Zakalíi
9 Xó e Mawu ɖɔ é ɖíe:
“Xó Jexóva tɔn húzú kpan nukɔn Hadláki to ɔ,
bɔ Damási wɛ nyí nǔ e gbé nya wɛ é ɖe é.*
Ðó nukún Jexóva tɔn ɖo gbɛtɔ́ lɛ́ jí,
bo lɛ́ ɖo akɔta Izlayɛ́li tɔn lɛ́ bǐ jí.
2 É lɛ́ húzú kpan nukɔn Hamáti, ée kpé dogbó xá ɛ é,
bo lɛ́ húzú kpan nukɔn Tíi kpó Sidɔ́ɔn kpó, ɖó yě nɔ lin ɖɔ émí nyɔ́nǔi dín.
3 Tíi mɛ ahohó ɖé nú éɖée.
É kplé kpatágan afúntúntún ɖɔhun,
bo kplé siká ali jí sín babá ɖɔhun.
4 Éɖíe! Jexóva ná yí nǔɖókan tɔn lɛ́,
bo ná zin ahwankpá tɔn dɛ́ nyi xu mɛ;*
bɔ è ná sɔ́ myɔ dó fyɔ́ ɛ.
5 Acikelɔ́ni ná mɔ mɔ̌ bɔ xɛsi ná ɖi i;
ado ná hu Gaza tawun,
Eklɔ́ni lɔmɔ̌, ɖó è dó winnyá mɛ e nyí nukúnɖíɖó tɔn é.
Axɔ́sú ɖé sín kún ná sú dó sín Gaza,
bɔ mɛ ɖěbǔ sɔ́ ná nɔ Acikelɔ́ni ǎ.
6 Agaví súnnu ɖé ná cí Acidɔ́di,
bɔ un ná ɖó nǔ Filisitɛ́ɛn ɔ sín goyíyí nu.
7 Un ná ɖe nǔ e wú hun va dó lɛ́ é sín nu tɔn* mɛ,
bo ná ɖe nǔ e xyɔ́ wǔ lɛ́ é sín aɖǔ tɔn lɛ́ jí,
bɔ mɛ e ná kpo n’i lɛ́ é ná nyí Mawu mǐtɔn tɔn;
é ná wá cí hɛ̌nnugán e ɖo Judáa é ɖé ɖɔhun,
bɔ mɛ e nɔ nɔ Eklɔ́ni lɛ́ é ná cí Jebúzinu lɛ́ ɖɔhun.
8 Un ná ɖó gɔnu ɖó xwé ce nukɔn, bo ná cɔ́ ɛ,
bónú mɛ ɖěbǔ ní ma byɔ́ mɛ, alǒ mɛ ɖěbǔ ní tɔ́n ó;
azɔ̌gán* ɖě sɔ́ ná byɔ́ mɛ ǎ,
ɖó din ɔ, un mɔ nǔ énɛ́* kpó nukún ce lɛ́ kpó.
9 Vǐ nyɔ̌nu Sinyɔ́ɔ tɔn è, awǎjijɛ towe ní túnflá.
Vǐ nyɔ̌nu Jeluzalɛ́mu tɔn è, sú ɖuɖéjí sín xó.
Kpɔ́n! Axɔ́sú towe ja gɔ̌n towe.
Nǔjlɔ́jlɔ́watɔ́ wɛ n’i, bo hɛn hwlɛngán ja,*
mɛɖéesɔ́hwetɔ́ wɛ é nyí, é xá tócí ɖé jí,
tócíví ɖé jí,* ɛɛn, tócí asi sín vǐ ɖé jí.
10 Un ná ɖe ahwankɛkɛ́ lɛ́ sín Eflayímu,
bo ná ɖe sɔ́ lɛ́ sín Jeluzalɛ́mu.
Daswé* e è nɔ sɔ́ dó fun ahwan lɛ́ é ɖě sɔ́ ná ɖe ǎ.
É ná jlá fífá nú akɔta lɛ́;
é ná kpa acɛ sín xu ɖé kɔn jɛ ɖěvo kɔn,
sín Tɔsisa ɔ* tó yi fí e ayǐkúngban ɔ kponu ɖó lɛ́ é.
11 Hwi nyɔ̌nu* è, un ná ɖe gantɔ́ towe lɛ́ sín do e mɛ sin ma ɖe ǎ é mɛ,
gbɔn akɔjijɛ towe sín hun gblamɛ.
12 Mi gantɔ́ e ɖo nukúnɖíɖó mɛ lɛ́ é mi, mi lɛ́ kɔ yi ahohó ɔ kɔn.
Un ɖo ɖiɖɔ nú we wɛ égbé ɖɔ:
‘Hwi nyɔ̌nu* è, un ná sú axɔ́ weɖobǔ we.
13 Ðó un ná dlɛ́n* Judáa daswé* ce ɖɔhun.
Un ná sɔ́ Eflayímu dó daswé* ɔ mɛ,*
Sinyɔ́ɔ è, un ná fɔ́n vǐ súnnu towe lɛ́,
bɔ yě ná sí te dó Glɛ̌ki sín vǐ súnnu lɛ́ jí,
bɔ un ná bló bɔ a* ná cí ahwanfuntɔ́ ɖé sín hwǐ ɖɔhun.’
14 Jexóva ná ɖe xlɛ́ nyi wɛn ɖɔ émí ɖo kpɔ́ xá yě,
bɔ gǎ tɔn ná tɔ́n jǐkɛwun ɖɔhun.
Aklúnɔ Nǔbǐwúkpétɔ́ Jexóva ná kún lanzo,
bo ná yi nukɔn kpó jɔhɔn syɛ́nsyɛ́n tofɔligbé tɔn lɛ́ kpó.
15 Jexóva ahwankpá lɛ́ tɔn ná jɛ hun dó yě jí,
yě ná vúnvún klohwán lɛ́, bo gbídí yě ɖó afɔ wú.
Yě ná nu ahan, bo ná ɖú zǐngídi vɛ̌ɛn nu wɛ yě ɖe ɖɔhun,
yě ná cí gannú e vɛ̌ɛn gɔ́ é ɖɔhun,
hun e è gba kɔn nyi vɔ̌sákpe ɔ sín zo lɛ́ jí é ɖɔhun.
16 Jexóva Mawu yětɔn ná hwlɛ́n yě ɖo gbe énɛ́ gbe,
ɖó lɛ̌ngbɔ́hwan tɔn, ɛɛn, togun tɔn wɛ nú yě;
yě ná cí awǐnnya xɔ akwɛ́ gǎngbákún* ɖé tɔn lɛ́ ɖɔhun, bo ná nɔ kɔ́n ɖo ayǐkúngban tɔn jí.
17 Ðó ɖagbewiwa tɔn d’agba lóóo,
ɖɛkpɛ tɔn vɛ́ jlɛ́ lóóo!
Jinukún ná bló bɔ dɔ̌nkpɛvú lɛ́ ná vun,
bɔ vɛ̌ɛn yɔ̌yɔ́ ná bló bɔ nyɔ̌nu ɖo alɔjí lɛ́ ná vun.”