NǓ E MƐ WINNYAWINNYA LƐ NƆ KANBYƆ LƐ É
Nɛ̌ Biblu ka Sixu D’alɔ Mì Gbɔn?: Akpáxwé 1: Nɔ Kíjé Biblu Towe
“Un tɛ́n kpɔ́n bo na xà Biblu, amɔ̌, lee é ɖiga gbɔn é dó xɛsi mì!”—Briana, xwè 15.
Nǔ nɔ cí mɔ̌ nú hwi lɔ wɛ à? Xóta elɔ sixu d’alɔ we!
Etɛwu è ka ɖó na xà Biblu?
Biblu xixa nɔ dɔn we sɔmɔ̌ ǎ wɛ à? Enyi mɔ̌ wɛ ɔ, è sixu mɔ nukúnnú jɛ mɛ. A sixu lin dó Biblu wu ɖɔ é nyí wema e wexwɛ tɔn lɛ hugǎn afatɔ́n, bɔ nǔwlanwlán tɔn lɛ wínní, lobɔ fɔtóo ɖě kún ɖ’emɛ ó é ɖé; lé enɛ kún dɔn mɛ sɔ televiziɔn kpo video lɛ kpo ó!
Amɔ̌, lin nǔ dó wǔ tɔn gbɔn lě: Enyi a yì tɔ́n jɛ dɔkungbá hwexónu tɔn ɖaxó ɖé jí ɔ, a na ba na mɔ dò nú nǔ e ɖ’emɛ é à cé?
Dɔkungbá mɔ̌hun ɖé wɛ Biblu nyí. Nǔnywɛ xɔ akwɛ gegě wɛ ɖ’emɛ bo sixu d’alɔ we bɔ a na
Wá gbeta ɖagbe lɛ kɔn
Ðó gbè kpɔ́ xá mɛjitɔ́ towe lɛ
Mɔ xɔ́ntɔn ɖagbe hugǎn lɛ
Ðí xwi xá adohu adohu
Aniwu wema hwexónu tɔn mɔ̌hun ka sixu nyɔ́ zán ɖò hwe mǐtɔn nu? Ðó “nǔ e è wlán dó Mawuxówema ɔ mɛ ɔ, Mawu wɛ sɔ́ bǐ dó ayi mɛ nú mɛ lɛ” wutu wɛ. (2 Timɔtée 3:16) Tinmɛ enɛ tɔn wɛ nyí ɖɔ wěɖexámɛ e ɖò Biblu mɛ é gosin Nǔnywɛtɔ́ ɖagbe hugǎn wɛkɛ ɔ tɔn gɔ́n.
Biblu ɔ, dɔkungbá e mɛ nǔnywɛ xɔ akwɛ e è ma sixu jlɛ́ ǎ lɛ é ɖè é ɖé wɛ
Nɛ̌ un ka ɖó na xà Biblu gbɔn?
Wlɛnwín nukɔntɔn ɔ wɛ nyí ɖɔ a ni xà Biblu ɔ wexwɛ ɖebɔdoɖewu. Enɛ na zɔ́n bɔ a na tuùn wɛn e ɖò Biblu ɔ mɛ é sín sin sɛ̀ xwe na. Ali e nu è sixu xà Biblu ɖè lɛ é gégé. Kpɔ́n kpɔ́ndéwú we:
A sixu xà wema Biblu tɔn 66 lɛ ɖebɔdoɖewu lee ye ɖ’emɛ gbɔn é, sín Bǐbɛ̌mɛ jɛ Nǔɖexlɛ́mɛ.
A sixu xà Biblu ɔ ɖò azǎnlinlɛ́n linu, enɛ wɛ nyí sɔgbe xá lee nǔ lɛ jɛ gbɔn nǔgbo nǔgbo bɔ è ɖɔ é ɖebɔdoɖewu.
Wěɖexámɛ: Nudọnamẹ Dogọ A7, ee ɖò Lẹdogbedevomẹ Aihọn Yọyọ Tọn mɛ é slɛ́ nǔ taji ɖěɖee jɛ ɖò gbɛzán Jezu tɔn mɛ ɖò ayikúngban jí lɛ é ɖebɔdoɖewu ɖò azǎnlinlɛ́n linu.
Wlɛnwín wegɔ́ e a sixu zán dó xà Biblu é wɛ nyí tan e cá kan xá wuvɛ̌ e mɛ a ɖè é ɖé é sísɔ́. Kpɔ́ndéwú ɖé lɛ ɖíe:
A ka jló na mɔ xɔ́ntɔn ɖejid’ewu lɛ à? Xà tan Davidi kpo Jonatáan kpo tɔn. (1 Samuwɛli, wemata 18-20) Enɛ gudo hǔn, zǎn azɔ̌wema “Comment se faire des amis fidèles” dó mɔ nǔkplɔnmɛ e nyɔ́ zán lɛ é ɖò tan ɔ mɛ.
A ka jló na na hlɔnhlɔn nǔwukpikpé e a ɖó bo nɔ ɖu ɖò mɛtɛnkpɔn jí é à? Xà tan lee Jozɛfu ɖu ɖò mɛtɛnkpɔn jí gbɔn é tɔn. (Bǐbɛ̌mɛ, wemata 39) Enɛ gudo hǔn, zán azɔ̌wema “Lehe Hiẹ Sọgan Nọavùnte Sọta Whlepọn Do . . . Josẹfu—Adà 1” kpo “Accusé à tort ! Joseph—2e Partie” kpo dó mɔ nǔkplɔnmɛ e nyɔ́ zán lɛ é ɖò tan ɔ mɛ.
A ka jló na kplɔ́n nǔ dó lee ɖɛxixo sixu d’alɔ we gbɔn é jí à? Xà tan Nɛɛmíi tɔn. (Nɛɛmíi, wemata 2) Enɛ gudo hǔn, zán azɔ̌wema “Dieu a répondu à sa prière” dó mɔ nǔkplɔnmɛ e nyɔ́ zán lɛ é ɖò tan ɔ mɛ.
Wěɖexámɛ: Enyi a ɖò Biblu xà wɛ ɔ, kúdeji ɖɔ fí bǐ ɖò tóo lɛlɛ̌ dó we, enɛ ɔ, a ayi towe sixu nɔ nǔ ɖokpo jí.
Wlɛnwín atɔngɔ́ e a sixu zán dó xà Biblu é wɛ nyí ɖɔ a ni sɔ́ tan ɖé alǒ ɖɛhan ɖé bo xà, lobɔ enɛ gudo ɔ, a na gbéjé lee é kan we gbɔn é kpɔ́n. Enyi a xà tan ɔ gudo ɔ, kan nǔ lěhun lɛ byɔ hwiɖée:
Etɛwu Jehovah ka sɔ́ enɛ dó Biblu ɔ mɛ?
Etɛ é ka ɖexlɛ́ dó mɛ alɔkpa e Jehovah nyí é kpo lee é nɔ wà nǔ lɛ gbɔn é kpo wu?
Nɛ̌ un ka sixu zán mɔjɛmɛ enɛ ɖò gbɛzán ce mɛ gbɔn?
Wěɖexámɛ: Nya nǔɖe gbé! Wlǎn azǎn e jí a jló na jɛ tuto Biblu xixa tɔn towe xwedó jí é ɖ’ayǐ.