Nǔ lěe Jezu jlá wɛn ɔ kpó kanɖódónǔwú kpó gbɔn é ní kplɔ́n nǔ we

1. Ðɔ jijɔ e nɔ ɖe mɛsɛntɔ́ Jexóva tɔn lɛ́ ɖó vo nú gbɛ ɔ é ɖokpó.

ALI e nu mɛsɛntɔ́ Jexóva tɔn lɛ́ gbɔn vo nú klisánwun nyíjɛtɔ́ lɛ́ ɖe é ɖokpó wɛ nyí kan e yě nɔ ɖóa dó wɛnjíjlázɔ́ ɔ wú é. (Ti. 2:14) Amɔ̌, hweɖélɛ́nu ɔ, a sixú nɔ mɔ ɖɔ akpakpa kún nɔ sɔ́ émí dó sinsɛnzɔ́ ɔ wú ó. Bóyá lěe nǔ cí nú mɛxó agun tɔn azɔ̌syɛ́nsyɛ́nwatɔ́ e ɖɔ xó élɔ́ é wɛ é nɔ cí nú hwi lɔ: “Hweɖélɛ́nu ɔ, akpakpa wɛn ɔ jíjlá tɔn ɖěbǔ nɔ sɔ́ mì ǎ.”

2. Hweɖélɛ́nu ɔ, étɛ́ ka sixú zɔ́n bɔ é ná vɛ́ wǔ bɔ è ná kpo ɖo kan ɖó dó sinsɛnzɔ́ ɔ wú wɛ?

² Akpakpa sixú nɔ sɔ́ mǐ dó alɔ ɖíɖó ɖo akpáxwé mawusinsɛn mímɛ́ mǐtɔn tɔn ɖěvo lɛ́ mɛ wú hú alɔ ɖíɖó ɖo mawuxóɖiɖɔ agbawungba tɔn mɛ. Étɛ́wú? Ényí mǐ gbá xɔ tutoblónúnǔ ɔ tɔn lɛ́, alǒ hɛn yě ɖó mímɛ́ jí, ɖ’alɔ ɖo sɔhɛnmɛzɔ́ lɛ́ mɛ alǒ dó wǔsyɛ́n lanmɛ nú nɔví mǐtɔn lɛ́ ɔ, mǐ sixú mɔ le e é ná hɛn wá é afɔjíafɔjí, bɔ nǔ énɛ́ e wú mǐ kpé bo wa lɛ́ é ná lɛ́ jɛmɛ nú mǐ. Mǐ nɔ ɖu fífá kpó wǎnyíyí kpó e mǐ nɔ mɔ hwenu e mǐ ɖo azɔ̌ wa ɖó kpɔ́ xá nɔví mǐtɔn lɛ́ wɛ é sín le, bo nɔ tuun ɖɔ nǔ e mǐ wa nú yě é nɔ su nukún yětɔn mɛ. Ðo alɔ ɖěvo mɛ ɔ, mǐ sixú ko ɖo wɛn ɔ jlá wɛ ɖo xá ɖé mɛ nú xwe mɔ̌kpán, bɔ é ka hɛn le káká ɖé wá ǎ. Alǒ mǐ sixú nɔ xo go mɛ e nɔ gbɛ́ wɛn ɔ lɛ́ é. Mǐ lɛ́ tuun ɖɔ ée vivɔnu ɔ ná ɖo sisɛkpɔ́ wɛ é ɔ, mɛ e ná yí wɛn ɔ lɛ́ é sixú ɖe kpo. (Mat. 10:22) Étɛ́ ka sixú d’alɔ mǐ bɔ akpakpa e nɔ sɔ́ mǐ dó wɛnjíjlázɔ́ ɔ wú é ma ná ɖe kpo ǎ, é nyɔ́ wa ɔ, jɛ wɛ é ná lɛ́ jɛjí?

3. Nɛ̌ Luki 13:6-9 ka ɖe lěe Jezu nɔ ɖó kan dó nǔ wú gbɔn é xlɛ́ gbɔn?

³ Kpɔ́ndéwú Jezu tɔn gbígbéjé kpɔ́n sixú kplɔ́n nǔɖé mǐ dó akpakpa e ná sɔ́ mǐ dó wɛnjíjlázɔ́ ɔ wú é wú. Akpakpa gɔn sísɔ́ ɛ gbeɖé ɖo sinsɛnzɔ́ tɔn mɛ ǎ. Nǔgbó ɔ, ée hwenu ɖo yiyi wɛ é ɔ, é lɛ́ ɖó kan dó azɔ̌ tɔn wú. (Xa Luki 13:6-9.) Vǐwunzɔ́watɔ́ e zán xwe atɔn dó kpé nukún dó vǐwuntín ɖé wú, b’ɛ ma ka ná sínsɛ́n ɖě ǎ é ɖɔhun ɔ, Jezu zán xwe atɔn mɔ̌ dó jlá wɛn ɔ Jwifu lɛ́, yě mɛ gěgé ka yí ǎ. Amɔ̌, lěe vǐwunzɔ́watɔ́ ɔ ma jó gbe bo lin ɖɔ fígitín ɔ kún ná ná sínsɛ́n ó ǎ é ɖɔhun ɔ, Jezu jó gbe dó mɛ lɛ́ wú alǒ dɔn afɔ d’ayǐ ɖo sinsɛnzɔ́ tɔn mɛ ǎ. É nyɔ́ wa ɔ, é lɛ́ dó gǎn syɛ́nsyɛ́n bónú wɛn tɔn ná byɔ́ ayi yětɔn mɛ.

4. Ðɔ nǔ e kpɔ́ndéwú Jezu tɔn sixú kplɔ́n mǐ é ɛnɛ.

⁴ Ðo xóta élɔ́ mɛ ɔ, mǐ ná ɖɔ xó dó lěe Jezu ɖe kanɖódónǔwú xlɛ́, ɖo tají ɔ, ɖo sunzán ayizɛ́n gǔdo tɔn sinsɛnzɔ́ tɔn tɔn hwenu gbɔn lɛ́ é jí. Nǔ kplɔ́nkplɔ́n dó nǔ e é kplɔ́n mɛ é wú kpó nǔ e é wa é sín kpɔ́ndéwú xwixwedó kpó ná d’alɔ mǐ bɔ mǐ ná kpo ɖo kan ɖó dó nǔ wú wɛ ɖo égbé. Mi nú mǐ ní gbéjé kpɔ́ndéwú Jezu tɔn kpɔ́n ɖo ali ɛnɛ nu: (1) É sɔ́ ayi ɖó jlǒ Jexóva tɔn jí, (2) é hɛn nǔɖɔɖayǐ Biblu tɔn lɛ́ ayi mɛ, (3) é ɖeji dó alɔdó Jexóva tɔn wú, kpó (4) é kpo ɖo linlin ɖagbe ɖó wɛ ɖɔ mɛɖé lɛ́ ná ɖótó émí kpó.

É SƆ́ AYI ÐÓ JLǑ JEXÓVA TƆN JÍ

5. Nɛ̌ Jezu ka ɖe xlɛ́ ɖɔ émí sɔ́ ayi ɖó jlǒ Mawu tɔn wiwa jí gbɔn?

⁵ Jezu jlá ‘wɛn ɖagbe Axɔ́súɖuto ɔ tɔn’ kpó kanɖódónǔwú kpó, ɖó é tuun ɖɔ azɔ̌ e Mawu ba ɖɔ émí ní wa é nɛ́. (Luk. 4:43) Jezu sɔ́ sinsɛnzɔ́ ɔ ɖó tɛn nukɔntɔn ɔ mɛ ɖo gbɛzán tɔn mɛ. É ná bo tlɛ nyí ɖo sinsɛnzɔ́ tɔn sín sunzán gǔdo tɔn lɛ́ mɛ ɔ, é “nɔ ɖo nǔ kplɔ́n mɛ wɛ sín toxo ɖé mɛ jɛ ɖěvo mɛ, bo nɔ lɛ́ ɖo mɔ̌ wa wɛ sín gletoxo ɖé mɛ jɛ ɖěvo mɛ.” (Luk. 13:22) É lɛ́ kplɔ́n azɔ̌ ahwanvú ɖěvo lɛ́ bónú yě ná jlá wɛn ɖagbe ɔ xá ɛ.—Luk. 10:1.

6. Nɛ̌ wɛnjíjlázɔ́ ɔ ka cá kan xá azɔ̌ ɖěvo e mǐ sixú ɖó lɛ́ é gbɔn? (Kpɔ́n ɖiɖe ɔ lɔmɔ̌.)

⁶ Égbé ɖésú ɔ, wɛn ɖagbe ɔ jíjlá wɛ nyí azɔ̌ tají e Jexóva kpó Jezu kpó ba ɖɔ mǐ ní wa é. (Mat. 24:14; 28:19, 20) Kancícá tlɔlɔ ɖé ɖo wɛnɖagbejíjlázɔ́ ɔ kpó azɔ̌ Axɔ́súɖuto ɔ tɔn ɖěvo lɛ́ kpó tɛ́ntin. Ði kpɔ́ndéwú ɔ, mǐ nɔ gbá xɔ Axɔ́súɖuto ɔ tɔn lɛ́ alǒ w’azɔ̌ ɖo Betɛ́li bá dó nɔ gǔdo nú hudó e tíin ɖo gle ɔ mɛ lɛ́ é. Mǐ nɔ wa sɔhɛnmɛzɔ́, é ka nyí bo ná dó hɛn sɔ nɔví súnnu kpó nɔví nyɔ̌nu kpó mǐtɔn lɛ́ kpowun wú ǎ, loɔ, bo ná dó lɛ́ d’alɔ yě bónú yě ná lɛ́ jɛ nǔ e yě ko nɔ wa dó sɛn Mawu lɛ́ é wa jí. Wɛnjíjlázɔ́ ɔ lɔ ɖ’é mɛ. Ényí mǐ tuun lě do wɛnjíjlázɔ́ ɔ ɖo tají sɔ é, bo nɔ flín ɖɔ azɔ̌ tají e Jexóva ba ɖɔ mǐ ní wa é nɛ́ ɔ, é ná sísɛ́ mǐ bɔ mǐ ná nɔ ɖ’alɔ ɖo sinsɛnzɔ́ ɔ mɛ ɖo gbesisɔmɛ. János e nyí mɛxó agun tɔn ɖé ɖo Hongrie é ɖɔ: “Un nɔ flín nyiɖée ɖɔ azɔ̌ Axɔ́súɖuto ɔ tɔn ɖěbǔ kún sixú ɖyɔ́ tɛn nú wɛnjíjlázɔ́ ɔ ó. Wɛnjíjlázɔ́ ɔ wɛ nyí azɔ̌ tají hú gǎn mǐtɔn.”

7. Étɛ́wú Jexóva ka ba ɖɔ mǐ ní kpo ɖo wɛn ɔ jlá wɛ? (1 Timɔtée 2:3, 4)

⁷ Ényí mǐ nɔ ɖó linlin e Jexóva nɔ ɖó dó mɛ lɛ́ wú é ɔ, mǐ sixú ná hlɔ̌nhlɔ́n kan e mǐ nɔ ɖó dó sinsɛnzɔ́ ɔ wú é. É ba ɖɔ mɛ gěgé ní se wɛn ɖagbe ɔ, bo lɛ́ yí gbe ná lěe é nyɔ́ bló gbɔn é. (Xa 1 Timɔtée 2:3, 4.) Bo ná dó kpé énɛ́ wú ɔ, é nɔ kplɔ́n azɔ̌ mǐ bónú alɔ ná lɛ́ se kpɛ́n nú mǐ hú gǎn ɖo gbɛhwlɛ́ngánzɔ́ énɛ́ mɛ. Ði kpɔ́ndéwú ɔ, alɔnuwéma Yǐ wǎn nú gbɛtɔ́ lɛ́: D’alɔ yě bónú yě ní húzú ahwanvú ɖe wě tawun tawun e sixú d’alɔ mǐ bɔ mǐ ná bɛ́ xóɖɔɖókpɔ́ xá mɛ lɛ́ bo ná bló bɔ yě ná húzú ahwanvú lɛ́ é xá mǐ. Ényí mɛ lɛ́ ná bo ma tlɛ yí wɛn ɔ din ǎ ɔ, ali ɖé sixú wá hun nú yě bɔ yě ná wa mɔ̌ jɛ nukɔn nú vivɔnu wǔvɛ́ ɖaxó ɔ tɔn. Nǔ e mǐ nɔ ɖɔ nú yě din é sixú nyí nǔ e ná sísɛ́ yě bɔ yě ná yí wɛn ɔ ɖo sɔgúdo é. Amɔ̌, wɛn ɔ jɛ́n mǐ ná kpo ɖo jlǎjlá wɛ có nǔ ná nyí mɔ̌.

É NƆ HƐN NǓÐƆÐAYǏ BIBLU TƆN LƐ́ AYI MƐ

8. Nɛ̌ nǔɖɔɖayǐ Biblu tɔn lɛ́ e Jezu tuun é ka d’alɔ ɛ b’ɛ zán hwenu tɔn kpó nǔnywɛ́ kpó gbɔn?

⁸ Jezu mɔ nukúnnú jɛ lěe nǔɖɔɖayǐ Biblu tɔn lɛ́ ná jɛnu gbɔn é mɛ. É tuun ɖɔ xwe atɔn adaɖé kpowun jɛ́n émí ná wa sinsɛnzɔ́ émítɔn ná. (Dan. 9:26, 27) É lɛ́ tuun nǔ e è ɖɔ ɖ’ayǐ dó hwenu e é ná kú é kpó lěe é ná kú gbɔn é kpó wú é. (Luk. 18:31-34) Nǔ e Jezu tuun é d’alɔ ɛ bɔ é zán hwenu tɔn ganjí. Wǎgbɔ tɔn ɔ, é jlá wɛn ɔ kpó kanɖódónǔwú kpó bá dó fó azɔ̌ e è sɔ́ dó así n’i ɖɔ é ní wa é.

9. Étɛ́wú nǔɖɔɖayǐ Biblu tɔn lɛ́ ka nɔ sísɛ́ mǐ bɔ mǐ nɔ jlá wɛn ɔ kpó kanɖódónǔwú kpó?

⁹ Nukúnnú mimɔ jɛ nǔɖɔɖayǐ Biblu tɔn lɛ́ mɛ sixú sísɛ́ mǐ bɔ mǐ ná jlá wɛn ɔ kpó kanɖódónǔwú kpó. Mǐ tuun ɖɔ táan káká ɖé kún sɔ́ kpo nú gbɛ élɔ́ ó. Mǐ tuun ɖɔ nǔ e ɖo jijɛ wɛ din lɛ́ é kpo walɔ e ɖo mɛ lɛ́ fɛnnu ɖo égbé lɛ́ é kpó sɔgbe xá nǔ e Biblu ɖɔ ɖ’ayǐ dó wuntun e ná dó gesí azǎn gǔdo gúdo tɔn lɛ́ é wú é. Mǐ mɔ lěe adɔn e ɖo Anglo-Amérique, éé nyí Acɛkpikpa e ɖó agbɔ̌n hú bǐ ɖo gbɛ ɔ mɛ é kpó Russie gɔ́ nú ahwan tɔn lɛ́ kpó tɛ́ntin é bló bɔ nǔɖɔɖayǐ e kunkplá axɔ́sú tofɔligbé tɔn ɔ kpó axɔ́sú totaligbé tɔn ɔ kpó é ɖo jijɛnu wɛ ɖo “hwenu e nǔ lɛ́ bǐ ná ɖo nǎ fó wɛ” é gbɔn é. (Dan. 11:40) Mǐ lɛ́ mɔ nǔ jɛ wú ɖɔ Anglo-Amérique, éé nyí Acɛkpikpa e ɖó agbɔ̌n hú bǐ ɖo gbɛ ɔ mɛ é wɛ nɔ te nú afɔ bǒcyɔ e xó è ɖɔ ɖo Daniyɛ́li 2:43-45 mɛ é tɔn. Mǐ kú d’é jí ɖɔ lěe nǔɖɔɖayǐ ɔ xlɛ́ gbɔn é ɔ, zaanɖé din ɔ, énɛ́ wɛ nyí ɖɔ táan kléwún ɖé gúdo din ɔ, Axɔ́súɖuto Mawu tɔn ná sú kún dó nú acɛkpikpa gbɛtɔ́ tɔn lɛ́. Nǔɖɔɖayǐ énɛ́ lɛ́ bǐ xlɛ́ ɖɔ vivɔnu ɔ ko ɖo kɛ́nnɛ́kɛ́nnɛ́, énɛ́ wú ɔ, mǐ ɖó ná zán hwenu mǐtɔn ɖo ali ɖagbe hú gǎn ɔ nu bá dó jlá wɛn ɖagbe ɔ.

10. Ali ɖěvo tɛ́ lɛ́ nu nǔɖɔɖayǐ Biblu tɔn lɛ́ ka sixú flɔ́ zo dó glɔ̌ nú kanɖódónǔwú mǐtɔn ɖe?

¹⁰ Nǔɖɔɖayǐ Biblu tɔn lɛ́ lɛ́ zɔ́n bɔ mǐ ɖó wɛn e jlǎjlá tɔn nɔ sɔ́ akpakpa mǐ é ɖé. Carrie e nyí nɔví nyɔ̌nu ɖé bo nɔ nɔ République dominicaine é ɖɔ: “Akpá ɖaaɖagbe Jexóva tɔn e kunkplá sɔgúdo lɛ́ é nɔ sísɛ́ mì bɔ un nɔ jlá nǔgbó ɔ mɛ ɖěvo lɛ́. Ényí un mɔ nǔ e ɖí xwi xá wɛ mɛ lɛ́ ɖe ɖo égbé é ɔ, un nɔ mɔ ɖɔ nǔɖɔɖayǐ énɛ́ lɛ́ kún nyí nyiɖokpónɔ tɔn ó, loɔ, yě lɔmɔ̌ tɔn wɛ.” Nǔɖɔɖayǐ Biblu tɔn lɛ́ nɔ xlɛ́ ɖɔ Jexóva ɖo alɔ dó mǐ wɛ ɖo azɔ̌ énɛ́ kɔn, bɔ énɛ́ nɔ dó wǔsyɛ́n lanmɛ nú mǐ bɔ mǐ nɔ kpo ɖo wɛn ɔ jlá wɛ. Leila e nɔ nɔ Hongrie é ɖɔ: “Ezayíi 11:6-9 dó wǔsyɛ́n lanmɛ nú mì bɔ un nɔ jlá wɛn ɖagbe ɔ mɛ ɖěɖěe é tlɛ cí ɖɔ yě kún ná yí wɛn ɔ ó lɛ́ é. Un tuun ɖɔ kpó alɔdó Jexóva tɔn kpó ɔ, mɛ ɖěbǔ sixú húzú.” Gɔ́ ná ɔ, Christopher e nyí nɔví súnnu ɖé bo gosín Zambie é ɖɔ: “Lěe Maki 13:10 ɖɔ ɖ’ayǐ gbɔn é ɔ, wɛn ɖagbe ɔ ɖo kan vun wɛ gbɔn awa gbɛ ɔ tɔn lɛ́ bǐ xwé, bɔ un mɔ ɖɔ yɛ̌yi wɛ è wlí nú mì nú má ɖó alɔ ɖo nǔɖɔɖayǐ énɛ́ sín jijɛnu mɛ.” Nǔɖɔɖayǐ Biblu tɔn tɛ́ lɛ́ ka nɔ sísɛ́ we bɔ a nɔ kpo ɖo wɛn ɔ jlá wɛ?

É NƆ ÐEJI ÐƆ JEXÓVA NÁ D’ALƆ ÉMÍ

11. Étɛ́wú é ka byɔ́ ɖɔ Jezu ní ɖeji dó alɔdó Jexóva tɔn wú bá dó kpo ɖo wɛn ɔ jlá wɛ kpó kanɖódónǔwú kpó? (Luki 12:49, 53)

¹¹ Jezu ɖeji ɖɔ Jexóva ná nɔ gǔdo nú émí bɔ émí ná kpo ɖo wɛn ɔ jlá wɛ kpó kanɖódónǔwú kpó. Jezu nɔ ɖó ayi te có, é tuun ɖɔ wɛn ɖagbe Axɔ́súɖuto ɔ tɔn ná dɔn xomɛsin kpó gbeklánxámɛ syɛ́nsyɛ́n kpó wá. (Xa Luki 12:49, 53.) Wɛn e jlá wɛ Jezu ɖe é zɔ́n bɔ sinsɛngán lɛ́ tɛ́n kpɔ́n azɔn mɔ̌kpán bá hu i. (Jaan 8:59; 10:31, 39) Amɔ̌, Jezu kpo ɖo wɛn ɔ jlá wɛ, ɖó é tuun ɖɔ Jexóva ɖo kpɔ́ xá émí. É ɖɔ: “Un ɖo nyiɖokpó ǎ, loɔ, Tɔ́ e sɛ́ mì dó é ɖo kpɔ́ xá mì. . . . É jó mì dó nyiɖokpónɔ ǎ, ɖó un nɔ wa nǔ e nɔ nyɔ́ nukún tɔn mɛ lɛ́ é hwebǐnu.”—Jaan 8:16, 29.

12. Nɛ̌ Jezu ka sɔ́ nǔ nú ahwanvú tɔn lɛ́ nú yě ná kpo ɖo wɛn ɔ jlá wɛ ɖo gbeklánxámɛ nukɔn gbɔn?

¹² Jezu flín ahwanvú tɔn lɛ́ ɖɔ yě sixú ɖeji ɖɔ Jexóva ná nɔ kpɔ́ xá yě. É ná jiɖe yě azɔn mɔ̌kpán ɖɔ ényí è ná bo ɖo ya dó nú yě wɛ ɔ, Jexóva ná d’alɔ yě. (Mat. 10:18-20; Luk. 12:11, 12) Énɛ́ wú ɔ, é ɖe wě xá yě ɖɔ ayi yětɔn ní ɖo te. (Mat. 10:16; Luk. 10:3) É kplɔ́n yě ɖɔ yě ní ma nɔ hɛn mɛ e ma nɔ ba ná ɖótó yě ǎ lɛ́ é gǎnnugǎnnu bónú yě ná se wɛn yětɔn ó. (Luk. 10:10, 11) Gɔ́ ná ɔ, é ɖɔ nú yě ɖɔ ényí è ɖo ya dó nú yě wɛ hǔn, yě ní hɔn. (Mat. 10:23) Jezu nɔ ɖó kan dó nǔ wú, bo nɔ lɛ́ ɖeji dó Jexóva wú có, ényí é ma byɔ́ ɖó mɔ̌ ǎ ɔ, é nɔ sɔ́ gbɛ tɔn ɖó axɔ́ nu ǎ.—Jaan 11:53, 54.

13. Étɛ́wú a ka sixú kú d’é jí ɖɔ Jexóva ná d’alɔ we?

¹³ Mǐ ɖó alɔdó Jexóva tɔn sín hudó bá dó kpo ɖo wɛn ɔ jlá wɛ ɖo gbeklánxámɛ nukɔn ɖo égbé. (Nǔɖe. 12:17) Étɛ́wú a ka sixú kú d’é jí ɖɔ Jexóva ná nɔ gǔdo nú we? Ð’ayi ɖɛ e Jezu xo b’ɛ ɖo Jaan wěmata 17 mɛ é wú. Jezu byɔ́ Jexóva ɖɔ é ní nya xɛ ɖo mɛsɛ́dó lɛ́ jí, bɔ Jexóva ka se ɖɛ énɛ́. Wěma Mɛsɛ́dó tɔn ɖɔ lěe è ɖo ya dó nú mɛsɛ́dó lɛ́ wɛ có, Jexóva ka d’alɔ yě bɔ yě jlá wɛn ɔ kpó kanɖódónǔwú kpó gbɔn é xó. Ðo ɖɛ e Jezu xo é mɛ ɔ, é lɛ́ byɔ́ Jexóva ɖɔ é ní nya xɛ ɖo mɛ ɖěɖěe ná ɖi nǔ nú wɛn e jlá wɛ mɛsɛ́dó lɛ́ ɖe é jí. Hwi lɔ ɖ’é mɛ. Jexóva kpo ɖo sin ná nú ɖɛ Jezu tɔn wɛ; É ná d’alɔ we lěe é d’alɔ mɛsɛ́dó lɛ́ gbɔn é.—Jaan 17:11, 15, 20.

14. Nɛ̌ mǐ ka wa gbɔn bo tuun ɖɔ mǐ ná kpé wú bo kpo ɖo wɛn ɔ jlá wɛ kpó kanɖódónǔwú kpó? (Kpɔ́n ɖiɖe ɔ lɔmɔ̌.)

¹⁴ Ényí wɛn ɖagbe ɔ jíjlá kpó kanɖódónǔwú kpó ná bo tlɛ wá vɛ́ wǔ hú gǎn ée vivɔnu ɔ ɖo sisɛkpɔ́ wɛ é ɔ, mǐ ná mɔ alɔdó e sín hudó mǐ ɖó lɛ́ é bǐ. (Luk. 21:12-15) Jezu kpó ahwanvú tɔn lɛ́ kpó ɖɔhun ɔ, mǐ nɔ hun ali ɔ nú mɛ lɛ́ bónú yě ná ɖótó wɛn ɖagbe ɔ alǒ gbɔ. Gɔ́ ná ɔ, mǐ nɔ lɛ́ nyi alɔ nú nǔdindɔn xá yě. É ná bo tlɛ nyí hwenu e è ɖó dogbó nú azɔ̌ mǐtɔn é ɔ, nɔví mǐtɔn lɛ́ kpé wú bo kpo ɖo wɛn ɖagbe ɔ jlá wɛ, ɖó yě ɖeji dó hlɔ̌nhlɔ́n yěɖésúnɔ tɔn wú ǎ, loɔ, Jexóva wú wɛ yě ɖeji dó wútu. Ðo xwe kanweko nukɔntɔn ɔ mɛ ɔ, Jexóva ná hlɔ̌nhlɔ́n mɛsɛntɔ́ tɔn lɛ́, mɔ̌ ɖokpó ɔ, ɖo égbé ɔ, é nɔ ná hlɔ̌nhlɔ́n mǐ bónú mǐ ná dó “sixú jlá wɛn ɖagbe ɔ bǐ mlɛ́mlɛ́” lěe é ba gbɔn é. (2 Tim. 4:17) A sixú kú d’é jí ɖɔ ényí a ɖeji dó Jexóva wú ɔ, a ná kpé wú bo kpo ɖo wɛn ɔ jlá wɛ kpó kanɖódónǔwú kpó.

É KPO ÐO LINLIN ÐAGBE ÐÓ WƐ

15. Étɛ́ ka xlɛ́ ɖɔ Jezu ɖó linlin ɖagbe dó sinsɛnzɔ́ ɔ wú?

¹⁵ Jezu kpo ɖo linlin ɖagbe ɖó dó wɛnjíjlázɔ́ ɔ wú wɛ. Énɛ́ d’alɔ ɛ bɔ akpakpa e nɔ sɔ́ ɛ dó sinsɛnzɔ́ tɔn wú é ɖe kpo ǎ. Ði kpɔ́ndéwú ɔ, xweyǐgbe vivɔnu xwe 30 H.M. tɔn ɔ, Jezu mɔ ɖɔ mɛ gěgé ɖo gbesisɔmɛ bo ná se wɛn ɖagbe ɔ, bo sɔ́ yě jlɛ́ dó jinukún e ko su yiya é wú. (Jaan 4:35) Xwe ɖokpó mɔ̌ gúdo ɔ, é ɖɔ nú ahwanvú tɔn lɛ́ ɖɔ: “Jinukún ɖo kpɔ́ gégé.” (Mat. 9:37, 38) Gɔ́ ná ɔ, nukɔnmɛ ɔ, é lɛ́ tɛ ɖɛ̌ jí ɖɔ: “Jinukún ɖo kpɔ́ gégé. . . Mi sa vo nú Gǎn nǔkúnyiya tɔn ɔ bónú é ní sɛ́ azɔ̌watɔ́ dó jinukúngbo tɔn mɛ.” (Luk. 10:2) Jezu gɔn nukún ɖó gbeɖé ɖɔ mɛ lɛ́ ná yí wɛn ɖagbe ɔ ǎ, bɔ hwenu e yě wa mɔ̌ é ɔ, é j’awǎ.—Luk. 10:21.

16. Nɛ̌ nǔjlɛ́dónǔwú Jezu tɔn lɛ́ ka d’alɔ ahwanvú tɔn lɛ́ bɔ yě ɖó linlin ɖagbe dó sinsɛnzɔ́ ɔ wú gbɔn? (Luki 13:18-21) (Kpɔ́n ɖiɖe ɔ lɔmɔ̌.)

¹⁶ Jezu kplɔ́n ahwanvú tɔn lɛ́ ɖɔ yě ní nɔ ɖó linlin ɖagbe dó wɛn yětɔn wú, énɛ́ ná dó wǔsyɛ́n lanmɛ nú yě bɔ yě ná kpo ɖo kan ɖó dó nǔ wú wɛ. Ði kpɔ́ndéwú ɔ, lin tamɛ dó kpɔ́ndéwú tɔn we jí. (Xa Luki 13:18-21.) Jezu zán mutádi kwín ɖé dó kplɔ́n mɛ ɖɔ wɛn Axɔ́súɖuto ɔ tɔn ná vun kan ɖo ali jí wǔ ɖé nu, bɔ nǔ ɖě kún ná ɖó susu tɔn te ó. Gɔ́ ná ɔ, é zán tɔ́n dó xlɛ́ lěe wɛn Axɔ́súɖuto ɔ tɔn ná vun kan tawun bo ná sísɛ́ mɛ lɛ́ bɔ yě ná bló hǔzúhúzú e è sixú nɔ ma mɔ afɔjíafɔjí lɛ́ é gbɔn é. Mɔ̌ mɛ ɔ, Jezu d’alɔ ahwanvú tɔn lɛ́ bɔ yě mɔ ɖɔ wɛn e jlá wɛ émí ɖe é ná ná sínsɛ́n dandan.

17. Hwɛjijɔ tɛ́ lɛ́ mǐ ka ɖó bo ná kpo ɖo linlin ɖagbe ɖó dó sinsɛnzɔ́ ɔ wú wɛ?

¹⁷ Ényí mǐ lin tamɛ dó lěe wɛnjíjlázɔ́ ɔ ɖo alɔ dó gbɛtɔ́ gěgé wɛ gbɔn gbɛ ɔ bǐ mɛ é jí ɔ, é nɔ dó wǔsyɛ́n lanmɛ nú mǐ bɔ mǐ nɔ kpo ɖo wɛn ɔ jlá wɛ. Ðo xwe ɖokpó ɖokpó mɛ ɔ, jlǒɖótɔ́ lǐvi mɔ̌kpán nɔ wá kú Klísu tɔn flínflín domɛ, bo nɔ lɛ́ kplɔ́n Biblu xá mǐ. Gbɛtɔ́ afatɔ́n donu kanweko mɔ̌kpán nɔ bló batɛ́mu bo nɔ xo kpóɖó nú mǐ ɖo wɛnjíjlázɔ́ ɔ mɛ. Mǐ tuun mɛ nabí e kpo bo sixú wá yí wɛn mǐtɔn é ǎ, amɔ̌, mǐ tuun ɖɔ Jexóva ɖo ahwan ɖaxó ɖé xo kplé wɛ b’ɛ ná xo wǔvɛ́ ɖaxó e ja é zlɛ́. (Nǔɖe. 7:9, 14) Gǎn nǔkúnyiya tɔn ɔ kú d’é jí ɖɔ mɛ gěgé kpo bo ná wá yí wɛn ɖagbe ɔ, énɛ́ wú ɔ, mǐ ɖó hwɛjijɔ ɖagbe e wú mǐ ná kpo ɖo wɛn ɔ jlá wɛ é.

18. Étɛ́ mǐ ka ba ɖɔ mɛ ɖěvo lɛ́ ní ɖ’ayi wú dó mǐ wú?

¹⁸ Nǔ e è dó tuun ahwanvú Jezu tɔn lɛ́ ná hwebǐnu é wɛ nyí wɛn ɔ e yě nɔ jlá kpó kanɖódónǔwú kpó é. Ée mɛ lɛ́ mɔ akɔ́nkpinkpan mɛsɛ́dó lɛ́ tɔn é ɔ, “yě wá ɖó ayi wú ɖɔ yě . . . zɔn xá Jezu.” (Mɛ. 4:13) Ényí mɛ lɛ́ ɖo mǐ mɔ wɛ ɖo sinsɛnzɔ́ ɔ mɛ hǔn, mi nú yě ní nɔ mɔ ɖɔ kpɔ́ndéwú kanɖódónǔwú tɔn Jezu tɔn xwedó wɛ mǐ lɔ ɖe.