Tɛn Ɛntɛnɛ́ti tɔn e jí è nɔ zun xɔ́ntɔn ɖe é ɖo nǔ hɛn gblé dó vǐ towe wú wɛ wɛ a?: Lěe Biblu sixú d’alɔ mɛjitɔ́ lɛ́ gbɔn é

“Taglomɛzɔn e ɖo nǔ gba wɛ ɖo mɛ wínnyáwínnyá lɛ́ tɛ́ntin é ɔ, nǔɖé wɛ bo myá nukún tawun, bɔ mǐ ɖ’ayi wú ɖɔ nǔ e nɔ zɔ́n tawun lɛ́ é ɖokpó wɛ nyí tɛn Ɛntɛnɛ́ti tɔn e jí è nɔ zun xɔ́ntɔn ɖe lɛ́ é.”—Dotóogán Vivek Murthy, éé xwe aza nú lanmɛ ná nɔ ganjí xó ɖo États-Unis é, xójláwéma New York Times, 17 juin 2024.

Nɛ̌ mɛjitɔ́ lɛ́ ka sixú nya xɛ ɖo vǐ yětɔn lɛ́ jí, bɔ awǒvinú e ɖo tɛn Ɛntɛnɛ́ti tɔn e jí è nɔ zun xɔ́ntɔn ɖe é mɛ lɛ́ é ma ná ba yě ǎ gbɔn? Biblu ɖe wě ɖagbe lɛ́ xá mɛ.

Nǔ e mɛjitɔ́ lɛ́ sixú wa lɛ́ é

Gbějé nǔgbódodó Biblu tɔn élɔ́ lɛ́ kpɔ́n.

“Mɛ e ayi tɔn ɖo te ɔ . . . nɔ lin tamɛ cóbó nɔ wa nǔ.”—Nǔnywɛ́xó 14:15.

Ðó tɛn Ɛntɛnɛ́ti tɔn e jí è nɔ zun xɔ́ntɔn ɖe lɛ́ é sixú wa nǔ dó vǐ towe wú wútu ɔ, ma mɔ ɖɔ dandan wɛ émí ná ná gbe è bɔ é ná zán ó. Cóbónú a ná ná gbe vǐ towe bónú é ná zán tɛn Ɛntɛnɛ́ti tɔn e jí è nɔ zun xɔ́ntɔn ɖe é hǔn, mɔ nǔ jɛ wú ɖɔ é ko zin sɔmɔ̌ bo ná xwedó sɛ́n ɖěɖěe a ná dó dó táan nabí e é sixú nɔ zán ná é wú lɛ́ é, lobo ná nyi alɔ nú nǔmasɔgbe e nɔ tɔ́n ɖ’é jí lɛ́ é.

• Nú a ná ɖó mɔjɛmɛ d’é jí hǔn, xa xóta “Be E Jẹ Dọ Ovi Ṣie Ni Zan Nọtẹn Gbẹdido Intẹnẹt Ji Tọn lẹ Ya?” kpó “Protégez votre adolescent des dangers des réseaux sociaux” kpó.

“Mi ní nɔ zán hwenu mitɔn ganjí.”—Efɛ́zinu lɛ́ 5:16.

Ényí a ná gbe vǐ towe bónú é ná nɔ zán tɛn Ɛntɛnɛ́ti tɔn e jí è nɔ zun xɔ́ntɔn ɖe é hǔn, ɖǒ sɛ́n lɛ́ ayǐ dó lěe é ná zán gbɔn é wú, lobo tínmɛ lěe sɛ́n énɛ́ lɛ́ ná d’alɔ ɛ b’ɛ ná nɔ ayijayǐ mɛ gbɔn é n’i. Nɔ acéjí dó hǔzúhúzú ɖěbǔ e sixú xwetɔ́n ɖo vǐ towe sín nǔwalɔ mɛ, bo ná xlɛ́ ɖɔ a ɖó ná ɖó dogbó nú lěe é nɔ zán tɛn Ɛntɛnɛ́ti tɔn e jí è nɔ zun xɔ́ntɔn ɖe é gbɔn é wú.

• Zǎn ɖiɖe cícaví tɔn Zun xɔ́ntɔn ɖo Ɛntɛnɛ́ti jí kpó nǔnywɛ́ kpó dó d’alɔ vǐ towe bónú é ní mɔ nukúnnú jɛ nǔ e wú dogbó lɛ́ ɖo dandan é wú.

Ba do nú nǔ d’é jí

Biblu ɖɔ ɖɔ mǐ ɖo gbɛ nɔ wɛ ɖo “hwenu e syɛ́n bo vɛ́ wǔ bɔ è ná ɖí xwi xá lɛ́ é” mɛ. (2 Timɔtée 3:1-5) Amɔ̌, wěɖexámɛ ɖagbe e ná d’alɔ mǐ bɔ mǐ ná ɖí xwi xá lɛ́ é lɛ́vɔ́ ɖo Biblu mɛ. Xóta ɖé kunkplá mɛ wínnyáwínnyá e nɔ jɛ taglomɛzɔn lɛ́ é bo slɛ́ xóta jínjɔ́n Biblu jí 20 jɛjí, bɔ yě sixú d’alɔ mɛjitɔ́ lɛ́ kpó vǐ yětɔn lɛ́ kpó.