“Mawu kpá ninɔ wɛ nyí ɖagbe” nú mǐ!

1-2. (a) Gǎndídó tɛ́ xɔ́ntɔn vívɛ́ zunzun xá mɛɖé ka nɔ byɔ́? (b) Étɛ́ lɛ́ jí mǐ ka ná ɖɔ xó dó ɖo xóta élɔ́ mɛ?

A KA ɖó xɔ́ntɔn vívɛ́ ɖé a? Nɛ̌ a ka wa gbɔn bo zun xɔ́ntɔn vívɛ́ xá ɛ? A sixú ko zán hwenu ɖó kpɔ́ xá ɛ, tuun wǔvɛ́ tɔn lɛ́, nǔ e é nɔ yí wǎn ná lɛ́ é kpó nǔ e é nɔ gbɛ́ wǎn ná lɛ́ é kpó. A wá mɔ nǔ jɛ wú ɖɔ é ɖó jijɔ ɖagbe e a ba ná ɖó lɛ́ é. A wá yí wǎn nú xɔ́ntɔn towe.

² Xɔ́ntɔn vívɛ́ zunzun xá mɛɖé nɔ byɔ́ hwenu kpó gǎndídó kpó. Nǔ ɖokpó ɔ wɛ xɔ́ntɔn vívɛ́ zunzun xá Jexóva Mawu lɔ nɔ byɔ́. Ðo xóta élɔ́ mɛ ɔ, mǐ ná ɖɔ xó dó lěe mǐ sixú zun xɔ́ntɔn vívɛ́ xá Mawu mǐtɔn gbɔn é kpó le ɖěɖěe mɔ̌ wiwa nɔ hɛn wá lɛ́ é kpó jí. Jɛ nukɔn hwɛ̌ ɔ, mǐ ní gbéjé nǔ e wú é sɔgbe ɖɔ mǐ ní zun xɔ́ntɔn vívɛ́ xá Xɔ́ntɔn mǐtɔn ɖagbe hú gǎn ɔ Jexóva é kpɔ́n.

3. Étɛ́wú mǐ ka ɖó ná lin tamɛ dó le ɖěɖěe xɔ́ntɔn vívɛ́ zunzun xá Jexóva nɔ hɛn wá lɛ́ é jí? Jlɛ̌ dó nǔɖé wú.

³ É ɖo wɛn ɖɔ a yí gbe ɖɔ xɔ́ntɔn vívɛ́ zunzun xá Jexóva nyɔ́. Amɔ̌, ényí mǐ nɔ lin tamɛ dó lěe é nyɔ́ tawun sɔ é jí ɔ, énɛ́ ná sísɛ́ mǐ bɔ mǐ ná kpo ɖo xɔ́ntɔn vívɛ́ zun xá ɛ wɛ. (Ðɛh. 63:7-9) Ði kpɔ́ndéwú ɔ, ényí mǐ nɔ ɖu nǔɖuɖu hunsin ɖagbe tɔn, nɔ ba lanmɛ kpɔ́n, nɔ gbɔjɛ ganjí, bo nɔ lɛ́ nu sin gěgé ɔ, é nɔ wa ɖagbe nú mǐ. É ɖo mɔ̌ có, mɛ gěgé nɔ ké ya káká ɖé nú nǔ énɛ́ lɛ́ ǎ, bo nɔ wɔn ya nú lanmɛ ná nɔ ganjí yětɔn. Amɔ̌, lě do mǐ nɔ lin tamɛ dó le ɖěɖěe walɔ lanmɛ ná nɔ ganjí tɔn lɛ́ nɔ hɛn wá nú mǐ lɛ́ é jí sɔ é ɔ, mɔ̌ do wɛ mǐ ná tɛ́ dó yě wú sɔ. Mɔ̌ ɖokpó ɔ, mǐ tuun ɖɔ Jexóva kpá ninɔ wɛ nyí nǔ ɖagbe nú mǐ, amɔ̌, tamɛ linlin dó le ɖěɖěe mɔ̌ wiwa sixú hɛn wá nú mǐ lɛ́ é jí ná sísɛ́ mǐ bɔ mǐ ná kpo ɖo vǐvɛ́ xá xɔ́ntɔn mǐtɔn wɛ.—Ðɛh. 119:27-30.

4. Lěe Ðɛhan 73:28 xlɛ́ gbɔn é ɔ, nɛ̌ nǔ ka cí nú ɖɛhanwlántɔ́ ɔ?

⁴ Xa Ðɛhan 73:28. Mɛ e wlán ɖɛhan 73​gɔ́ ɔ é ɔ, Levíi ví e è sɔ́ b’ɛ nyí hanjitɔ́ ɖo tɛ́npli Jexóva tɔn mɛ é ɖé wɛ. É sixú ko sɛn Jexóva kpó gbejíninɔ kpó nú hwenu línlín. É ɖo mɔ̌ có, é kpo ɖo mimɔ wɛ ɖɔ émí ɖó ná flín émíɖée kpó mɛ ɖěvo lɛ́ kpó ɖɔ “Mawu kpá ninɔ” wɛ nyí nǔ ɖagbe nú émí kpó yě kpó. Le tɛ́ lɛ́ mɔ̌ wiwa ka hɛn wá?

“MAWU KPÁ NINƆ” NƆ NÁ MƐ AWǍJIJƐ

5. (a) Étɛ́wú xɔ́ntɔn vívɛ́ zunzun xá Jexóva ka nɔ ná mǐ awǎjijɛ? (b) Zɔn dó Nǔnywɛ́xó 2:6-16 jí bo ná kpɔ́ndéwú tawun tawun lěe nǔnywɛ́ Jexóva tɔn sixú hɛn le wá nú hwiɖésúnɔ, bo lɛ́ nya xɛ ɖo jǐ towe gbɔn é tɔn ɖé lɛ́.

⁵ Lě do mǐ vɛ́ xá Jexóva sɔ é ɔ, mɔ̌ do wɛ mǐ ná ɖ’awǎjijɛ sɔ. (Ðɛh. 65:5) Énɛ́ sɔgbe ɖó hwɛjijɔ gěgé wú. Ðokpó wɛ nyí ɖɔ nǔnywɛ́ e nyɔ́ zán bo ɖo Xó tɔn Biblu ɔ mɛ lɛ́ é zínzán nɔ hɛn le wá nú mǐ. Nǔnywɛ́ mɔ̌hun lɛ́ nɔ nya xɛ ɖo mǐ jí sín nǔ e sixú wa nǔ dó mǐ wú lɛ́ é kpó hwɛ syɛ́nsyɛ́n huhu kpó sí. (Xa Nǔnywɛ́xó 2:6-16.) Yǎyá wú wɛ ǎ bɔ Biblu ɖɔ: “Awǎjijɛnɔ wɛ nyí mɛ e mɔ nǔnywɛ́ é kpó mɛ e ɖó nukúnnúmɔjɛnǔmɛ é kpó.”—Nǔx. 3:13 nwt.

6. Étɛ́ ka zɔ́n bɔ ɖɛhanwlántɔ́ ɔ ba awǎjijɛ tɔn kpo?

⁶ É ɖo wɛn ɖɔ xɔ́ntɔn Jexóva tɔn lɛ́ tlɛ sixú gbɔn hwenu wǔblá tɔn lɛ́ mɛ hweɖélɛ́nu. Mɛ e wlán Ðɛhan 73​gɔ́ ɔ é ba awǎjijɛ tɔn kpo hwenu e é lɔn bɔ linlin nyanya lɛ́ ɖí bú i é. Akpɔ ɖó è, bɔ é jɛ mɛ nyanya lɛ́ sín gbɛ jló jí, ɖó ɖo linlin tɔn mɛ ɔ, yě nɔ ké ya nú Mawu alǒ nú nǔgbódodó Mawu tɔn lɛ́ ǎ, có gbɛ ka nyɔ́ nú yě. É ɖó linlin agɔ bo ɖɔ ɖɔ hwebǐnu wɛ gbɛtɔ́ alǎnnúwatɔ́ lɛ́ kpó goyítɔ́ lɛ́ kpó nɔ jɛ dɔkun, nɔ ɖo ganjí ɖo agbaza mɛ, bo kún tlɛ nɔ se wǔvɛ́ ɖě ó. (Ðɛh. 73:3-7, 12) Ðɛhanwlántɔ́ ɔ flú sɔmɔ̌, káká bo ɖɔ gǎn e dó wɛ émí ɖe bo ɖo Jexóva sɛn wɛ é ka hwɛ́n nǔɖé a jí. É ɖɔ ɖo aluwɛ tɔn mɛ ɖɔ: “Hǔn ayi ce e un lɛ bɔ é mɛ́, bɔ un ma lɔn bo ɖó alɔ ɖo nǔ nyanya ɖé mɛ ǎ ɔ, nǔ yǎyá wɛ é nyí nɛ́ hǔn!”—Ðɛh. 73:13.

7. Ényí mǐ ɖo aluwɛ mɛ ɔ, étɛ́ mǐ ka sixú wa? (Kpɔ́n ɖiɖe ɔ lɔmɔ̌.)

⁷ Ðɛhanwlántɔ́ ɔ lɔn nú aluwɛ wa nǔ dó wǔ tɔn káká sɔ́yi ǎ. É yá wǔ wa nǔɖé. É “byɔ́ tɛn mímɛ́ [Mawu tɔn] mɛ,” bɔ ɖo fínɛ́ ɔ, Jexóva jlá linlin tɔn ɖó. (Ðɛh. 73:17-19) Ényí mǐ ɖo aluwɛ mɛ ɔ, Jexóva, Xɔ́ntɔn mǐtɔn ɖagbe hú gǎn ɔ nɔ tuun. Ényí mǐ xo ɖɛ bo byɔ́ ɛ ɖɔ é ní xlɛ́ ali mǐ, lobo yí gbe nú alɔ e é nɔ dó mǐ gbɔn Xó tɔn kpó agun ɔ kpó gblamɛ é ɔ, é ná ná hlɔ̌nhlɔ́n mǐ bɔ mǐ ná dɛ ɖo aluwɛ nu. Ényí adohu adohu tlɛ ɖí bú mǐ ɔ, é ná sɔ́ mǐ dó awa tɔn lɛ́ mɛ, lobo dó gbɔ nú mǐ.—Ðɛh. 94:19.a

“MAWU KPÁ NINƆ” NÁ ZƆ́N BƆ GBƐ MǏTƆN NÁ ÐÓ NU BƆ MǏ NÁ LƐ́ ÐÓ NUKÚNÐÍÐÓ

8. Ali tají ɖěvo tɛ́ lɛ́ nu Mawu kpá ninɔ ka nɔ nyí ɖagbe nú mǐ ɖe?

⁸ Mawu kpá ninɔ nɔ lɛ́ nyí ɖagbe nú mǐ ɖo ali tají we ɖěvo lɛ́ nu. Nukɔntɔn ɔ, é nɔ zɔ́n bɔ mǐ nɔ ɖó gbɛzán e ɖó nu é ɖé. Wegɔ́ ɔ, é nɔ ná mǐ nukúnɖíɖó jɔ nukúnɖíɖó nú sɔgúdo. (Jel. 29:11) Mi nú mǐ ní gbéjé le énɛ́ lɛ́ kpɔ́n ganjí.

9. Nɛ̌ xɔ́ntɔn vívɛ́ zunzun xá Jexóva ka nɔ zɔ́n bɔ gbɛ mǐtɔn nɔ ɖó nu gbɔn?

⁹ Xɔ́ntɔn vívɛ́ zunzun xá Jexóva nɔ zɔ́n bɔ gbɛ mǐtɔn nɔ ɖó nu. Égbé ɔ, mɛ ɖěɖěe nɔ gbɛ́ ɖɔ Mawu kún tíin ó lɛ́ é gěgé nɔ lin ɖɔ gbɛ kún ɖó nu ó, lé ɖo nukɔnmɛ ɔ, gbɛtɔ́ lɛ́ kún sɔ́ ná tíin ó. É ɖo mɔ̌ có, nǔ e mǐ kplɔ́n ɖo Xó Mawu tɔn mɛ é zɔ́n bɔ mǐ kú d’é jí ɖɔ Mawu “tíin, bo nɔ dó ajɔ mɛ e ɖo biba ɛ wɛ vɛ́návɛ́ná lɛ́ é.” (Ebl. 11:6) É tlɛ nyí ɖo égbé ɔ, mǐ ɖó gbɛzán awǎjijɛnɔ ɖé, ɖó mǐ ɖo nǔ e wú è dá mǐ é wa wɛ, é wɛ nyí ɖɔ mǐ ɖo Tɔ́ mǐtɔn jǐxwé tɔn Jexóva sɛn wɛ.—Sɛ́n. 10:12, 13.

10. Étɛ́ mǐ ka mɔ ɖo Ðɛhan 37:29 mɛ b’ɛ kunkplá sɔgúdo mɛ ɖěɖěe ɖo nukún ɖó Jexóva wɛ lɛ́ é tɔn?

¹⁰ Nú mɛ gěgé ɔ, nukúnɖíɖó yětɔn fó ɖó gbɛ élɔ́ jí, é wɛ nyí ɖɔ yě ná yi azɔ̌mɛ, kpé nukún dó xwédo wú, bo lɛ́ sɔ́ nǔ ɖ’ayǐ nú hwenu e yě ná byɔ́ gbɔjɛ yětɔn ɖaxó ɔ mɛ é. Mawu ɖo atɛ mɛ nú yě ǎ. Ðo alɔ ɖěvo mɛ ɔ, Jexóva sɛntɔ́ lɛ́ nɔ sɔ́ nukúnɖíɖó yětɔn ɖó jǐ tɔn. (Ðɛh. 25:3-5; 1 Tim. 6:17) Mǐ ɖeji dó Mawu e kpá mǐ ɖe é wú, bo lɛ́ ɖeji dó akpá e é dó nú mǐ lɛ́ é wú. Nukúnɖíɖó e mǐ ɖó bo ná sɛn ɛ káká sɔ́yi ɖo palaɖísi mɛ é lɔ ɖo sɔgúdo mǐtɔn mɛ.—Xa Ðɛhan 37:29.

11. Ðagbe tɛ́ Mawu kpá ninɔ ka nɔ hɛn wá nú mǐ? Nɛ̌ nǔ ka nɔ cí n’i?

¹¹ Mawu kpá ninɔ nɔ wa ɖagbe nú mǐ ɖo ali gěgé ɖěvo lɛ́ nu. Ði kpɔ́ndéwú ɔ, Jexóva dó akpá ɖɔ émí ná sɔ́ hwɛ kɛ mɛ ɖěɖěe hwɛ yětɔn lɛ́ vɛ́ ná bɔ yě sɛkpɔ́ émí lɛ́ é. (Eza. 1:18) Wǎgbɔ tɔn ɔ, mǐ sɔ́ ná kpo ɖo ayixa e nɔ dó hwɛ mɛ é ɖé sín agban hɛn wɛ ɖó hwɛ e mǐ ko hu wá yi lɛ́ é wú ǎ. (Ðɛh. 32:1-5) Gɔ́ ná ɔ, ényí mǐ vɛ́ xá Jexóva ɔ, xomɛ nɔ hun i. (Nǔx. 23:15) É ɖo wɛn ɖɔ, a sixú lin tamɛ dó nyɔ̌ná ɖěvo ɖěɖěe xɔ́ntɔn zunzun xá Mawu nɔ hɛn wá lɛ́ é jí. Bɔ nɛ̌ a ka sixú kpo ɖo Mawu kpá gbɔn lo?

LĚE È SIXÚ KPO ÐO “MAWU KPÁ” GBƆN É

12. Étɛ́ a ka ko wa bá dó vɛ́ xá Mawu?

¹² Cóbónú a ná bló batɛ́mu bo ná húzú Kúnnuɖetɔ́ Jexóva tɔn ɔ, a ko wa nǔ gěgé dó zun xɔ́ntɔn xá Jexóva. Hwɛ e a hu wá yi lɛ́ é vɛ́ nú we, a ɖe xlɛ́ ɖɔ émí ɖó nǔɖiɖi ɖaxó nú Mawu, bo lɛ́ dó gǎn syɛ́nsyɛ́n bo nɔ zán gbɛ sɔgbe xá jlǒ tɔn. É ɖo mɔ̌ có, bo ná dó kpo ɖo vǐvɛ́ xá Mawu wɛ ɔ, a ɖó ná kpo ɖo nǔ énɛ́ lɛ́ wa wɛ.—Koló. 2:6.

13. Nǔ atɔn tɛ́ lɛ́ ka sixú d’alɔ mǐ bɔ mǐ ná kpo ɖo vǐvɛ́ xá Jexóva wɛ?

¹³ Étɛ́ ka ná d’alɔ mǐ bɔ mǐ ná kpo ɖo vǐvɛ́ xá Jexóva wɛ? (1) Mǐ ɖó ná kpo ɖo Biblu xa wɛ, bo lɛ́ kpo ɖo kplɔ́nkplɔ́n wɛ. Ée mǐ ná ɖo mɔ̌ wa wɛ é ɔ, nǔ e gbé nya wɛ mǐ ɖe é ɖó ná zɛ nǔ bǐbɛ́mɛ tɔn lɛ́ kplɔ́nkplɔ́n dó Mawu wú wú. Mǐ ɖó ná tɛ́n kpɔ́n bo mɔ nukúnnú jɛ nǔ e nyí jlǒ Mawu tɔn nú mǐ é wú, lobo lɛ́ jó mǐɖée dó bɔ nǔgbódodó tɔn e ɖo Xó tɔn mɛ lɛ́ é ná xlɛ́ ali mǐ. (Efɛ́. 5:15-17) (2) Mǐ ɖó ná ná hlɔ̌nhlɔ́n nǔɖiɖi mǐtɔn gbɔn tamɛ linlin dó kúnnuɖenú e xlɛ́ nyi wɛn ɖɔ é yí wǎn nú mǐ lɛ́ é jí gblamɛ. (3) Mǐ ɖó ná kpo ɖo wǎn gbɛ́ nú nǔ ɖěɖěe nɔ vɛ́ nú Jexóva lɛ́ é wɛ, bo ná lɛ́ nyi alɔ nú xɔ́ntɔn zunzun xá mɛ ɖěɖěe nɔ wa nǔ mɔ̌hun lɛ́ é.—Ðɛh. 1:1; 101:3.

14. Sɔgbe xá nǔ e è ɖɔ ɖo 1 Kɔlɛ́ntinu lɛ́ 10:31 mɛ é ɔ, nǔ tɛ́ lɛ́ mɔ̌ mǐ ka sixú nɔ wa gbe bǐ gbe bá dó kpo ɖo Jexóva nukúnmɛ nyɔ́ wɛ? (Kpɔ́n ɖiɖe lɛ́ lɔmɔ̌.)

¹⁴ Xa 1 Kɔlɛ́ntinu lɛ́ 10:31. É ɖo tají ɖɔ mǐ ní kpo ɖo nǔ ɖěɖěe nɔ dó xomɛhunhun nú Jexóva lɛ́ é gbé nya wɛ kpó kanɖódónǔwú kpó. Énɛ́ zɛ nǔ e mǐ nɔ wa ɖo sinsɛnzɔ́ ɔ mɛ, bo nɔ lɛ́ wa ɖo kplé lɛ́ jí é wú. Nǔ e mǐ nɔ wa bá dó nyɔ́ ɖo Jexóva sí lɛ́ é kan gbɛzán gbe bǐ gbe tɔn mǐtɔn. Ði kpɔ́ndéwú ɔ, ényí mǐ nɔ ɖɔ nǔgbó ɖo nǔ bǐ mɛ, bo nɔ lɛ́ má nǔ e ɖo mǐ sí lɛ́ é xá mɛ ɖěvo lɛ́ ɔ, é nɔ hun xomɛ nú Jexóva. (2 Kɔ. 8:21; 9:7) É lɛ́ ba ɖɔ mǐ ní nɔ ɖó sísí ɖaxó nú nǔníná e gbɛ nyí é. Mǐ nɔ vɛ́ xá Gbɛnámɛtɔ́ ɔ gbɔn nǔ élɔ́ lɛ́ wiwa gblamɛ: Mǐ nɔ kpɔ́n nǔ bo nɔ ɖu, bo nɔ kpɔ́n ahan bo nɔ nu, bo nɔ lɛ́ kpé nukún dó lanmɛ mǐtɔn wú ɖo ali e ɖo jlɛ̌ jí é ɖěvo lɛ́ nu. Gǎn ɖěbǔ e mǐ nɔ dó bá dó nyɔ́ ɖo Jexóva nukúnmɛ, é ná bo tlɛ nyí ɖo nǔ kpɛví kpɛví lɛ́ mɛ é nɔ su nukún tɔn mɛ.—Luk. 16:10.

15. Nɛ̌ Jexóva ka ba ɖɔ mǐ ní nɔ wa nǔ xá mɛ ɖěvo lɛ́ gbɔn?

¹⁵ Jexóva nɔ nyɔ́ xomɛ dó nǔjlɔ́jlɔ́watɔ́ lɛ́ kpó nǔagɔwatɔ́ lɛ́ kpó bǐ wú. (Mat. 5:45) É nɔ ɖó nukún ɖɔ mǐ lɔ ní wa nǔ ɖokpó ɔ nú mɛ ɖěvo lɛ́. Ði kpɔ́ndéwú ɔ, mǐ ‘nɔ zun mɛ ɖěbǔ ǎ, nɔ ɖɔ jlɛ ǎ, bo nɔ fá xomɛ dó mɛ bǐ wú mlɛ́mlɛ́.’ (Ti. 3:2) Énɛ́ hinhɛn ayi mɛ ná zɔ́n bɔ mǐ ná nɔ ɖe mɛ ɖěvo lɛ́ kpo, ɖó yě ɖi nǔ nú nǔ ɖokpó ɔ mǐɖɔhun ǎ kpowun wútu ǎ. (2 Tim. 2:23-25) Hweɖébǔnu e mǐ ɖo nǔ wa xá mɛ ɖěbǔ wɛ é ɔ, ényí mǐ nɔ nyɔ́ xomɛ, bo nɔ lɛ́ ké ya n’i ɔ, mǐ ná vɛ́ xá Jexóva.

MǏ SIXÚ KPO ÐO “MAWU KPÁ” ÉNYÍ MǏ TLƐ WA NǓ NYI DO Ɔ NƐ́

16. Ðo hweɖénu ɔ, nɛ̌ nǔ ka jɛ cící nú mɛ e wlán Ðɛhan 73​gɔ́ ɔ é jí?

¹⁶ Amɔ̌, ényí xwe ɖé lɛ́ gúdo ɔ, a wá jɛ mimɔ jí ɖɔ émí kún sɔ́ jɛxá wǎnyíyí Jexóva tɔn ó ɔ ka lo? Lěe mǐ ko ɖɔ gbɔn wá yi é ɔ, nǔ mɔ̌hun ɖé jɛ dó mɛ e wlán Ðɛhan 73​gɔ́ ɔ é jí. É sa gbɛ vo bo ɖɔ: “Un ko ɖibla ɖe afɔ nyi do. Kpɛví títí ɖé wɛ kpo bɔ un ná ɖíɖí nǔ.” (Ðɛh. 73:2) Éɖésú yí gbe ɖɔ émí “sin xomɛ,” émí nyí “xlonɔ,” émí “cí gbɔ̌ ɖɔhun” ɖo Jexóva nukɔn. (Ðɛh. 73:21, 22) Amɔ̌, é ka lin ɖɔ nǔwanyido émítɔn zɔ́n bɔ émí húzú zɛ̌n jɛ ado gúdo, bo kún sɔ́ jɛxá wǎnyíyí Jexóva tɔn ó wɛ a?

17. (a) É ná bo tlɛ nyí hwenu e awakanmɛ kú ɖɛhanwlántɔ́ ɔ tawun é ɔ, étɛ́ é ka wa? (b) Étɛ́ nǔ e jɛ dó jǐ tɔn é ka sixú kplɔ́n mǐ? (Kpɔ́n ɖiɖe lɛ́ lɔmɔ̌.)

¹⁷ Ényí ɖɛhanwlántɔ́ ɔ mɔ ɖɔ Jexóva gbɛ́ émí ɔ, hwenu kléwún ɖé kpowun jɛ́n nǔ ná ko cí mɔ̌ n’i ná. É cí ɖɔ hwenu e awakanmɛ kú i bǐ é ɔ, é mɔ ɖɔ émí ɖó ná sɛkpɔ́ Mawu d’é jí lěe xó tɔn élɔ́ lɛ́ xlɛ́ gbɔn é: “É ka ɖo mɔ̌ có, un ɖo gɔ̌n towe tɛgbɛ; a hɛn mì; ɖisí lɔ ce ɖo alɔ towe mɛ. Nǔ e a nɔ kplɔ́n mì lɛ́ nɔ xlɛ́ ali mì; a nɔ bló mɔ̌, bo ná yí mì dó susu towe mɛ.” (Ðɛh. 73:23, 24) Mǐ lɔ ɖó ná nɔ byɔ́ Jexóva ɖɔ é ní ná hlɔ̌nhlɔ́n mǐ hwenu e mǐ mɔ ɖɔ gǎn vɔ ɖo mǐ wú alǒ awakanmɛ kú mǐ é. (Ðɛh. 73:26; 94:18) Ényí mǐ tlɛ wá zɛ gbě nú hwenu ɖé ɔ, mǐ sixú lɛ́ kɔ wá Jexóva gɔ́n, bo gán jɛ wú ɖɔ é “ɖo gbesisɔmɛ bo ná sɔ́ hwɛ kɛ [mǐ].” (Ðɛh. 86:5) Ðo tají ɔ, hwenu e awakanmɛ kú mǐ tawun é ɔ, mǐ ɖó ná sɛkpɔ́ Mawu mǐtɔn d’é jí.—Ðɛh. 103:13, 14.

‘NƆ MAWU KPÁ’ KÁKÁ SƆ́YI

18. Étɛ́wú Jexóva sisɛkpɔ́ ma ka ɖó dogbó ǎ?

¹⁸ Bǎ e mɛ mǐ sixú sɛkpɔ́ Jexóva yi ɖó é kpó bǎ e mɛ mǐ sixú tuun i ganjí yi ɖó é kpó ɖó dogbó ǎ. Biblu ɖɔ: “Mɛ̌ ka sixú mɔ nǔ jɛ” ali Jexóva tɔn lɛ́, nǔnywɛ́ tɔn kpó nǔtuuntuun tɔn kpó wú?—Hlɔ̌. 11:33.

19. Gǎnjɛwú tɛ́ Ðɛhan ka ná mǐ?

¹⁹ Ðɛhan 79:13 ɖɔ: “Mǐdɛɛ lɛ́ e nyí togun towe ɔ, mǐ lɛ̌ngbɔ́hwan e a nyí lɛ̌ngbɔ́nyitɔ́ ná lɛ́ ɔ, mǐ ná nɔ ji han dó kpa we káká sɔ́yi; mǐ ná nɔ kpa susu nú we sín jijimɛ ɖě jí yi ɖě jí.” Ée a ná kpo ɖo Mawu kpá nɔ wɛ é ɔ, hwi lɔ sixú ɖeji ɖɔ émí ná mɔ nyɔ̌ná mavɔmavɔ lɛ́, bo sixú ɖɔ kpó jiɖiɖe kpó ɖɔ: “Hwi Mawu wɛ ná nyí sósyɛ́n ce, bo ná nyí nyɔ̌ná nyiɖokpónɔ géé tɔn káká sɔ́yi.”—Ðɛh. 73:26.