Nǔ e Axɔ́súɖuto Mawu tɔn ná wa ɖo ninɔmɛ ayǐ mɛ tɔn sín tagba lɛ́ linu é

“Gbɛtɔ́ lɛ́, toxo lɛ́ kpó nǔɖogbɛ lɛ́ bǐ kpó ɖo wǔvɛ́ mɔ wɛ ɖó ninɔmɛ ayǐ mɛ tɔn sín tagba syɛ́nsyɛ́n lɛ́ wútu. Hǔzúhúzú ninɔmɛ ayǐ mɛ tɔn tɔn lɛ́ zɔ́n bɔ jɔhɔn kpó jǐ kpó syɛ́nsyɛ́n lɛ́ ɖo syɛ́nsyɛ́n d’é jí wɛ, bo ɖo xwé kpó nǔɖókan kpó hɛn gblé wɛ gbɔn gbɛ ɔ bǐ mɛ. Ninɔmɛ e mɛ nǔɖogbɛ lɛ́ nɔ nɔ gbɛ ɖe ɖo xu mɛ é ɖo gblěgblé d’é jí wɛ ɖó yǒzo syɛ́nsyɛ́n wútu, bɔ nǔɖogbɛ ɖé lɛ́ sín kún sixú sú dó.”—Inger Andersen, sous-secrétaire générale des Nations unies et directrice exécutive du Programme des Nations unies pour l’environnement, 25 juillet 2023.

Acɛkpikpa lɛ́ ka ná kpé wú bo ɖó gbe kpɔ́ lobo ɖe ɖɛ tagba énɛ́ lɛ́ a? Yě ka ná kpé wú bo ná ɖe ɖɛ tagba énɛ́ lɛ́ bǐ mlɛ́mlɛ́?

Biblu ɖɔ acɛkpikpa ɖé sín xó b’ɛ sixú wa mɔ̌, bɔ é ná ɖe ɖɛ ninɔmɛ ayǐ mɛ tɔn sín tagba lɛ́ bǐ. É ɖɔ ɖɔ “Mawu [jǐxwé] tɔn ná ɖe axɔ́súɖuto e mɛɖé ma sixú gba ǎ é ɖokpó tɔ́n,” acɛkpikpa ɖé wɛ bo ná kpa acɛ dó ayǐkúngban ɔ bǐ jí, bo ná ɖe ɖɛ tagba tɔn lɛ́. (Daniyɛ́li 2:44) Ðo acɛkpikpa énɛ́ glɔ́ ɔ, è “ná wa nǔ nyanya ɖěbǔ ǎ, è ná hɛn nǔ ɖěbǔ gblé” dó mɛɖé alǒ ayǐkúngban ɔ wú ǎ.—Ezayíi 11:9.