Etɛ ka Nyí Sɛ́n Siká Tɔn Ɔ?
Xósin e Biblu na é
Xógbe “Sɛ́n Siká tɔn” ɔ tɔ́n ɖo Biblu mɛ ǎ. É ɖò mɔ̌ có, mɛ gegě nɔ zán xógbe mɔ̌hun dó dó gesí lee è na wà nǔ gbɔn, bɔ Jezu kplɔ́n mɛ é. Jezu ɖɔ ɖò Mawuxóɖiɖɔ Só jí tɔn nukúnɖeji ɔ mɛ ɖɔ: “Nǔ e mi jló ɖɔ gbɛtɔ́ lɛ ni bló nú emi ɔ, mi nɔ bló nú ye lɔmɔ̌.” (Matie 7:12; Luki 6:31) È nɔ lɛ́ ɖɔ Sɛ́n Siká tɔn ɔ gbɔn lě: “Wà nǔ e a ba ɖɔ mɛ ɖevo lɛ ni wà nú we é nú ye.”—Encyclopedia of Philosophy.
Etɛ ka nyí tinmɛ Sɛ́n Siká tɔn ɔ tɔn?
Sɛ́n Siká tɔn ɔ dó wusyɛn lanmɛ nú mǐ ɖɔ mǐ ni wà nǔ xá mɛ ɖevo lɛ lee mǐ jló ɖɔ ye ni wà nǔ xá mǐ gbɔn é. Ði kpɔ́ndéwú ɔ, enyi è wà nǔ xá mɛ ɖevo lɛ kpo sísí kpo, nyɔ́ xomɛ dó ye wu, bo yí wǎn nú ye ɔ, ye nɔ yí wǎn na. Enɛ wu ɔ, é sɔgbe ɖɔ mǐ ɖó na wà nǔ ɖokpo ɔ nú mɛ ɖevo lɛ.—Luki 6:31.
Etɛwu Sɛ́n Siká tɔn ɔ ka ɖo taji?
Mǐ sixu nyi Sɛ́n Siká tɔ́n ɔ ɖo ninɔmɛ gegě mɛ. Ði kpɔ́ndéwú ɔ, é sixu . . .
Hɛn alɔwliwlí mǐtɔn lidǒ.—Efɛzinu lɛ 5:28, 33.
Xlɛ́ ali mɛjitɔ́ lɛ ɖò vǐ yetɔn lɛ kpínkplɔ́n hwenu.—Efɛzinu lɛ 6:4.
Zɔ́n bɔ kancica ɖagbe na nɔ xɔ́ntɔn lɛ, nɔzo lɛ, kpo azɔ̌watɔ́gbɛ́ lɛ kpo tɛntin.—Nǔnywɛxó 3:27, 28; Kolosinu lɛ 3:13.
Sɛ́n Siká tɔ́n ɔ sɛ̀ sin xwè nú linlin e ɖo nǔ e è nɔ ylɔ́ ɖò kpaa mɛ ɖɔ Alɛnuwema Xóxó ɔ mɛ é gegě. Lee Jezu wà nǔ gbɔn é wɛ nyí nǔ e Sɛ́n ɔ [wema atɔ́ɔ́n nukɔntɔn Biblu tɔn lɛ] kpo gbeyiɖɔ lɛ [wema nǔɖɔɖ’ayǐ tɔn lɛ] kpo ɖɔ é. (Matie 7:12) Ðò xógbe ɖevo mɛ ɔ, Sɛ́n Siká tɔn ɔ sɛ̀ sin xwè nú nǔgbo taji e ɖo Alɛnuwema Xóxó ɔ mɛ é: Yǐ wǎn nú nɔzo towe.—Hlɔmanu lɛ 13:8-10.
Nǔ e mǐ sixu mɔ yí sín mɛ ɖevo lɛ gɔ́n é kɛɖɛ xó wɛ Sɛ́n Siká tɔn ɔ ɖɔ à?
Eǒ. Nǔnamɛ jí wɛ Sɛ́n Siká tɔn ɔ tɛɖɛ̌. Hwenu e Jezu na Sɛ́n Siká tɔn ɔ é ɔ, lee è na nɔ wà nǔ xá mɛ lɛ ɖo kpaa mɛ gbɔn é kɛɖɛ jí wɛ é ɖɔ xó dó ǎ, loɔ, é tlɛ lɛ́ ɖɔ xó dó lee è na wà nǔ xá kɛntɔ́ mɛtɔn lɛ gbɔn é jí. (Luki 6:27-31, 35) Enɛ wu ɔ, Sɛ́n Siká tɔn ɔ dó wusyɛn lanmɛ nú mɛ ɖɔ è ni wà ɖagbe nú mɛ bǐ.
Nɛ̌ a ka sixu nyi Sɛ́n Siká tɔn ɔ gbɔn?
1. Nɔ ɖó ayi nǔ wu. Nɔ ɖó ayi mɛ e lɛlɛ̌ dó we lɛ é wu ganji. Ði kpɔ́ndéwú ɔ, a sixu mɔ mɛɖé bɔ é ɖo agban kpinkpɛn ɖé dɔn wɛ, sè ɖɔ nɔzo towe ɖo dotóoxwé, alǒ ɖó ayi wu ɖɔ awakanmɛ kú azɔ̌watɔ́gbɛ́ towe ɖé. Enyi a “nɔ ba ɖagbe mɛ ɖě lɛ tɔn” ɔ, é ɖo wɛn ɖɔ a na mɔ ali ɖěɖee na hun nú we, bɔ a na ɖɔ alǒ wà nǔ e na d’alɔ mɛ é ɖé é.—Filipunu lɛ 2:4.
2. Nɔ sè wuvɛ̌ xá mɛ. Mǐ ni ɖɔ ɖɔ a ɖo mɛ ɖě ɔ sín tɛnmɛ. Enyi a ɖo ninɔmɛ ɖokpo ɔ mɛ ɔ, nɛ̌ nǔ ka na cí nú we? (Hlɔmanu lɛ 12:15) Enyi a tɛ́n kpɔ́n bo mɔ nǔ jɛ lee nǔ cí nú mɛ ɖevo lɛ é mɛ ɔ, é sixu sísɛ́ we bɔ a na d’alɔ ye.
3. Nɔ huzu sɔgbe xá ninɔmɛ lɛ. Hɛn dó ayi mɛ ɖɔ mɛ lɛ bǐ wɛ gbɔn vo. Nǔ e mǐ ba ɖɔ mɛ ɖevo lɛ ni bló nú mǐ é nyí nǔ e mɛ ɖevo na ba ɖɔ mǐ ni bló nú ye é dandan ǎ. Enɛ wu ɔ, ɖò nǔ ɖěɖee a sixu bló lɛ é mɛ ɔ, tɛ́n kpɔ́n bo sɔ́ ee na sù nukún mɛ lɛ tɔn mɛ hugǎn é.—1 Kɔlɛntinu lɛ 10:24.