NǓKPLƆNKPLƆN 30
Mɛvívɛ́ Towe lɛ Sixu Lɛ́ Wá Nɔ Gbɛ̀!
Kú nɔ hɛn aluwɛ kpo wǔbla kpo gegě wá nú mɛ. Enɛ wu wɛ Biblu ylɔ́ kú ɖɔ kɛntɔ́ ɖé. (1 Kɔlɛntinu lɛ 15:26) Ðò Nǔkplɔnkplɔn 27gɔ́ ɔ mɛ ɔ, a kplɔ́n ɖɔ Jehovah na sú kún dó nú kɛntɔ́ enɛ. Amɔ̌, nɛ̌ mɛ ɖěɖee ko kú lɛ é tɔn ka na nyí gbɔn? Ðò nǔkplɔnkplɔn elɔ mɛ ɔ, a na kplɔ́n nǔ dó akpá Jehovah tɔn jiwǔ ɖevo wu d’eji, é wɛ nyí ɖɔ, é na fɔ́n mɛ liva mɔ̌kpan wá gbɛ̀ bɔ ye na ɖu gbɛ̀ víví kaka sɔyi. É na fɔ́n ye sín kú! Nǔ ka sixu nyí mɔ̌ nǔgbo à? Jixwé wɛ ye na fɔ́n dó à alǒ ayikúngban jí?
1. Etɛ Jehovah ka jló na bló nú mɛvívɛ́ mǐtɔn e kú lɛ é?
Akpakpa ɖò Jehovah sɔ́ wɛ nú é na fɔ́n mɛ e ko kú lɛ é wá gbɛ̀. Nya nǔɖitɔ́ e nɔ nyí Jɔbu é ɖeji ɖɔ Mawu kún na wɔn emi ɖò kú emitɔn gudo ó. É ɖɔ nú Mawu ɖɔ: “Hwenu e a na ylɔ́ mì ɔ, un na sɔ nú we [sín Yɔdo mɛ].”—Xà Jɔbu 14:13-15.
2. Nɛ̌ mǐ ka wà gbɔn bo tuùn ɖɔ è sixu fɔ́n mɛkúkú lɛ wá gbɛ̀?
Hwenu e Jezu ɖò ayikúngban jí é ɔ, Mawu na ɛ acɛ bɔ é fɔ́n mɛ sín kú. Jezu fɔ́n ɖyɔvǐvu xwè 12 mɛví ɖé kpo asúkúsi ɖé sín vǐ sunnu kpo wá gbɛ̀. (Maki 5:41, 42; Luki 7:12-15) Nukɔnmɛ ɔ, xɔ́ntɔn Jezu tɔn Lazáa kú. Lazáa kú bɔ è ɖi i é ɔ, azǎn ɛnɛ ko wá yì có, Jezu ka fɔ́n ɛ wá gbɛ̀. Jezu xoɖɛ sɛ́dó Mawu bɔ enɛ gudo ɔ, é súxó bo ɖɔ: “Lazáa tɔ́n, bo wá.” Bɔ “mɛkúkú ɔ tɔ́n sín yɔdo ɔ mɛ nǔgbo.” Lazáa ɖò gbɛ̀! (Jaan 11:43, 44) Kpɔ́n lee xomɛ na ko hun Lazáa sín hɛ̌nnumɔ lɛ kpo xɔ́ntɔn tɔn lɛ kpo sɔ é!
3. Nukúnɖiɖó tɛ ka ɖè nú mɛvívɛ́ towe e kú lɛ é?
Biblu d’akpá ɖɔ: “Mawu na wá fɔ́n mɛ . . . sín kú.” (Mɛsɛ́dó 24:15) Mɛ ɖěɖee Jezu fɔ́n hwenu e é ɖò ayikúngban jí lɛ é yì jixwé ǎ. (Jaan 3:13) Xomɛ hun ye ɖɔ é fɔ́n ye wá gbɛ̀ dó ayikúngban jí. Mɔ̌ ɖokpo ɔ, Jezu na fɔ́n gbɛtɔ́ liva mɔ̌kpan ɖò malin-malin mɛ bɔ ye na ɖu gbɛ̀ víví kaka sɔyi ɖò palaɖisi mɛ ɖò ayikúngban jí. É ɖɔ ɖɔ è na fɔ́n mɛ ɖěɖee ɖò flǐn Mawu tɔn mɛ lɛ é sín kú, enyi gbɛtɔ́ ɖebǔ ma tlɛ flín ɖɔ ye nɔ gbɛ̀ kpɔ́n ǎ ɔ nɛ.—Jaan 5:28, 29.
BA DÒ NÚ NǓ D’EJI
Kplɔ́n nǔ e wu mǐ sixu ɖeji ɖɔ Jezu ɖó hlɔnhlɔn bo na fɔ́n mɛ sín kú, lobo ka na bló mɔ̌ é ɖò Biblu mɛ. Kplɔ́n lee fínfɔ́n sín kú sixu dó gbɔ nú we gbɔn é kpo lee é sixu na nukúnɖiɖó we gbɔn é kpo.
4. Jezu ɖexlɛ́ ɖɔ emi kpéwú bo na fɔ́n mɛkúkú Lɛ
Kplɔ́n nǔ dó nǔ e Jezu wà nú xɔ́ntɔn tɔn Lazáa é wu d’eji. Xà Jaan 11:14, 38-44, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
Nɛ̌ mǐ ka wà gbɔn bo tuùn ɖɔ Lazáa kú nǔgbo nǔgbo?—Kpɔ́n wemafɔ 39.
Enyi jixwé wɛ Lazáa ko yì ɔ, a ka lin ɖɔ Jezu na fɔ́n ɛ wá gbɛ̀ dó ayikúngban jí à?
5. È na fɔ́n mɛ gegě sín kú!
Xà Ðɛhan 37:29, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
Fitɛ gbɛtɔ́ liva mɔ̌kpan e è na fɔ́n sín kú lɛ é ka na nɔ gbɛ̀ ɖè?
Enyi mɛ ɖěɖee sɛn Jehovah lɛ é kɛɖɛ na fɔ́n sín kú wɛ Jezu ɖè ǎ. Xà Mɛsɛ́dó 24:15, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
Mɛ̌ ɖětɛ lɛ a ka jló ɖɔ è ni fɔ́n sín kú nú we?
Lin tamɛ dó nǔ elɔ jí: É bɔwǔ bɔ Jezu na fɔ́n mɛɖé sín kú lee vǐtɔ́ ɖé sixu fɔ́n vǐ tɔn sín amlɔ mɛ é ɖɔhun
6. Fínfɔ́n sín kú sixu dó gbɔ nú we bo lɛ́ na nukúnɖiɖó we
Tan Biblu tɔn vǐ nyɔnu Jayilɔsi tɔn tɔn ko dó gbɔ nú mɛ e mɛ kú na lɛ é gegě, bo lɛ́ dó wusyɛn lanmɛ nú ye. Xà tan jɔ tan enɛ ɖò Luki 8:40-42, 49-56 mɛ.
Cobonu Jezu na fɔ́n vǐ nyɔnu Jayilɔsi tɔn sín kú ɔ, é ɖɔ nú Jayilɔsi ɖɔ: “Ma ɖi xɛsi ó, vɛ̌ ko ɖi nǔ kpowun.” (Kpɔ́n wemafɔ 50.) Nɛ̌ nukúnɖiɖó fínfɔ́n sín kú tɔn ɔ ka sixu d’alɔ we gbɔn . . .
hwenu e mɛvívɛ́ towe ɖé kú é?
hwenu e gbɛ̀ towe ɖò axɔ́ nu é?
Xò VIDEO ɔ, enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu é jí.
Nɛ̌ nukúnɖiɖó fínfɔ́n sín kú tɔn ka dó gbɔ nú mɛjitɔ́ Phelicity tɔn lɛ bo lɛ́ dó wusyɛn lanmɛ nú ye gbɔn?
MƐÐÉ LƐ ÐƆ: “Mɛkúkú lɛ na fɔ́n sín xó ɔ, dlɔ̌ ɖé kpowun wɛ.”
Etɛ hwɛ ka lin?
Wemafɔ tɛ a ka sixu zán dó xlɛ́ ɖɔ è na fɔ́n mɛ sín kú?
ETƐ LƐ A KA KPLƆ́N?
Biblu d’akpá ɖɔ è na fɔ́n gbɛtɔ́ liva mɔ̌kpan sín kú. Jehovah ba ɖɔ ye ni lɛ́ wá nɔ gbɛ̀, bo ko na acɛ Jezu bonu é na fɔ́n ye sín kú.
Vɔ̌gbɔnji
Nɛ̌ nǔ ka nɔ cí nú Jehovah kpo Jezu kpo dó mɛkúkú lɛ fínfɔ́n wá gbɛ̀ wu?
Fitɛ gbɛtɔ́ liva mɔ̌kpan e è na fɔ́n sín kú lɛ é ka na nɔ gbɛ̀ ɖè? Jixwé alǒ ayikúngban jí? Etɛwu a ka ɖɔ mɔ̌?
Etɛwu a ka kúdeji ɖɔ mɛvívɛ́ towe lɛ sixu lɛ́ wá nɔ gbɛ̀?
KÍJÉ
Kplɔ́n afɔ tawun tawun ɖěɖee a sixu ɖè dó ɖí xwi xá aluwɛ lɛ é.
Nǔgbododó Biblu tɔn lɛ ka sixu d’alɔ mɛ e ɖò aluwɛ mɛ é dóo à?
Nɛ̌ yɔkpɔvu lɛ ka sixu ɖí xwi xá kú mɛvívɛ́ ɖé tɔn gbɔn?
È na fɔ́n mɛ ɖě sín kú dó jixwé wɛ à? Mɛ ɖětɛ lɛ è ma ka na fɔ́n sín kú ǎ?