Lɔ̌nyijǐ-fɔnkan yihún Olympique tɔn lɛ́ ka sixú dɔn gbɛtɔ́ lɛ́ ɖó bǔ nǔgbó nǔgbó a?: Étɛ́ Biblu ka ɖɔ?

Ðo lɔ̌nyijǐ-fɔnkan yihún Olympique tɔn alǔun hwenu 2024 tɔn hwenu ɔ, è lin ɖɔ gbɛtɔ́ lǐva atɔ́ɔ́n ná kpɔ́n lɔ̌nyijǐ-fɔnkan yihúndatɔ́ e gosín to 206 mɛ wá agbahwlɛ́nhwlɛ́n ɔ tɛnmɛ lɛ́ é. Thomas Bach e nyí gǎn nú wěɖegbɛ́ e ɖɔ nǔ dó agbahwlɛ́nhwlɛ́n Olympique tɔn nu gbɔn gbɛ ɔ bǐ mɛ é ɖɔ: “Mǐ ɖo nǔwiwa e dɔn gbɛ ɔ bǐ ɖó bǔ ɖo fífá mɛ é ɖé mɛ ɖ’alɔ ɖe wɛ. Mi nu mǐ ní wa nǔ sɔgbe xá linlin e wú è ɖó lɔ̌nyijǐ-fɔnkan yihún Olympique tɔn lɛ́ ayǐ é; énɛ́ wɛ nyí ɖɔ gbɛtɔ́ lɛ́ bǐ ɖó ná zán fífá gbɛ, lobo lɛ́ nɔ bǔ, mǐ bǐ ná bo tlɛ gbɔn vo nú mǐɖée ɔ nɛ́.”

Lɔ̌nyijǐ-fɔnkan yihún Olympique tɔn lɛ́ ka sixú d’alɔ mǐ bɔ mǐ ná kpé nǔ ɖaxó énɛ́ lɛ́ e gbé nya wɛ é ɖe lɛ́ é wú a? Fífá jɔ fífá kpó bǔninɔ adodwé kpó ka ná wá tíin gbe ɖokpó a?

Yě ka ná hɛn fífá kpó bǔninɔ kpó wá a?

Xwe élɔ́ mɛ sín lɔ̌nyijǐ-fɔnkan yihún Olympique tɔn zɔ́n bɔ mɛ lɛ́ mɔ nǔ zɛ lɔ̌nyijǐ-fɔnkan yihúndida kpowun wú. É lɛ́ tá wěziza dó tagba e nɔ wa nǔ dó gbɛtɔ́ wú lɛ́ é, gɔ́ nú tagba e nɔ wa xwetɔ́n ɖo toxóɖiɖɔ linu bo nɔ klán gbɛtɔ́ lɛ́ é jí. Acɛ gbɛtɔ́ lɛ́ tɔn, akɔ kínklán, mɛ ɖiɖe ɖó vo ɖo mɛ mɛ ɖo sinsɛn linu kpó nǔagɔwaxámɛ kpó ɖo tagba énɛ́ lɛ́ mɛ.

Lɔ̌nyijǐ-fɔnkan yihúndida Olympique tɔn ɖɔhun e nɔ dɔn gbɛtɔ́ e gosín fí vovo lɛ́ é kplé lɛ́ é nɔ zɔ́n bɔ mɛ lɛ́ nɔ ɖe ayi ɖ’ayǐ. Amɔ̌, nǔwiwa énɛ́ lɛ́ nɔ lɛ́ xlɛ́ ɖɔ mɛ lɛ́ nɔ lin nǔ bo nɔ lɛ́ wa nǔ ɖo ali ɖé lɛ́ nu bɔ é nɔ dɔn kínklán wá yě kpó mɛ ɖěvo lɛ́ kpó tɛ́ntin. Gɔ́ ná ɔ nǔwiwa énɛ́ lɛ́ nɔ lɛ́ dó wǔsyɛ́n lanmɛ nú mɛ lɛ́ bɔ yě nɔ gbɛ kan dó nǔ wa gbɔn mɔ̌ nu, bɛ́ sɔ́ nɔ nyí nǔ e ná dɔn fífá jɔ fífá kpó bǔninɔ adodwé ɔ kpó wá lɛ́ é sín kan wɛ yě nɔ xo ǎ.

Biblu ko ɖɔ ɖ’ayǐ ɖɔ gbɛtɔ́ lɛ́ ná ɖó jijɔ ɖěɖěe ná zɔ́n bɔ bǔninɔ ná vɛ́ wǔ ɖo égbé lɛ́ é. (2 Timɔtée 3:1-5) Bo ná dó kplɔ́n nǔ dó nǔɖɔɖayǐ Biblu tɔn énɛ́ jí d’é jí hǔn, xa xóta “La Bible a-t-elle prédit la mentalité et la conduite des gens de notre époque?”

Nukúnɖíɖó jɔ nukúnɖíɖó nú fífá kpó bǔninɔ kpó gbɛ ɔ bǐ tɔn

Nukúnɖíɖó ɖeji d’é wú ɖe nú fífá kpó bǔninɔ kpó gbɛ ɔ bǐ tɔn ɖo Biblu mɛ. É d’akpá ɖɔ mɛ e ɖo ayǐkúngban ɔ jí lɛ́ é bǐ ná nɔ bǔ ɖo acɛkpikpa jǐxwé tɔn ɖé glɔ́, é wɛ nyí “Axɔ́súɖuto Mawu tɔn.”—Luki 4:43; Matíe 6:10.

Axɔ́sú Axɔ́súɖuto énɛ́ tɔn, Jezu Klísu, ná bló bɔ fífá ná tíin gbɔn gbɛ ɔ bǐ mɛ. Biblu ɖɔ:

• “Hwɛjijɔ ní gba kpé, . . . vivo ní tíin.”—Ðɛhan 72:7.

• “É ná hwlɛ́n wamamɔnɔ e ɖo xó sú wɛ ɔ. . . . É ná yí yě sín mɛ e nɔ kpa acɛ gannaganna lɛ́ kpó dǎkaxotɔ́ lɛ́ kpó sí.”—Ðɛhan 72:12, 14.

Ðo alɔnu din ɔ, nǔkplɔ́nmɛ Jezu tɔn lɛ́ ko dɔn gbɛtɔ́ lǐvi mɔ̌kpán ɖó bǔ ɖo to 239 mɛ. Ðó kúnnuɖetɔ́ Jexóva tɔn e gbɔn gbɛ ɔ bǐ mɛ lɛ́ é nyí klisánwun lɛ́ wútu ɔ, yě kplɔ́n bo nɔ nɔ fífá mɛ. Bo ná dó mɔ lěe nǔ nyí mɔ̌ gbɔn é hǔn, xa Atɔxwɛ e xóta tɔn nyí “Ðu ɖo wǎngbɛ́númɛ jí” é.