”—Ðɛhan 65:3.
Mɛɖé lɛ nɔ xoɖɛ ɖó ye ɖɔ ɖɔ é nɔ zɔ́n bɔ emi nɔ mɔ emiɖée mɛ, enyi ye ma tlɛ ɖi ɖɔ mɛɖé ɖè bo nɔ ɖótó ye nǔgbo nǔgbo ǎ ɔ nɛ. Amɔ̌, mǐ nɔ xoɖɛ ɖó mǐ nɔ mɔ ɖɔ é nɔ zɔ́n bɔ mǐ nɔ mɔ mǐɖée mɛ kpowun wu ǎ, é nyɔ́ wà ɔ, é nɔ zɔ́n bɔ mǐ nɔ ɖí xwi xá wuvɛ̌ mǐtɔn lɛ. Biblu na jiɖe mǐ ɖɔ: ‘Jehovaha ɖò kpɔ́ xá mɛ e nɔ súxó ylɔ́ ɛ lɛ bǐ; ye mɛ e nɔ ylɔ́ ɛ kpo ayi yetɔn bǐ kpo lɛ. Ye súxó ɔ, é nɔ sè, bo nɔ hwlɛn ye gán.’—Ðɛhan 145:18, 19.
Nǔgbo ɔ, mǐ sixu kánɖeji ɖɔ Jehovah Mawu nɔ sè ɖɛ mɛsɛntɔ́ tɔn lɛ tɔn. Kpo wanyiyi kpo ɔ, é ɖɔ: “Mi na súxó ylɔ́ mì, bo na xwedó mì, lobo na savo nú mì, bɔ un na ɖótó mi.”—Jelemíi 29:12.
MAWU BA ÐƆ A NI NƆ XOÐƐ SƐ́DÓ EMI.
“Mi nɔ ɖókan dó ɖɛxixo wu.”—Hlɔmanu lɛ 12:12.
Ðò Biblu mɛ ɔ, è dó wusyɛn lanmɛ nú mǐ ɖɔ mǐ ni nɔ ɖókan dó ɖɛxixo wu, lobo nɔ xoɖɛ ɖò ninɔmɛ bǐ mɛ. É ɖò wɛn ɖɔ, Jehovah Mawu ba ɖɔ mǐ ni nɔ xoɖɛ sɛ́dó emi.—Matie 26:41; Efɛzinu lɛ 6:18.
Etɛwu Mawu ka ba ɖɔ mǐ ni nɔ xoɖɛ sɛ́dó emi? Kpɔ́ndéwú ɖé ɖíe: Vǐtɔ́ tɛ ma ka na ba ɖɔ vǐ tɔn n’i kan nǔ elɔ byɔ ɛ ǎ: “Papa, mi ka na sixu d’alɔ mì à?” É ɖò wɛn ɖɔ, vǐtɔ́ ɖé sixu ko tuùn nǔ e nɔ hudo vǐ tɔn lɛ é kpo lee nǔ nɔ cí nú vǐ tɔn lɛ é kpo, amɔ̌, enyi é sè bɔ vǐ tɔn byɔ alɔdó tɔn ɔ, enɛ na xlɛ́ ɛ ɖɔ vǐ ɔ ɖeji dó wǔ tɔn, bo lɛ́ vɛ́ kpo é kpo. Mɔ̌ ɖokpo ɔ, enyi mǐ nɔ xoɖɛ sɛ́dó Mawu ɔ, mǐ nɔ xlɛ́ ɛ ɖɔ mǐ ɖeji dó wǔ tɔn, bo lɛ́ ba na vɛ́ kpo é kpo.—Nǔnywɛxó 15:8; Jaki 4:8.
MAWU NƆ KPÉ NUKÚN WǓ WE DÓO.
“Mi zlɔ́n nǔ e ɖò linkpɔ́n nyí nú mi wɛ lɛ bǐ sín agban ɖó jǐ tɔn, ɖó é ɖò nukún kpé dó mi wu wɛ.”—1 Piyɛ́ɛ 5:7.
Mawu nɔ ba ɖɔ mǐ ni nɔ xoɖɛ sɛ́dó emi, ɖó é yí wǎn nú mǐ, bo nɔ lɛ́ kpé nukún dó mǐ wu. É tuùn nǔ e ɖí xwi xá wɛ mǐ ɖè lɛ é kpo nǔ e nɔ ɖó adohu adohu nú mǐ lɛ é kpo bǐ, bo nɔ ba na d’alɔ mǐ.
Ðò gbɛzán Axɔ́su Davidi tɔn bǐ mɛ ɔ, é nɔ xoɖɛ sɛ́dó Jehovah Mawu, bo nɔ ba alɔdó tɔn, lobo nɔ lɛ́ ɖɔ nǔ e ɖò linkpɔ́n nyí n’i wɛ lɛ é kpo lee nǔ nɔ cí n’i lɛ é kpo nú Jehovah. (Ðɛhan 23:1-6) Nɛ̌ nǔ ka cí nú Mawu dó Davidi wu? Mawu yí wǎn nú Davidi, bo nɔ lɛ́ ɖótó ɖɛ tootobu e é nɔ xò sɛ́dó è lɛ é. (Mɛsɛ́dó 13:22) Mɔ̌ ɖokpo ɔ, Mawu nɔ ɖótó ɖɛ mǐtɔn lɛ ɖó é nɔ kpé nukún mǐ wu.
‘UN YÍ WǍN NÚ JEHOVAH, ÐÓ UN SÚXÓ YLƆ́ Ɛ Ɔ, É NƆ SÈ’
Ðɛhan-wlantɔ́ lɛ ɖokpo wɛ wlán xó enɛ lɛ. É ɖeji ɖɔ Mawu sè ɖɛ emitɔn lɛ, bɔ enɛ d’alɔ ɛ tawun. É mɔ ɖɔ emi sɛkpɔ́ Jehovah, bɔ enɛ nɔ na ɛ hlɔnhlɔn b’ɛ nɔ ɖí xwi xá gbɛmɛ wúvɛ́ tɔn lɛ kpo aluwɛ tɔn lɛ kpo.—Ðɛhan 116:1-9.
Enyi mǐ kánɖeji ɖɔ Mawu nɔ sè ɖɛ mǐtɔn lɛ ɔ, mǐ na kpò ɖò ɖɛ xò sɛ́dó é wɛ. Mǐ ni gbéjé kpɔ́ndéwú Pedro e nɔ nɔ totaligbé Espagne tɔn é tɔn kpɔ́n. Alitawoví ɖé hu vǐ tɔn xwè 19 mɛví ɔ. Hwenu e Pedro ɖò aluwɛ mɛ é ɔ, é ɖɔ lee nǔ cí n’i pɛ́pɛ́pɛ́ é nú Mawu, bo xoɖɛ ɖě ɖò ɖě jí dó ba gbɔdónúmɛ kpo alɔdó tɔn kpo. Tɛ ka jɛ bɔ d’ewu? Pedro ɖɔ: “Jehovah na sinkɔn nú ɖɛ ce lɛ, bo dó gbɔ nú nyi kpo asì ce kpo, lobo lɛ́ nɔ gudo nú mǐ gbɔn nǔɖitɔ́ hatɔ́ lɛ gblamɛ.”
Hwɛhwɛ ɔ, mǐ nɔ mɔ sinkɔn nú ɖɛ mǐtɔn lɛ gbɔn gbɔ e xɔ́ntɔn wanyiyinɔ mǐtɔn lɛ nɔ dó nú mǐ é kpo gudo e ye nɔ nɔ nú mǐ é kpo gblamɛ
Pedro sín vǐ fɔ́n wá gbɛ̀ ǎ có, ɖɛ e é xò lɛ é d’alɔ é kpo xwédo tɔn kpo tawun. Asì tɔn María Carmen flín ɖɔ: “Ðɛ d’alɔ mì, bɔ un dɛ ɖò aluwɛ ce nu. Un tuùn ɖɔ Jehovah Mawu mɔ nǔ jɛ ninɔmɛ ce mɛ, ɖó nú un xoɖɛ sɛ́dó è ɔ, ayi ce nɔ j’ayǐ, bɔ un nɔ vo.”
Biblu kpo nǔ e xá mɛ gegě ɖò gbɛ̀ yetɔn mɛ é kpo xlɛ́ vaan ɖɔ Mawu nɔ ɖótó ɖɛ lɛ. É ɖò mɔ̌ có, é ɖò wɛn ɖɔ Mawu kún nɔ na sinkɔn nú ɖɛ lɛ bǐ ó. Tɛwu Mawu ma ka nɔ na sinkɔn nú ɖɛ lɛ bǐ ǎ?
a Jehovah wɛ nyí nyikɔ Mawu tɔn.—Ðɛhan 83:18, nwt.