“Mi nɔ ná akɔ́nkpinkpan mɛ.” —1 TƐSALONÍKINU LƐ́ 5:14.

Xɔ́ntɔn towe sixú ɖo adohu adohu jí, alǒ nɔ mɔ ɖɔ émí kún hwɛ́n nǔɖé ó, bo ɖo xwi ɖí xá linlin énɛ́ wɛ. Ényí a nɔ vɔ́ gǎnjɛwú ná ɛ ɖɔ nǔ tɔn nɔ ɖu ayi mɛ nú we ɔ, a sixú dó gbɔ n’i bo lɛ́ ná akɔ́nkpinkpan ɛ, nú a ma tlɛ tuun nǔ e a ná ɖɔ tawun é ǎ ɔ nɛ́.

“Nɔ ɖó suúlu.”—1 TƐSALONÍKINU LƐ́ 5:14.

Hwebǐnu wɛ xɔ́ntɔn towe ná ɖo gbesisɔmɛ bo ná ɖɔ xó ǎ. Vɔ̌ gǎnjɛwú ná xɔ́ntɔn towe ɖɔ kpó xomɛhunhun kpó wɛ émí ná nɔ ɖótó è hwenu e é ná nɔ ba ná ɖɔ xó é. Azɔn e jɛ wɛ xɔ́ntɔn towe ɖe é sixú zɔ́n bɔ é ɖɔ alǒ wa nǔ ɖěɖěe ná dó xomɛsin nú we lɛ́ é. É sixú dɔn nǔ gbɔn tuto e mi ko bló lɛ́ é jí, alǒ bɛ́ xomɛsin. Ðǒ suúlu dó wǔ tɔn, bo lɛ́ mɔ nǔ jɛ ninɔmɛ tɔn mɛ hwenu e a nǎ ɖo alɔ dó è wɛ é.—Nǔnywɛ́xó 18:24.