Akɔta lɛ́ ka sixú w’azɔ̌ ɖó kpɔ́ bo nyi alɔ nú hǔzúhúzú baɖabaɖa e nɔ kúnkplá ninɔmɛ ayǐ mɛ tɔn bo nɔ hɛn nǔ gblé tawun lɛ́ é a?: Étɛ́ Biblu ka ɖɔ?

Ðo dimanche 20 novembre 2022 ɔ, kplé e Gbɛ̌ kplékplé akɔta lɛ́ tɔn bló dó hǔzúhúzú e kúnkplá ninɔmɛ ayǐ mɛ tɔn é wú, bɔ è ylɔ́ ɖɔ COP27 é wá vivɔnu. Gǎn kpó akɔwé kpó tɛnmɛ tɛnmɛ e wá kplé ɔ lɛ́ é yí gbe ɖɔ è ná ná akwɛ́ yatɔ́nɔ sín to ɖěɖěe wú hǔzúhúzú e kúnkplá ninɔmɛ ayǐ mɛ tɔn lɛ́ é nɔ hɛn nǔ gblé dó lɛ́ é. Amɔ̌, mɛ gěgé ɖɔ ɖɔ énɛ́ kún ná ɖe ɖɛ tagba ɔ mlɛ́mlɛ́ ó.

• Ðo 19 novembre 2022 ɔ, António Guterres, éé nyí Gbɛ̌ kplékplé akɔta lɛ́ tɔn sín wěgbójínɔtɔ́ é ɖɔ: “Xomɛ hun mì ɖɔ mǐ wá gbeta ɔ kɔn bo ná kplé akwɛ́ dó d’alɔ mɛ ɖěɖěe nɔ se wǔvɛ́ hǔzúhúzú e nɔ kúnkplá ninɔmɛ ayǐ mɛ tɔn lɛ́ é tɔn lɛ́ é. Amɔ̌, mǐ tuun ɖɔ énɛ́ kún ná kpé ó . . . Planɛ́ti mǐtɔn cí azinzɔnnɔ e kpo ɖo ajijimɛnú lɛ́ sín xɔsá ɖo dotóoxwé é ɖɔhun.”

• Ðo 20 novembre 2022 ɔ, Mary Robinson, éé nyí togán xóxó Irelande tɔn, bo lɛ́ xwe aza nú Gbɛ̌ kplékplé akɔta lɛ́ tɔn sín mǐmámɛ e nɔ ɖɔ acɛ gbɛtɔ́ tɔn lɛ́ xó é kpɔ́n é ɖɔ: “Hǔzúhúzú e nɔ kúnkplá ninɔmɛ ayǐ mɛ tɔn é baɖabaɖa ɖé sixú hɛn nǔ gblé dó ayǐkúngban ɔ wú ɖo malínmálín mɛ, bo ná wa nǔ dó mɛ bǐ wú.”

Ado nɔ hu mɛ wínnyáwínnyá lɛ́ tawun dó nǔ e sixú jɛ dó planɛ́ti mǐtɔn wú ɖo sɔgúdo é wú. É ɖo mɔ̌ có, akɔta lɛ́ ka sixú w’azɔ̌ ɖó kpɔ́ bo ná ɖe akpá e yě dó ɖɔ émí ná wa nǔɖé dó jlá hǔzúhúzú e nɔ kúnkplá ninɔmɛ ayǐ mɛ tɔn lɛ́ é ɖó é a? Étɛ́ Biblu ka ɖɔ?

Akɔta lɛ́ ka ná w’azɔ̌ ɖó kpɔ́ b’ɛ ná kpa yě a?

Biblu ɖe xlɛ́ ɖɔ ényí acɛkpikpa lɛ́ ná bo kpé wú bo bló bɔ nǔ e hǔzúhúzú e nɔ kúnkplá ninɔmɛ ayǐ mɛ tɔn é nɔ dɔn wá lɛ́ é kpɔ́n te ɔ, yě kún ná kpé wú bo ɖe ɖɛ tagba ɔ mlɛ́mlɛ́ ó. Hwɛjijɔ e wú wɛ é we ɖíe:

• “Nǔ e xá ɔ, è sixú jlɔ́ ǎ.”—Nǔnywɛ́tɔ́xó 1:15.

  Tínmɛ tɔn: Acɛkpikpa lɛ́ sixú kpé wú bo wa nǔ e yě jló ná wa lɛ́ é bǐ ǎ, è dá gbɛtɔ́ bónú é ná kp’acɛ dó éɖée jí ǎ. (Jelemíi 10:23) Ényí akɔta lɛ́ ná bo tlɛ w’azɔ̌ ɖó kpɔ́ ɔ, yě ná kpé wú bo ɖe ɖɛ tagba gbɛ ɔ tɔn lɛ́ gbeɖé ǎ, ényí yě ná bo dó gǎn gbɔn ɖěbǔ ɔ nɛ́.

• “Gbɛtɔ́ lɛ́ ná nɔ ba ɖɔ émítɔn jɛ́n ná nyɔ́; yě ná nɔ yí wǎn nú akwɛ́; . . . yě ná nɔ kú nǔbláwǔ nú mɛ ǎ.”—2 Timɔtée 3:2, 3.

  Tínmɛ tɔn: Biblu ko ɖɔ ɖ’ayǐ ɖɔ ɖo hwe mǐtɔn nu ɔ, mɛ gěgé ná nyí cejɛ́nnábínɔ, bo ná nɔ ba ná w’azɔ̌ ɖó kpɔ́ dó hɛn le wá nú mɛ ɖěvo lɛ́ ǎ.

Nukúnɖíɖó tíin

É ɖo mɔ̌ có, nǔ e sixú jɛ dó planɛ́ti mǐtɔn wú ɖo sɔgúdo é ná sín akpá ɖěɖěe acɛkpikpa gbɛtɔ́ tɔn lɛ́ dó lɛ́ é wú ǎ. Mawu ko bló tuto Gǎn e kpé nǔ wú é ɖokpó tɔn nú gbɛ ɔ, é wɛ nyí Jezu Klísu. Biblu ɖɔ dó wǔ tɔn ɖɔ:

• “Mawu ná ɛ acɛ bɔ é ná ɖu axɔ́sú. È nɔ ylɔ́ ɛ ɖɔ Wěɖexámɛtɔ́ kpíkpé, Mawu hlɔ̌nhlɔ́nnɔ, Tɔ́ tɛgbɛ tɔn, Gǎn fífánɔ.”—Ezayíi 9:5.

Jezu wɛ nyí Axɔ́sú nú Axɔ́súɖuto Mawu tɔn, éé nyí acɛkpikpa ɖé bo ɖo jǐxwé é. (Matíe 6:10) É ɖó hlɔ̌nhlɔ́n, nǔnywɛ́ kpó jlǒ kpó bo ná kpé nukún dó planɛ́ti mǐtɔn kpó mɛ e ɖ’é jí lɛ́ é kpó wú. (Ðɛhan 72:12, 16) É ná nɔ nukɔn bɔ acɛkpikpa jǐxwé tɔn énɛ́ ná sú kún dó nú “mɛ e nɔ hɛn ayǐkúngban ɔ gblé lɛ́” é, lobo ná jlá nǔ e ko gblé dó planɛ́ti ɔ wú lɛ́ é bǐ ɖó.—Nǔɖexlɛ́mɛ 11:18; Ezayíi 35:1, 7.

Nú a ná ɖó mɔjɛmɛ dó nǔ e ná jlá hǔzúhúzú e kúnkplá ninɔmɛ ayǐ mɛ tɔn lɛ́ é ɖó nǔgbó nǔgbó é wú d’é jí hǔn, xa xóta “Etẹ Biblu Dọ Gando Ninọmẹ Aimẹ Tọn He Nọ Diọ lẹ po Ṣogodo Mítọn po Go?”