LĚE È SIXÚ ÐU ÐO WǍNGBƐ́NÚMƐ JÍ GBƆN É

2 | Ma Nɔ Ba Hlɔn ó

Nǔ e Biblu ɖɔ é:

“Mi ma nɔ zé nǔ nyanya dó sú nǔ nyanya xɔ mɛ ɖěbǔ ó; . . . Ényí mi kpé wú hǔn, mi tɛ́n kpɔ́n gbɔn alɔkpa bǐ mɛ lěe mi kpé wú gbɔn é, bó nɔ fífá mɛ xá gbɛtɔ́ lɛ́ bǐ. . . . Miɖésúnɔ ma nɔ ba hlɔn ó; . . . ɖó è wlán dó Mawuxówéma ɔ mɛ ɖɔ: ‘Nyɛ wɛ nɔ ba hlɔn; nyɛ wɛ nɔ sú nǔ e è wa ɔ sín axɔ́ mɛ; Aklúnɔ wɛ ɖɔ mɔ̌.’”—HLƆ̌MANU LƐ́ 12:17-19.

Tínmɛ tɔn:

Ényí è wa nǔ agɔ xá mǐ ɔ, é sɔgbe ɖo jɔwámɔ linu ɖɔ xomɛ ní sin mǐ, amɔ̌, Mawu ba ɖɔ mǐ ní nɔ ba hlɔn ǎ. É nyɔ́ wa ɔ, é byɔ́ mǐ ɖɔ mǐ ní nɔ te kpɔ́n émí, ɖó ɖo malínmálín mɛ ɔ, é ná ɖó nǔ nǔagɔwiwa bǐ nu.—Ðɛhan 37:7, 10.

Nǔ e a sixú wa é

Ényí gbɛtɔ́ hwɛhutɔ́ lɛ́ ba hlɔn ɔ, énɛ́ nɔ zɔ́n bɔ wǎngbɛ́númɛ nɔ vun kan. Énɛ́ wú ɔ, ényí mɛɖé dó xomɛsin xomɛ nú we, alǒ wa nǔ agɔ xá we hǔn, ma ba hlɔn ó. Tɛ́n kpɔ́n, bó ɖu ɖo lěe nǔ nɔ cí nú we é jí, bó wa nǔ ɖo fífá mɛ. Ðo ninɔmɛ ɖé lɛ́ mɛ ɔ, é sixú nyɔ́ hú gǎn ɖɔ è ní wɔn nǔ e jɛ é. (Nǔnywɛ́xó 19:11) Ðo ninɔmɛ ɖěvo lɛ́ mɛ ɔ, é sixú nyɔ́ hú gǎn ɖɔ è ní ɖó nǔ e jɛ é sín gbe nú mɛ e ɖó ná se lɛ́ é. Ði kpɔ́ndéwú ɔ, ɖo ninɔmɛ ɖěɖěe mɛ è wa alǎnnú wǔ we ɖe lɛ́ é ɔ, a sixú wá gbeta ɔ kɔn bó ná ɖó nǔ e jɛ é sín gbe nú kponɔ lɛ́, alǒ acɛkpatɔ́ ɖěvo lɛ́.

Hlɔnbiba nɔ bló nǔ ɖě ɖó ǎ, mɛɖésúnɔ wú jɛ́n é nɔ wa nǔ dó

Nú é ka cí ɖɔ è kún sixú ɖe ɖɛ tagba ɔ ɖo fífá mɛ ó ɔ ka lo? Alǒ ényí a ko wa nǔ e wú a kpé é bǐ bá mɔ tɛn bó ɖe ɖɛ tagba ɔ ɖo fífá mɛ, b’ɛ ma ka kpa we ǎ ɔ ka lo? Ma ba hlɔn ó. Hlɔnbiba ná ɖibla lɛ́ zɔ́n bɔ ninɔmɛ ɔ ná vántán d’é jí. É nyɔ́ wa hǔn, ɖu ɖo wǎngbɛ́númɛ jí. A sixú kplɔ́n, bó nɔ ɖeji dó lěe Mawu nɔ ɖe ɖɛ tagba lɛ́ gbɔn é wú. “Gǎn jɛ wǔ tɔn, é ná wa azɔ̌ tɔn.”—Ðɛhan 37:3-5.

Nǔ e jɛ nǔgbó é ɖé—ADRIÁN

É ɖu ɖo hlɔnbiba jí

Hwenu e Adrián ɖo wǐnnyáwínnyá mɛ é ɔ, é nɔ xo dǎka, mɛ ɖěvo lɛ́ sín nǔ nɔ vɛ́ wǔ tɔn, b’ɛ nɔ lɛ́ ba hlɔn. É ɖɔ: “Hwɛhwɛ ɔ, akpotokwín e è nɔ nyi, bó nɔ da tú mɛ lɛ́ é mɛ wɛ un nɔ ɖ’alɔ ɖe, bɔ azɔn gěgé wɛ un gblé wǔ vantankánnyá, bɔ mɛ lɛ́ nɔ hɔn jó mì dó, bó nɔ mɔ ɖɔ un ko kú.”

Adrián jɛ Biblu kplɔ́n jí hwenu e é ɖó xwe 16 é. É ɖɔ gɔ́ ná ɖɔ: “Ée un ɖo nukɔn yi wɛ ɖo Biblu kplɔ́nkplɔ́n ce mɛ é ɔ, un wá mɔ ɖɔ é byɔ́ ɖɔ má bló hǔzúhúzú ɖé lɛ́ ɖo mɛ alɔkpa e un nyí é wú.” É byɔ́ ɖɔ é ní jó wǎngbɛ́númɛ dó, lobo lɛ́ ɖó dǎkaxixo te. Tají ɔ, nǔ e é kplɔ́n ɖo Hlɔ̌manu lɛ́ 12:17-19 mɛ, b’ɛ ɖɔ ɖɔ è ma ba hlɔn ó é wa ɖagbe n’i tawun. É ɖɔ: “Un wá yí gbe ɖɔ Jehovah ɖésú wɛ ná ɖó nǔ nǔagɔwiwa nu, lěe é ba gbɔn é, bó ka ná wa mɔ̌ dó hwetɔnnu. Kpɛɖé kpɛɖé ɔ, un wá ɖu ɖo dǎka e un nɔ xo é jí.”

Gbadanu ɖokpó ɔ, mɛ ɖěɖěe kpó Adrián kpó nɔ nyi akpotokwín ɖ’ayǐ lɛ́ é tɔ́ hun i. Mɛ e nyí gǎn ɖo yě nu é sú xó bó ɖɔ: “Jɛ hun dó hwiɖée jí!” Adrián yí gbe ɖɔ: “Akpakpa sɔ́ mì tawun bónú má ba hlɔn.” Amɔ̌, é ba hlɔn ǎ, é nyɔ́ wa ɔ, é xo ɖɛ kléwún ɖé sɛ́dó Jehovah, bó gosín fínɛ́.

Adrián gbɛ kan d’é nu bó ɖɔ: “Ayǐhɔ́ngbe tɔn ɔ, un yi mɔ gǎn ɔ ɖokpónɔ. Xomɛ sin mì bɔ hlɔnbiba jló mì, amɔ̌, un lɛ́vɔ́ sa vo nú Jehovah d’ayi mɛ ɖɔ é ní d’alɔ mì bónú má ɖu ɖo nyiɖée jí. É kpácá mì ɖɔ nyaví ɔ wá kpé mì bó ɖɔ: ‘Sɔ́ nǔ e jɛ sɔ é kɛ mì. Nú un ma ná blɛ́ we ǎ ɔ, un ba bó ná cí hwi ɖɔhun. Un jló ná kplɔ́n Biblu.’ Ðu e un ɖu ɖo xomɛsin ce jí é víví nú mì kpɔ́n! Énɛ́ wɛ zɔ́n bɔ mǐ jɛ Biblu kplɔ́n jí ɖó kpɔ́.”