Lěe è sixú nyi alɔ nú “alɔtúntún ɖo mɛxóxwe mɛ” gbɔn é.

Ðo 1990 kpó 2015 kpó vlamɛ ɔ, kɛ́n mɛ ɖěɖěe ɖó xwe 50 jɛjí, bo tún alɔ ɖo États-Unis lɛ́ é tɔn jɛjí donu we, bɔ mɛ ɖěɖěe ɖó xwe 65 jɛjí lɛ́ é tɔn jɛjí donu atɔn. Dobanúnǔtɔ́ lɛ́ ɖe xógbe “alɔtúntún ɖo mɛxóxwe mɛ” ɔ tɔ́n bá dó xlɛ́ lě do mɛ e ko wlí alɔ sín hwenu línlín ɖíe, bo ka ɖo túntún wɛ ɖo mɛxóxwe mɛ lɛ́ é sín kɛ́n ɖo jijɛjí wɛ sɔ́ é. Étɛ́ ka nɔ dɔn “alɔtúntún ɖo mɛxóxwe mɛ” wá? Nɛ́ a ka sixú nya xɛ ɖo alɔwlíwlí towe jí bo ma ná wá tún alɔ ɖo mɛxóxwe mɛ ǎ gbɔn?

Ðo xóta élɔ́ mɛ ɔ, mǐ ná ɖɔ xó dó nǔ élɔ́ lɛ́ jí:

• Étɛ́ ka nɔ dɔn alɔtúntún ɖo mɛxóxwe mɛ wá?

• Nǔ e a sixú wa é

• Xóɖɔɖókpɔ́ nɔ d’alɔ

Étɛ́ ka nɔ dɔn alɔtúntún ɖo mɛxóxwe mɛ wá?

• Hwɛhwɛ ɔ, mɛxómɔ e nɔ tún alɔ lɛ́ é sín kancícá nɔ ko ɖo da vɔ́ wɛ kpɛɖé kpɛɖé sín do. Hwenu ɖo yiyi wɛ ɔ, nú è sɔ́ asú kpó asi kpó ɖé lɛ́ ɔ, nǔ e nɔ ɖu ayi mɛ nú asi lɛ́ é nɔ gbɔn vo nú nǔ e nɔ ɖu ayi mɛ nú asú lɛ́ é bɔ nǔ kpɛví ɖé jɛ́n yě nɔ wá ɖó ɖo bǔ. Alǒ ényí vǐ yětɔn lɛ́ wá nyí mɛxó bo gosín akpá yětɔn ɔ, yě sixú wá ɖó ayi wú ɖɔ ayi sísɔ́ ɖó azɔ̌ e yě ɖó ɖi mɛjitɔ́ é jí ná zɔ́n bɔ yě ná wɔn lěe yě ná sɔ ayi ɖó asú kpó asi kpó ɖagbe nyínyí jí gbɔn é.

• Ðo xwe gǔdo gúdo tɔn élɔ́ lɛ́ mɛ ɔ, ényɔ́watɔ́ e è nɔ ɖɔ alɔwlíwlí xó lɛ́ é ɖɔ nú asi lɛ́ ɖɔ yě ní sɔ́ ayi ɖó hudó yěɖésúnɔ tɔn lɛ́ jí. ‘Un ka ɖó awǎjijɛ ɖo alɔwlíwlí ce mɛ a?’ ‘É ka ɖo blǒbló wɛ bɔ un ná kpɔ́n te d’é jí a?’ ‘Lěe mɛ e un da é nɔ wa nǔ xá mì gbɔn é ka nɔ xlɛ́ ɖɔ é yí wǎn nú mì bɔ un lɛ́ xɔ akwɛ́ n’i a?’ Nú nǔ ma ɖo mɔ̌ nyí wɛ ǎ ɔ, a sixú ɖo linlin wɛ ɖɔ é ná nyɔ́ nú we hú gǎn ɖɔ a ní gbɛ́ mɛ e a da é, bo bɛ́ gbɛzán yɔ̌yɔ́ ɖěvo.

• Alɔtúntún sɔ́ nɔ nylá mɛ lɛ́ nukún mɛ ǎ. Mɛ̌si Eric Klinenberg wlán ɖɔ: “É lín din ǎ bɔ, é byɔ́ ɖɔ mɛ e ma ɖó awǎjijɛ ɖo alɔwlíwlí tɔn mɛ ǎ, bo ba ná tún alɔ é ɖé ní nɔ ná hwɛjijɔ ɖagbe e wú é ba ná wa mɔ̌ é. Flíjɛ tɔn wɛ nɔ jɛ ɖo égbé: Ényí a ma ɖó awǎjijɛ ɖo alɔwlíwlí towe mɛ ǎ ɔ, a ɖó ná ná hwɛjijɔ ɖagbe é wú a ma ko tún alɔ ǎ lɛ́ é. Nǔ nɔ nyí mɔ̌ ɖó mɛ gěgé nɔ lin égbé ɖɔ nǔ e ɖo tají hú gǎn bɔ è ɖó ná wa é wɛ nyí nǔ e nɔ nyɔ́ nú mɛɖésúnɔ é.”a

È ná ɖɔ ɔ, ényí mɛɖé tún alɔ ɔ, é sɔ́ nɔ mɔ tagba ɖé lɛ́ ǎ, amɔ̌, é sixú kpo ɖo tagba yɔ̌yɔ́ lɛ́ mɔ wɛ. Ði kpɔ́ndéwú ɔ, dobanúnǔ ɖé xlɛ́ ɖɔ “alɔtúntún ɖo mɛxóxwe mɛ nɔ dɔn akwɛ́yózo syɛ́nsyɛ́n nyi ayǐ, ɖo tají ɔ nú nyɔ̌nu lɛ́.”

Nǔɖé ɖo fí bɔ è ɖó ná lin tamɛ d’é jí. Wěma Don’t Divorce ɖɔ: “A na bo tɛ́n kpɔ́n bá húzú gbɛzán towe ɔ, mɛ ɖokpó e a nyí é nyí wɛ jɛ́n a ná kpo ɖe. Ðó xóɖɔɖókpɔ́ ma ɖo dǐndín wɛ ganjí xá mɛ e a da é ǎ wútu ɔ, hǔzúhúzú tɛ́ a ka bló ɖo xóɖɔɖókpɔ́ linu? Hǔzúhúzú tɛ́ lɛ́ a ka bló ɖo lěe a nɔ ɖí xwi xá tagba lɛ́ gbɔn é kpáxwé?”b

Nǔ e a sixú wa é

• Yǐ gbe nú hǔzúhúzú ɔ. Kancícá ɖě nɔ gɔn hǔzúhúzú ǎ. Kancícá e ɖo hwi kpó mɛ e a da é kpó tɛ́ntin é sixú ko húzú ɖó vǐ mitɔn lɛ́ sɛ tɛn alǒ nǔ vovo lɛ́ wɛ jɛ ayi mɛ ɖu nú mi mɛ we lɛ́ jí wútu. Ma jó nǔ lɛ́ dó lěe yě ko ɖe é bo lin ɖɔ é ná wá kpɔ́n te ó, é nyɔ́ wa ɔ, lin tamɛ dó lěe a ná bló bɔ lěe nǔ lɛ́ ɖe din é ná kpɔ́n te d’é jí gbɔn é jí.

  

  Nǔgbódodó Biblu tɔn: “Ma nɔ kanbyɔ́ ɖɔ: “Étɛ́wú gbɛ ɖ’ayǐ tɔn ka nyɔ́ hú gbɛ din tɔn” ó, ɖó mɛ e nyɔ̌ nǔ i ɔ nɔ kan nǔ mɔ̌hun byɔ́ ǎ.”—Nǔnywɛ́tɔ́xó 7:10.

• Kpo ɖo vǐvɛ́ xá mɛ e a da é wɛ. A ka sixú tɛ́n kpɔ́n bo ná jɛ wǎn yí nú nǔ e nɔ ɖu ayi mɛ nú mɛ e a da é ɖé jí alǒ byɔ́ ɛ ɖɔ é ní wá zán hwenu ɖó kpɔ́ xá we ɖo nǔ e nɔ ɖu ayi mɛ nú hwɛ é ɖé kɔn a? Mi ka sixú wa alǒ kplɔ́n nǔ yɔ̌yɔ́ ɖěvo e mi mɛ we lɛ́ bǐ ná ɖu vǐví tɔn é ɖé a? Nǔ e gbé a ɖó ná nya é wɛ nyí ɖɔ mi ní zán hwenu ɖó kpɔ́, mɔ̌ mɛ ɔ, hwi kpó mɛ e a da é kpó sɔ́ ná nɔ mɔ ɖɔ xɔ wɛ mi kpé dó kpowun ǎ, amɔ̌, mi ná nɔ mɔ miɖée dó mɔ asú kpó asi kpó.

  

  Nǔgbódodó Biblu tɔn: “Mi nú mɛ ɖokpó ɖokpó ní nɔ ba nǔ e ná hɛn le wá nú mɛ ɖěvo lɛ́ é, é ní ma nyí nǔ e ná hɛn le wá nú éɖésúnɔ é ó.”—1 Kɔlɛ́ntinu lɛ́ 10:24.

• Mi kpo ɖo nǔ wa xá miɖée wɛ ɖo ali ɖagbe nú. Mi ma nɔ gɔn sísí ɖe xlɛ́ miɖée kpowun ɖó mi ko ɖo kpɔ́ sín hwenu línlín ɖíe wú ó. Nɔ ɖɔ xó nú mɛ e a da é kpó sísí kpó bo tɛ́n kpɔ́n bo kpo ɖo nǔ wa xá ɛ wɛ ɖo ali ɖagbe nú lěe é nyí gbɔn hwenu e mi ɖo xɔ́ntɔn mɛ é. Nɔ ɖɔ “kɛnklɛ́n” kpó “a wa nǔ” kpó. Nɔ ɖe wǎnyíyí xlɛ́ bo nɔ lɛ́ ɖe nǔsumɛnukúnmɛ xlɛ́ mɛ e a da é nú nǔ e é wa nú we lɛ́ é.

  

  Nǔgbódodó Biblu tɔn: “Mi nɔ nyɔ́ xomɛ dó miɖée lɛ́ wú, bo nɔ ɖe nǔbláwǔkúnúmɛ e gɔ́ngɔ́n é xlɛ́.”—Efɛ́zinu lɛ́ 4:32.

• Nɔ flín hwenu ɖagbe e mi zán ɖó kpɔ́ lɛ́ é. Mi nɔ kpɔ́n fɔtóo alɔwlíwlí tɔn mitɔn lɛ́ alǒ fɔtóo nǔ ɖěvo e mi wa ɖó kpɔ́ lɛ́ é tɔn ɖó kpɔ́. Mɔ̌ wiwa sixú d’alɔ mi bɔ mi ná kpo ɖo wǎnyíyí ɖó nú miɖée wɛ bo ná kpo ɖo sísí ɖe xlɛ́ miɖée wɛ ɖo alɔwlíwlí mitɔn mɛ.

  

  Nǔgbódodó Biblu tɔn: “Asú ɖokpó ɖokpó ɖó ná yí wǎn nú asi tɔn éɖésúnɔ ɖɔhun. Ðo alɔ ɖěvo mɛ ɔ, asi ɖó ná ɖó sísí ɖaxó nú asú tɔn.”—Efɛ́zinu lɛ́ 5:33.