NǓKPLƆNKPLƆN 12
Etɛ lɛ ka Na D’alɔ We Bɔ A Na Kpò Ðò Biblu Kplɔ́n Wɛ?
Biblu kplɔnkplɔn ɖó lè, amɔ̌, é sixu nɔ ma bɔwǔ hwebǐnu. Hweɖelɛnu ɔ, a sixu nɔ kanbyɔ hwiɖée ɖɔ, emi ka na kpéwú bo kpò ɖò Biblu ɔ kplɔ́n wɛ à jí. Etɛwu é ka nyɔ́ ɖɔ a ni dó gǎn bo kpò ɖ’ewu? Etɛ lɛ ka sixu d’alɔ we bɔ enyi wuvɛ̌ lɛ na bo ɖò finɛ ɔ, a na kpò ɖò kan ɖó d’ewu wɛ?
1. Nɛ̌ Biblu kplɔnkplɔn ka sixu d’alɔ we gbɔn?
“Mawuxó ɔ ɖò gbɛ̀, bo ɖó hlɔnhlɔn.” (Eblée lɛ 4:12) Biblu sixu d’alɔ we, ɖó é ɖè linlin Mawu tɔn lɛ kpo lee nǔ nɔ cí n’i dó wǔ we é kpo xlɛ́. É nɔ d’alɔ mɛ bɔ è nɔ tuùn nǔ, nyɔ́nǔi bo nɔ lɛ́ ɖó nukúnɖiɖó. Taji bǐ ɔ, Biblu nɔ d’alɔ mɛ bɔ è nɔ huzu xɔ́ntɔn Jehovah tɔn. Nú a ɖò Biblu ɔ kplɔ́n wɛ ɔ, tɛn na hlɔnhlɔn e é ɖó é wɛ a ɖè bonu é na hɛn gbɛzán towe kpɔ́n te nɛ.
2. Etɛwu mǐ ka ɖó na tuùn lě dò nǔgbo Biblu tɔn lɛ ɖò taji sɔ é?
Nǔgbo e ɖò Biblu mɛ lɛ é cí dɔkun xɔ akwɛ lɛ ɖɔhun. Enɛ wu wɛ Biblu dó wusyɛn lanmɛ nú mǐ ɖɔ mǐ ni “xɔ nǔgbo, bo ma sà gbeɖé ó.” (Nǔnywɛxó 23:23, nwt) Enyi afɔklɛ́nnú lɛ na bo ɖò finɛ, bonu mǐ hɛn lě dò nǔgbo Biblu tɔn lɛ ɖò taji sɔ é ayi mɛ ɔ, mǐ na wà nǔ e wu mǐ kpé é bǐ bo na kpò ɖò nǔ kplɔ́n wɛ.—Xà Nǔnywɛxó 2:4, 5.
3. Nɛ̌ Jehovah ka sixu d’alɔ we bɔ a na kpò ɖò nǔ kplɔ́n wɛ gbɔn?
Ðó Jehovah wɛ nyí Gbɛɖotɔ́ Nǔbǐwukpétɔ́ towe bo lɛ́ nyí Xɔ́ntɔn towe wutu ɔ, é ba na d’alɔ we nú a ni kplɔ́n nǔ dó wǔ tɔn. É hɛn ɔ, é na bló bɔ a na “ɖó jlǒ bo na nɔ wà nǔ.” (Xà Filipunu lɛ 2:13.) Enɛ wu ɔ, nú é byɔ hweɖelɛnu ɖɔ jlǒ e a ɖó bo na kplɔ́n nǔ, alǒ wà nǔ sɔgbe xá nǔ e a nɔ kplɔ́n lɛ é ni syɛn d’eji ɔ, é sixu d’alɔ we. Enyi a ɖó hudo hlɔnhlɔn tɔn d’eji bo na mɔ tɛn dó ɖu ɖò afɔklɛ́nnú lɛ, alǒ gbeklánxámɛ jí ɔ, é sixu na hlɔnhlɔn enɛ we. Nɔ byɔ Jehovah hwɛhwɛ ɖò ɖɛ mɛ ɖɔ é ni d’alɔ we, bonu a na kpò ɖò Biblu ɔ kplɔ́n wɛ.—1 Tɛsalonikinu lɛ 5:17.
BA DÒ NÚ NǓ D’EJI
Kpɔ́n lee enyi tuto towe na bo ján tawun, alǒ mɛ ɖevo lɛ na bo ɖò gbè klán xá we wɛ ɔ, a sixu kpò ɖò Biblu ɔ kplɔ́n wɛ gbɔn é. Gɔ́ na ɔ, gbějé lee Jehovah na d’alɔ we bɔ a na kpò ɖò kan ɖó d’ewu wɛ gbɔn é kpɔ́n.
4. Nǔ Biblu kplɔnkplɔn towe ni ɖò tɛn nukɔntɔn ɔ mɛ nú we
Hweɖelɛnu ɔ, alɔnu mǐtɔn nɔ ján sɔmɔ̌ bɔ é nɔ cí nú mǐ ɖɔ mǐ kún ɖó hwenu kaka ɖé bo na dó kplɔ́n Biblu ó ɖɔhun. Etɛ ka sixu d’alɔ mǐ? Xà Filipunu lɛ 1:10, nwt, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
Etɛ lɛ a ka lin ɖɔ ye nyí “nǔjɔnǔ hugǎn lɛ” ɖò gbɛ̀ mɛ?
Etɛ lɛ a ka sixu wà dó xlɛ́ ɖɔ Biblu kplɔnkplɔn towe ɖò taji tawun nú we?
Enyi a bɛ́ kɔ́ dó alǎ ɖé mɛ, cobo wá jɛ awinnyaglo bɛ́ d’emɛ jí ɔ, awinnyaglo lɛ na mɔ tɛnmɛ ǎ
Enyi a bɛ́ awinnyaglo lɛ d’emɛ jɛ nukɔn ɔ, a na mɔ tɛnmɛ bo na bɛ́ kɔ́ sukpɔ́ gɔ́ na. Mɔ̌ ɖokpo ɔ, enyi a sɔ́ “nǔ e nyí nǔjɔnǔ hugǎn lɛ é” ɖó tɛn nukɔntɔn ɔ mɛ ɖò gbɛzán towe mɛ ɔ, a na kpéwú bo na bló ye, bo ka na lɛ́ mɔ táan nú nǔ ɖevo lɛ
Biblu kplɔnkplɔn nɔ sú hudo nǔ gbigbɔ tɔn lɛ tɔn mǐtɔn sín dò, é wɛ nyí hudo e mǐ ɖó bo na tuùn Mawu bo lɛ́ sɛn ɛ é. Xà Matie 5:3, nwt; enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
Enyi mǐ sɔ́ Biblu kplɔnkplɔn ɖó tɛn nukɔntɔn ɔ mɛ ɔ, nɛ̌ mǐ ka nɔ ɖu lè tɔn gbɔn?
5. Gbeklánxámɛ lɛ na bo ɖò finɛ hǔn, kpò ɖò kan ɖó dó nǔkplɔnkplɔn ɔ wu wɛ
Hweɖelɛnu ɔ, mɛ ɖevo lɛ sixu tɛ́n kpɔ́n bo na túntún awakanmɛ nú we dó Biblu kplɔnkplɔn ɔ wu. Kpɔ́n kpɔ́ndéwú Francesco tɔn. Xò VIDEO ɔ, enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu lɛ é jí.
Ðò video ɔ mɛ ɔ, nɛ̌ Francesco sín xɔ́ntɔn lɛ kpo xwédo tɔn kpo ka wà nǔ gbɔn hwenu e é ɖɔ nǔ e kplɔ́n wɛ é ɖè lɛ é sín xó nú ye é?
Lè tɛ kanɖodónǔwu tɔn ka hɛn wá n’i?
Xà 2 Timɔtée 2:24, 25, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
Nɛ̌ nǔ ka nɔ cí nú xwédo towe kpo xɔ́ntɔn towe lɛ kpo dó nǔ e kplɔ́n wɛ a ɖè lɛ é wu?
Sɔgbe kpo wemafɔ enɛ lɛ kpo ɔ, nú mɛɖé tíìn bɔ Biblu kplɔnkplɔn towe ma nyɔ́ nukún tɔn mɛ ǎ ɔ, nɛ̌ a ka ɖó na wà nǔ gbɔn? Etɛwu?
6. Ganjɛ Jehovah wu bonu é na d’alɔ we
Nú mǐ ɖò sisɛkpɔ́ Jehovah d’eji wɛ ɔ, jlǒ e mǐ ɖó bo na nyɔ́ nukún tɔn mɛ é nɔ ɖò syɛnsyɛn d’eji wɛ. É ɖò mɔ̌ có, mǐ sixu mɔ ɖɔ huzuhuzu lɛ biblo ɖò gbɛzán mǐtɔn mɛ bo na jɛ nǔgbododó tɔn lɛ kɔn vɛwǔ. Enyi nǔ cí mɔ̌ nú we gbeɖé hǔn, ma jó gbè ó. Jehovah na d’alɔ we. Xò VIDEO ɔ, enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu lɛ é jí.
Huzuhuzu tɛ lɛ Jim ka bló bá nyɔ́ Jehovah nukúnmɛ bɔ video ɔ xlɛ́?
Etɛ ka jiwǔ nú we ɖò kpɔ́ndéwú tɔn mɛ?
Xà Eblée lɛ 11:6, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
Etɛ Jehovah ka na wá wà nú “mɛ e ɖò biba ɛ wɛ lɛ” é, enɛ wɛ nyí mɛ ɖěɖee ɖò tintɛnkpɔn wɛ syɛnsyɛn bo na tuùn i lobo lɛ́ nyɔ́ nukún tɔn mɛ lɛ é?
Etɛ enɛ ka kplɔ́n we dó lee nǔ nɔ cí nú Jehovah hwenu e é mɔ gǎn ɖěɖee dó wɛ a ɖè bo na kplɔ́n Biblu ɔ lɛ é wu?
MƐÐÉ SIXU KANBYƆ ÐƆ: “Etɛwu a ka ɖò Biblu kplɔ́n xá Kúnnuɖetɔ́ Jehovah tɔn lɛ wɛ?”
Nɛ̌ a ka na ɖɔ?
ETƐ LƐ A KA KPLƆ́N?
Biblu kplɔnkplɔn nɔ bɔwǔ hwebǐnu ǎ có, é ka sixu d’alɔ we bɔ a na ɖu gbɛ̀ sín vivǐ kaka sɔyi. Kpò ɖò Jehovah wu ganjɛ wɛ, é na d’ajɔ we.
Vɔ̌gbɔnji
Etɛwu nǔgbo Biblu tɔn lɛ ka xɔ akwɛ nú we?
Enyi a “mɔ dò nú nǔ e nyí nǔjɔnǔ hugǎn lɛ é” gudo ɔ, etɛ a ka ɖó na wà?
Etɛwu a ka ɖó na byɔ Jehovah ɖɔ é ni d’alɔ we bonu a na kpò ɖò Biblu ɔ kplɔ́n wɛ?
KÍJÉ
Kpɔ́n wlɛnwín e ko d’alɔ mɛ gegě bɔ ye zán hwenu yetɔn kpo nǔnywɛ kpo é ɛnɛ.
“Lee A Sixu Zán Hwenu Towe kpo Nǔnywɛ kpo Gbɔn É” (Réveillez-vous! février 2014)
Nawe ɖé tíìn bɔ asú tɔn mɔ nukúnnú jɛ gǎn ɖěɖee dó wɛ é ɖè bɔ nǔ tɔn na nyɔ́ Mawu nukúnmɛ é mɛ ǎ. Kpɔ́n lee Jehovah d’alɔ ɛ gbɔn é.
Kpɔ́n lee nya ɖé ɖu kanɖodónǔwu asì tɔn tɔn sín lè gbɔn é.
È nɔ dó hwɛ Kúnnuɖetɔ́ Jehovah tɔn lɛ hweɖelɛnu ɖɔ ye nɔ gbà xwédo lɛ. Nǔgbo jɛn ka wɛ à?