3 | Lěe kpɔ́ndéwú Biblu tɔn lɛ́ sixú d’alɔ we gbɔn é

BIBLU ÐƆ . . . Súnnu kpó nyɔ̌nu kpó “mǐ . . . ɖɔhun” lɛ́ sín xó.—JAKI 5:17.

Tínmɛ tɔn

Súnnu kpó nyɔ̌nu kpó ɖěɖěe lěe nǔ nɔ cí nú yě é nɔ gbɔn vovo lɛ́ é sín tan gbɛɖe lɛ́ wɛ gɔ́ Biblu mɛ. Ényí mǐ ɖo tan yětɔn lɛ́ xa wɛ ɔ, mǐ sixú mɔ mɛɖé ɖo yě mɛ, bɔ lěe nǔ nɔ cí nú mǐ é wɛ é cí nú é lɔ.

Lěe énɛ́ sixú d’alɔ we gbɔn é

Mǐ mɛ bǐ wɛ nɔ ba ɖɔ mɛ ɖěvo lɛ́ ní mɔ nǔ jɛ lěe nǔ nɔ cí nú mǐ é mɛ. Amɔ̌, énɛ́ lɛ́ ɖo tají tawun hwenu e mǐ ɖo xwi ɖí xá taglomɛzɔn wɛ é. Ényí mǐ ɖo tan gbɛɖe mɛ e xó Biblu ɖɔ lɛ́ é tɔn xa wɛ ɔ, mǐ sixú mɔ ɖɔ gbɛtɔ́ mǐɖɔhun wɛ yě nyí, bɔ mǐ ɖó linlin ɖokpó ɔ yěɖɔhun, lobɔ lěe nǔ cí nú yě é ɔ, mɔ̌ wɛ nǔ nɔ cí nú mǐ lɔmɔ̌. Wǎgbɔ tɔn ɔ, ényí mǐ ɖo xwi ɖí xá adohu adohu wɛ, bo lɛ́ ɖo wǔvɛ́ se wɛ ɖo lěe nǔ nɔ cí nú mɛ é linu ɔ, mǐ nɔ mɔ ɖɔ nǔ mɔ̌hun lɛ́ ko gbo mɛ ɖěvo lɛ́ lɔ, bɔ mǐ sɔ́ nɔ mɔ ɖɔ mǐ ɖo mǐɖokpónɔ dín ǎ.

Biblu ɖɔ mɛ gěgé xó bɔ yě mɔ ɖɔ mɛɖé kún sɔ́ ɖo émítɔn ɖɔ wɛ ó, bɔ yě lɛ́ flú. “Agbɔ̌n kpé mì.” Nǔ ko cí mɔ̌ nú we kpɔ́n a? Nǔ cí mɔ̌ nú Mɔyízi, Elíi kpó Davídi kpó.—Kɛ́nsísɔ́ 11:14; 1 Axɔ́sú lɛ́ 19:4; Ðɛhan 55:5.
Biblu ɖɔ nǎwe ɖé xó nú mǐ bɔ é nɔ nyí Ana, bɔ ‘akpɔ ɖó è ɖésú,’ ɖó é sixú ji vǐ ǎ, lobɔ asísí tɔn nɔ ɖo nǔɖɔ ba ɛ wɛ titewungbe tɔn.—1 Samuwɛ́li 1:6, 10.
Biblu ɖɔ nya ɖé xó nú mǐ bɔ é nɔ nyí Jɔbu, bɔ lěe nǔ cí n’i é sixú cí mɔ̌ nú mǐ lɔ. Nya gbejínɔtɔ́ ɖé wɛ n’i có, é se wǔvɛ́ tawun ɖo lěe nǔ nɔ cí nú mɛ é linu, bɔ gbe ɖokpó ɔ, é ɖɔ: “É kpé mì lo! Un sɔ́ ɖo nǎ kú wɛ gbeɖé ǎ wɛ a?”—Jɔbu 7:16.

Ényí mǐ nɔ kplɔ́n nǔ dó lěe mɛ énɛ́ lɛ́ e xó Biblu ɖɔ lɛ́ é ɖí xwi xá linlin nyanya lɛ́ b’ɛ kpa yě gbɔn é wú ɔ, mǐ lɔmɔ̌ sixú mɔ hlɔ̌nhlɔ́n bo ná ɖí xwi xá wǔvɛ́ mǐtɔn lɛ́.

Lěe Biblu ɖo alɔ dó gbɛtɔ́ lɛ́ wɛ gbɔn é Kevin

Lěe taglomɛzɔn e nɔ nyí trouble bipolaire é wa nǔ dó wǔ ye gbɔn é

“Hwenu e un ɖibla ɖó xwe 50 é wɛ è mɔ taglomɛzɔn e nɔ nyí trouble bipolaire é nú mì. Hweɖélɛ́nu ɔ, un nɔ mɔ ɖɔ un sixú ɖí xwi xá wǔvɛ́ ɖěbǔ e un ná mɔ ɖo gbɛ mɛ é. Amɔ̌ hwe ɖěvo lɛ́ nu ɔ, gbɛ nɔ cikɔ nú mì.”

Lěe Biblu d’alɔ mì gbɔn é

“Mɛ e xó Biblu ɖɔ bɔ un nɔ mɔ nyiɖée ɖo ninɔmɛ yětɔn mɛ lɛ́ é ɖokpó wɛ nyí mɛsɛ́dó Piyɛ́ɛ. É wa nǔɖé lɛ́ nyi do, bɔ énɛ́ zɔ́n bɔ é mɔ ɖɔ émí kún sɔ́ hwɛ́n nǔɖé ó. É jó éɖée dó bónú linlin énɛ́ wa nǔ dó wǔ tɔn káká sɔ́yi ǎ, é nyɔ́ wa ɔ, é ba alɔdó xɔ́ntɔn tɔn e nǔ tɔn nɔ ɖu ayi mɛ ná lɛ́ é tɔn. Ényí taglomɛzɔn ce zɔ́n bónú kéze ɖé ma yi ganjí nú mì ǎ ɔ, nǔwanyido nyiɖésúnɔ tɔn lɛ́ sixú ɖí bú mì, bo zɔ́n bɔ un mɔ ɖɔ un kún hwɛ́n nǔɖé ó. Piyɛ́ɛ ɖɔhun ɔ, un nɔ tɛ́n kpɔ́n bo nɔ nɔ kpɔ́ xá xɔ́ntɔn vívɛ́ ce e nɔ ba ná d’alɔ mì bónú un ma jó gbe ó lɛ́ é.

“Mɛ ɖěvo e xó Biblu ɖɔ bɔ tan tɔn nɔ dó gbɔ nú mì tawun é wɛ nyí axɔ́sú Davídi. Hwɛhwɛ wɛ ninɔmɛ tɔn nɔ ɖó linkpɔ́n n’i, bɔ nǔ e é wa nyi do wá yi lɛ́ é nɔ vɛ́ n’i. Un nɔ mɔ nyiɖée ɖo ninɔmɛ tɔn mɛ, ɖó hweɖélɛ́nu ɔ, un nɔ wa nǔɖé lɛ́ alǒ ɖɔ nǔɖé lɛ́, b’ɛ nɔ wá vɛ́ nú mì. Xó ɖěɖěe Davídi ɖɔ ɖo Ðɛhan 51gɔ́ ɔ mɛ lɛ́ é nɔ dó gbɔ nú mì. Ðo wěmafɔ 5gɔ́ ɔ mɛ ɔ, Davídi ɖɔ: ‘Un yí nǔ e un wa nyi do lɛ́ bǐ gbe, bɔ hwɛ e un hu ɔ ɖo nukɔn ce hwebǐnu.’ Lěe nǔ nɔ cí nú mì hwenu e gbɛ mɛ d’ablu dó mì é pɛ́ɛ́ nɛ́. É nɔ vɛ́ wǔ nú mì tawun ɖɔ má ɖó linlin ɖagbe lɛ́ dó nyiɖée wú. Amɔ̌, un nɔ lɛ́ mɔ nyiɖée ɖo xó élɔ́ lɛ́ e Davídi ɖɔ ɖo wěmafɔ 12gɔ́ ɔ mɛ é mɛ: ‘Mawu ce, sɔ́ ayi mímɛ́ dó xomɛ nú mì; lɛ̌ vɔ́ ayixa ce blóɖó, bónú ayixa ce ní lí dǒ ganjí.’ Nyi lɔ nɔ byɔ́ Mawu ɖɔ ní d’alɔ mì bónú má nɔ ɖó linlin ɖagbe dó nyiɖée wú. Wěmafɔ 19gɔ́ ɔ lɔ nɔ dó gbɔ nú mì. É ɖɔ: ‘A nɔ gbɛ́ wǎn nú mɛ e hwɛ tɔn lɛ́ vɛ́ n’i tlílí ɖo ayi mɛ bɔ wǔ kú ɔ ǎ.’ Wěmafɔ énɛ́ nɔ vɔ́ gǎnjɛwú ná mì ɖɔ Mawu yí wǎn nú mì.

“Ayi sísɔ́ ɖó kpɔ́ndéwú Biblu tɔn lɛ́ kpó nǔ e Mawu ná mì din lɛ́ é kpó jí nɔ ná hlɔ̌nhlɔ́n nukúnɖíɖó sɔgúdo tɔn ce. Un mɔ ɖɔ akpá Biblu tɔn lɛ́ ná jɛnu, bɔ énɛ́ nɔ d’alɔ mì bɔ un nɔ kpo ɖo gbɛ wezun ɔ kan wɛ.”