Ðeji dó “Hwɛɖɔtɔ́ gbɛ ɔ bǐ tɔn” sín nǔbláwǔkúnúmɛ wú!

1. Nǔ e dó gbɔ nú mɛ é tɛ́ Jexóva ka kplɔ́n Ablaxámu?

XÓÐƆÐÓKPƆ́ ɖé wɛ bɔ Ablaxámu wɔn gbeɖé ǎ. Mawu gbɔn wɛnsagun ɖé jí bo ɖɔ nú Ablaxámu ɖɔ émí ɖo toxo Sodɔ́mu kpó Gomɔ́ɔ kpó tɔn ná sú kún dó ná wɛ. Nya nǔjlɔ́jlɔ́watɔ́ énɛ́ sín ayi gba dó. É kanbyɔ́ ɖɔ: “A nǎ sú mɛ ɖagbe kpó mɛ nyanya kpó sín kún dó ɖó kpɔ́ wɛ a? . . . Hwɛɖɔtɔ́ gbɛ ɔ bǐ tɔn ɔ ná gɔn hwɛjijɔ xwedó dó wa nǔ wɛ a?” Jexóva ɖó suúlu bo kplɔ́n nǔɖé xɔ́ntɔn tɔn vívɛ́ ɔ bɔ é hɛn le wá nú mǐ bǐ bo lɛ́ dó gbɔ nú mǐ, énɛ́ wɛ nyí ɖɔ: Mawu ná sú kún dó nú mɛ ɖagbe lɛ́ gbeɖé ǎ.—Bǐb. 18:23-33.

2. Étɛ́ ka ná mǐ gǎnjɛwú ɖɔ hwɛɖiɖɔ Jexóva tɔn lɛ́ nɔ sɔgbe bo nɔ lɛ́ nyí kpó nǔbláwǔkúnúmɛ kpó?

² Étɛ́wú mǐ ka sixú kú d’é jí ɖɔ lěe Jexóva nɔ ɖɔ hwɛ gbɔn é sɔgbe bɔ é nɔ lɛ́ nyí kpó nǔbláwǔkúnúmɛ kpó? Ðó mǐ tuun ɖɔ ‘ayixa mɛ wɛ Jexóva nɔ kpɔ́n.’ (1 Sam. 16:7) Nǔgbó ɔ, é tuun “gbɛtɔ́ lɛ́ bǐ sín ayixa.” (1 Axɔ́. 8:39; 1 Tan 28:9) Nǔgbó énɛ́ jí wǔ tawun. Lěe Jexóva nɔ ɖɔ hwɛ gbɔn é zɛ nukúnnúmɔjɛnǔmɛ mǐtɔn wú flaflá tɔn. É sɔgbe ɖɔ è sɔ́ d’ayi mɛ nú mɛsɛ́dó Pɔ́lu b’ɛ ɖɔ dó Jexóva Mawu wú ɖɔ: “Mɛ̌ ka sixú mɔ do nú hwɛɖiɖɔ tɔn lɛ́?”—Hlɔ̌. 11:33.

3-4. Étɛ́ lɛ́ mǐ ka sixú nɔ kanbyɔ́ mǐɖée lɛ́ hweɖélɛ́nu? Étɛ́ lɛ́ jí mǐ ka ná ɖɔ xó dó ɖo xóta élɔ́ mɛ? (Jaan 5:28, 29)

³ É ɖo mɔ̌ có, hweɖélɛ́nu ɔ, mǐ sixú kan nǔ e Ablaxámu kanbyɔ́ lɛ́ é ɖɔhun byɔ́. Mǐ tlɛ sixú kanbyɔ́ mǐɖée ɖɔ: ‘É ka sixú nyɔ́ bló bɔ mɛ e Jexóva ko sú kún dó ná lɛ́ é, ɖi mɛ ɖěɖěe é sú kún dó ná ɖo Sodɔ́mu kpó Gomɔ́ɔ kpó lɛ́ é ná lɛ́ wá nɔ gbɛ a? Yě mɛ ɖě ka ná fɔ́n hwenu e è ná “fɔ́n . . . nǔagɔwatɔ́ lɛ́” sín kú é a?’—Mɛ. 24:15.

⁴ Mi nú mǐ ní lɛ́vɔ́ gbɔn nǔ e mǐ tuun dó fínfɔ́n sín kú wú lɛ́ é jí. Agaɖanu din ɔ, mǐ mɔ nukúnnúmɔjɛnǔmɛ e è vɔ́ jlá ɖó lɛ́ é dó mɛ e è ná fɔ́n sín kú “bónú yě ná nɔ gbɛ” lɛ́ é kpó mɛ e è ná fɔ́n sín kú “bo ná ɖɔ hwɛ xá” lɛ́ é kpó wú.a (Xa Jaan 5:28, 29.) Nukúnnúmɔjɛnǔmɛ énɛ́ zɔ́n bɔ mǐ ɖó ná bló hǔzúhúzú ɖé lɛ́. Mǐ ná ɖɔ xó dó yě wú ɖo xóta élɔ́ kpó éé bɔ d’é wú é kpó mɛ. Nú nǔ e kunkplá hwɛ jlɔ́jlɔ́ e Jexóva nɔ ɖɔ é ɔ, mǐ ná to ɖɔ xó dó nǔ e mǐ ma tuun ǎ lɛ́ é jí jɛ nukɔn, bɔ énɛ́ gúdo ɔ, mǐ ná wá ɖɔ xó dó nǔ e mǐ tuun lɛ́ é jí.

NǓ E MǏ MA TUUN Ǎ LƐ́ É

5. Étɛ́ lɛ́ wěma mǐtɔn lɛ́ ka ɖɔ dó mɛ ɖěɖěe sín kún è sú dó ɖo Sodɔ́mu kpó Gomɔ́ɔ kpó lɛ́ é wú ɖ’ayǐ?

⁵ Ð’ayǐ ɔ, wěma mǐtɔn lɛ́ ɖɔ xó dó nǔ e gbo mɛ ɖěɖěe Jexóva ɖó hwɛ ná ɖɔ yě nyí nǔagɔwatɔ́ lɛ́ é wú. Mǐ ɖɔ ɖ’ayǐ ɖɔ nukúnɖíɖó fínfɔ́n sín kú tɔn ɖě kún sɔ́ ɖe nú mɛ mɔ̌hun lɛ́ ó, ɖi mɛ e nɔ Sodɔ́mu kpó Gomɔ́ɔ kpó lɛ́ é. Amɔ̌, ée mɛsɛntɔ́ gbejínɔtɔ́ ɔ kplɔ́n nǔ ganjí dó xó ɔ wú, bo lɛ́ xo ɖɛ d’é wú ganjí gúdo é ɔ, é za wě ɖɔ mǐ kún sixú ɖɔ mɔ̌ bo tɛ afɔ jí ó. Étɛ́wú?

6. Nǎ kpɔ́ndéwú hwɛ e Jexóva ɖó nú nǔagɔwatɔ́ lɛ́ é tɔn ɖé lɛ́. Étɛ́ mǐ ma ka tuun ǎ?

⁶ Tan Biblu tɔn gěgé ɖɔ xó nú mǐ dó lěe Jexóva ɖó hwɛ nú nǔagɔwatɔ́ lɛ́ gbɔn é wú. Ði kpɔ́ndéwú ɔ, Jexóva sú kún dó nú mɛ lɛ́ bǐ ɖo Sinvɔgbɛ ɔ hwenu, Nɔwée kpó xwédo tɔn kpó jɛ́n é jó dó. Gɔ́ ná ɔ, é zán Izlayɛ́li ví lɛ́ dó sú kún dó nú akɔta tɛ́nwe e nɔ nɔ Akpádídó yíkúngban ɔ jí lɛ́ é. É lɛ́ zán wɛnsagun ɖokpó dó hu ahwanfuntɔ́ Asilíi tɔn 185000 ɖo zǎnto ɖokpó mɛ. (Bǐb. 7:23; Sɛ́n. 7:1-3; Eza. 37:36, 37) Ðo ninɔmɛ énɛ́ lɛ́ bǐ mɛ ɔ, Biblu ɖɔ nú mǐ nyi wɛn ɖɔ Jexóva sú kún dó nú mɛ énɛ́ lɛ́ bǐ mlɛ́mlɛ́ bɔ nukúnɖíɖó fínfɔ́n sín kú tɔn ɖě kún sɔ́ ɖe nú yě ó wɛ a? Éǒ, é ɖɔ mɔ̌ ǎ. Étɛ́wú mǐ ka sixú ɖɔ mɔ̌?

7. Étɛ́ lɛ́ mǐ ma ka tuun dó mɛ ɖěɖěe è sú kún dó ná ɖo Sinvɔgbɛ ɔ hwenu lɛ́ é alǒ hwenu e Izlayɛ́li ví lɛ́ ɖo Kanáa yíkúngban ɔ yi wɛ lɛ́ é wú ǎ? (Kpɔ́n ɖiɖe .)

⁷ Mǐ tuun lěe Jexóva ɖó hwɛ nú yě mɛ ɖokpó ɖokpó gbɔn é ǎ; mɔ̌ jɛ́n mǐ ma lɛ́ tuun nú ali ɔ hun nú mɛ e è hu lɛ́ é nú yě ná kplɔ́n nǔ dó Jexóva wú bo lɛ́ kɔ sín hwɛ yětɔn lɛ́ gúdo alǒ gbɔ ǎ é nɛ́. Ée Biblu ɖɔ xó dó hwenu e sin vɔ gbɛ ɔ é wú é ɔ, é ɖɔ ɖɔ Nɔwée “nyí mɛɖé bo nɔ jlá nǔjlɔ́jlɔ́wiwa.” (2 Pi. 2:5) Amɔ̌, é ɖɔ ɖɔ hwenu e Nɔwée ɖo tɔjíhún ɖaxó ɖé gbá wɛ é ɔ, é lɛ́ tɛ́n kpɔ́n bo yi gb’akpá nú mɛ ɖěɖěe ɖo ayǐkúngban ɔ jí bo ná dɔn ɖo Sinvɔgbɛ ɔ hwenu lɛ́ é ɖokpó ɖokpó ǎ. Mɔ̌ ɖokpó ɔ, ɖo akɔta Kanáanu lɛ́ tɔn lɛ́ sín xó ɔ mɛ ɔ, mǐ tuun nú ali hun nú mɛ nyanya énɛ́ lɛ́ bǐ nú yě ná kplɔ́n nǔ dó Jexóva wú bo húzú jijɔ ǎ.

8. Étɛ́ lɛ́ mǐ ma ka tuun dó Sodɔ́munu lɛ́ kpó Gomɔ́ɔnu lɛ́ kpó wú ǎ?

⁸ Sodɔ́munu lɛ́ kpó Gomɔ́ɔnu lɛ́ kpó ka lo? Tɛ́ntin yětɔn wɛ nya nǔjlɔ́jlɔ́watɔ́ e nɔ nyí Lɔti é nɔ gbɛ ɖe. Amɔ̌, mǐ ka tuun nú Lɔti ɖɔ mawuxó nú yě mɛ bǐ a? Éǒ. É ɖo wɛn ɖɔ mɛ nyanya wɛ nú yě, amɔ̌, yě bǐ tuun nǔ ɖagbe ɖo nǔ nyanya mɛ a? Flín ɖɔ súnnu e ɖo toxo ɔ mɛ lɛ́ é d’ahwan gbě bo wá, bá ɖóxó xá jǒnɔ e wá Lɔti gɔ́n lɛ́ é gǎnnugǎnnu. Biblu ɖɔ ɖɔ “bɛ́sín yɔkpɔ́vú lɛ́ jí káká yi degénɔ kpikpoe lɛ́ jí” ɖo ahwan ɔ mɛ. (Bǐb. 19:4; 2 Pi. 2:7) Mǐ ka tuun nú Mawu nǔbláwǔkúnúmɛtɔ́ mǐtɔn Jexóva ɖó kúhwɛ nú yě mɛ ɖokpó ɖokpó bɔ nukúnɖíɖó fínfɔ́n sín kú tɔn ɖě sɔ́ ɖe nú yě ǎ dóó a? Jexóva ná gǎnjɛwú Ablaxámu ɖɔ nǔjlɔ́jlɔ́watɔ́ wǒ vɔ́vɔ́ kún ɖo toxo énɛ́ mɛ ó. (Bǐb. 18:32) Mɔ̌ mɛ ɔ, nǔagɔwatɔ́ wɛ yě nyí, bɔ hwɛ Jexóva tɔn jɔ bɔ é sú kún yětɔn dó ɖó nǔ e yě wa lɛ́ é wú. Mǐ ka sixú ɖɔ bo tɛ afɔ jí ɖɔ, yě mɛ ɖě kún ná fɔ́n hwenu e “è ná fɔ́n . . . nǔagɔwatɔ́ lɛ́ . . . sín kú” é ó a? Éǒ, mǐ sixú ɖɔ bo dó zǒgbe jí ǎ.

9. Étɛ́ mǐ ma ka tuun dó Salomɔ́ɔ wú ǎ?

⁹ Ðo alɔ ɖěvo mɛ ɔ, Biblu lɛ́ ɖɔ xó dó nǔjlɔ́jlɔ́watɔ́ e wá húzú nǔagɔwatɔ́ lɛ́ é wú. Kpɔ́ndéwú tɔn ɖokpó wɛ nyí axɔ́sú Salomɔ́ɔ. É tuun mɛ alɔkpa e Jexóva nyí é, bo lɛ́ tuun lěe é ɖó ná sɛn ɛ gbɔn é, bɔ Jexóva kɔn nyɔ̌ná gěgé dó jǐ tɔn; amɔ̌, é wá yá é ɔ, Salomɔ́ɔ jɛ vodún lɛ́ sɛn jí. Hwɛ e é hu lɛ́ é dó xomɛsin nú Jexóva bɔ nǔ e yě ji lɛ́ é nɔ ayǐ nú xwe kanweko mɔ̌kpán. Nǔgbó wɛ ɖɔ Biblu ɖɔ ɖɔ Salomɔ́ɔ “zán wá kú, bɔ è sɔ́ ɛ ɖó tɔ́ tɔn Davídi Toxo mɛ.” (1 Axɔ́. 11:5-9, 43; 2 Axɔ́. 23:13) Amɔ̌, ɖó Biblu zán xógbe énɛ́ wútu ɔ, xlɛ́xlɛ́ wɛ é ɖe ɖɔ Jexóva ná fɔ́n Salomɔ́ɔ sín kú a? Biblu ɖɔ ǎ. Mɛɖé lɛ́ sixú lin ɖɔ Salomɔ́ɔ ná fɔ́n sín kú, ɖó Biblu ɖɔ ɖɔ “mɛ e kú é ɔ, è ko tún kan n’i sín hwɛ tɔn lɛ́ sí.” (Hlɔ̌. 6:7) Nǔgbó wɛ, amɔ̌ xlɛ́xlɛ́ wɛ énɛ́ ɖe ɖɔ è ná fɔ́n mɛ e ko kú lɛ́ é bǐ sín kú, cí nǔ ɖɔ è ko kú kpowun ɔ, è nɔ ɖ’acɛ nú fínfɔ́n sín kú ɖɔhun ǎ. Nǔníná ɖé wɛ fínfɔ́n sín kú nyí sín Mawu mǐtɔn wǎnyíyínɔ ɔ gɔ́n. Mɛ ɖěɖěe é jló ná hun ali ɔ ná bɔ yě ná sɛn ɛ káká sɔ́yi lɛ́ é wɛ é nɔ fɔ́n sín kú. (Jɔb. 14:13, 14; Jaan 6:44) È ka ná dó ajɔ énɛ́ Salomɔ́ɔ a? Jexóva wɛ tuun xósin ɔ; mǐdɛɛ lɛ́ tuun ǎ. Amɔ̌, mǐ tuun ɖɔ Jexóva ná wa nǔ e sɔgbe é.

NǓ E MǏ TUUN LƐ́ É

10. Nɛ̌ nǔ ka nɔ cí nú Jexóva dó kún súsú dó nú gbɛtɔ́ lɛ́ wú? (Ezekiyɛ́li 33:11) (Kpɔ́n ɖiɖe ɔ lɔmɔ̌.)

¹⁰ Xa Ezekiyɛ́li 33:11. Nú nǔ e kan lěe Jexóva nɔ dá hwɛ nú gbɛtɔ́ lɛ́ gbɔn é ɔ, Jexóva ɖɔ lěe nǔ nɔ cí n’i é nú mǐ kpó xomɛnyínyɔ́ kpó. Jexóva sɔ́ d’ayi mɛ nú mɛsɛ́dó Piyɛ́ɛ b’ɛ ɖe xó sín nǔ e gbeyíɖɔ Ezekiyɛ́li wlán é mɛ, bo ɖɔ: “Jexóva . . . jló ɖɔ è ní sú mɛ ɖěbǔ sín kún dó ǎ.” (2 Pi. 3:9) Kpó nukúnnúmɔjɛnǔmɛ nǔgbó énɛ́ e dó gbɔ nú mɛ é tɔn kpó ɔ, mǐ tuun ɖɔ ényí hwɛjijɔ ɖagbe e wú Jexóva ná sú kún dó nú mɛɖé bǐ mlɛ́mlɛ́ é ma ɖe ǎ ɔ, é kún ná wa mɔ̌ ó. É nɔ kú nǔbláwǔ nú mɛ titewungbe, bo nɔ sɔ́ hwɛ kɛ mɛ hweɖébǔnu e é nyɔ́ bló dó é.

11. Mɛ̌ mɛ̌ e è ma ka ná fɔ́n sín kú ǎ? Nɛ̌ mǐ ka wa gbɔn bo tuun mɔ̌?

¹¹ Étɛ́ mǐ ka tuun dó mɛ e ma ná fɔ́n sín kú ǎ lɛ́ é wú? Mɛ mɔ̌hun e sín xó Biblu ɖɔ é sukpɔ́ ǎ.b Jezu ɖe xlɛ́ ɖɔ è kún ná fɔ́n Judási Isikaliɔ́ti sín kú ó. (Mak. 14:21; kpɔ́n Jaan 17:12 kpó tínmɛ e ɖo wěmafɔ énɛ́ jí ɖo Biblu nǔkplɔ́nkplɔ́n tɔn mɛ é kpó lɔmɔ̌.) Judási jló bo klán gbe xá Jexóva Mawu kpó Vǐ tɔn kpó. (Kpɔ́n Maki 3:29.) Mɔ̌ ɖokpó ɔ, Jezu ɖɔ dó sinsɛngán ɖěɖěe klán gbe xá ɛ lɛ́ é ɖé lɛ́ wú ɖɔ yě kú ɔ, yě kún ná fɔ́n sín kú ó. (Mat. 23:33) Bɔ mɛsɛ́dó Pɔ́lu gb’akpá nú mɛ ɖɔ, gǔfɔ́ndómawujítɔ́ ɖěɖěe hwɛ yětɔn lɛ́ ma vɛ́ nú yě ǎ lɛ́ é kún ná fɔ́n sín kú ó.—Ebl. 6:4-8; 10:29.

12. Étɛ́ mǐ ka tuun dó nǔbláwǔkúnúmɛ Jexóva tɔn wú? Nǎ kpɔ́ndéwú ɖé lɛ́.

¹² É ɖo mɔ̌ có, étɛ́ mǐ ka tuun dó nǔbláwǔkúnúmɛ Jexóva tɔn wú? Nɛ̌ é ka ɖe xlɛ́ ɖɔ émí kún “jló ɖɔ è ní sú mɛ ɖěbǔ sín kún dó” ó gbɔn? Mǐ ní gbéjé lěe é kú nǔbláwǔ nú mɛ e hu hwɛ syɛ́nsyɛ́n lɛ́ é ɖé lɛ́ gbɔn é kpɔ́n. Axɔ́sú Davídi hu hwɛ syɛ́nsyɛ́n ɖěbɔdóɖěwú ɖé lɛ́, mɛsibiba kpó mɛhuhu kpó ɖo hwɛ énɛ́ lɛ́ mɛ. Amɔ̌, hwɛ Davídi tɔn lɛ́ vɛ́ n’i, énɛ́ wú ɔ, Jexóva kú nǔbláwǔ n’i bo sɔ́ hwɛ kɛ ɛ. (2 Sam. 12:1-13) Axɔ́sú Manasée wa nǔ nyanya gěgé ɖo ɖibla nyí gbɛzán tɔn bǐ mɛ. Ninɔmɛ Manasée tɔn tlɛ́n asá sɔmɔ̌ có, Jexóva kú nǔbláwǔ n’i bo sɔ́ hwɛ kɛ ɛ ɖó hwɛ tɔn lɛ́ vɛ́ n’i wútu. (2 Tan 33:9-16) Kpɔ́ndéwú énɛ́ lɛ́ flín mǐ ɖɔ ényí hwɛjijɔ e wú Jexóva ná kú nǔbláwǔ nú mɛ lɛ́ é tíin ɔ, é nɔ wa mɔ̌. É ná fɔ́n mɛ énɛ́ lɛ́ sín kú, ɖó yě mɔ nǔ jɛ wú ɖɔ émí hu hwɛ syɛ́nsyɛ́n bɔ hwɛ yětɔn lɛ́ vɛ́ nú yě wútu.

13. (a) Aniwú Jexóva ka kú nǔbláwǔ nú Ninívunu lɛ́? (b) Étɛ́ Jezu ka wá ɖɔ dó Ninívunu lɛ́ wú ɖo nukɔnmɛ?

¹³ Mǐ lɛ́ tuun lěe Jexóva kú nǔbláwǔ nú Ninívunu lɛ́ gbɔn é. Mawu ɖɔ nú Jonási ɖɔ: “Agbɔ̌n kpé mì dó dǎka e xo wɛ to ɔ mɛ nu lɛ́ ɖe ɔ wú.” Amɔ̌, ée hwɛ yětɔn lɛ́ vɛ́ nú yě é ɔ, Jexóva sɔ́ hwɛ kɛ yě kpó xomɛnyínyɔ́ kpó. Jexóva kú nǔbláwǔ nú yě hú lěe Jonási kú nǔbláwǔ nú yě gbɔn é flaflá tɔn. É byɔ́ ɖɔ Mawu ní flín nǔ gbeyíɖɔ tɔn e ɖo xomɛsin jí é ɖɔ Ninívunu lɛ́ kún “tuun nǔ e nyɔ́ ɔ kpó nǔ e nylá ɔ kpó” ó. (Joná. 1:1, 2; 3:10; 4:9-11) Nukɔnmɛ ɔ, Jezu zán kpɔ́ndéwú énɛ́ dó kplɔ́n nǔ mɛ dó hwɛ jlɔ́jlɔ́ ɖiɖɔ Jexóva tɔn kpó nǔbláwǔkúnúmɛ tɔn kpó wú. Jezu ɖɔ ɖɔ Ninívunu e hwɛ yětɔn lɛ́ vɛ́ nú yě lɛ́ é ná “fɔ́n sín kú ɖo hwɛɖiɖɔ ɔ hwenu.”—Mat. 12:41.

14. Ali tɛ́ ‘fɔ́n e è ná fɔ́n mɛ sín kú bá ɖɔ hwɛ xá mɛ’ é ka ná hun nú Ninívunu lɛ́?

¹⁴ “Hwɛɖiɖɔ” tɛ́ hwenu wɛ Ninívunu lɛ́ ka ná “fɔ́n sín kú”? Jezu ɖɔ xó dó mɛ e “è ná fɔ́n [sín kú] bo ná ɖɔ hwɛ xá” lɛ́ é wú. (Jaan 5:29) Axɔ́súɖuɖu tɔn xwe afatɔ́n tɔn e hwenu è ná fɔ́n “nǔjlɔ́jlɔ́watɔ́ lɛ́ kpó nǔagɔwatɔ́ lɛ́ kpó” bǐ é wú ɖɔ xó dó wɛ é ɖe. (Mɛ. 24:15) “È ná fɔ́n” nǔagɔwatɔ́ lɛ́ “bo ná ɖɔ hwɛ xá yě.” Énɛ́ ɖo xlɛ́xlɛ́ wɛ ɖɔ nú è fɔ́n yě sín kú gúdo ɔ, Jexóva kpó Jezu kpó ná kpɔ́n ɖɔ yě ka nɔ se tónú nú nǔ e kplɔ́n wɛ yě ɖe lɛ́ é, bo nɔ zán yě a jí. Ényí Ninívunu e fɔ́n sín kú é ɖé gbɛ́ ɖɔ émí kún ná sɛn Jexóva ó ɔ, Jexóva ná kpo è nyi gbɛ ǎ. (Eza. 65:20) Amɔ̌, ali ná hun nú mɛ ɖěɖěe wá gbeta ɔ kɔn bo ná sɛn Jexóva kpó gbejíninɔ kpó lɛ́ é bǐ bɔ yě ná nɔ gbɛ káká sɔ́yi!—Dan. 12:2, nwt.

15. (a) Aniwú mǐ ma ka ɖó ná ɖɔ ɖɔ è kún ná fɔ́n mɛ ɖěɖěe sín kún è sú dó ɖo Sodɔ́mu kpó Gomɔ́ɔ kpó lɛ́ é ɖěbǔ ó ǎ? (b) Nɛ̌ mǐ ka sixú mɔ nukúnnú jɛ xó ɖěɖěe è ɖɔ ɖo Judi 7 mɛ lɛ́ é mɛ gbɔn? (Kpɔ́n gbǎví “Étɛ́ ɖɔ gbé Judi ka ja?”)

¹⁵ Hwenu e Jezu ɖo xó ɖɔ dó Sodɔ́munu lɛ́ kpó Gomɔ́ɔnu lɛ́ kpó wú wɛ é ɔ, é ɖɔ ɖɔ “Hwɛɖɔzán ɔ” ná bɔ wǔ nú yě hú mɛ ɖěɖěe gbɛ́ émí kpó nǔkplɔ́nmɛ émítɔn lɛ́ kpó lɛ́ é. (Mat. 10:14, 15; 11:23, 24; Luk. 10:12) Étɛ́ ɖɔ gbé é ka ja? Sin dó xó jí wɛ Jezu ka ɖe kpowun dó ɖo xlɛ́xlɛ́ wɛ ɖɔ mɛ e nɔ gbɛ ɖo hwe émítɔn nu lɛ́ é tlɛ nylá hú Sodɔ́munu lɛ́ kpó Gomɔ́ɔnu lɛ́ kpó a? Flín ɖɔ hwenu e Jezu ɖɔ ɖɔ Ninívunu lɛ́ “ná fɔ́n sín kú ɖo hwɛɖiɖɔ ɔ hwenu” é ɔ, ɖiɖɔ wɛ é ɖe ɖɔ yě ná fɔ́n tlɔlɔ lě. É ɖo wɛn ɖɔ, “Hwɛɖɔzán” ɖokpó ɔ xó ɖɔ wɛ é ɖe ɖo ninɔmɛ we lɛ́ bǐ mɛ. Ninívunu lɛ́ ɖɔhun ɔ, Sodɔ́munu lɛ́ kpó Gomɔ́ɔnu lɛ́ kpó wa nǔ nyanya lɛ́. Amɔ̌, ali hun nú Ninívunu lɛ́ bɔ yě ná ɖe xlɛ́ ɖɔ hwɛ émítɔn lɛ́ vɛ́ nú émí. Gɔ́ ná ɔ, flín nǔ e Jezu ɖɔ dó mɛ e “è ná fɔ́n [sín kú] bo ná ɖɔ hwɛ xá yě” lɛ́ é wú é. “Mɛ e wa nǔ nyanya lɛ́ é” wɛ nú yě. (Jaan 5:29) Énɛ́ wú ɔ, é cí ɖɔ nukúnɖíɖó ɖe nú Sodɔ́munu lɛ́ kpó Gomɔ́ɔnu lɛ́ kpó ɖɔhun. É sixú nyɔ́ bló bɔ é hwe bǐ ɔ, yě mɛ ɖé lɛ́ ná fɔ́n sín kú, bɔ ali sixú hun nú mǐ bɔ mǐ ná kplɔ́n nǔ yě dó Jexóva kpó Jezu Klísu kpó wú!

16. Étɛ́ mǐ ka tuun dó lěe Jexóva ná wá gbeta mɛ ɖěɖěe è ná fɔ́n sín kú lɛ́ é tɔn kɔn gbɔn é wú? (Jelemíi 17:10)

¹⁶ Xa Jelemíi 17:10. Ðo wěmafɔ énɛ́ mɛ ɔ, mǐ xa nǔ e mǐ tuun dó lěe Jexóva nɔ ɖɔ hwɛ gbɔn é wú é: Hwebǐnu wɛ Jexóva “nɔ tuun nǔ e lin wɛ gbɛtɔ́ ɖe ɖo ayi tɔn mɛ é. Nǔ e ɖo mɛ xomɛ ɔ, [é] nɔ mɔ bo nɔ da kpɔ́n.” Nú nǔ e kan fínfɔ́n sín kú ɖo sɔgúdo é ɔ, é ná “wa nǔ nú mɛ lěe walɔ mɛ ɔ tɔn byɔ́ gbɔn é.” Ényí hwɛjijɔ e wú Jexóva ná kú nǔbláwǔ nú mɛ é ɖé ma tíin ǎ ɔ, é nɔ wa mɔ̌ ǎ, amɔ̌, nú é byɔ́ ɖɔ é ní kú nǔbláwǔ nú mɛ hweɖébǔnu ɔ, é nɔ wa mɔ̌. Énɛ́ wú ɔ, nú mǐ ma kú d’é jí ɖɔ Biblu ɖɔ ɖɔ è ná fɔ́n mɛɖé sín kú ǎ ɔ, mǐ ɖó ná ɖɔ gbeɖé ɖɔ è ná fɔ́n mɛ ɔ sín kú ǎ!

“HWƐÐƆTƆ́ GBƐ Ɔ BǏ TƆN” NÁ ‘XWEDÓ HWƐJIJƆ DÓ WA NǓ’

17. Étɛ́ sɔgúdo ka hɛn nu nú mɛ ɖěɖěe ko kú lɛ́ é?

¹⁷ Sín hwenu e Adámu kpó Ɛvu kpó xo kpóɖó nú Satáan bo fɔ́n gǔ dó Jexóva Mawu jí é ɔ, gbɛtɔ́ lǐva mɔ̌kpán ko kú. “Kú” ɔ, “kɛntɔ́” baɖabaɖa ɖé wɛ! (1 Kɔ. 15:26) Étɛ́ ka ɖo te kpɔ́n mɛ énɛ́ lɛ́ bǐ? Mɛ kpɛɖé jɛ́n è ná fɔ́n ɖo ahwanvú Klísu tɔn gbejínɔtɔ́ lɛ́ mɛ, bo ná ná yě gbɛ jɔmakú ɖo jǐxwé; kɛ́n yětɔn wɛ nyí 144000. (Nǔɖe. 14:1) Súnnu kpó nyɔ̌nu kpó gbejínɔtɔ́ éé yí wǎn nú Jexóva lɛ́ é gěgé ná ɖo “nǔjlɔ́jlɔ́watɔ́” e “è ná fɔ́n,” bɔ yě ná nɔ gbɛ káká sɔ́yi ɖo ayǐkúngban jí lɛ́ é mɛ, ényí yě kpo ɖo nǔjlɔ́jlɔ́watɔ́ nyí wɛ ɖo Axɔ́súɖuɖu xwe afatɔ́n tɔn Klísu tɔn kpó mɛtɛ́nkpɔ́n gǔdo tɔn ɔ kpó hwenu ɔ nɛ́. (Dan. 12:13; Ebl. 12:1) Gɔ́ ná ɔ, ɖo xwe afatɔ́n ɔ hwenu ɔ, ali ná hun nú “nǔagɔwatɔ́ lɛ́,” yě wɛ nyí mɛ ɖěɖěe ma sɛn Jexóva kpɔ́n gbeɖé ǎ lɛ́ é kpó mɛ ɖěɖěe tlɛ wa nǔ nyanya lɛ́ é kpó, bɔ yě ná ɖyɔ́ nǔwalɔ yětɔn lɛ́ lobo jɛ Mawu sɛn jí kpó gbejíninɔ kpó. (Luk. 23:42, 43) É ɖo mɔ̌ có, mɛɖé lɛ́ dá tawun, bo kán ɖ’é jí bǐ mlɛ́mlɛ́ bá fɔ́n gǔ dó Jexóva kpó linlin tɔn lɛ́ kpó jí, énɛ́ wú ɔ, é wá gbeta ɔ kɔn ɖɔ è kún ná fɔ́n mɛ énɛ́ lɛ́ sín kú gbeɖé ó.—Luk. 12:4, 5.

18-19. (a) Étɛ́wú mǐ ka sixú ɖeji dó lěe Jexóva ná ɖɔ hwɛ xá mɛ ɖěɖěe ko kú lɛ́ é gbɔn é wú? (Ezayíi 55:8, 9) (b) Étɛ́ lɛ́ jí mǐ ka ná ɖɔ xó dó ɖo xóta e bɔ d’é wú é mɛ?

¹⁸ Mǐ ka sixú kú d’é jí bǐ mlɛ́mlɛ́ ɖɔ Jexóva nɔ wá gbeta e sɔgbe é kɔn hwebǐnu, hwenu e é ɖo hwɛ gbɛtɔ́ lɛ́ tɔn ɖɔ wɛ é a? Ganjí! Jexóva wɛ nyí “Hwɛɖɔtɔ́ gbɛ ɔ bǐ tɔn” éé ma ɖó blɔ̌ ǎ, ɖó nǔnywɛ́ hú gǎn bo nɔ lɛ́ kú nǔbláwǔ nú mɛ é. Ablaxámu mɔ nukúnnú jɛ énɛ́ wú ganjí. Jexóva kplɔ́n azɔ̌ Vǐ tɔn, bo sɔ́ hwɛɖiɖɔ sín azɔ̌ lɛ́ bǐ d’alɔ mɛ n’i. (Jaan 5:22) Jexóva kpó Jezu kpó bǐ sixú tuun nǔ e ɖo gbɛtɔ́ ɖokpó ɖokpó sín ayi mɛ é. (Mat. 9:4) Énɛ́ wú ɔ, yě ná wa “nǔ e sɔgbe é” hwebǐnu, hwenu e yě ná ɖo hwɛ ɖɔ xá mɛ ɖokpó ɖokpó wɛ é!

¹⁹ Mi nú mǐ ní kán ɖ’é jí bá ɖeji dó Jexóva kpó gbeta e kɔn é nɔ wá lɛ́ é kpó wú. Mǐ tuun ɖɔ mǐ kún jɛxá bá ɖɔ hwɛ ó, éyɛ́ ka jɛxá! (Xa Ezayíi 55:8, 9.) Énɛ́ wú ɔ, kpó jiɖiɖe kpó ɔ, mǐ nɔ jó hwɛɖiɖɔ ɔ bǐ d’alɔ mɛ nú Jexóva kpó Vǐ tɔn kpó. Gɔ́ ná ɔ, mǐ tuun ɖɔ Axɔ́sú mǐtɔn Jezu ná wa nǔ jlɔ́jlɔ́, bo lɛ́ kú nǔbláwǔ nú mɛ Tɔ́ tɔn ɖɔhun. (Eza. 11:3, 4) Amɔ̌, étɛ́ mǐ ka sixú ɖɔ dó lěe Jexóva kpó Jezu kpó ná ɖɔ hwɛ gbɛtɔ́ lɛ́ tɔn gbɔn ɖo wǔvɛ́ ɖaxó ɔ hwenu é wú? Étɛ́ mǐ ma ka tuun ǎ? Étɛ́ mǐ ka tuun? Xóta e bɔ d’é wú é ná ná xósin nú nǔkanbyɔ́ énɛ́ lɛ́.