Ezayíi
39 Hwe énɛ́ nu ɔ, Babilɔ́nu xɔ́sú Mɛlodáki-Baladáni, Baladáni ví ɔ sɛ́ wěmasɛ́dómɛ lɛ́ kpó nǔníná ɖé kpó dó Ezekiyási, ɖó é se ɖɔ é jɛ azɔn bɔ azɔn tɔn gbɔ n’i. 2 Ezekiyási yí yě* kpó akpakpa sɔ́ mɛ kpó,* bo xlɛ́ yě xɔ e mɛ dɔkun tɔn lɛ́ ɖe é: kpatágan, siká, balusámumi kpó ami xɔ akwɛ́ ɖěvo kpó, fí e é nɔ sɛ ahwanfunnú tɔn lɛ́ bǐ xwe dó é, gɔ́ nú nǔ e vɛ́ ko ɖo dɔkunsɛxwetɛn tɔn lɛ́ é bǐ. É sɔ́ kpo nǔ ɖě bónú Ezekiyási gɔn xlɛ́xlɛ́ yě ɖo xwé* éɖésúnɔ tɔn kpó axɔ́súɖuto tɔn bǐ kpó mɛ ǎ.
3 Énɛ́ gúdo ɔ, gbeyíɖɔ Ezayíi wá axɔ́sú Ezekiyási gɔ́n, bo kanbyɔ́ ɛ ɖɔ: “Étɛ́ súnnu énɛ́ lɛ́ ka ɖɔ? Fítɛ́ yě ka gosín?” Bɔ Ezekiyási ɖɔ: “To línlín ɖé mɛ wɛ yě gosín, ɛɛn, Babilɔ́nu wɛ yě gosín.” 4 Énɛ́ gúdo ɔ, é kanbyɔ́ ɖɔ: “Étɛ́ yě ka mɔ ɖo xwé towe gbe?”* Ezekiyási yí gbe ɖɔ: “Nǔ e ɖo xwé ce gbe* lɛ́ é bǐ wɛ yě mɔ. Nǔ ɖě sɔ́ kpo ɖo dɔkunsɛxwetɛn ce bɔ un gɔn xlɛ́xlɛ́ yě ǎ.”
5 Din ɔ, Ezayíi ɖɔ nú Ezekiyási ɖɔ: “Ðǒtó xó e Jexóva ahwankpá lɛ́ tɔn ɖɔ é: 6 ‘Éɖíe! Hweɖénu ná wá su, bɔ è ná bɛ́ nǔ e ɖo xwé towe gbe* lɛ́ é bǐ kpó nǔ e tɔ́gbó towe lɛ́ xo kplé káká jɛ égbé lɛ́ é bǐ kpó yi Babilɔ́nu. È ná jó nǔ ɖěbǔ dó ǎ,’ wɛ Jexóva ɖɔ. 7 ‘Bɔ è ná bɛ́ vǐ e hwiɖésúnɔ ná ji lɛ́ é ɖé lɛ́ yi, bɔ yě ná húzú axɔ́súzɔ́watɔ́ hɔnmɛ tɔn lɛ́ ɖo axɔ́sú Babilɔ́nu tɔn sín hɔnmɛ.’”
8 Énɛ́ ɔ, Ezekiyási ɖɔ nú Ezayíi ɖɔ: “Xó Jexóva tɔn e a ɖɔ nú mì é nyɔ́.” Énɛ́ gúdo ɔ, é ɖɔ gɔ́ ná ɖɔ: “Ðó fífá kpó ayijayǐ* kpó ná tíin ɖo gbɛhwenu ce* wútu.”