Lěe è ná ɖó nǔ ahwan kpó hunnyahunnya lɛ́ kpó nu gbɔn é

MAWU NÁ ÐÓ NǓ ACƐKPIKPA GBƐTƆ́ TƆN LƐ́ NU

Mawu ná ɖó nǔ acɛkpikpa gbɛtɔ́ tɔn lɛ́ nu gbɔn ahwan e Biblu ylɔ́ ɖɔ Aamagedɔ́ni é gblamɛ.a (Nǔɖexlɛ́mɛ 16:16) Ðo hwenɛ́nu ɔ, “axɔ́sú e ɖo ayǐkúngban ɔ bǐ jí lɛ́ é” ná xo yěɖée kplé nú “ahwan e è ná fun ɖo Mawu Nǔbǐwúkpétɔ́ ɔ sín azǎn ɖaxó ɔ gbe é.” (Nǔɖexlɛ́mɛ 16:14) Aamagedɔ́ni wɛ nyí ahwan e Mawu ná fun dó ɖó nǔ ahwan lɛ́ bǐ nu é.

Mawu ná sɔ́ Axɔ́súɖuto tɔn alǒ acɛkpikpa tɔn e ná kp’acɛ sín jǐxwé, bɔ è ma ná sú kún dó ná gbeɖé ǎ é dó ɖyɔ́ acɛkpikpa gbɛtɔ́ tɔn lɛ́ ná. (Daniyɛ́li 2:44) Mawu sɔ́ Vǐ súnnu tɔn Jezu Klísu, bɔ é nyí Axɔ́sú nú Axɔ́súɖuto énɛ́. (Ezayíi 9:5, 6; Matíe 28:18) Acɛkpikpa énɛ́ wɛ nyí Axɔ́súɖutob e Jezu kplɔ́n ahwanvú tɔn lɛ́ ɖɔ yě ní nɔ xo ɖɛ bo byɔ́ é. (Matíe 6:9, 10) Gbɛtɔ́ lɛ́ bǐ ná nɔ bǔ ɖo acɛkpikpa ɖokpó e ná kp’acɛ gbɔn gbɛ ɔ bǐ mɛ, bɔ Jezu nyí Gǎn ná é glɔ́.

Jezu ná zán acɛ tɔn nú le éɖésúnɔ tɔn lɛ́, lěe gbɛtɔ́ acɛkpatɔ́ lɛ́ nɔ bló gbɔn é ǎ. Ðó é nɔ wa nǔ ɖó sɛ́nxwi jí, bo ma nɔ ɖe mɛɖé ɖó vo ɖo mɛɖé mɛ ǎ wútu ɔ, ado ná hu mɛ ɖě ɖɔ è ná wa nǔ agɔ xá émí, ɖó sinmɛ agbaza tɔn émítɔn, to émítɔn alǒ akɔ émítɔn wú ǎ. (Ezayíi 11:3, 4) Gɔ́ ná ɔ, é sɔ́ ná byɔ́ ɖɔ gbɛtɔ́ lɛ́ ní xo hun dó acɛ yětɔn lɛ́ tamɛ ɖě ǎ. Aniwú? Ðó Jezu ná sɔ́ ayi ɖó ganjíninɔ mɛ ɖokpó ɖokpó tɔn jí. “É ná hwlɛ́n wamamɔnɔ e ɖo xó sú wɛ ɔ, bo ná hwlɛ́n lelenɔ e ma ɖó ɖɔxátɔ́ ɖě ǎ é. . . . É ná yí yě sín mɛ e nɔ kpa acɛ gannaganna lɛ́ kpó dǎkaxotɔ́ lɛ́ kpó sí.”—Ðɛhan 72:12-14.

Axɔ́súɖuto Mawu tɔn ná sú ahwanlyánnú e nɔ hu nǔ lɛ́ é dó. (Micée 4:3) É ná lɛ́ sú mɛ nyanya ɖěɖěe ma nɔ ba ná jó hunxixo dó ǎ, alǒ nɔ d’avaja fífá mɛ ɖěvo lɛ́ tɔn mɛ lɛ́ é sín kún dó. (Ðɛhan 37:9, 10) Súnnu, nyɔ̌nu kpó yɔkpɔ́vú kpó bǐ ná nɔ ayijayǐ mɛ, ɖo fí ɖěbǔ e yě ná yi ɖo ayǐkúngban ɔ jí é.—Ezekiyɛ́li 34:28.

Gbɛtɔ́ lɛ́ ná ɖu gbɛ ɖagbe hú gǎn ɔ sín vǐví ɖo acɛkpikpa Mawu tɔn glɔ́. É ná ɖó nǔ tagba ɖěɖěe nɔ zɔ́n bɔ gbɛtɔ́ lɛ́ nɔ xo hun lɛ́ é nu, ɖi ya, adɔ kpó xɔ ɖagbe ma ɖó kpó. Mɛ lɛ́ bǐ ná ɖó nǔɖuɖu hunsin ɖagbe tɔn b’ɛ ná túnflá, bo ná lɛ́ ɖó fí ɖagbe e yě ná nɔ nɔ é.—Ðɛhan 72:16; Ezayíi 65:21-23.

Ðo Axɔ́súɖuto Mawu tɔn glɔ́ ɔ, nǔ nyanya e ahwan wa dó mɛ wú lɛ́ é ɖě sɔ́ ná ɖe ǎ. É nyí akpa e nɔ jɛ mɛ wú ɖó nǔ baɖabaɖa e nɔ jɛ ɖo ahwan hwenu lɛ́ é wú lɛ́ é kɛ́ɖɛ́ wɛ ná blí bú ǎ, loɔ, wǔvɛ́ e è nɔ se ɖo taglo mɛ kpó lěe nǔ nɔ cí nú mɛ é kpó kpáxwé lɛ́ é lɔ ná blí bú. Mɛ ɖěɖěe tlɛ ko kú lɛ́ é ná fɔ́n wá gbɛ dó ayǐkúngban jí. (Ezayíi 25:8; 26:19; 35:5, 6) Xwédo lɛ́ ná lɛ́ wá nɔ bǔ, bɔ nǔ baɖabaɖa e ahwan nɔ zɔ́n bɔ è nɔ flín lɛ́ é lɔ ná ɖo “nǔ xóxó [e] ko bú” lɛ́ é mɛ.—Nǔɖexlɛ́mɛ 21:4.

MAWU NÁ ÐE HWƐHUHU SÍIN

Axɔ́súɖuto Mawu tɔn ná dɔn gbɛtɔ́ lɛ́ bǐ ɖó bǔ, bɔ yě ná nɔ sɛn Mawu nǔgbó ɖokpó ɔ Jexóvac, “Mawu wǎnyíyínɔ e lɛ́ nyí fífánɔ é.” (2 Kɔlɛ́ntinu lɛ́ 13:11) Gbɛtɔ́ lɛ́ ná kplɔ́n lěe è nɔ nɔ kpɔ́ ɖo fífá mɛ gbɔn é. (Ezayíi 2:3, 4; 11:9) Mɛ ɖěɖěe nɔ zán nǔ e yě kplɔ́n lɛ́ é ná jɛ yěɖée kannu sín hwɛhuhu sí.—Hlɔ̌manu lɛ́ 8:20, 21.

MAWU NÁ SÚ KÚN DÓ NÚ SATÁAN KPÓ AWǑVI TƆN LƐ́ KPÓ

Axɔ́súɖuto Mawu tɔn ná sú kún dó nú mɛ ɖěɖěe nɔ nɔ gǔdo nú ahwan lɛ́ é, yě wɛ nyí Satáan kpó awǒvi tɔn lɛ́ kpó. (Nǔɖexlɛ́mɛ 20:1-3, 10) Ényí è sú kún dó nú Satáan kpó awǒvi tɔn lɛ́ kpó ɔ, “fífá ná túnflá.”—Ðɛhan 72:7, nwt.

A sixú kú d’é jí ɖɔ akpá e Mawu dó bo ná ɖó nǔ ahwan kpó hunnyahunnya lɛ́ kpó nu é ná jɛnu. É ɖó nǔwúkpíkpé kpó jlǒ kpó bo ná sú ahwan dó:

• Mawu ɖó nǔnywɛ́ kpó hlɔ̌nhlɔ́n kpó e ɖo dandan cóbɔ è ná ɖó nǔ ahwan kpó dǎkaxixo kpó nu é. (Jɔbu 9:4) Nǔ ɖěbǔ wiwa nɔ gló è ǎ.—Jɔbu 42:2.

• Nú gbɛtɔ́ lɛ́ ɖo wǔvɛ́ mɔ wɛ ɔ, é nɔ vɛ́ mɔ nú Mawu. (Ezayíi 63:9) É lɛ́ “gbɛ́ wǎn nú mɛ e yí wǎn nú alǎnnúwiwa é.”—Ðɛhan 11:5.

• Mawu nɔ bló nǔ e é ɖɔ lɛ́ é ɖ’é jí hwebǐnu; é sixú ɖó adingban ǎ.—Ezayíi 55:10, 11; Titu 1:2.