Kpo ɖo zɔnlin zun gbɔn nǔɖiɖi gblamɛ wɛ

1. Étɛ́wú xomɛ ka hun Pɔ́lu dó gbɛ e é zán é wú?

ÐO HWE ɖé nu ɔ, mɛsɛ́dó Pɔ́lu tuun ɖɔ è ná hu émí ɖo malínmálín mɛ, amɔ̌, é ɖó hwɛjijɔ lɛ́ bǐ bɔ gbɛ e é zán é ná d’awǎjijɛ n’i. Ée é kpɔ́n gǔdo sɛ́dó é ɔ, é ɖɔ: “Un kán wezun ɔ káká jɛ vivɔnu, un hɛn nǔɖiɖi ɔ wú.” (2 Tim. 4:6-8) Pɔ́lu wá gbeta e nǔnywɛ́ kpé é kɔn bo zán gbɛzán tɔn dó sɛn Jexóva, bo kú d’é jí ɖɔ xomɛ hun Jexóva dó émí wú. Mǐ lɔ ba bo ná nɔ wá gbeta ɖagbe lɛ́ kɔn bónú nǔ mǐtɔn ná nyɔ́ Mawu nukúnmɛ. Nɛ̌ mǐ ka sixú wa mɔ̌ gbɔn?

2. Étɛ́ ka nyí tínmɛ è ní ɖi zɔnlin gbɔn nǔɖiɖi gblamɛ tɔn?

² Pɔ́lu ɖɔ dó éɖésúnɔ kpó klisánwun gbejínɔtɔ́ ɖěvo lɛ́ kpó wú ɖɔ: “Nǔɖiɖi gblamɛ wɛ mǐ ɖo zɔnlin ɖi gbɔn wɛ, é nyí gbɔn nǔ e è nɔ mɔ lɛ́ é gblamɛ ǎ.” (2 Kɔ. 5:7) Étɛ́ ɖɔ wɛ Pɔ́lu ka ɖe? Ðo Biblu mɛ ɔ, hweɖélɛ́nu ɔ, ‘zɔnlin ɖiɖi’ nɔ dó gesí gbɛ e mɛɖé wá gbeta ɔ kɔn bá zán é. Ényí mɛɖé nɔ zun zɔnlin gbɔn nǔ e è nɔ mɔ lɛ́ é kɛ́ɖɛ́ gblamɛ ɔ, é nɔ zɔn dó nǔ e é sixú mɔ é, nǔ e é sixú se é kpó lěe nǔ nɔ cí n’i é kpó kɛ́ɖɛ́ jí dó wá gbeta lɛ́ kɔn. Amɔ̌, mɛ e nɔ zun zɔnlin gbɔn nǔɖiɖi gblamɛ é nɔ zɔn dó ji e é ɖe dó Jexóva Mawu wú é wú dó wá gbeta lɛ́ kɔn. Nǔwiwa tɔn lɛ́ nɔ xlɛ́ ɖɔ é kú d’é jí ɖɔ Mawu ná dó ajɔ émí, bɔ wěɖexámɛ e ɖo Xó Jexóva tɔn mɛ lɛ́ é xwixwedó ná hɛn le wá nú émí.—Ðɛh. 119:66; Ebl. 11:6.

3. Ényí è nɔ ɖi zɔnlin gbɔn nǔɖiɖi gblamɛ ɔ, le tɛ́ lɛ́ è ka nɔ mɔ? (2 Kɔlɛ́ntinu lɛ́ 4:18)

³ É ɖo wɛn ɖɔ mǐ bǐ wɛ nɔ zɔn dó nǔ e mǐ nɔ mɔ é, nǔ e mǐ nɔ se é kpó lěe nǔ nɔ cí nú mǐ é kpó jí dó wá gbeta ɖé lɛ́ kɔn. Amɔ̌, ényí nǔ e mǐ nɔ mɔ, alǒ se lɛ́ é kɛ́ɖɛ́ jí wɛ mǐ nɔ zɔn dó dó wá gbeta tají lɛ́ kɔn ɔ, é ná ɖibla dɔn tagba wá nú mǐ. Étɛ́wú? Nǔ e mǐ nɔ mɔ é kpó nǔ e mǐ nɔ se é kpó sixú zán mǐ hweɖélɛ́nu. Nú yě ná bo ma ka tlɛ zán mǐ ǎ ɔ, ényí nǔ e è nɔ mɔ lɛ́ é kɛ́ɖɛ́ gblamɛ jɛ́n mǐ nɔ zun zɔnlin gbɔn ɔ, mǐ sixú wá wɔn ya nú jlǒ Mawu tɔn, alǒ wěɖexámɛ tɔn. (Nǔt. 11:9; Mat. 24:37-39) Amɔ̌, ényí mǐ nɔ ɖi zɔnlin gbɔn nǔɖiɖi gblamɛ ɔ, mǐ ná ɖibla wá gbeta e nɔ “nyɔ́ Aklúnɔ nukúnmɛ lɛ́ é” kɔn. (Efɛ́. 5:10) Wěɖexámɛ Mawu tɔn xwixwedó ná ná mǐ fífá ayi mɛ tɔn, bo ná lɛ́ zɔ́n bɔ mǐ ná ɖó awǎjijɛ jɔ awǎjijɛ. (Ðɛh. 16:8, 9; Eza. 48:17, 18) Gɔ́ ná ɔ, ényí mǐ kpo ɖo zɔnlin ɖi wɛ gbɔn nǔɖiɖi gblamɛ ɔ, mǐ ná mɔ gbɛ mavɔmavɔ.—Xa 2 Kɔlɛ́ntinu lɛ́ 4:18.

4. Ényí mɛɖé nɔ ɖi zɔnlin gbɔn nǔɖiɖi gblamɛ alǒ gbɔn nǔ e è nɔ mɔ lɛ́ é gblamɛ ɔ, nɛ̌ é ka sixú wa gbɔn bo tuun?

⁴ Ényí nǔɖiɖi gblamɛ wɛ mǐ nɔ ɖi zɔnlin gbɔn, alǒ ényí nǔ e è nɔ mɔ lɛ́ é gblamɛ wɛ mǐ nɔ ɖi zɔnlin gbɔn ɔ, nɛ̌ mǐ ka sixú wa gbɔn bo tuun? Nú è ná ɖɔ ɔ, è sixú sɛ sin xwe ná gbɔn lě: Étɛ́ lɛ́ ka nɔ xlɛ́ ali gbeta e kɔn mǐ nɔ wá lɛ́ é? Nǔ e mǐ sixú mɔ lɛ́ é kɛ́ɖɛ́ wɛ nɔ xlɛ́ ali mǐ a? Alǒ ji e mǐ ɖe dó Jexóva kpó wěɖexámɛ tɔn lɛ́ kpó wú é wɛ nɔ xlɛ́ ali mǐ? Mi nú mǐ ní gbéjé lěe mǐ sixú kpo ɖo zɔnlin zun wɛ gbɔn nǔɖiɖi gblamɛ gbɔn é kpɔ́n ɖo ali tají atɔn nu: hwenu e mǐ ɖo gbeta azɔ̌ e mǐ ná wa é tɔn kɔn wá wɛ é, hwenu e mǐ ɖo gbeta mɛ e mǐ ná da é tɔn kɔn wá wɛ é kpó hwenu e tutoblónúnǔ ɔ ɖe wě xá mǐ é kpó. Ðo ninɔmɛ énɛ́ lɛ́ ɖokpó ɖokpó mɛ ɔ, mǐ ná ɖɔ xó dó nǔ ɖěɖěe mǐ ɖó ná gbéjé kpɔ́n bá dó wá gbeta ɖagbe lɛ́ kɔn é wú.

HWENU E A ÐO GBETA AZƆ̌ E A NÁ WA É TƆN KƆN WÁ WƐ É

5. Étɛ́ lɛ́ mǐ ka ɖó ná gbéjé kpɔ́n hwenu e mǐ ɖo gbeta azɔ̌ e mǐ ná wa é tɔn kɔn wá wɛ é?

⁵ Mǐ bǐ wɛ nɔ ba ná sú hudó mǐɖésúnɔ kpó mɛ e ɖo xwédo mǐtɔn mɛ lɛ́ é kpó tɔn sín do. (Nǔt. 7:12; 1 Tim. 5:8) Azɔ̌ ɖé lɛ́ nɔ kpé kwɛ́ tawun. Yě sixú zɔ́n bɔ azɔ̌watɔ́ ɖé ná kpé nukún dó akwɛ́zínzán tɔn gbe bǐ gbe tɔn lɛ́ wú, bo ná lɛ́ sɛ ɖě xwe nú sɔgúdo. Azɔ̌ ɖé lɛ́ sín akwɛ́ ka sixú hwe tawun, bɔ hudó tají tají xwédo ɔ tɔn lɛ́ sín do jɛ́n yě sixú sú nú azɔ̌watɔ́ ɔ. Ényí mǐ ɖo gbeta azɔ̌ e mǐ ná yí gbe ná alǒ gbɔ é tɔn kɔn wá wɛ ɔ, é sɔgbe ɖɔ mǐ ní lin tamɛ dó akwɛ́ nabí e é ná hɛn wá nú mǐ é jí. Amɔ̌, ényí nǔ ɖokpó géé e jí mɛɖé nɔ lin tamɛ dó é nɛ́ ɔ, é sixú xlɛ́ ɖɔ é ɖo zɔnlin ɖi gbɔn nǔ e è nɔ mɔ lɛ́ é gblamɛ wɛ.

6. Nɛ̌ mǐ ka sixú ɖi zɔnlin gbɔn nǔɖiɖi gblamɛ hwenu e mǐ ɖo gbeta azɔ̌ e mǐ ná wa é tɔn kɔn wá wɛ é gbɔn? (Eblée lɛ́ 13:5)

⁶ Ényí mǐ nɔ ɖi zɔnlin gbɔn nǔɖiɖi gblamɛ ɔ, mǐ ná lɛ́ gbéjé lěe azɔ̌ ɔ sixú kunkplá xɔ́ntɔn e mǐ zun xá Jexóva é gbɔn é kpɔ́n. Mǐ sixú kan nǔ élɔ́ lɛ́ byɔ́ mǐɖée: ‘Azɔ̌ ɔ ka ná byɔ́ ɖɔ má ɖ’alɔ ɖo nǔ e Jexóva gbɛ́ wǎn ná lɛ́ é wiwa mɛ wɛ a?’ (Nǔx. 6:16-19) ‘É ka ná jɛ mawusinsɛn ce mɛ, bɔ vlafo ɔ, é ná zɔ́n bɔ un ná nɔ zɔ nú xwédo ce nú hwenu línlín wɛ a?’ (Filí. 1:10) Ényí ɛɛn wɛ nyí xósin nǔkanbyɔ́ énɛ́ lɛ́ ɖěbǔ tɔn ɔ, nǔnywɛ́nú wɛ é ná nyí ɖɔ è ní ma yí gbe nú azɔ̌ ɔ ó, ényí azɔ̌ mimɔ ná bo tlɛ vɛ́ wǔ ɔ nɛ́. Ðó nǔɖiɖi gblamɛ wɛ mǐ nɔ zun zɔnlin gbɔn wútu ɔ, mǐ nɔ wá gbeta e nɔ xlɛ́ ɖɔ mǐ ɖeji ɖɔ Jexóva ná kpé nukún dó hudó mǐtɔn lɛ́ wú jɛ́n wɛ lɛ́ é kɔn.—Mat. 6:33; xa Eblée lɛ́ 13:5.

7-8. Nɛ̌ nɔví súnnu e nɔ nɔ Amérique du sud é ɖé ka ɖi zɔnlin gbɔn nǔɖiɖi gblamɛ gbɔn? (Kpɔ́n ɖiɖe ɔ lɔmɔ̌.)

⁷ Ð’ayi lěe nɔví súnnu Javier,a éé nɔ nɔ Amérique du sud é ɖ’ayi wú ɖɔ é ɖo tají ɖɔ émí ní zun zɔnlin gbɔn nǔɖiɖi gblamɛ gbɔn é wú. É ɖɔ: “Azɔ̌ kpinkpɛn ɖé sín ali hun nú mì, bɔ sunzánfókwɛ́ e un ná nɔ ɖu é ná nɔ yi ée un nɔ ɖu ɖ’ayǐ é donu we, bɔ un ná ɖu vǐví tɔn tawun.” É ɖo mɔ̌ có, é jló Javier tawun ɖɔ é ní nyí gběxosín-alijítɔ́. É gbɛ kan d’é nu bo ɖɔ: “È bló tuto bo ná kan nǔ byɔ́ mì cóbá yí mì d’azɔ̌ ɔ mɛ. Jɛ nukɔn nú nǔkanbyɔ́mɛ ɔ ɔ, un xo ɖɛ bo byɔ́ alɔdó Jexóva tɔn, bo ɖeji ɖɔ é tuun nǔ e nyɔ́ nú mì hú gǎn é. Un ba ɖɔ kan ní jɛ kan jí nú mì ɖo azɔ̌ mɛ, amɔ̌, ényí azɔ̌ énɛ́ ma ná d’alɔ mì bónú un ná kpé nǔ e gbé nya wɛ un ɖe ɖo gbigbɔ lixo lɛ́ é wú ǎ hǔn, un ba ǎ.”

⁸ Javier ɖɔ: “Ðo nǔkanbyɔ́mɛ ɔ hwenu ɔ, gǎn ɔ ɖɔ nú mì ɖɔ é ná byɔ́ ɖɔ un ná nɔ wa gangúdozɔ́ hwɛhwɛ. Un tínmɛ n’i kpó sísí kpó ɖɔ un kún ná sixú wa mɔ̌ ó, ɖó mawusinsɛn ce wú.” Énɛ́ wú ɔ, Javier gbɛ́ azɔ̌ ɔ. Aklúnɔzángbla we gúdo ɔ, é bɛ́ gběxosín-alijítɔ́zɔ́. Nukɔnmɛ ɖo xwe énɛ́ mɛ ɔ, é mɔ azɔ̌ e é ma byɔ́ ɖɔ è ní nɔ yi azɔ̌mɛ ɖo azǎn lɛ́ bǐ jí ǎ é ɖé. É ɖɔ: “Jexóva se ɖɛ ce lɛ́, bo bló bɔ un mɔ azɔ̌ e sɔgbe xá tuto gběxosín-alijítɔ́ tɔn ce é. É víví nú mì tawun ɖɔ un mɔ azɔ̌ e zɔ́n bɔ un ɖó hwenu hú gǎn bá sɛn Jexóva, bo lɛ́ mɔ hwenu nú nɔví ce lɛ́ é ɖé.”

9. Étɛ́ Trésor sín kpɔ́ndéwú ka kplɔ́n we?

⁹ Nú mǐ ka ɖ’ayi wú ɖɔ azɔ̌ e wa wɛ mǐ ɖe din é zɔ́n bɔ mǐ kún ɖo zɔnlin ɖi wɛ gbɔn nǔɖiɖi gblamɛ ó ɔ ka lo? Lin tamɛ dó kpɔ́ndéwú Trésor e nɔ nɔ Congo é tɔn jí. É ɖɔ: “Azɔ̌ ce yɔ̌yɔ́ ɔ, azɔ̌ e ali tɔn ma nɔ hun nú mɛ azɔn we ǎ é ɖé wɛ. Akwɛ́ e un nɔ ɖu é yi ée un nɔ ɖu ɖ’ayǐ é donu atɔn, bɔ è nɔ lɛ́ ɖó sísí nú mì tawun.” Amɔ̌, Trésor nɔ gɔn kplé lɛ́ hwɛhwɛ, ɖó gangúdozɔ́ lɛ́ wú. È nɔ lɛ́ gbídí kɔ n’i bónú é ná wa azɔ̌ e ná zɔ́n bɔ é ná nɔ ɖ’adingban lɛ́ é. Trésor ba ná jó azɔ̌ ɔ dó, amɔ̌, é ɖi xɛsi ɖɔ émí ná ba azɔ̌ kpo. Étɛ́ ka d’alɔ ɛ? É ɖɔ: “Xabakúku 3:17-19 d’alɔ mì bɔ un mɔ nǔ jɛ mɛ ɖɔ ényí un na bo tlɛ jó azɔ̌ énɛ́ dó, bo ma sɔ́ nɔ ɖu akwɛ́ ɖaxó ǎ ɔ, Jexóva ná kpé nukún dó wǔtu ce jɛ́n wɛ. Énɛ́ wú ɔ, un jó azɔ̌ ɔ dó.” É tínmɛ ɖɔ: “Azɔ̌gán gěgé nɔ lin ɖɔ é jɛxá ɖɔ è ní sɔ́ nǔ ɖěbǔ dó sá vɔ̌, káká jɛ gbɛzán xwédo tɔn mɛtɔn kpó nǔ gbigbɔ tɔn lɛ́ kpó jí dó azɔ̌ e kpé kwɛ́ é ɖé tamɛ. É víví nú mì ɖɔ un nya xɛ ɖo xɔ́ntɔn e un zun xá Jexóva é kpó vɛ̌ e un vɛ́ xá xwédo ce é kpó jí. Xwe ɖokpó gúdo ɔ, Jexóva d’alɔ mì bɔ un mɔ azɔ̌ ɖagbe e ná zɔ́n bɔ un ná zán gbɛzán e ɖo jlɛ̌ jí é, bo lɛ́ mɔ hwenu nú nǔwiwa klisánwun tɔn lɛ́ hú gǎn é ɖé. Ényí mǐ sɔ́ Jexóva ɖó tɛn nukɔntɔn ɔ mɛ ɔ, énɛ́ sixú zɔ́n bɔ mǐ ɖí xwi xá akwɛ́yózo hweɖélɛ́nu, amɔ̌, Jexóva ná kpé nukún dó mǐ wú.” Ɛɛn, ényí mǐ ɖeji dó wěɖexámɛ Jexóva tɔn lɛ́ kpó akpá tɔn lɛ́ kpó wú ɔ, mǐ ná kpo ɖo zɔnlin ɖi wɛ gbɔn nǔɖiɖi gblamɛ, b’ɛ ka ná kɔn nyɔ̌ná dó mǐ jí.

HWENU E A ÐO GBETA MƐ E A NÁ DA É TƆN KƆN WÁ WƐ É

10. Étɛ́ lɛ́ ka sixú zɔ́n bɔ mǐ ɖi zɔnlin gbɔn nǔ e è nɔ mɔ lɛ́ é gblamɛ hwenu e mǐ ɖo gbeta mɛ e mǐ ná da é tɔn kɔn wá wɛ é?

¹⁰ Nǔníná wɛ alɔwlíwlí nyí sín Jexóva gɔ́n, bɔ é sɔgbe ɖɔ è ní ba ná wlí alɔ. Ényí nɔví nyɔ̌nu ɖé ɖo tamɛ lin dó nɔví súnnu e é ná da é jí wɛ ɔ, é sixú sɔ́ ayi ɖó mɛ alɔkpa e nɔví súnnu ɔ nyí é, lěe é cí ɖo wěxo é, nyǐkɔ e é ɖó ɖo ta é, ninɔmɛ tɔn ɖo akwɛ́ linu kpó azɔ̌ e é ɖó ɖo xwédo tɔn mɛ lɛ́ é kpó jí, bo sixú lɛ́ kpɔ́n ɖɔ é ka ná bló bɔ émí ná ɖó awǎjijɛ a jí.b Nǔ énɛ́ lɛ́ ɖo tají. Amɔ̌, ényí é sɔ́ ayi ɖó nǔ énɛ́ lɛ́ kɛ́ɖɛ́ jí ɔ, é sixú xlɛ́ ɖɔ nǔ e è nɔ mɔ lɛ́ é gblamɛ wɛ é nɔ zun zɔnlin gbɔn.

11. Nɛ̌ mǐ ka sixú ɖi zɔnlin gbɔn nǔɖiɖi gblamɛ hwenu e mǐ ɖo gbeta mɛ e mǐ ná da é tɔn kɔn wá wɛ é gbɔn? (1 Kɔlɛ́ntinu lɛ́ 7:39)

¹¹ Jexóva nɔ gó ɖó nɔví súnnu kpó nɔví nyɔ̌nu kpó mǐtɔn e nɔ xwedó wěɖexámɛ tɔn lɛ́ hwenu e yě ɖo gbeta mɛ e yě ná da é tɔn kɔn wá wɛ lɛ́ é wú! Ði kpɔ́ndéwú ɔ, yě nɔ hɛn akpágbanúmɛxó e ɖɔ ɖɔ è ní nɔ te káká bo zɛ “wǐnnyáwínnyáxwe” wú cóbó byɔ́ xɔ́ntɔn mɛ é ayi mɛ. (1 Kɔ. 7:36) Jijɔ ɖěɖěe Jexóva ɖɔ ɖɔ yě ná zɔ́n bɔ mɛɖé ná nyí asú ɖagbe, alǒ asi ɖagbe lɛ́ é jí wɛ yě nɔ sɔ́ ayi ɖó hú gǎn hwenu e yě ɖo mɛ e yě ná da é gbéjé kpɔ́n wɛ é. (Nǔx. 31:10-13, 26-28; Efɛ́. 5:33; 1 Tim. 5:8) Ényí mɛ e ma nyí Kúnnuɖetɔ́ ǎ é ɖé ɖe xlɛ́ yě ɖɔ nǔ yětɔn jɛ émítɔn jí ɔ, yě nɔ se tónú nú wěɖexámɛ e ɖɔ “mɛ ɔ ní vɛ́ ko nyí ahwanvú Aklúnɔ tɔn,” bo ɖo 1 Kɔlɛ́ntinu lɛ́ 7:39 mɛ é. (Xa.) Yě nɔ kpo ɖo zɔnlin ɖi wɛ gbɔn nǔɖiɖi gblamɛ, bo nɔ ɖeji ɖɔ Jexóva sixú kpé nukún dó émí wú ɖo lěe nǔ nɔ cí nú mɛ é linu hú mɛ ɖěvo ɖěbǔ.—Ðɛh. 55:23.

12. Étɛ́ kpɔ́ndéwú Rosa tɔn ka kplɔ́n we?

¹² Ð’ayi nǔ e jɛ dó Rosa, éé nyí gběxosín-alijítɔ́ bo nɔ nɔ Colombie é jí é wú. Nǔ tɔn jɛ súnnu e ɖo azɔ̌ tɔn mɛ bo ma nyí Kúnnuɖetɔ́ ǎ é ɖé tɔn jí. Rosa yí wǎn n’i. É ɖɔ: “É cí ɖɔ mɛ ɖagbe tawun wɛ n’i. É nɔ d’alɔ mɛ e ɖo xá tɔn mɛ lɛ́ é bo nɔ lɛ́ zán gbɛ ɖagbe. Un yí wǎn nú lěe é nɔ wa nǔ xá mì gbɔn é. Jijɔ e un nɔ ba ɖɔ asú e un ná wá da é ní ɖó lɛ́ é bǐ wɛ é ɖó, Kúnnuɖetɔ́ jɛ́n é ma nyí ǎ.” É gbɛ kan d’é nu bo ɖɔ: “É vɛ́ wǔ nú mì nú má ɖɔ éǒ n’i, ɖó nǔɖé wɛ bo jló mì ɖo ayi mɛ. Hwe ɔ nu ɔ, un nɔ mɔ ɖɔ un ɖo nyiɖokpó, bo ba ná wlí alɔ, amɔ̌, un ko mɔ mɛɖé ɖo nǔgbó ɔ mɛ ǎ.” Amɔ̌, Rosa sɔ́ ayi ɖó nǔ e é sixú mɔ lɛ́ é kɛ́ɖɛ́ jí ǎ. É lin tamɛ dó nǔ e gbeta énɛ́ kɔn wiwa ná wa dó xɔ́ntɔn e é zun xá Jexóva é wú é jí. Énɛ́ wú ɔ, é sɛ́n kan nú nǔ wa ɖó kpɔ́ xá nya ɔ, bo kpo ɖo alɔnu tɔn hɛn ján wɛ ɖo sinsɛnzɔ́ Jexóva tɔn mɛ. Táan kléwún ɖé gúdo ɔ, è ylɔ́ ɛ nú Wěmaxɔmɛ nú wɛnɖagbejlátɔ́ Axɔ́súɖuto ɔ tɔn lɛ́, bɔ din ɔ, é nyí gběxosín-alijítɔ́ titewungbe. Rosa ɖɔ: “Jexóva kɔn nyɔ̌ná gěgé dó jǐ ce, bɔ yě zɔ́n bɔ un ɖó awǎjijɛ tawun.” É nɔ bɔ wǔ nú è ná ɖi zɔnlin gbɔn nǔɖiɖi gblamɛ ɖo nǔ e kunkplá lěe nǔ nɔ cí nú mɛ lɛ́ é kpáxwé ǎ có, mɔ̌ wiwa ka nɔ hɛn le wá hwebǐnu.

HWENU E TUTOBLÓNÚNǓ Ɔ ÐE WĚ XÁ WE É

13. Étɛ́ ka sixú zɔ́n bɔ mǐ ná ɖi zɔnlin gbɔn nǔ e è nɔ mɔ lɛ́ é gblamɛ hwenu e tutoblónúnǔ ɔ ɖe wě xá mǐ é?

¹³ Hwɛhwɛ wɛ tutoblónúnǔ ɔ nɔ ɖe wě xá mǐ ɖo mawusinsɛn mǐtɔn kpáxwé, é sixú nyí gbɔn mɛxó agun tɔn ayǐ ɔ jí tɔn lɛ́, nukúnkpénǔwútɔ́ lɛ̌dó tɔn lɛ́, alaxɔ, alǒ Hǎgbɛ́ alixlɛ́mɛtɔ́ ɔ jí. Amɔ̌, hweɖélɛ́nu ɔ, mǐ sixú nɔ ma mɔ nukúnnú jɛ nǔ e wú nɔví lɛ́ ɖe wě ɖé lɛ́ xá mǐ é mɛ. Mǐ sixú sɔ́ ayi ɖó nǔ e wěɖexámɛ ɔ sixú wa dó mǐ wú lɛ́ é kɛ́ɖɛ́ jí. Mǐ tlɛ sixú jɛ ayi sɔ́ ɖó gǎnmaɖó nɔví e xlɛ́ ali ɔ mǐ lɛ́ é tɔn jí jí.

14. Étɛ́ ka ná zɔ́n bɔ mǐ ná ɖi zɔnlin gbɔn nǔɖiɖi gblamɛ hwenu e tutoblónúnǔ ɔ ɖe wě xá mǐ é? (Eblée lɛ́ 13:17)

¹⁴ Ényí mǐ nɔ ɖi zɔnlin gbɔn nǔɖiɖi gblamɛ ɔ, mǐ nɔ ɖeji ɖɔ Jexóva wɛ ɖo ali xlɛ́ tutoblónúnǔ tɔn wɛ, bo ka tuun ninɔmɛ mǐtɔn lɛ́. Mɔ̌ mɛ ɔ, mǐ nɔ yá wǔ se tónú, bo ka nɔ wa mɔ̌ kpó linlin ɖagbe kpó. (Xa Eblée lɛ́ 13:17.) Mǐ nɔ tuun ɖɔ tónúsise mǐtɔn nɔ gɔ́ so nú bǔninɔ agun ɔ tɔn. (Efɛ́. 4:2, 3) Mǐ nɔ ɖeji ɖɔ ényí nɔví e ɖo nukɔn nú nǔ lɛ́ é ná bo tlɛ nyí gbɛtɔ́ hwɛhutɔ́ lɛ́ ɔ, Jexóva ná kɔn nyɔ̌ná dó tónúsise mǐtɔn jí. (1 Sam. 15:22) É ná jlá nǔ ɖěbǔ e é byɔ́ ɖɔ è ní jlá ɖó jɛ́n wɛ lɛ́ é ɖó ɖo hwetɔnnu.—Micée 7:7.

15-16. Nɔví súnnu ɖé xo nǔ kpɔ́n dó wěɖexámɛ wú có, étɛ́ ka d’alɔ ɛ b’ɛ ɖi zɔnlin gbɔn nǔɖiɖi gblamɛ? (Kpɔ́n ɖiɖe ɔ lɔmɔ̌.)

¹⁵ Kpɔ́ndéwú ɖé ɖíe bo tɛ ɖɛ̌ le e zɔnlin zunzun gbɔn nǔɖiɖi gblamɛ nɔ hɛn wá é jí. Espagne gbe wɛ è nɔ dó tawun ɖo Pérou có, ayǐ ɔ jí nu lɛ́ gěgé ka nɔ dó gbe ayǐ ɔ jí tɔn lɛ́. Gbe énɛ́ lɛ́ ɖokpó wɛ nyí Quechua. Nú xwe mɔ̌kpán ɔ, nɔví súnnu kpó nɔví nyɔ̌nu kpó e nɔ dó Quechua lɛ́ é wɛ nɔ yi ba mɛ ɖěɖěe nɔ dó Quechua ɖo ayǐ ɔ jí lɛ́ é mɔ. É ɖo mɔ̌ có, bo ná dó wa nǔ sɔgbe xá gbeta ɖěɖěe kɔn acɛkpikpa ɔ wá lɛ́ é ɔ, è bló hǔzúhúzú lɛ́ ɖo lěe è nɔ ba mɛ lɛ́ kpɔ́n gbɔn é linu. (Hlɔ̌. 13:1) Wǎgbɔ tɔn ɔ, mɛɖé lɛ́ kanbyɔ́ yěɖée ɖɔ énɛ́ ná dɔn azɔ̌ ɔ dó gǔdo ɖo ayǐ ɔ jí ǎ é jí. Amɔ̌ ɖó nɔví lɛ́ húzú sɔgbe xá hǔzúhúzú lɛ́ wútu ɔ, Jexóva kɔn nyɔ̌ná dó gǎn ɖěɖěe yě dó bá mɔ mɛ ɖěɖěe nɔ dó Quechua lɛ́ é gěgé é jí.

¹⁶ Kevin e nyí mɛxó agun tɔn ɖé ɖo agun e nɔ dó Quechua é ɖé mɛ é lɔ ɖo mɛ e ado hu hwe ɔ nu lɛ́ é mɛ. É tínmɛ ɖɔ: “Un kanbyɔ́ nyiɖée ɖɔ: ‘Nɛ̌ mǐ ka ná nɔ mɔ mɛ e nɔ dó Quechua lɛ́ é gbɔn din?’” Étɛ́ Kevin ka wa? É ɖɔ: “Un flín Nǔnywɛ́xó 3:5. Un lɛ́ lin tamɛ dó Mɔyízi jí. Jexóva ɖɔ é ní wa nǔ e é cí ɖɔ é kún nyi ta fí ɖě ó é ɖé. É ɖɔ nú Mɔyízi ɖɔ é ní kplá Izlayɛ́li ví lɛ́ tɔ́n sín Ejípu yi Xu vɔvɔ ɔ kɔn, b’ɛ cí ɖɔ ɖo fínɛ́ ɔ, yě kún sixú wa nǔɖé bo gló Ejípunu e ɖo yě nya wɛ lɛ́ é ó ɖɔhun. É ɖo mɔ̌ có, é se tónú, bɔ Jexóva kɔn nyɔ̌ná dó tónúsise tɔn jí ɖo ali jí wǔ ɖé nu.” (Tín. 14:1, 2, 9-11, 21, 22) Kevin ɖo gbesisɔmɛ bá bló hǔzúhúzú lɛ́ ɖo sinsɛnzɔ́ tɔn kpáxwé. Étɛ́ é ka ná? É ɖɔ: “Lěe Jexóva kɔn nyɔ̌ná dó mǐ jí gbɔn é jí wǔ nú mì. Ð’ayǐ ɔ, mǐ nɔ zun zɔnlin tawun ɖo sinsɛnzɔ́ ɔ mɛ, bɔ hweɖélɛ́nu ɔ, mɛ e nɔ dó Quechua é ɖokpó, alǒ we jɛ́n mǐ nɔ mɔ. Din ɔ, xá ɖěɖěe mɛ mɛ e nɔ dó Quechua lɛ́ é sukpɔ́ ɖe é jí wɛ mǐ nɔ sɔ́ ayi ɖó. Énɛ́ zɔ́n bɔ mǐ nɔ bɛ́ xóɖɔɖókpɔ́ gěgé, ɖó mɛbakpɔ́n kpó Biblu kplɔ́nkplɔ́n kpó gěgé. Mɛ e nɔ wá kplé mǐtɔn lɛ́ é sín kɛ́n jɛjí. Nǔgbó ɔ, ényí mǐ nɔ ɖi zɔnlin gbɔn nǔɖiɖi gblamɛ ɔ, Jexóva nɔ d’ajɔ mǐ hwebǐnu.

17. Étɛ́ xóta élɔ́ ka kplɔ́n we?

¹⁷ Mǐ ɖɔ xó dó ali e nu mǐ ná kpo ɖo zɔnlin ɖi wɛ gbɔn nǔɖiɖi gblamɛ ɖe é tají atɔn jí. É ɖo mɔ̌ có, mǐ ɖó ná kpo ɖo zɔnlin ɖi gbɔn nǔɖiɖi gblamɛ wɛ ɖo akpáxwé gbɛzínzán mǐtɔn tɔn lɛ́ bǐ mɛ, ɖi kpɔ́ndéwú ɔ, hwenu e mǐ ɖo gbeta lɛ́ kɔn wá wɛ dó ayiɖeɖayǐ, wěma kplɔ́nkplɔ́n, alǒ vǐ kplɔ́nkplɔ́n wú wɛ é. Ényí gbeta ɖěbǔ kɔn wɛ mǐ ɖó ná wá ɔ, mǐ ɖó ná zɔn dó nǔ e mǐ sixú mɔ lɛ́ é kɛ́ɖɛ́ jí dó wá yě kɔn ǎ, loɔ, mǐ ɖó ná lɛ́ zɔn dó xɔ́ntɔn e mǐ zun xá Jexóva é, wě e é nɔ ɖe xá mǐ lɛ́ é kpó akpá e é dó ɖɔ émí ná kpé nukún dó mǐ wú é kpó jí. Ényí mǐ wa mɔ̌ ɔ, mǐ ná kpé wú bo ‘wa nǔ bo ná nyɔ́ ɖo Jexóva, Mawu mǐtɔn gɔ́n káká sɔ́yi.’—Micée 4:5.