Wema Kplɔnkplɔn kpo Dɔkun Jijɛ kpo ka Sixu Zɔ́n Bɔ È Ðó Sɔgudo Ðagbe Hugǎn ɖé À?

Mɛ gegě nɔ lin ɖɔ mɛ ɖěɖee sè wema ganji, bo lɛ́ jɛ dɔkun lɛ é sín sɔgudo ɖó jiɖe. Ye ɖi ɖɔ wema e è nɔ kplɔ́n ɖò kplɔnyiji-alavɔ é sixu zɔ́n bɔ mɛɖé na nyɔ́ azɔ̌ wà ganji, nyí mɛ ɖagbe ɖé ɖò xwédo tɔn mɛ, lobo lɛ́ nyí toví ɖagbe ɖé. Ye sixu nɔ lɛ́ lin ɖɔ wema kplɔnkplɔn ganji na zɔ́n bɔ è na mɔ azɔ̌ e kpé kwɛ é ɖé, bɔ mɛ e ka ɖ’akwɛ gegě lɛ é na ɖ’awǎjijɛ.

GBETA E KƆN MƐ GEGĚ NƆ WÁ É ÐÉ

Ð’ayi nǔ e Zhang Chen e nɔ nɔ Chine é ɖɔ é wu. É ɖɔ: “Un mɔ ɖɔ un ɖó na ɖó kúnnuɖewema ɖé ɖò kplɔnyiji-alavɔ bo na dó gló ya; gɔ́ na ɔ, azɔ̌ e kpé kwɛ tawun é ɖé na zɔ́n bɔ na vo bǐ ɖò gbɛzán ce mɛ.”

Bo na dó ɖó gbɛzán e jɛmɛ nú mɛ é ɖé ɔ, akpakpa nɔ sɔ́ mɛ gegě dó kplɔnyiji-alavɔ nukúnɖeji lɛ yiyi wu, bɔya ɖò tò ɖevo lɛ mɛ. Linlin enɛ e mɛ lɛ nɔ ɖó é jɛ wě vaan, bo ka fɔ́n bo ɖò jijɛji wɛ kaka jɛ hwenu e Covid-19 ɖó dogbó nú tomɛyiyi lɛ é. É ko ɖibla yì xwè 10 mɔ̌ dìn bɔ tutomɛ ɖé gbéjé mɛ ɖěɖee nɔ yì azɔ̌mɛ ɖò tò ɖevo mɛ lɛ é kpɔ́n, bo ɖó gbè ɖɔ ɖibla nyí mɛ enɛ lɛ vlɔ́ jɛji wɛ nyí Azíi-nu.

Hwɛhwɛ ɔ, vɔ̌ gegě wɛ mɛjitɔ́ lɛ nɔ sá, bonu vǐ yetɔn lɛ na yì kplɔnyiji-alavɔ ɖò tò ɖevo lɛ mɛ. Qixiang ee nɔ nɔ Taïwan é flín ɖɔ: “Mɛjitɔ́ ce lɛ jɛ dɔkun ǎ có, ye sɛ́ mǐ mɛ ɛnɛ e nyí vǐ yetɔn lɛ é bǐ dó wemaxɔmɛ ɖò États-Unis.” Bo na dó kpé nukún dó akwɛzinzan e wemaxɔmɛ mɔ̌hun yiyi na byɔ é wu ɔ, xwédo tɔn na ko ɖu axɔ́ gegě lee é nɔ nyí gbɔn nú xwédo gegě ɖevo lɛ é.

WEMA KPLƆNKPLƆN KA NƆ ZƆ́N BƆ È NƆ ÐÓ SƆGUDO ÐAGBE HUGǍN Ɔ À?

Wema kplɔnkplɔn sixu zɔ́n bɔ gbɛ̀ mǐtɔn kpɔ́n te d’eji ɖò ali ɖé lɛ nu, é ka ɖò mɔ̌ có, é nɔ zɔ́n bonu mɛ e yì wemaxɔmɛ lɛ é nɔ mɔ nǔ e ɖó nukún wɛ ye ɖè lɛ é hwebǐnu ǎ. Ði kpɔ́ndéwú ɔ, mɛ gegě savɔ̌ nú xwè mɔ̌kpan, bo lɛ́ ɖu axɔ́ kpɔ́ có, ye ka mɔ azɔ̌ e ba wɛ ye ɖè é ǎ. Ðò gbè e Rachel Mui ɖó ɖò Singapore’s Business Times mɛ é ɔ, é ɖɔ: “Mɛ e ɖò kúnnuɖewema kplɔnyiji-alavɔ tɔn ɖó wɛ lɛ é fɔ́n bo ɖò jijɛji wɛ, bɔ ye ɖě ka ɖò azɔ̌ mɔ wɛ ǎ.” Jianjie ee ɖó kúnnuɖewema kplɔnyiji-alavɔ tɔn gegě, bo nɔ nɔ Taïwan é ɖɔ: “Ðěwagbɔn ɖè nú ye ǎ; ye ɖó na yí gbè nú azɔ̌ e ma ɖó kancica ɖebǔ xá kúnnuɖewema e ye ɖó ɖò kplɔnyiji-alavɔ ǎ é.”

Mɛ ɖěɖee mɔ azɔ̌ e ba wɛ ye ɖè lɛ é sixu ɖ’ayi wu ɖɔ nǔ lɛ kún yì ganji ɖò gbɛzán yetɔn mɛ lee ye lin gbɔn é ó. Ee Niran ee nyí Thaïlande-nu ɖé é ɖó kúnnuɖewema kplɔnyiji-alavɔ tɔn ɖò kplɔnyiji-alavɔ Royaume-Unis tɔn, bo lɛkɔ yì xwé gudo é ɔ, é mɔ azɔ̌ e sɔgbe xá kúnnuɖewema tɔn é ɖé. “Nǔ e un ɖó nukún é pɛ́ɛ wɛ jɛ; kúnnuɖewema e un ɖó é d’alɔ mì bɔ un mɔ azɔ̌ e zɔ́n bɔ un nɔ ɖu sunzánfókwɛ gegě é ɖé. Amɔ̌, cobonu un na ɖu sunzánfókwɛ ɖaxó enɛ ɔ, é byɔ ɖɔ má wà azɔ̌ gegě, bo lɛ́ zán hwenu gegě. Wǎgbɔ tɔn ɔ, è nya mɛ e ɖò azɔ̌ wà wɛ ɖò azɔ̌xwé e un nɔ w’azɔ̌ ɖè lɛ é gegě, bɔ nyi lɔ ɖò ye mɛ. Un wá mɔ ɖɔ azɔ̌ ɖě kún sixu zɔ́n bonu è ɖó sɔgudo ɖagbe hugǎn ɔ ó.”

Mɛ e na bo tlɛ jɛ dɔkun, alǒ ɖó gbɛzán awǎjijɛnɔ enyíì lɛ é, nɔ lɛ́ mɔ tagba xwédo tɔn lɛ, jɛ azɔn, bo tlɛ nɔ gbɔn akwɛyózó mɛ. Katsutoshi e nɔ nɔ Japon é yí gbè ɖɔ: “Un jɛ dɔkun, amɔ̌, un ɖ’awǎjijɛ ǎ, ɖó mɛ ɖevo lɛ nɔ hwanwǔ mì, bo nɔ lɛ́ wà nǔ xá mì ɖò ali e ma sɔgbe ǎ é nu.” Nawe ɖé nɔ nɔ Viêt Nam, bo nɔ nyí Lam bo ɖɔ: “Un nɔ mɔ bɔ mɛ gegě nɔ tɛ́n kpɔ́n, bo na ɖó azɔ̌ e kpé kwɛ é ɖé, bo na dó sixu mɔ akwɛ gegě, bá nɔ ayijayǐ mɛ, amɔ̌, flíjɛ tɔn wɛ nɔ jɛ, ye nɔ ɖó linkpɔ́n gegě, bo tlɛ nɔ jɛ azɔn.”

Franklin ɖɔhun ɔ, mɛ gegě wá gbeta ɔ kɔn ɖɔ nǔ tawun tawun ɖevo lɛ kpò ɖò gbɛ̀ mɛ, bo ɖò taji hú wema kplɔnkplɔn ɖaxó ɖaxó lɛ, kpo dɔkun jijɛ kpo. Mɛɖé lɛ tɛ́n kpɔ́n bo nyí mɛ ɖagbe, bo nɔ lɛ́ wà nǔ ɖagbe nú mɛ ɖevo lɛ, bɔ mɔ̌ mɛ ɔ, ye ba sɔgudo ɖagbe hugǎn ɔ. Ɛɛn, ye zé ayi yetɔn lɛ ɖó nǔ agbaza tɔn lɛ gbé nyinya jí ǎ. Gbɛzinzan gbɔn mɔ̌ ka sixu zɔ́n bɔ è ɖó sɔgudo ɖagbe hugǎn ɔ à? Xóta e bɔ d’ewu é na xósin nǔkanbyɔ enɛ tɔn.