NǓKPLƆNKPLƆN 55
Nɔ Gudo nú Agun Towe
Gbɔn gbɛ̀ ɔ bǐ mɛ ɔ, gbɛtɔ́ livi mɔ̌kpan nɔ sɛn Jehovah kpo awǎjijɛ kpo ɖò agun afatɔ́n mɔ̌kpan mɛ. Alixlɛ́mɛ e ye nɔ mɔ lɛ é nɔ sù nukún yetɔn mɛ, bɔ ye nɔ sɔ́ jlǒ dó nɔ gudo nú agun ɔ ɖò ali gegě nu. Mɔ̌ wɛ nǔ nɔ cí nú hwi lɔ dó agun towe wu à?
1. Ali tɛ lɛ nu mɔ̌ a ka sixu zán hwenu towe kpo hlɔnhlɔn towe kpo dó nɔ gudo nú agun ɔ ɖè?
Mǐ mɛ bǐ sixu nɔ gudo nú agun ɔ. Ði kpɔ́ndéwú ɔ, mɛ ɖé lɛ ɖò agun towe mɛ bo nyí mɛxomɔ alǒ wɔ̌nɖowǔnanɔ wɛ à? A sixu nɔ d’alɔ ye bɔ ye na nɔ wá kplé lɛ à? Alǒ a sixu nɔ d’alɔ ye ɖò ali ɖevo lɛ nu, ɖi axixwixwlé nú ye abǐ xwégbezɔ́wiwa nú ye à? (Xà Jaki 1:27.) Mǐ sixu nɔ lɛ́ sɔ́ mǐɖée jó dó d’alɔ bɔ è na jlá Kpléxɔ Axɔ́suɖutó ɔ tɔn ɖó, bo na lɛ́ hɛn ɖó mimɛ̌ jí. Mɛɖé nɔ hɛn mǐ gannugánnú ɖɔ mǐ ni wà nǔ enɛ lɛ ǎ. Wǎn e mǐ yí nú Mawu kpo nɔví mǐtɔn lɛ kpo é wɛ nɔ sísɛ́ mǐ bɔ mǐ nɔ “zé [mǐɖée] jó kpo jlǒ kpo.”—Ðɛhan 110:3, nwt.
Kúnnuɖetɔ́ e bló baptɛm lɛ é sixu lɛ́ nɔ gudo nú agun ɔ ɖò ali ɖevo lɛ nu. Nɔví sunnu ɖěɖee jɛxa lɛ é sixu nyí devízɔ́watɔ́ sinsɛnzɔ́wiwa tɔn, bɔ ɖò nukɔnmɛ ɔ, ye sixu nyí mɛxo agun tɔn. Nɔví sunnu lɛ kpo nɔví nyɔnu lɛ kpo bǐ sixu nyí gbexosin-alijitɔ́, dó nɔ gudo nú wɛnɖagbejijlazɔ́ ɔ kpo kanɖodónǔwu kpo. Kúnnuɖetɔ́ ɖé lɛ sixu d’alɔ bɔ è na gbá xɔ e mɛ mǐ nɔ sɛn Mawu ɖè lɛ é, alǒ sɛ̀ tɛn yì agun e mɛ è ɖó hudo alɔdó tɔn ɖè ɖò ali ɖevo lɛ nu é ɖé mɛ.
2. Nɛ̌ mǐ ka sixu zán nǔɖokan mǐtɔn lɛ dó nɔ gudo nú agun ɔ gbɔn?
Mǐ sixu ‘sɔ́ dɔkun mǐtɔn lɛ dó sɔ́ Jehovah sù.’ (Nǔnywɛxó 3:9) Mǐ nɔ mɔ ɖɔ wǔjɔmɛ ɖé wɛ é nyí ɖɔ mǐ ni na akwɛ mǐtɔn kpo nǔɖokan mǐtɔn ɖevo lɛ kpo, dó nɔ gudo nú agun mǐtɔn kpo wɛnɖagbejijlazɔ́ e wà wɛ è ɖè gbɔn gbɛ̀ ɔ bǐ mɛ é kpo. (Xà 2 Kɔlɛntinu lɛ 9:7.) Nǔnina mǐtɔn lɛ nɔ lɛ́ nɔ gudo nú sɔhɛnmɛzɔ́ lɛ. Mɛ gegě wá gbeta ɔ kɔn bo nɔ “ɖè akwɛ ɖó vo” ɖò gbesisɔmɛ dó na nǔ. (Xà 1 Kɔlɛntinu lɛ 16:2.) Mǐ sixu nɔ zán gbǎví nǔnina tɔn e ɖò fí e mǐ nɔ sɛn Mawu ɖè lɛ é dó na nǔ, alǒ gbɔn donate.jw.org jí dó na nǔ. Jehovah hun ali nú mǐ bonu mǐ na zán nǔɖokan mǐtɔn lɛ dó ɖè wǎn e mǐ yí n’i é xlɛ́.
BA DÒ NÚ NǓ D’EJI
Mǐ ni gbéjé ali e nu a sixu nɔ gudo nú agun towe ɖè é ɖé lɛ kpɔ́n.
3. Mǐ sixu zán nǔɖokan mǐtɔn lɛ
Jehovah kpo Jezu kpo nɔ yí wǎn nú mɛ e nɔ na nǔ mɛ kpo xomɛhunhun kpo é. Ði kpɔ́ndéwú ɔ, Jezu ɖ’ayi gǎn e asúkúsi wamamɔnɔ ɖé dó bo na nǔ é wu. Xà Luki 21:1-4, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
Nǔ gegě jɛn mǐ na na cobo na nyɔ́ Jehovah nukúnmɛ à?
Nɛ̌ nǔ ka nɔ cí nú Jehovah kpo Jezu kpo dó nǔ e mǐ nɔ na kpo ayi bǐ kpo lɛ é wu?
Nú a na mɔ nǔ jɛ lee è nɔ zán nǔnina mǐtɔn lɛ gbɔn é wu hǔn, xò VIDEO ɔ. Enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu é jí.
Nɛ̌ è ka nɔ zán nǔnina lɛ bɔ agun e gbɔn gbɛ̀ ɔ bǐ mɛ lɛ é nɔ ɖu lè tɔn gbɔn?
4. Mǐ sixu sɔ́ mǐɖée jó dó d’alɔ
Ðò Biblu sín táan mɛ ɔ, Jehovah sɛntɔ́ lɛ w’azɔ̌ kpo kanɖodónǔwu kpo dó hɛn fí e è nɔ sɛn Mawu ɖè lɛ é ɖó mimɛ̌ jí. Amɔ̌, enɛ byɔ nǔ hú akwɛ nina kpowun. Xà 2 Tan 34:9-11, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
Nɛ̌ Izlayɛli-ví ɖokpo ɖokpo ka d’alɔ bɔ è kpé nukún dó xwé Jehovah tɔn, alǒ fí e è nɔ sɛn Mawu ɖè é wu gbɔn?
Nú a na mɔ lee Kúnnuɖetɔ́ Jehovah tɔn lɛ nɔ xwedó kpɔ́ndéwú hwexónu tɔn enɛ gbɔn é hǔn, xò VIDEO ɔ. Enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu lɛ é jí.
Etɛwu é ka ɖò taji ɖɔ mǐ ni nɔ hɛn Kpléxɔ Axɔ́suɖuto ɔ tɔn mǐtɔn ɖó mimɛ̌ jí, bo lɛ́ hɛn ɖó ninɔmɛ ɖagbe mɛ?
Ali tɛ lɛ nu mɔ̌ a ka sixu d’alɔ ɖè?
5. Nɔví sunnu lɛ sixu dó gǎn bá jɛxa azɔ̌ ɖevo lɛ
Mawuxówema ɔ dó wusyɛn lanmɛ nú sunnu Klisanwun lɛ ɖɔ ye ni dó gǎn bo wà nǔ e wu ye kpé é bǐ dó nɔ gudo nú agun ɔ. Nú a na mɔ kpɔ́ndéwú tɔn ɖé hǔn, xò VIDEO ɔ. Enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu é jí.
Ðò video ɔ mɛ ɔ, nɛ̌ Ryan ka dó gǎn bo nɔ gudo nú agun ɔ d’eji gbɔn?
Biblu tinmɛ nǔ ɖěɖee nɔví sunnu lɛ ɖó na wà, bá jɛxa bo na nyí devízɔ́watɔ́ sinsɛnzɔ́wiwa tɔn kpo mɛxo agun tɔn kpo lɛ é. Xà 1 Timɔtée 3:1-13, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
MƐÐÉ SIXU KANBYƆ ÐƆ: “Nɛ̌ Kúnnuɖetɔ́ Jehovah tɔn lɛ ka nɔ mɔ akwɛ dó w’azɔ̌ yetɔn gbɔn?”
Xósin tɛ hwɛ ka na na mɛ ɔ?
ETƐ LƐ A KA KPLƆ́N?
Gǎn ɖěɖee mǐ nɔ dó bo nɔ zán hwenu mǐtɔn, hlɔnhlɔn mǐtɔn kpo nǔɖokan mǐtɔn lɛ kpo dó nɔ gudo nú agun ɔ é nɔ sù Jehovah nukúnmɛ tawun.
Vɔ̌gbɔnji
Nɛ̌ mǐ ka sixu zán hwenu mǐtɔn kpo hlɔnhlɔn mǐtɔn kpo dó nɔ gudo nú agun ɔ gbɔn?
Nɛ̌ mǐ ka sixu zán nǔɖokan mǐtɔn lɛ dó nɔ gudo nú agun ɔ gbɔn?
Ali tɛ lɛ nu mɔ̌ a ka jló na nɔ gudo nú agun ɔ ɖè?
KÍJÉ
Kpɔ́n nǔ e wu Mawu ma sɔ́ nɔ byɔ mɛsɛntɔ́ tɔn lɛ ɖɔ ye ni nɔ na maɖówǒ ǎ é.
Biblu sɔ́ azɔ̌ ɖé lɛ dʼasí nú sunnu e bló baptɛm lɛ é. Bɔ nú é ka wá byɔ ɖɔ nyɔnu e bló baptɛm é ɖé ni kpé nukún dó azɔ̌ enɛ lɛ wú ɔ lo?
Kpɔ́n Kúnnuɖetɔ́ akɔ́nkpantɔ́ e savɔ̌ gegě dó bɛ́ wema lɛ yì jó nú nǔɖitɔ́ hatɔ́ yetɔn lɛ é ɖé lɛ.
Lee mǐ nɔ mɔ akwɛ dó wà azɔ̌ mǐtɔn gbɔn é gbɔn vo tawun nú lee sinsɛn ɖevo lɛ nɔ mɔ gbɔn é. Kpɔ́n lee nǔ nyí mɔ̌ gbɔn é.