Lěe è ná kplɔ́n nǔ gbɔn é
Kplɔ́n “han gbigbɔ tɔn lɛ́” dó tamɛ
“Hweɖélɛ́nu ɔ, ényí un mɔ ɖɔ un kún nyí nǔɖéwanú ó, bónú énɛ́ ɖo ayimɛya dó nú mì wɛ ɔ, Jexóva nɔ dó wǔsyɛ́n lanmɛ nú mì gbɔn han ɖěɖěe nɔ tɔ́n ɖo televizyɔn JW® jí lɛ́ é gblamɛ.”—Lorraine, États-Unis.
Akpáxwé mawusinsɛn mǐtɔn tɔn ɖé wɛ “han gbigbɔ tɔn” ɖěɖěe mǐ nɔ ji hwebǐnu dó kpa Mawu lɛ́ é nyí. (Koló. 3:16) Ényí a kplɔ́n han énɛ́ lɛ́ dó tamɛ ɔ, yě sixú d’alɔ we hwenu e hanwéma, kabǐ alǒkan, alǒ tablɛ́ti ma sɔ́ ná wá ɖo así we ǎ é. Tɛ́n wěɖexámɛ élɔ́ lɛ́ kpɔ́n, yě ná d’alɔ we bɔ a ná kplɔ́n han lɛ́ dó tamɛ.
Nɔ xa xógbe han lɛ́ tɔn lɛ́ kpó sɔxwixwe kpó bá dó mɔ nǔ jɛ tínmɛ yětɔn wú. Ényí è mɔ nǔ jɛ nǔɖé mɛ ɔ, flínflín tɔn nɔ bɔ wǔ nú mɛ hú gǎn. Han mǐtɔn lɛ́ bǐ, káká jɛ han bǔnɔ lɛ́ kpó yɔkpɔ́vú lɛ́ sín han lɛ́ kpó jí sín xógbe lɛ́ ɖo jw.org jí. Ðo akpáxwé Nǔsɛxwetɛn mɛ ɔ, yi Han mɛ.
Nɔ wlán xógbe han lɛ́ tɔn lɛ́ dó wěma jí. Mɔ̌ wiwa ná d’alɔ we hú gǎn, bɔ a ná flín xógbe han lɛ́ tɔn lɛ́.—Sɛ́n. 17:18.
Nɔ xa alǒ ji d’aga. Nɔ sɔ́ gbe dó jǐ dó xa xógbe han lɛ́ tɔn lɛ́, alǒ ji yě azɔn mɔ̌kpán.
Tɛ́n lěe a nɔ flín nǔ gbɔn é kpɔ́n. Ma kpɔ́n hanwéma ɔ mɛ ó, bo tɛ́n kpɔ́n lobo flín xógbe lɛ́. Énɛ́ gúdo hǔn, kpɔ́n ɖɔ é ka kpa we a jí.