2 | “Gbɔ e Nǔwlánwlán mímɛ́ lɛ́ nɔ dó nú mɛ é”

BIBLU ÐƆ: “Nǔ e è ko wlán ɖ’ayǐ lɛ́ é bǐ ɔ, è wlán yě bo ná dó kplɔ́n nǔ mǐ, bónú gbɔn dɛ e mǐ nɔ dɛ é kpó gbɔ e Nǔwlánwlán mímɛ́ lɛ́ nɔ dó nú mɛ é kpó gblamɛ ɔ, mǐ ní dó sixú ɖó nukún nǔ.”—HLƆ̌MANU LƐ́ 15:4.

Tínmɛ tɔn

Linlin gbɔdónúmɛ tɔn ɖěɖěe sixú ná mǐ hlɔ̌nhlɔ́n kpó didɛ kpó e sín hudó mǐ ɖó, bo ná ɖí xwi xá linlin masɔgbe lɛ́ é ɖo Biblu mɛ. Wɛn Biblu tɔn lɛ́vɔ́ ná mǐ nukúnɖíɖó ɖɔ zaanɖé din ɔ, wǔvɛ́ e mǐ nɔ mɔ ɖo lěe nǔ nɔ cí nú mɛ é linu é ná húzú nǔ xóxó.

Lěe énɛ́ sixú d’alɔ gbɔn é

Hweɖélɛ́nu ɔ, mǐ mɛ bǐ wɛ nɔ se wǔvɛ́ ɖo lěe nǔ nɔ cí nú mɛ é linu, amɔ̌, mɛ ɖěɖěe ɖo linkpɔ́nzɔn jɛ wɛ alǒ ɖo xwi ɖí xá adohu adohu wɛ lɛ́ é sixú nɔ se wǔvɛ́ ɖo lěe nǔ nɔ cí nú mɛ é linu hwebǐnu. Nɛ̌ Biblu ka sixú d’alɔ gbɔn?

Linlin ɖagbe ɖěɖěe sixú ɖyɔ́ linlin masɔgbe lɛ́ é gěgé ɖo Biblu mɛ. (Filípunu lɛ́ 4:8) Biblu xixa sixú bló bɔ linlin gbɔdónúmɛ tɔn lɛ́ kpó linlin fífá tɔn lɛ́ kpó ná gɔ́ ayi mǐtɔn mɛ bɔ énɛ́ ná d’alɔ mǐ bɔ mǐ ná ɖ’acɛ dó lěe nǔ nɔ cí nú mǐ é jí.—Ðɛhan 94:18, 19.
Biblu sixú d’alɔ mǐ bɔ mǐ sɔ́ ná nɔ lin ɖɔ mǐ kún hwɛ́n nǔɖé ó ǎ.—Luki 12:6, 7.
Wěmafɔ Biblu tɔn gěgé ná gǎnjɛwú mǐ ɖɔ mǐ kún ɖo mǐɖokpónɔ ó, lé Gbɛɖótɔ́ mǐtɔn Mawu nɔ mɔ nǔ jɛ lěe nǔ nɔ cí nú mǐ é mɛ bǐ mlɛ́mlɛ́.—Ðɛhan 34:19; 1 Jaan 3:19, 20.
Biblu d’akpá ɖɔ Mawu ná ɖe wǔvɛ́ e nǔ nyanya e jɛ wá yi lɛ́ é flínflín nɔ ɖó nú mǐ lɛ́ é síin. (Ezayíi 65:17; Nǔɖexlɛ́mɛ 21:4) Ényí mǐ ɖo wǔvɛ́ se wɛ ɖo taglomɛ alǒ ɖo lěe nǔ nɔ cí nú mǐ é linu, bo ma ka tuun nǔ bǔ e ɖo mǐ wa wɛ é ǎ ɔ, akpá énɛ́ sixú ná hlɔ̌nhlɔ́n mǐ bɔ mǐ ná kpo ɖo didɛ wɛ.

Lěe Biblu ɖo alɔ dó gbɛtɔ́ lɛ́ wɛ gbɔn é Jessica

Lěe linkpɔ́nzɔn wa nǔ dó wǔ ye gbɔn é

“Hwenu e un ɖó xwe 25 é ɔ, un jɛ taglomɛzɔn baɖabaɖa ɖé, bɔ è wá mɔ linkpɔ́nzɔn syɛ́nsyɛ́n nú mì. Nǔ e ɖó wǔvɛ́ nú mì wá yi lɛ́ é flínflín ajijimɛ kpó ayi ce mɛ e wá wɛ yě nɔ ɖe magbokɔ é kpó dó wǔvɛ́ nú mì tawun. Dotóo lɛ́ d’alɔ mì bɔ un mɔ nǔ jɛ mɛ ɖɔ ali nyanya e nu un nɔ lin nǔ ɖe ɖ’ayǐ, ɖó nǔ nyanya ɖěɖěe jɛ dó jǐ ce lɛ́ é wútu é wú wɛ linkpɔ́nzɔn ce sín. Gbɔn vo nú amasin e jɛxá azɔn ce lɛ́ é zínzán ɔ, un lɛ́ ɖó hudó dotóo e tuun azɔ̌ ganjí ɖo ali énɛ́ nu é tɔn, b’ɛ ná d’alɔ mì bɔ un ná tuun nǔ e ma nyí nǔ ɖagbe ǎ, bɔ un nɔ lin kpɔ́n lɛ́ é lobo gbɔ nǔ lin gbɔn mɔ̌.”

Lěe Biblu d’alɔ mì gbɔn é

“Hwenu e linkpɔ́nzɔn ce wá kpa zinkpo bǐ é ɔ, xɛsi nɔ ɖi mì tawun, ado nɔ hu mì zɛ xwé wú, bɔ amlɔ nɔ lɛ́ gbɛ́ mì. Hwɛhwɛ ɖo zǎnmɛ ɔ, linlin masɔgbe e nɔ ɖo ayimɛya dó nú mì wɛ lɛ́ é nɔ ɖí bú mì, bɔ un nɔ sixú ɖ’acɛ dó yě jí ǎ. Lěe Ðɛhan 94:19 tínmɛ gbɔn é ɔ, Mawu sixú dó gbɔ nú mǐ, bo lɛ́ xo hwihwɛ́ ayi mǐtɔn hwenu e adohu adohu ɖí bú mǐ é. Énɛ́ wú ɔ, un nɔ sɔ́ Biblu ce kpó wěma e mɛ un nɔ sɔ́ kɛ́n wěmafɔ e nɔ dó wǔsyɛ́n lanmɛ nú mì lɛ́ é tɔn dó é kpó ɖó zan ce kpá. Ényí amlɔ gbɛ́ mì ɔ, un nɔ xa wěmafɔ Biblu tɔn ɖé lɛ́, énɛ́ ɔ, un nɔ ná tɛn linlin Mawu tɔn lɛ́ bɔ yě nɔ dó gbɔ nú mì.

“Biblu dó wǔsyɛ́n lanmɛ nú mǐ ɖɔ mǐ ní nɔ flí linlin ɖěɖěe ma sɔgbe xá nǔ e mǐ tuun dó Mawu wú ǎ lɛ́ é xwe. Ð’ayǐ ɔ, un kú d’é jí ɖɔ un kún hwɛ́n nǔɖé ó, mɛɖé kún ka yí wǎn nú mì ó, un kún ka lɛ́ nyí nǔɖéwanú ó. Amɔ̌, un kplɔ́n ɖɔ linlin énɛ́ lɛ́ kún sɔgbe xá nǔ e Biblu kplɔ́n mɛ é ó. Biblu ɖe xlɛ́ ɖɔ Mawu nyí Tɔ́ wǎnyíyínɔ, bo lɛ́ nyí Tɔ́ wǔvɛ́sexámɛtɔ́ e nɔ kpé nukún dó mǐ mɛ ɖokpó ɖokpó wú é. Kpɛɖé kpɛɖé ɔ, un ɖ’acɛ dó linlin ce lɛ́ jí, bo sɔ́ nɔ jó linlin ce lɛ́ dó bónú yě nɔ ɖ’acɛ dó jǐ ce ǎ. Un kplɔ́n bo nɔ ɖó linlin e Mawu nɔ ɖó dó wǔ ce é dó nyiɖée wú. Afɔ tají ɖé wɛ nyí énɛ́ bɔ un ɖe, b’ɛ d’alɔ mì bɔ un ɖu ɖo linlin masɔgbe e un nɔ ɖó dó nyiɖée wú é jí.

“Un ɖo nukún ɖó hwenu e wǔvɛ́ e nǔ élɔ́ lɛ́ nɔ ɖó nú mɛ é ná blí bú é wɛ kpó akpakpa sɔ́ mɛ kpó: nǔ nyanya e ko jɛ wá yi lɛ́ é bǐ flínflín kpó linlin e ma sɔgbe ǎ bɔ è nɔ ɖó lɛ́ é bǐ kpó. Un tuun ɖɔ ɖo sɔgúdo ɔ, taglomɛzɔn ɖě kún sɔ́ ná tíin ó. Énɛ́ nɔ d’alɔ mì bɔ un nɔ dɛ din, bo nɔ ɖo nukún ɖó hwenu e un ma sɔ́ ná jɛ linkpɔ́nzɔn ɖě ǎ ɖo sɔgúdo é wɛ.”