Étɛ́wú toxóɖiɖɔ ka nɔ klán gbɛtɔ́ lɛ́ sɔmɔ̌? Étɛ́ Biblu ka ɖɔ?

Gbɔn gbɛ ɔ bǐ mɛ ɔ, to gěgé wɛ klán ɖo toxóɖiɖɔ linu. Sɔgbe xá dobanúnǔ e azɔ̌xwé dobanúnǔ tɔn ɖé bló ɖo 2022 é ɔ, “mɛ e ko ɖó mɛxóxwe é 65 ɖo 100 jí, ɖo to vovo 19 mɛ ɖɔ ɖɔ gbemanɔkpɔ́ alǒ gbemanɔkpɔ́ syɛ́nsyɛ́n tíin ɖo mɛ e nɔ nɔ gǔdo nú toxóɖɔgbɛ́ta vovo lɛ́ é tɛ́ntin ɖo to émítɔn mɛ.”—Pew Research Center.

A ka ɖ’ayi wú ɖɔ kínklán e toxóɖiɖɔ nɔ dɔn wá é ɖo kan vun wɛ ɖo fí e a nɔ nɔ é a? Étɛ́wú nǔ ka ɖo mɔ̌ nyí wɛ? Nǔɖé ka ɖe bo sixú ɖe ɖɛ ninɔmɛ mɔ̌hun a? Gbějé nǔ e Biblu ɖɔ é kpɔ́n.

Jijɔ e nɔ dɔn kínklán wá lɛ́ é

Biblu ɖɔ ɖ’ayǐ ɖɔ ɖo “azǎn gǔdo gúdo tɔn lɛ́,” énɛ́ wɛ nyí, ɖo hwe mǐtɔn nu ɔ, mɛ gěgé ná ɖó jijɔ e ná zɔ́n bɔ bǔninɔ nɔ vɛ́ wǔ lɛ́ é.

• “Ðo azǎn gǔdo gúdo tɔn lɛ́ mɛ ɔ, hwenu e syɛ́n bo vɛ́ wǔ bɔ è ná ɖí xwi xá lɛ́ é ná tíin. Ðó gbɛtɔ́ lɛ́ ná nɔ nyí cejɛ́nnábínɔ, . . . yě ná nɔ ba ná ɖó gbe kpɔ́ ǎ.”—2 Timɔtée 3:1-3, nwt.

Mɛ gěgé ɖo tagba jɛ wɛ bónú acɛkpikpa lɛ́ ná yi ta có, nǔ ɖo mɔ̌ nyí wɛ ǎ. Mɛ lɛ́ nɔ ɖó linlin vovo lɛ́, bɔ azɔ̌wiwa ɖó kpɔ́ bo ná ɖe ɖɛ tagba lɛ́ nɔ vɛ́ wǔ nú yě alǒ tlɛ gló yě. Nǔ e mɛ é nɔ tɔ́n kɔ dó lɛ́ é dó zǒgbe nǔ e Biblu ɖɔ wá yi b’ɛ ko lín tawun é jí.

• “Gbɛtɔ́ ɖě nɔ kpa acɛ gannaganna nú nɔzo tɔn, bo nɔ wa nǔ dó wǔ tɔn.”—Nǔnywɛ́tɔ́xó 8:9.

É ɖo mɔ̌ có, Biblu ɖɔ nǔ e ná ɖe ɖɛ ninɔmɛ ɔ é: acɛkpikpa ɖé wɛ, bɔ mɛ e nyí gǎn ná é kpé wú bo ná ɖe ɖɛ tagba e ɖo wǔvɛ́ dɔn wá nú gbɛtɔ́ lɛ́ wɛ égbé lɛ́ é.

Gǎn e jɛxá bɔ nǔ mɛtɔn nɔ ɖu ayi mɛ ná é ɖé

Biblu ɖɔ gǎn ɖokpó xó, bɔ éɖokpónɔ wɛ jɛxá: Jezu Klísu wɛ. Jezu ɖó hlɔ̌nhlɔ́n, acɛ, kpó jlǒ kpó bo ná hɛn bǔninɔ kpó fífá kpó wá nú gbɛtɔ́ lɛ́ bǐ.

• “Hwɛjijɔ ní gba kpé axɔ́sú ɔ hwenu, . . . vivo ní tíin ɖo to ɔ mɛ.”—Ðɛhan 72:7.

• “Akɔta lɛ́ bǐ ná nyí mɛsɛntɔ́ tɔn.”—Ðɛhan 72:11.

Jezu nyí gǎn e jɛxá é ɖé, ɖó gbɛtɔ́ lɛ́ sín nǔ nɔ ɖu ayi mɛ n’i, bɔ é lɛ́ jló ná d’alɔ yě, ɖo tají ɔ, mɛ ɖěɖěe è wa nǔmasɔgbe xá lɛ́ é.

• “É ná hwlɛ́n wamamɔnɔ e ɖo xó sú wɛ ɔ, bo ná hwlɛ́n lelenɔ e ma ɖó ɖɔxátɔ́ ɖě ǎ é. É ná kú nǔbláwǔ nú mɛ e ma ɖó hlɔ̌nhlɔ́n ɖé ǎ lɛ́ kpó gbɛ̌dónánɔ lɛ́ kpó; é ná hwlɛ́n wamamɔnɔ lɛ́ sín gbɛ gán. É ná yí yě sín mɛ e nɔ kpa acɛ gannaganna lɛ́ kpó dǎkaxotɔ́ lɛ́ kpó sí.”—Ðɛhan 72:12-14.

Kplɔ́n nǔ ɖěvo lɛ́ dó Axɔ́súɖuto Mawu tɔn, éé nyí acɛkpikpa ɖé ɖo jǐxwé bɔ Jezu nyí gǎn ná é wú. Ba dó nú lěe acɛkpikpa tɔn sixú hɛn le wá nú we gbɔn é kpó lěe a sixú nɔ gǔdo n’i gbɔn é kpó.

• Kpɔ́n video Étɛ́ ka nyí Axɔ́súɖuto Mawu tɔn?

• Xa xóta “Ahọluduta Jiwheyẹwhe Tọn—Gandudu de He Ma Nọ Hò Ahizi.”