Mǐ ka ɖó ná jɛ kpɔ́ cóbó wlí alɔ wɛ a?

Asú kpó asi kpó gěgé nɔ jɛ kpɔ́ cóbó nɔ wlí alɔ. Mɛ ɖé lɛ́ nɔ wa mɔ̌ ɖó yě nɔ ba ná kpɔ́n ɖɔ émí jɛxá émíɖée a jí, bo nɔ ɖó nukún ɖɔ énɛ́ ná zɔ́n bɔ alɔwlíwlí yětɔn ná yi ta. Kpɔ́ jijɛ jɛ nukɔn nú alɔwlíwlí ka nyí nǔnywɛ́nú a?

Ðo xóta élɔ́ mɛ ɔ, mǐ ná ɖɔ xó dó nǔ élɔ́ lɛ́ jí:

• Étɛ́ Biblu ka ɖɔ?

• Kpɔ́ jijɛ jɛ nukɔn nú alɔwlíwlí ka ná sɔ́ nǔ nú we nú alɔwlíwlí wɛ a?

• Kpɔ́ jijɛ jɛ nukɔn nú alɔwlíwlí ka ná d’alɔ we bɔ a ná sɛ akwɛ́ xwe wɛ a?

• Kpɔ́ jijɛ jɛ nukɔn nú alɔwlíwlí ka ná d’alɔ we bɔ a ná nyi alɔ nú mɛ e a ma sixú nɔ awǎjijɛ mɛ xá ǎ é dida wɛ a?

• Nǔ ɖagbe hú gǎn ɖé ka ɖe bɔ a sixú wa a?

Étɛ́ Biblu ka ɖɔ?

• Biblu gbɛ́ xóɖóxámɛ jɛ nukɔn nú alɔwlíwlí. Ði kpɔ́ndéwú ɔ, é ɖɔ: “Nɔ zɔ nú agalilɛ.” (1Tɛsaloníkinu lɛ́ 4:3; 1Kɔlɛ́ntinu lɛ́ 6:18) Énɛ́ kunkplá súnnu kpó nyɔ̌nu kpó e jɛ kpɔ́ lɛ́ é lɔmɔ̌, ényí yě ná bo tlɛ ɖo linlin wɛ bo ná wá wlí alɔ ɔ nɛ́.a Nǔgbódodó Biblu tɔn lɛ́ nɔ nya xɛ ɖo mɛ jí sín xo mimɔ ma ko wlí alɔ kpó nǔ nyanya mɔ̌hun ɖěvo kpó e kpɔ́ jijɛ jɛ nukɔn nú alɔwlíwlí sixú dɔn wá lɛ́ é sí.

• Mawu wɛ bló tuto alɔwlíwlí tɔn. Hwenu e é ɖó ayǐ é ɔ, é ɖɔ: “Súnnu ná jó tɔ́ tɔn kpó nɔ tɔn kpó dó, bo ná jɛ kpɔ́ xá asi tɔn, bɔ yě mɛ we lɛ́ ná húzú ɖokpó géé.” (Bǐbɛ́mɛ 2:24) Akpá e súnnu kpó nyɔ̌nu kpó nɔ dó nú yěɖée ɖo alɔwlíwlí yětɔn hwenu é wɛ nyí dodónu ɖagbe hú gǎn ɔ nú wǎnyíyí ná nɔ xwédo ɔ mɛ, bɔ é ná lɛ́ xo ǎ.

Kpɔ́ jijɛ jɛ nukɔn nú alɔwlíwlí ka ná sɔ́ nǔ nú we nú alɔwlíwlí wɛ a?

Mɛ ɖé lɛ́ lin ɖɔ ɛɛn wɛ nyí xósin ɔ. Yě nɔ lin ɖɔ ényí è jɛ kpɔ́ bo zán hwenu ɖó kpɔ́ ɖo xwégbezɔ́ lɛ́ kɔn, bo lɛ́ kpɔ́n jijɔ mɛɖée lɛ́ tɔn lɛ́ ɔ, énɛ́ nɔ zɔ́n bɔ è nɔ mɔ nǔ kpɔ́n ganjí. Amɔ̌, akpá e è nɔ dó ɖo alɔwlíwlí hwenu é ɖo tají bónú awǎjijɛ ní nɔ alɔwlíwlí mɛ.

Nɛ̌ asú kpó asi kpó lɛ́ ka sixú kplɔ́n bo ná nɔ tɛ́ dó yěɖée wú ɖo hwenu ɖagbe lɛ́ alǒ nyanya lɛ́ mɛ gbɔn? Kpɔ́ jijɛ jɛ nukɔn nú alɔwlíwlí, énɛ́ wɛ nyí hwenu e mɛ we lɛ́ ɖěbǔ nɔ mɔ ɖɔ émí sixú ɖó nǔ kancícá ɔ nu hweɖébǔnu é, nyí ali ɖagbe ɔ bónú è ná ɖó alɔwlíwlí awǎjijɛnɔ ɖé ǎ. Amɔ̌, ényí mɛ we lɛ́ d’akpá nú yěɖée syɛ́nsyɛ́n, bo nɔ w’azɔ̌ ɖó kpɔ́ dó ɖe ɖɛ tagba lɛ́ ɔ, kancícá yětɔn nɔ yi ta.

Nǔ tají ɔ: Súnnu kpó nyɔ̌nu kpó e ma sɔ́ nǔ nú yěɖée bo ná wlí alɔ ǎ, bo ka jɛ kpɔ́ lɛ́ é sixú ɖo nǔ sɔ́ nú kínklán wɛ fɛɛ.

Nǔgbódodó Biblu tɔn: “Nǔ e mɛɖé dó é wɛ é ná ya.”—Galátinu lɛ́ 6:7.

Kpɔ́ jijɛ jɛ nukɔn nú alɔwlíwlí ka ná d’alɔ we bɔ a ná sɛ akwɛ́ xwe wɛ a?

Mɛ ɖé lɛ́ lin ɖɔ ɛɛn wɛ nyí xósin ɔ. Dobanúnǔ Pew Research Center tɔn ɖé xlɛ́ ɖɔ ɖo États-Unis ɔ, ɛnɛ ɖo wǒ jí mɛxó e jɛ kpɔ́ jɛ nukɔn nú alɔwlíwlí lɛ́ é tɔn wa mɔ̌ ɖó yě lin ɖɔ énɛ́ ná d’alɔ yě bɔ yě ná sɛ akwɛ́ xwe wútu. Amɔ̌, yě jɛ kpɔ́ bɔ é bló hwenu kpɛɖé gúdo é ɔ, yě mɛ ɖé lɛ́ kpo ɖo ɖiɖɔ wɛ ɖɔ yě kún ko ɖo gbesisɔmɛ bo ná wlí alɔ ó, ɖó yě ko ɖó akwɛ́ tɔn ǎ wútu.

Kpɔ́ jijɛ jɛ nukɔn nú alɔwlíwlí sixú lɛ́ ji nǔ ɖěvo lɛ́, ɖo tají ɔ, nú nyɔ̌nu lɛ́. Ði kpɔ́ndéwú ɔ, ényí yě ɖó nǔ kancícá yětɔn nu ɔ, nyɔ̌nu lɛ́ wɛ vǐ lɛ́ hinhɛn sín agban nɔ wá kpɛn hwɛhwɛ.

Nǔ tají ɔ: Nǔ nyanya e kpɔ́ jijɛ jɛ nukɔn nú alɔwlíwlí nɔ ji lɛ́ é sixú zɛ ɖagbe enyíi e ɖ’é mɛ lɛ́ é wú flaflá tɔn.

Nǔgbódodó Biblu tɔn: “Nyɛ [Jexóva] ɔ, nyɛ wɛ nyí Mawu towe; nyi wɛ ná ɖɔ nǔ e ná nyɔ́ nú we ɔ nú we.”—Ezayíi 48:17.

Kpɔ́ jijɛ jɛ nukɔn nú alɔwlíwlí ka ná d’alɔ we bɔ a ná nyi alɔ nú mɛ e a ma sixú nɔ awǎjijɛ mɛ xá ǎ é dida wɛ a?

Mɛ ɖé lɛ́ lin ɖɔ ɛɛn wɛ nyí xósin ɔ. É ɖo mɔ̌ có, wěma Fighting for Your Marriage ɖɔ ɖɔ “hwɛhwɛ ɔ, hwenu zínzán ɖó kpɔ́ nɔ zɔ́n bɔ nǔ ɖíɖó kancícá ɖé nu nɔ vɛ́ wǔ, amɔ̌, mɛ ɖěɖěe nɔ jɛ kpɔ́ jɛ nukɔn nú alɔwlíwlí lɛ́ é nɔ ɖ’ayi wú ǎ. Aniwú? Súnnu kpó nyɔ̌nu kpó e ko jɛ kpɔ́ é ɖé lɛ́ sixú wá mɔ ɖɔ émí kún jɛxá émíɖée lɛ́ ɖěbǔ ó. Amɔ̌, ɖó yě ɖó xwégbe kanlin ɖé ɖó kpɔ́, ɖu axɔ́ ɖé ɖó kpɔ́, abǐ ɖó nukún tɔn ǎ bɔ nyɔ̌nu ɔ mɔ xo wútu ɔ, dobanúnǔtɔ́ lɛ́ mɔ ɖɔ yě nɔ gbɔ bo cí kpɔ́ kpowun ɖó yě ko kplɔ́n bo nɔ nɔ kpɔ́, bo sixú bló hǔzúhúzú e ná ko nyɔ́ nú yě é ɖé ǎ wútu.”b Wěma Fighting for Your Marriage gbɛ kan d’é nu bo ɖɔ ɖɔ ɖo xógbe ɖěvo mɛ ɔ, “mɛ ɖěɖěe nǔ ɖo nǔ ganjí wɛ ɔ, yě ɖó ná klán cóbó yi alɔwlíwlí kɔn lɛ́ é nɔ gbɔ bo wá gbɛ kan dó kpɔ́ninɔ yětɔn nu ɖó énɛ́ nɔ bɔ wǔ nú yě hú gǎn kpowun wútu.”

Nǔ tají ɔ: Kpɔ́ jijɛ jɛ nukɔn nú alɔwlíwlí nɔ d’alɔ mɛ bɔ è nɔ wá gbeta ɖagbe ɖé kɔn ǎ; wǔ wɛ nǔ ɖíɖó kancícá nyanya ɖé nu nɔ vɛ́ d’é jí.

Nǔgbódodó Biblu tɔn: “Gbɛtɔ́ e ayi tɔn ɖo te ɔ mɔ nǔ nyanya ja ɔ, é nɔ hɔn bɛ; xlonɔ ka nɔ zɔn mɔ̌ bo nɔ yi zɔn mɛ.”—Nǔnywɛ́xó 22:3.

Nǔ ɖagbe hú gǎn ɖé ka ɖe bɔ a sixú wa a?

A sixú nyi alɔ nú tagba e nɔ wá tɔ́n ɖo kpɔ́ jijɛ jɛ nukɔn nú alɔwlíwlí mɛ lɛ́ é, bo ná mlɛ́ ali e ná zɔ́n bɔ nú a wá wlí alɔ ɔ, é ná kpa we hú gǎn é ɖé. Gbɔn nɛ̌ é? Gbɔn nǔgbódodó Biblu tɔn e kunkplá alɔwlíwlí lɛ́ é zínzán ganjí gblamɛ. Zǎn hwenu dó tuun mɛ e a ba ná da é ganjí jɛ nukɔn hwɛ̌ cóbónú mi jɛ kpɔ́ asú kpó asi kpó ɖɔhun. É nyɔ́ ɖɔ a ní da mɛɖé ɖó hwi kpó é kpó nɔ zán nǔgbódodó ɖokpó ɔ lɛ́, bo lɛ́ ɖi nǔ nú nǔ ɖokpó ɔ lɛ́ hú ɖɔ a ní da ɛ ɖó é nɔ jló we bɔ a nɔ ba ná ɖóxó xá ɛ kpowun wútu.

Wěɖexámɛ ɖěɖěe sixú d’alɔ we bɔ a ná mlɛ́ ali e ná zɔ́n bɔ a ná ɖó alɔwlíwlí e jínjɔ́n ayǐ, bo lɛ́ ɖó awǎjijɛ é ɖé é ɖo Biblu mɛ.c Ði kpɔ́ndéwú ɔ, wěɖexámɛ e ɖo Biblu mɛ lɛ́ é sixú d’alɔ we bɔ a ná . . .

• nyi alɔ nú gbejímanɔ

• nyí mɛ alɔkpa e ná húzú asú alǒ asi ɖagbe ɖé é

• nɔ acéjí dó nǔ e sixú gb’akpá nú we vlafo ɖɔ mɛ e lin ná da wɛ a ɖe é kún jɛxá we ó lɛ́ é wú hwenu e mi ɖo xɔ́ntɔn mɛ é

Bo ná dó kplɔ́n nǔ ɖěvo lɛ́ dó xóta énɛ́ lɛ́ wú hǔn, kpɔ́n akpáxwé “Alɔwlíwlí kpó xwédo kpó” ɖo jw.org jí.

Nǔgbódodó Biblu tɔn: “Mawu wɛ sɔ́ Nǔwlánwlán mímɛ́ lɛ́ bǐ dó ayi mɛ nú mɛ e wlán lɛ́ é; é nyɔ́ bónú è ná sɔ́ dó kplɔ́n nǔ mɛ.”—2 Timɔtée 3:16.