LĚE È SIXÚ ÐU ÐO WǍNGBƐ́NÚMƐ JÍ GBƆN É

1 | Ma Nɔ Ðe Mɛðé Ðó Vo Ðo Mɛðé Mɛ ó

Nǔ e Biblu ɖɔ é:

“Mawu . . . nɔ ɖe mɛɖé ɖó vo ɖo mɛɖé mɛ [ǎ]. Loɔ, ɖo akɔta ɖěbǔ mɛ ɔ, mɛ e nɔ ɖó sísí n’i, bó nɔ xwedó hwɛjijɔ ɔ, mɛ énɛ́ sín nǔ nɔ nyɔ́ nukún tɔn mɛ.”—MƐSƐ́DÓ 10:34, 35.

Tínmɛ tɔn:

Jehovaha Mawu nɔ kpɔ́n dó to mǐtɔn, akɔ mǐtɔn, sinmɛ agbaza tɔn mǐtɔn, alǒ aca mǐtɔn wú dó dá hwɛ nú mǐ ǎ. É nyɔ́ wa ɔ, é nɔ sɔ́ ayi ɖó nǔ tají ɔ jí, énɛ́ wɛ nyí mɛ e mǐ nyí ɖo xomɛ é. Nǔgbó ɔ, “nǔ e ɖo wěxo ɔ wɛ gbɛtɔ́ nɔ kpɔ́n, ayixa mɛ wɛ . . . Mawu Mavɔmavɔ ka nɔ kpɔ́n.”—1 Samuwɛ́li 16:7.

Nǔ e a sixú wa é:

Nǔgbó wɛ ɖɔ mǐ kún sixú tuun nǔ e ɖo mɛ ɖěvo lɛ́ sín ayi mɛ é ó, amɔ̌, mǐ sixú tɛ́n kpɔ́n bó nɔ wa nǔ Mawu ɖɔhun, lobo ná nɔ ɖe mɛɖé ɖó vo ɖo mɛɖé mɛ ǎ. Dǒ gǎn bó nɔ sɔ́ ayi ɖó jijɔ mɛ ɖokpó ɖokpó tɔn jí, ma nɔ xwe mɛ bǐ dó ahwan ɖokpó ɔ mɛ ó. Ényí a ɖó ayi wú ɖɔ lěe nǔ nɔ cí nú we dó mɛ ɖěvo lɛ́, é sixú nyí mɛ e gosín akɔ, alǒ to ɖěvo mɛ lɛ́ é wú é jɛ hǔzúhúzú jí dó nyanya jí hǔn, xo ɖɛ sɛ́dó Mawu, bó byɔ́ ɛ ɖɔ é ní d’alɔ we bónú a ní hɔn ɖɔ nú linlin énɛ́ e ɖo ayi towe mɛ é. (Ðɛhan 139:23, 24) Ényí a byɔ́ Jehovah kpó ayi bǐ kpó ɖɔ é ní d’alɔ émí bónú émí ma sɔ́ ɖe mɛɖé ɖó vo ɖo mɛɖé mɛ ó ɔ, a sixú ɖeji ɖɔ é ná d’alɔ we.—1 Piyɛ́ɛ 3:12.

a Jehovah wɛ nyí nyǐkɔ Mawu tɔn.—Ðɛhan 83:18, nwt.

“Nyi kpó yovó ɖě kpó ko jínjɔ́n kpɔ́, bó ɖɔ xó ɖo fífá mɛ kpɔ́n gbeɖé ǎ. . . Din ɔ, un ɖo kplékplé nɔví lɛ́ tɔn e gbɔn gbɛ ɔ bǐ mɛ é ɖé mɛ; kplékplé énɛ́ ɖɔhun ɖě sɔ́ ɖe ǎ.”—TITUS

Nǔ e jɛ nǔgbó é ɖé—TITUS

É ɖu ɖo wǎngbɛ́númɛ jí

Nya ɖé nɔ nyí Titus, bɔ sɛ́n masɔgbe e è dó dó akɔ klánklán wú lɛ́ é nɔ dó xomɛsin n’i tawun. Énɛ́ wú ɔ, é byɔ́ gbɛ̌ta dǎkaxotɔ́ lɛ́ tɔn e nǔ nɔ cí mɔ̌ ná é ɖé mɛ. É ɖɔ: “Mǐ nɔ yi fí e è ma nɔ ba ná mɔ mɛwi lɛ́ ɖe ǎ lɛ́ é, ɖi otɛ́li lɛ́ kpó nǔbaɖutɛn lɛ́ kpó, bó ná dó dɔn tagba nyi ayǐ.” Titus ɖɔ ɖɔ wǎn e émí nɔ gbɛ́ nú mɛ ɖěvo lɛ́ é syɛ́n sɔmɔ̌ bɔ émí nɔ xo dǎka yě wú; é ɖɔ gɔ́ ná ɖɔ: “Ényí nyi kpó súnnu, alǒ nyɔ̌nu ɖé kpó bɛ́ jlɛ ɔ, nyi jɛ́n nɔ yá wǔ dó nǔ mɛ jɛ nukɔn.”

Ée Titus jɛ Biblu kplɔ́n xá Kúnnuɖetɔ́ Jehovah tɔn lɛ́ jí é ɔ, é jɛ hǔzúhúzú lɛ́ bló jí. Ényí é xa Biblu ɔ, é nɔ zɔ́n tamɛ lin i. Akpá e kúnkplá sɔgúdo, bó ɖɔ ɖɔ ‘kú kún sɔ́ ná tíin ó, aluwɛ kún sɔ́ ná tíin ó, alěniná kún sɔ́ ná tíin ó, wǔvɛ́ mimɔ kún ka sɔ́ ná tíin ó’ é sɔ́ akpakpa ɛ tawun.—Nǔɖexlɛ́mɛ 21:3, 4.

Ðo bǐbɛ́mɛ ɔ, é dó gǎn tawun bá mɔ tɛn dó jó wǎngbɛ́númɛ dó. É ɖɔ: “É vɛ́ wǔ nú mì tawun ɖɔ má húzú lěe un nɔ lin nǔ gbɔn é kpó lěe un nɔ wa nǔ gbɔn é kpó.” Amɔ̌, nǔ e é kplɔ́n ɖo Mɛsɛ́dó 10:34, 35 mɛ, b’ɛ ɖɔ xó dó lěe Mawu ma nɔ ɖe mɛɖé ɖó vo ɖo mɛɖé mɛ ǎ gbɔn é wú é d’alɔ ɛ.

Étɛ́ mɛ é ka tɔ́n kɔ dó? Titus tínmɛ ɖɔ: “Hwenu e un mɔ wǎnyíyí e Kúnnuɖetɔ́ Jehovah tɔn lɛ́ nɔ ɖe xlɛ́ yěɖée, bó ma tlɛ nɔ kpɔ́n dó aca, alǒ sinmɛ agbaza tɔn mɛ ɖěvo lɛ́ tɔn wú ǎ é ɔ, un wá kú d’é jí ɖɔ Kúnnuɖetɔ́ Jehovah tɔn lɛ́ wɛ ɖo Mawu sɛn wɛ ɖo ali ɖagbe hú gǎn ɔ nu. Cóbónú un ná húzú Kúnnuɖetɔ́ ɔ, yovó e ɖo agun ɔ mɛ lɛ́ é ɖokpó ylɔ́ mì dó xwé tɔn gbe, bónú mǐ ná ɖu nǔɖé ɖó kpɔ́. Dlɔ̌ ɖɔhun wɛ é cí nú mì. Nyi kpó yovó ɖě kpó ko jínjɔ́n kpɔ́, bó ɖɔ xó ɖo fífá mɛ kpɔ́n gbeɖé, káká bónú é ná nyí nǔ wɛ un ná wá ɖu ɖo xwé tɔn gbe ǎ. Din ɔ, un ɖo kplékplé nɔví lɛ́ tɔn e gbɔn gbɛ ɔ bǐ mɛ é ɖé mɛ; kplékplé énɛ́ ɖɔhun ɖě sɔ́ ɖe ǎ.”