Toxóɖɔtɔ́ lɛ́ gba akpá nú mɛ ɖɔ Aamagedɔ́ni ná wá zaanɖé: Étɛ́ Biblu ka ɖɔ?

Ðo lundi 10 octobre zǎnzǎn ɔ, Russie-nu lɛ́ da bɔ̌nbu dó toxo Ukraine tɔn lɛ́ gěgé mɛ. Yě wa mɔ̌, dó ba bɔ̌nbu e è da azǎn we jɛ nukɔn dó hɛn anǎ e dɔn Crimée kpó Russie kpó cá é gblé é sín hlɔn. Toxóɖɔtɔ́ ɖé lɛ́ gba akpá nú mɛ ɖɔ Aamagedɔ́ni ná wá zaanɖé b’ɛ nɔ zaan gúdo é wɛ nǔ énɛ́ lɛ́ jɛ.

• “Sín [togán Amɛlíka tɔn John F.] Kennedy kpó bɔ̌nbuhwan e si azɔ ɖo Cuba é kpó hwenu ɔ, Aamagedɔ́ni ko ɖo kɛ́nnɛ́kɛ́nnɛ́ mɔ̌ kpɔ́n ǎ. . . . Un lin nú è ná [zán] bɔ̌nbu e nɔ vívá nǔ tawun é ɖé mɔ̌ kpowun bónú é ná gɔn Aamagedɔ́ni dɔn wá ǎ.”—Xó e togán États-Unis tɔn Joe Biden ɖɔ ɖo 6 octobre 2022 é.

• “Un yí gbe ɖɔ Aamagedɔ́ni wɛ ɖo vǐ sɔ́ ɖó akɔn wɛ mɔ̌, bo ka ná wa nǔ dó planɛ́ti ɔ bǐ wú.”—Xó e togán Ukraine tɔn Volodymyr Zelensky ɖɔ ɖo BBC News jí ɖo 8 octobre 2022, hwenu e è kan nǔ byɔ́ ɛ dó nǔ e bɔ̌nbu e nɔ vívá nǔ tawun lɛ́ é zínzán ná ji lɛ́ é wú é.

Bɔ̌nbu e nɔ vívá nǔ tawun lɛ́ é zínzán ka sixú dɔn Aamagedɔ́ni wá nǔgbó a? Étɛ́ Biblu ka ɖɔ?

Bɔ̌nbu e nɔ vívá nǔ tawun lɛ́ é ná hun nǔ sín Aamagedɔ́ni nu wɛ a?

Éǒ. Azɔn ɖokpó géé wɛ è mɔ xókwín “Aamagedɔ́ni” ɔ ɖo Biblu mɛ ɖo Nǔɖexlɛ́mɛ 16:16 mɛ. É ka nɔ dó gesí ahwan e akɔta lɛ́ nɔ fun ɖo yěɖée lɛ́ tɛ́ntin é ǎ, loɔ, ahwan e ná tíin ɖo Mawu kpó “axɔ́sú e ɖo ayǐkúngban ɔ bǐ jí lɛ́” é kpó tɛ́ntin e wɛ é nɔ dó gesí. (Nǔɖexlɛ́mɛ 16:14) Mawu ná zán ahwan Aamagedɔ́ni tɔn dó ɖó nǔ acɛkpikpa gbɛtɔ́ tɔn nu.—Daniyɛ́li 2:44.

Nú a ná kplɔ́n nǔ dó nǔ e ná jɛ ɖo ayǐkúngban ɔ jí ɖo Aamagedɔ́ni hwenu é wú d’é jí hǔn, xa xóta Étɛ́ ka nyí ahwan Aamagedɔ́ni tɔn?

Ahwan e è ná zán bɔ̌nbu e nɔ vívá nǔ tawun é dó fun é ɖé ná sú kún dó nú ayǐkúngban ɔ kpó mɛ e ɖ’é jí lɛ́ é kpó wɛ a?

Éǒ. Nǔgbó wɛ ɖó acɛkpatɔ́ lɛ́ sixú wá zán bɔ̌nbu e nɔ vívá nǔ tawun lɛ́ é ɖo nukɔnmɛ, amɔ̌, Mawu ná lɔn nú è ná sú kún dó nú ayǐkúngban ɔ ǎ. Biblu ɖɔ:

• “Ayǐkúngban ɔ ɖo te tɛgbɛ.”—Nǔnywɛ́tɔ́xó 1:4, nwt.

• “[Ayǐkúngban] ɔ ná nyí hwɛjijɔnɔ lɛ́ tɔn, bɔ yě ná nɔ [jí] káká sɔ́yi.”—Ðɛhan 37:29.

É ɖo mɔ̌ có, nǔɖɔɖayǐ Biblu tɔn lɛ́ kpó nǔ ɖěɖěe ɖo jijɛ wɛ agaɖanu din lɛ́ é kpó xlɛ́ ɖɔ fí bǔnɔ ɖé wɛ mǐ tunta ɖo hwenuxó gbɛtɔ́ tɔn mɛ. (Matíe 24:3-7; 2 Timɔtée 3:1-5) Kpɔ́n nǔ e Biblu ɖɔ dó sɔgúdo wú é gbɔn Biblu e mǐ nɔ kplɔ́n mɛ vɔ̌nu é gblamɛ.