Ahwan e fun wɛ è ɖe ɖo gbadahwe jí Azíi tɔn é: Étɛ́ Biblu ka ɖɔ?

Gbɛ ɔ ɖo adohu adohu jí ɖó nǔ e ahwan e dɔn États-Unis, Israël kpó Iran kpó cá é ná ji é wú. Ahwan énɛ́ ka ná wá nyí ahwan ɖaxó bo ná wa nǔ dó to gěgé wú wɛ a? Acɛkpikpa lɛ́ ka sixú bló bɔ hunnyahunnya ná hán, bɔ fífá ná tíin gbɔn gbɛ ɔ bǐ mɛ a?

Mɛ ɖěɖěe ko xa nǔɖɔɖayǐ Biblu tɔn lɛ́ é sixú nɔ kanbyɔ́ yěɖée ɖɔ ahwan énɛ́ e fun wɛ è ɖe ɖo gbadahwe jí Azíi tɔn é wɛ ná hun nǔ sín ahwan Aamagedɔ́ni tɔn e xó è ɖɔ ɖo wěma Nǔɖexlɛ́mɛ tɔn mɛ é nu a jí.

Étɛ́ Biblu ka ɖɔ?

Acɛkpikpa lɛ́ ka ná ɖó nǔ ahwan e fun wɛ è ɖe ɖo gbadahwe jí Azíi tɔn é nu a?

Biblu ɖɔ: “Mi ma gán jɛ gǎnhúnǔtɔ́ gbɛ mɛ fí tɔn lɛ́ wú ó. Gbɛtɔ́ wɛ yě nyí, yě kpé wú bó ná hwlɛ́n mɛ gán ǎ.”—Ðɛhan 146:3.

Nú acɛkpikpa lɛ́ ná kpé wú bo ná bló bɔ fífá ná tíin ɖó bǎ ɖé mɛ ɖo gbadahwe jí Azíi tɔn, alǒ gbɔ ɔ, te jɛ́n mǐ ná nɔ bá kpɔ́n. Amɔ̌, Biblu ɖe xlɛ́ nyi wɛn ɖɔ toxóɖɔtɔ́gán ɖě, acɛkpikpa ɖě, alǒ kplékplé gbɛtɔ́ tɔn ɖě kún sixú ɖó nǔ ahwan nu, bo hɛn fífá e ná nɔ ayǐ káká sɔ́yi é wá ó. Mawu kɛ́ɖɛ́ jɛ́n sixú kpé wú bo “sú ahwan kún dó gbɔn gbɛ ɔ bǐ mɛ.”—Ðɛhan 46:10.

• Nú a ná ɖó mɔjɛmɛ d’é jí hǔn, xa Atɔxwɛ élɔ́ e xóta tɔn nyí “Ahwan ná vɔ: Gbɔn nɛ̌ é?” é

Ahwan e fun wɛ è ɖe ɖo gbadahwe jí Azíi tɔn é ka ɖo blǒbló wɛ bɔ nǔɖɔɖayǐ ɖé ɖo jijɛnu wɛ wɛ a?

Biblu ɖɔ: “Mi ná se ahwanfunfun sín zǐngídi ɖo fí e sɛkpɔ́ mi lɛ́ é, bo ná se ahwanfunfunxó ɖo fí e lín dó mi lɛ́ é. . . . Akɔta ɖě ná tɔ́n ahwan ɖě, bɔ axɔ́súɖuto ɖě ná tɔ́n ahwan ɖě.”—Matíe 24:6, 7.

Ahwan e fun wɛ è ɖe ɖo gbadahwe jí Azíi tɔn alɔnu din é nyí nǔ ɖěvo e dó gesí “azǎn gǔdo gúdo tɔn gbɛ élɔ́ tɔn lɛ́” é, bo lɛ́ gɔ́ so nú kúnnuɖenú e xlɛ́ ɖɔ mǐ ɖo gbɛ nɔ wɛ ɖo “azǎn gǔdo gúdo tɔn lɛ́” mɛ é. (Matíe 24:3; 2 Timɔtée 3:1) Ahwan e ɖo nǔ gba wɛ égbé lɛ́ é xlɛ́ ɖɔ zaanɖé din ɔ, Mawu ná ɖó nǔ ahwan kpó wǔvɛ́ ɖěvo e nɔ wa nǔ dó gbɛtɔ́ lɛ́ wú lɛ́ é kpó nu.

• Nú a ná ɖó mɔjɛmɛ d’é jí hǔn, xa xóta“Étɛ́ ka nyí wuntun “azǎn gǔdo gúdo tɔn lɛ́,” alǒ “hwenu e gbɛ élɔ́ ná vɔ dó ɔ” tɔn lɛ́?”

Aamagedɔ́ni ka ná bɛ́ ɖo gbadahwe jí Azíi tɔn wɛ a?

Biblu ɖɔ: “Nǔɖɔɖayǐ lɛ́ xo axɔ́sú lɛ́ kplé dó fí e è nɔ ylɔ́ ɖɔ Aamagedɔ́ni ɖo Ebléegbe mɛ é.”—Nǔɖexlɛ́mɛ 16:16.

Ahwan Aamagedɔ́ni tɔn nyí ahwan e acɛkpatɔ́ lɛ́ ná fun ɖo yěɖée tɛ́ntin, bɔ é ná bɛ́ ɖo gbadahwe jí Azíi tɔn é ǎ. Ahwan e è ná fun gbɔn gbɛ ɔ bǐ mɛ é ɖé wɛ, bo ná nyí ɖo acɛkpatɔ́ lɛ́ bǐ kpó Mawu kpó tɛ́ntin.

• Nú a ná ɖó mɔjɛmɛ d’é jí hǔn, xa xóta“Étɛ́ ka nyí ahwan Aamagedɔ́ni tɔn?”

Étɛ́ ka sixú d’alɔ mǐ bɔ mǐ ná ɖí xwi xá nǔ tɛnmɛ tɛnmɛ e nɔ ɖó adohu adohu nú mǐ lɛ́ é?

Biblu ɖɔ: “Ado ní ma nɔ hu mi dó nǔ ɖěbǔ wú ó, é nyɔ́ wa ɔ, ɖo ninɔmɛ lɛ́ bǐ mɛ ɔ, mi ní nɔ byɔ́ nǔ Mawu gbɔn ɖɛxixo, vosisa kpó kúdídó kpó gblamɛ.”—Filípunu lɛ́ 4:6.

Jexóvaa Mawu byɔ́ mǐ ɖɔ mǐ ní nɔ xo ɖɛ sɛ́dó émí. Ðó nǔ mitɔn nɔ ɖu ayi mɛ nú Mawu wútu ɔ, é ná ɖótó ɖɛ mǐtɔn lɛ́, bo ná d’alɔ mǐ bɔ mǐ ná ɖí xwi xá adohu adohu mǐtɔn lɛ́. (1 Piyɛ́ɛ 5:7) Ali e nu é nɔ wa mɔ̌ ɖe é ɖokpó wɛ nyí ɖɔ é nɔ d’alɔ mǐ bɔ mǐ nɔ mɔ nǔ jɛ nǔ e wú è kpo ɖo ahwan fun wɛ é, lěe è ná wá ɖó nǔ ahwan nu gbɔn é kpó nǔ e é ná wa dó ɖe ɖɛ wǔvɛ́ mǐtɔn lɛ́ é kpó mɛ.—Nǔɖexlɛ́mɛ 21:3, 4.

• Nú a ná ɖó mɔjɛmɛ dó lěe Mawu nɔ d’alɔ mǐ gbɔn é wú hǔn, xa xóta “La Bible peut-elle m’apporter du réconfort ?”