Lee Mǐ Na Kpò Ðò Awǎ Jɛ Wɛ Gbɔn, Hwenu E Mǐ Na Ðò Didɛ Wɛ Ðò Mɛtɛnkpɔn lɛ Nu É

1-2. Sɔgbe xá Matie 5:11 ɔ, linlin tɛ mǐ ka ɖó na nɔ ɖó dó wuvɛ̌ lɛ wu?

JEZU d’akpá nú ahwanvu tɔn lɛ ɖɔ ye na ɖó awǎjijɛ adodwé ɔ. É ka lɛ́ gb’akpá nú ye ɖɔ ye na mɔ wuvɛ̌ lɛ. (Mat. 10:22, 23; Luk. 6:20-23) Ahwanvu Klisu tɔn e mǐ nyí é nɔ dó awǎjijɛ nú mǐ. Enyi xwédo mǐtɔn klán gbè xá mǐ, alǒ enyi acɛkpikpa lɛ dóya nú mǐ, abǐ azɔ̌gbɛ́ alǒ wemaxɔmɛvígbɛ́ lɛ tɛ́n kpɔ́n bo na sísɛ́ mǐ bɔ mǐ na wà nǔ nyanya ɔ, nɛ̌ nǔ ka nɔ cí nú mǐ? Enyi mǐ lin tamɛ dó nǔ enɛ lɛ jí ɔ, ado sixu hu mǐ.

² Ðò kpaa mɛ ɔ, mɛ gegě nɔ mɔ ɖɔ yadonúmɛ kún nyí nǔ e na zɔ́n bɔ è na jɛ awǎ é ɖé ó. Amɔ̌, nǔ e Xó Mawu tɔn ɖɔ nú mǐ ɖɔ mǐ ni wà é pɛ́ɛ ka nɛ. Ði kpɔ́ndéwú ɔ, Jaki wlán ɖɔ mǐ kún ɖó na lin ɖɔ mǐ kún ɖó alɔdó ɖě hwenu e mǐ ɖò wuvɛ̌ lɛ ɖí xwi xá wɛ é ó, loɔ, mǐ ɖó na j’awǎ. (Ja. 1:2, 12) Jezu ɖɔ ɖɔ nú è tlɛ ɖò ya dó nú mǐ wɛ ɔ, mǐ ɖó na j’awǎ. (Xà Matie 5:11.) Nɛ̌ mɛtɛnkpɔn lɛ ka na ɖò finɛ có, mǐ ka sixu kpò ɖò awǎ jɛ wɛ gbɔn? Tamɛ linlin dó xó e ɖò wema e Jaki wlán sɛ́dó Klisanwun bǐbɛ̌mɛ tɔn lɛ é mɛ é ɖé lɛ jí sixu kplɔ́n nǔ gegě mǐ. Mǐ ni tó ɖɔ xó dó wuvɛ̌ e Klisanwun enɛ lɛ ɖí xwi xá é wu jɛ nukɔn.

WUVƐ̌ TƐ LƐ KLISANWUN XWÈ KANWEKO NUKƆNTƆN Ɔ TƆN LƐ KA ÐÍ XWI XÁ?

3. Jaki huzu ahwanvu Jezu tɔn b’ɛ na nɔ zaan é ɔ, tɛ ka jɛ?

³ Ee nɔví Jezu tɔn Jaki huzu ahwanvu b’ɛ na nɔ zaan é ɔ, è jɛ ya dó nú Klisanwun e ɖò Jeluzalɛmu lɛ é jí. (Mɛ. 1:14; 5:17, 18) Ee è hu ahwanvu Etyɛni é ɔ, Klisanwun gegě hɔn sín toxo ɔ mɛ, bɔ “ye bǐ gbakpé Judée kpodo Samalíi kpan gbéjí,” bɔ mɛɖé lɛ tlɛ hɔn kaka yì Ciplu kpo Antyɔci kpo. (Mɛ. 7:58–8:1; 11:19) Wuvɛ̌ gegě wɛ ahwanvu lɛ ɖí xwi xá. Amɔ̌, kpo akpakpa sɔ́ mɛ kpo wɛ ye jlá wɛnɖagbe ɔ, gbɔn fí ɖebǔ e ye yì é, bɔ è ɖó agun lɛ ayǐ gbɔn tokpɔn Hlɔma tɔn mɛ. (1 Pi. 1:1) Ðò enɛ gudo ɔ, ye lɛ́ gbɔn hwenu vɛwǔ gegě mɛ.

4. Wuvɛ̌ ɖevo tɛ lɛ nu Klisanwun bǐbɛ̌mɛ tɔn lɛ ka ɖó na dɛ ɖè?

⁴ Klisanwun bǐbɛ̌mɛ tɔn lɛ ɖí xwi xá wuvɛ̌ gegě. Ði kpɔ́ndéwú ɔ, ɖò xwè 50 H.M. tɔn mɔ̌ ɔ, tokpɔngán Hlɔma tɔn Klodu ɖegbe ɖɔ Jwifu lɛ bǐ ni tɔ́n sín Hlɔma. Enɛ wu ɔ, è hɛn Jwifu e huzu Klisanwun lɛ é gannugánnú bɔ ye jó xwé yetɔn lɛ dó bo sɛ̀ tɛn yì fí ɖevo lɛ. (Mɛ. 18:1-3) Ðò xwè 61 H.M. tɔn mɔ̌ ɔ, mɛsɛ́dó Pɔlu wlán ɖɔ è zun Klisanwun hatɔ́ emitɔn lɛ ɖò agbawungba, è wlí ye dó ganmɛ, bo lɛ́ fin nǔɖokan yetɔn lɛ. (Ebl. 10:32-34) Mɛ ɖevo lɛ ɖɔhun ɔ, Klisanwun lɛ ɖó na dɛ ɖò ya kpo azɔn kpo nu.—Hlɔ. 15:26; Fili. 2:25-27.

5. Nǔkanbyɔ tɛ lɛ mǐ ka na mɔ xósin na?

⁵ Jaki wlán wema-sɛ́dó-mɛ tɔn jɛ nukɔn nú xwè 62 H.M. tɔn. É tuùn wuvɛ̌ e mɛ gbɔn dín wɛ nɔví tɔn lɛ ɖè é ganji. Jehovah sɔ́ d’ayi mɛ nú Jaki bɔ é wlán nǔ sɛ́dó Klisanwun enɛ lɛ, bo ɖè wě tawun tawun e na d’alɔ ye bɔ enyi ye na bo tlɛ ɖò wuvɛ̌ lɛ mɔ wɛ ɔ, ye na kpò ɖò awǎ jɛ wɛ lɛ é xá ye. Mi nú mǐ ni gbéjé wema-sɛ́dó-mɛ Jaki tɔn kpɔ́n, bo na xósin nú nǔkanbyɔ elɔ lɛ: Enyi wuvɛ̌ lɛ na bo tlɛ ɖò finɛ ɔ, etɛwu Klisanwun ɖé ka sixu j’awǎ? Etɛ ka sixu zɔ́n bɔ Klisanwun ɖé ba awǎjijɛ enɛ kpò? Nɛ̌ nǔnywɛ, nǔɖiɖi kpo akɔ́nkpinkpan kpo ka sixu d’alɔ mǐ bɔ enyi mǐ na bo tlɛ ɖò wuvɛ̌ ɖebǔ ɖí xwi xá wɛ ɔ, mǐ na kpò ɖò awǎ jɛ wɛ gbɔn?

ETƐ KA NƆ ZƆ́N BƆ KLISANWUN ÐÉ NƆ J’AWǍ?

6. Sɔgbe xá Luki 6:22, 23 ɔ, etɛwu Klisanwun ɖé ka sixu j’awǎ, hwenu e é ɖò wuvɛ̌ mɛ é?

⁶ Mɛ gegě sixu lin ɖɔ enyi emi ɖò ganji ɖò agbaza mɛ, jɛ dɔkun bo lɛ́ ɖó xwédo awǎjijɛnɔ ɖé ɔ kɛɖɛ jɛn emi sixu j’awǎ. Amɔ̌, awǎjijɛ alɔkpa e xó Jaki ɖɔ ɖò wema-sɛ́dó-mɛ tɔn mɛ é ɖò nǔ e gbigbɔ mímɛ́ Mawu tɔn nɔ na mɛ lɛ é mɛ, é nɔ sín ninɔmɛ mɛɖé tɔn wu ǎ. (Ga. 5:22) Tuùn e Klisanwun ɖé tuùn ɖɔ nǔ emitɔn nyɔ́ Jehovah nukúnmɛ, bɔ emi ɖò kpɔ́ndéwú Jezu tɔn xwedó wɛ é nɔ zɔ́n bɔ é nɔ ɖó awǎjijɛ adodwé ɔ. (Xà Luki 6:22, 23; Kolo. 1:10, 11) È sixu jlɛ́ awǎjijɛ mǐtɔn dó myɔ lantɛ́nu ɖé tɔn wu. Lantɛ́nu ɔ sín gò nɔ cyɔn alɔ myɔ ɔ jí, bɔ jɔhɔn alǒ jǐ nɔ wà nǔ dó wǔ tɔn ǎ, bɔ enɛ nɔ zɔ́n bɔ é nɔ kpò ɖò jiji wɛ. Mǐ lɔ sixu ɖó awǎjijɛ, enyi nǔ ɖebǔ na bo ɖò jijɛ wɛ ɖò gbɛzán mǐtɔn mɛ ɔ nɛ. Enyi mǐ jɛ azɔn alǒ ma tlɛ ɖó akwɛ nabi ɖé ǎ ɔ, mǐ na ba awǎjijɛ mǐtɔn kpò ǎ. Enyi mɛ lɛ cá nú mǐ, alǒ xwédo mǐtɔn lɛ sín mɛ lɛ klán gbè xá mǐ ɔ, mǐ na ba awǎjijɛ mǐtɔn kpò ǎ. Awǎjijɛ mǐtɔn sixu syɛn d’eji, hweɖebǔnu e mɛ lɛ na tɛ́n kpɔ́n bo na bló bɔ mǐ na ba awǎjijɛ mǐtɔn kpò é. Wuvɛ̌ e mǐ nɔ mɔ ɖó nǔɖiɖi mǐtɔn wu lɛ é nɔ xlɛ́ ɖɔ mǐ nyí ahwanvu Klisu tɔn nǔgbo lɛ. (Mat. 10:22; 24:9; Jaan 15:20) Nǔ e wu Jaki wlán xó elɔ lɛ é nɛ: “Nɔví ce lɛ mi, hwenu e è na ɖò mi dó kpɔ́n wɛ gbɔn alɔkpa lɛ bǐ mɛ ɔ, ni nyí awǎjijɛnú nú mi.”—Ja. 1:2.

7-8. Ðagbe tɛ mɛtɛnkpɔn lɛ ka nɔ wà nú nǔɖiɖi mǐtɔn?

⁷ Jaki lɛ́ ɖɔ xó dó hwɛjijɔ ɖevo e wu Klisanwun lɛ nɔ ba na dɛ ɖò wuvɛ̌ syɛnsyɛn lɛ nu é wu. É ɖɔ: “Enyi nǔɖiɖi mitɔn lidǒ ɖò mɛdókpɔ́n lɛ mɛ ɔ, é nɔ zɔ́n bɔ è nɔ ɖó suúlu [alǒ didɛ, nwt].” (Ja. 1:3) È sixu sɔ́ mɛtɛnkpɔn lɛ jlɛ́ dó myɔ e è nɔ zé dó tun gan na é wu. Enyi è xò zo dó gan ɔ, bonu é wá fá ɔ, é nɔ syɛn. Mɔ̌ ɖokpo ɔ, enyi mǐ dɛ ɖò mɛtɛnkpɔn lɛ nu ɔ, nǔɖiɖi mǐtɔn nɔ lidǒ. Enɛ wu wɛ Jaki wlán ɖɔ: “Mi nɔ acéjí bonu suúlu [alǒ didɛ] e mi na ɖó ɔ ni wà azɔ̌ kpíkpé, bonu mi na zin, bo na jɛ ayǐ ɖò nǔ ɖebǔ mɛ ǎ.” (Ja. 1:4) Enyi mǐ mɔ lee mɛtɛnkpɔn lɛ nɔ bló bɔ nǔɖiɖi mǐtɔn nɔ syɛn gbɔn é ɔ, mǐ sixu ɖí xwi xá ye kpo awǎjijɛ kpo.

⁸ Jaki lɛ́ ɖɔ nǔ e na zɔ́n bɔ mǐ sixu ba awǎjijɛ kpò é ɖé lɛ ɖò wema-sɛ́dó-mɛ tɔn mɛ. Nǔ tɛ lɛ ka wɛ? Nɛ̌ mǐ ka sixu ɖu ɖò ye jí gbɔn?

ÐU ÐÒ NǓ ÐĚÐEE SIXU XÒ AWǍJIJƐ TOWE YÍ LƐ É JÍ

9. Etɛwu mǐ ka ɖó hudo nǔnywɛ tɔn?

⁹ Etɛ ka sixu xò awǎjijɛ mǐtɔn yí? Hwenu e mǐ ma tuùn nǔ e mǐ na wà é ǎ é. Hwenu e mǐ ɖò wuvɛ̌ lɛ mɛ é ɔ, mǐ nɔ ba alɔdó Jehovah tɔn, bo na mɔ tɛn bo wá gbeta e na nyɔ́ nukún tɔn mɛ lɛ é, ee na hɛn lè wá nú nɔví mǐtɔn lɛ é, kpo ɖěɖee na d’alɔ mǐ bɔ mǐ na nɔ gbeji lɛ é kpo kɔn. (Jel. 10:23) Mǐ ɖó nǔnywɛ sín hudo bo na tuùn nǔ e mǐ ɖó na wà é, kpo nǔ e mǐ ɖó na ɖɔ nú mɛ ɖěɖee klán gbè xá mǐ lɛ é kpo. Enyi mǐ ma tuùn nǔ e mǐ na wà é ǎ ɔ, awakanmɛ sixu kú mǐ, bɔ mǐ na yawǔ ba awǎjijɛ mǐtɔn kpò.

10. Enyi mǐ jló na ɖó nǔnywɛ ɔ, etɛ mǐ ka ɖó na wà bɔ Jaki 1:5 ɖɔ?

¹⁰ Etɛ mǐ ka sixu wà bo na kpò ɖò awǎjijɛ ɖó wɛ? Byɔ̌ Jehovah ɖɔ é ni na we nǔnywɛ. Enyi mǐ na dɛ ɖò mɛtɛnkpɔn mǐtɔn lɛ nu kpo awǎjijɛ kpo ɔ, nǔ nukɔntɔn e mǐ ɖó na wà é wɛ nyí ɖɔ mǐ ɖó na byɔ Jehovah ɖò ɖɛ mɛ ɖɔ é ni na mǐ nǔnywɛ e sín hudo mǐ ɖó bo na wá gbeta ɖagbe lɛ kɔn é. (Xà Jaki 1:5.) Enyi mǐ mɔ ɖɔ Jehovah kún na sinkɔn nú ɖɛ mǐtɔn tlolo ó ɔ, etɛ mǐ ka ɖó na wà? Jaki ɖɔ ɖɔ mǐ ɖó na “nɔ byɔ” Mawu. Akpɔ nɔ ɖó Jehovah ɖó nǔnywɛ e byɔ ɛ wɛ mǐ nɔ ɖè é wu ǎ. É na sin xomɛ dó mǐ ǎ. Nú mǐ xoɖɛ dó byɔ nǔnywɛ bá mɔ tɛn dó dɛ ɖò mɛtɛnkpɔn lɛ nu ɔ, Tɔ́ mǐtɔn jixwé tɔn ɔ “nɔ hun alɔ dó na nǔ mǐ.” (Ðɛh. 25:12, 13) É nɔ mɔ wuvɛ̌ e mɛ gbɔn wɛ mǐ ɖè lɛ é, bo nɔ sè wuvɛ̌ xá mǐ, bo ka nɔ lɛ́ ɖò gbesisɔmɛ bá d’alɔ mǐ. Enɛ nɔ zɔ́n bɔ mǐ nɔ j’awǎ tawun. Amɔ̌, nɛ̌ Jehovah ka nɔ na mǐ nǔnywɛ gbɔn?

11. Nǔ ɖevo tɛ mǐ ka ɖó na wà, bá dó ɖó nǔnywɛ?

¹¹ Jehovah nɔ na mǐ nǔnywɛ gbɔn Xó tɔn gblamɛ. (Nǔx. 2:6) Bo na dó ɖó nǔnywɛ enɛ ɔ, mǐ ɖó na nɔ kplɔ́n Xó Mawu tɔn kpo wema jinjɔn Biblu jí lɛ kpo. Amɔ̌, mǐ ɖó na wà nǔ hugǎn nǔ kplɔnkplɔn kpowun. Mǐ ɖó na wà nǔ e Mawu ɖɔ mǐ ni wà lɛ é. Jaki wlán ɖɔ: “Mi ma ɖò . . . Mawuxó ɔ ɖótó wɛ kpowun ó; azɔ̌ wɛ mi na nɔ zé dó wà na titewungbe.” (Ja. 1:22) Nú mǐ nɔ xwedó wěɖexámɛ Mawu tɔn lɛ ɔ, mǐ nɔ huzu fífá gbɛ́tɔ́, nɔ ɖó linlin e ɖò jlɛ̌ jí é, bo nɔ lɛ́ nyɔ́ xomɛ hugǎn. (Ja. 3:17) Jijɔ enɛ lɛ nɔ d’alɔ mǐ, bɔ mǐ nɔ dɛ ɖò wuvɛ̌ ɖebǔ nu, bo nɔ lɛ́ zɔ́n bɔ mǐ nɔ ba awǎjijɛ mǐtɔn kpò ǎ.

12. Etɛwu é ka ɖò taji ɖɔ mǐ ni tuùn Biblu ɔ ganji?

¹² Xó Mawu tɔn cí nǔkpɛ́n ɖé ɖɔhun; é nɔ d’alɔ mǐ bɔ mǐ nɔ mɔ nǔ e mǐ ɖó na jlaɖó é kpo lee mǐ sixu wà mɔ̌ gbɔn é kpo. (Ja. 1:23-25) Ði kpɔ́ndéwú ɔ, enyi mǐ kplɔ́n Xó Mawu tɔn gudo ɔ, mǐ sixu ɖó ayi wu ɖɔ mǐ ɖó na ɖu ɖò lee nǔ nɔ cí nú mǐ é jí. Kpo alɔdó Jehovah tɔn kpo ɔ, mǐ kplɔ́n lee mǐ na fá xomɛ, hwenu e mɛɖé dó xomɛsin nú mǐ, alǒ tagba ɖé zɔ́n bɔ mǐ sin xomɛ é gbɔn é. Ðó mǐ nɔ fá xomɛ wutu ɔ, lee mǐ nɔ wà nǔ gbɔn hwenu e tagba lɛ wá xwetɔ́n é nɔ kpɔ́n te. Mǐ nɔ kpéwú bo nɔ lin tamɛ ganji, bo nɔ lɛ́ wá gbeta ɖagbe lɛ kɔn. (Ja. 3:13) É ɖò taji ɖɔ mǐ ni tuùn Biblu ɔ ganji!

13. Etɛwu mǐ ka ɖó na kplɔ́n nǔ dó kpɔ́ndéwú ɖěɖee mɛ e xó Biblu ɖɔ lɛ é sɔ́ ɖ’ayǐ é wu?

¹³ Hweɖelɛnu ɔ, hwenu e mǐ wà nǔ nyi dò gudo é kɛɖɛ jɛn mǐ nɔ tuùn nǔ e mǐ ɖó na nyi alɔ na é. Amɔ̌, è kplɔ́n nǔ gbɔn mɔ̌ ɔ, é nɔ vɛ́ tawun. Ali ɖagbe hugǎn e nu mǐ sixu ɖó nǔnywɛ ɖè é ɖokpo wɛ nyí ɖɔ nǔ ɖagbe e mɛ ɖevo lɛ wà lɛ é kpo nǔ nyanya e ye wà lɛ é kpo ni kplɔ́n nǔ mǐ. Enɛ wu wɛ Jaki dó wusyɛn lanmɛ nú mǐ ɖɔ kpɔ́ndéwú mɛ e xó Biblu ɖɔ é ɖé lɛ tɔn ɖi Ablaxamu, Hlaxabu, Jɔbu, kpo Elíi kpo tɔn ni kplɔ́n nǔ mǐ. (Ja. 2:21-26; 5:10, 11, 17, 18) Mɛsɛntɔ́ gbejinɔtɔ́ Jehovah tɔn enɛ lɛ kpéwú bo dɛ ɖò wuvɛ̌ e sixu ko xò awǎjijɛ yetɔn yí lɛ é nu. Kpɔ́ndéwú didɛ tɔn yetɔn lɛ xlɛ́ ɖɔ kpo alɔdó Jehovah tɔn kpo ɔ, mǐ sixu wà nǔ ɖokpo ɔ.

14-15. Enyi mǐ ɖò nǔ xò kpɔ́n wɛ ɔ, etɛwu mǐ ka ɖó na tɛ́n kpɔ́n bo ɖeɖɛ?

¹⁴ Etɛ ka sixu xò awǎjijɛ mǐtɔn yí? Hwenu e mǐ ma kú dó nǔ e mǐ ɖi nǔ na lɛ é jí ǎ é. Sín hweɖenu jɛ hweɖenu ɔ, é sixu vɛwǔ nú mǐ bɔ mǐ na mɔ nǔ jɛ nǔɖe wu ɖò Xó Mawu tɔn mɛ. Alǒ, Jehovah na sinkɔn nú ɖɛ mǐtɔn lɛ lee mǐ ba gbɔn é ǎ. Enɛ sixu zɔ́n bɔ mǐ jɛ nǔ xò kpɔ́n jí. Enyi mǐ wɔn ya nú nǔxokpɔ́n enɛ lɛ ɔ, ye sixu vɔ́da nú nǔɖiɖi mǐtɔn, bo wà nǔ dó kancica e mǐ ɖó xá Jehovah é wu. (Ja. 1:7, 8) Ye sixu zɔ́n bɔ mǐ ba nukúnɖiɖó sɔgudo tɔn mǐtɔn kpò.

¹⁵ Mɛsɛ́dó Pɔlu jlɛ́ nukúnɖiɖó sɔgudo tɔn mǐtɔn dó gandótɔnu ɖé wu. (Ebl. 6:19) Gandótɔnu ɖé nɔ hɛn tɔjihun ɖé ɖó te, hwenu e jɔhɔn syɛnsyɛn ɖé ɖò nyinyi wɛ é bonu jɔhɔn ɔ ma dɔn ɛ yì fí e só lɛ ɖè é ó. Enyi wlɔ e dɔn gandótɔnu ɔ cá kpo tɔjihun ɔ kpo é ma wɛ́n ǎ ɔ jɛn gandótɔnu ɔ nɔ nyɔ́ zán. Lee gandótɔnu ɖé sín wlɔ jɛ ko ɔ, é nɔ vɔ́da nú gandótɔnu ɔ gbɔn é ɔ, mɔ̌ wɛ nǔxokpɔ́n e mǐ wɔn ya na lɛ é sixu vɔ́da nú nǔɖiɖi mǐtɔn gbɔn é nɛ. Enyi è klán gbè xá mɛɖé ɔ, nǔɖiɖi e é ɖó ɖɔ Jehovah sixu bló bɔ akpá tɔn lɛ na jɛnu é sixu vɔ́da. Enyi nǔɖiɖi mǐtɔn vɔ́da ɔ, mǐ nɔ ba nukúnɖiɖó kpò. Lee Jaki ɖɔ gbɔn é ɔ, mɛ e nɔ xò nǔ kpɔ́n é “cí aslɔkɛ́ e site ɖò xù jí, bɔ jɔhɔn nɔ dó alɔ mɛ, bo nɔ xò dó ɖisí, bo nɔ xò dó amyɔ é ɖɔhun.” (Ja. 1:6) Mɛ mɔ̌hun sixu nɔ ma ɖó awǎjijɛ gbeɖé!

16. Enyi mǐ ɖò nǔ xò kpɔ́n wɛ ɔ, etɛ mǐ ka ɖó na wà?

¹⁶ Etɛ mǐ ka sixu wà bo na kpò ɖò awǎjijɛ ɖó wɛ? Ðeɖɛ nǔxokpɔ́n towe lɛ; nǎ hlɔnhlɔn nǔɖiɖi towe. Ma dán lɛjɛlɛjɛ ó. Ðò gbeyiɖɔ Elíi hwenu ɔ, togun Jehovah tɔn jɛ nǔ xò kpɔ́n dó nǔ e ye ɖi nǔ na lɛ é wu jí. Elíi ɖɔ nú ye ɖɔ: ‘Hwetɛnu wɛ mi ka na sɛn nǔ we yì jɛ? Mi sɔ́ ɖokpo bo sɛn. Enyi Jehovah wɛ ɖó acɛ nǔgbo hǔn, mi bo sɛn ɛ. É ka nyí vodun Baalu wɛ ɖó acɛ nǔgbo hǔn, mi bo sɛn ɛ!’ (1 Axɔ́. 18:21) Égbé ɖesu ɔ, mɔ̌ wɛ mǐ ɖó na yawǔ wà nǔ gbɔn é nɛ. Mǐ ɖó na nɔ ba dò nú nǔ, bo na dó kúdeji ɖɔ Jehovah wɛ nyí Mawu, bɔ Biblu nyí Xó tɔn, lobɔ Kúnnuɖetɔ́ Jehovah tɔn lɛ wɛ nyí togun tɔn. (1 Tɛ. 5:21) Enyi mǐ wà mɔ̌ ɔ, nǔ e xò kpɔ́n wɛ mǐ ɖè lɛ é na blí bú, bɔ mǐ na lɛ́ na hlɔnhlɔn nǔɖiɖi mǐtɔn. Enyi mǐ ɖó hudo alɔdó tɔn bo na dó ɖeɖɛ nǔxokpɔ́n mǐtɔn lɛ ɔ, mǐ sixu byɔ alɔdó mɛxo agun tɔn lɛ tɔn. Enyi mǐ na kpò ɖò awǎ jɛ wɛ ɖò Jehovah sinsɛn mɛ ɔ, mǐ ɖó na nɔ yawǔ wà nǔ.

17. Enyi mǐ ba akɔ́nkpinkpan kpò ɔ, etɛ ka na jɛ?

¹⁷ Etɛ ka sixu xò awǎjijɛ mǐtɔn yí? Awakanmɛkúmɛ. Xó Mawu tɔn ɖɔ: “Enyi kanmɛ gbɔjɔ we adǎngbomɛzángbe hǔn, hlɔnhlɔn hwedó we tawun nɛ.” (Nǔx. 24:10) Xógbe Ebléegbe tɔn e è lilɛ dó “kanmɛ gbɔjɔ [mɛ]” é sín tinmɛ sixu nyí “akɔ́nkpinkpan biba kpò.” Enyi a ba akɔ́nkpinkpan kpò ɔ, a na yawǔ ba awǎjijɛ kpò.

18. Etɛ ka nyí tinmɛ didɛ tɔn?

¹⁸ Etɛ mǐ ka sixu wà bo na kpò ɖò awǎjijɛ ɖó wɛ? Ganjɛ Jehovah wu, bonu é ni na we akɔ́nkpinkpan nú a na dɛ. Mǐ ɖó hudo akɔ́nkpinkpan tɔn bo na dɛ ɖò mɛtɛnkpɔn lɛ nu. (Ja. 5:11) Xókwín e Jaki zán bɔ è lilɛ dó “suúlu” alǒ didɛ é sixu zɔ́n bɔ ayi mǐtɔn yì mɛ e ɖò tɛndo ɖokpo ɔ mɛ bo ma sɛ̀ dò ǎ é ɖé jí. Mǐ sixu lin tamɛ dó sɔja e ɖò te kpo akɔ́nkpinkpan kpo, hwenu e kɛntɔ́ lɛ tɔ́n ahwan ɛ é ɖé jí.

19. Etɛ kpɔ́ndéwú mɛsɛ́dó Pɔlu tɔn ka sixu kplɔ́n mǐ?

¹⁹ Mɛsɛ́dó Pɔlu sɔ́ kpɔ́ndéwú nukúnɖeji ɖé ɖ’ayǐ ɖò akɔ́nkpinkpan kpo didɛ kpo linu. Hweɖelɛnu ɔ, awakanmɛ nɔ kú i. Amɔ̌, é nɔ ganjɛ Jehovah wu, bonu é na na ɛ hlɔnhlɔn e sín hudo é ɖó é, enɛ zɔ́n bɔ é kpéwú bo dɛ. (2 Kɔ. 12:8-10; Fili. 4:13) Enyi mǐ nɔ sɔ́ mǐɖée hwe, bo tuùn ɖɔ mǐ ɖó hudo alɔdó Jehovah tɔn tɔn ɔ, mǐ sixu ɖó hlɔnhlɔn kpo akɔ́nkpinkpan kpo mɔ̌hun.—Ja. 4:10.

SƐKPƆ́ MAWU BO KPÒ ÐÒ AWǍ JƐ WƐ

20-21. Etɛ jí mǐ ka sixu kú dó?

²⁰ Mǐ sixu kúdeji ɖɔ mɛtɛnkpɔn e mǐ nɔ mɔ lɛ é kún nyí tódɔnnúmɛ Mawu tɔn ó. Jaki na ganjɛwu elɔ mǐ: “Hwenu e mɛɖé na jɛ tɛnkpɔn mɛ ɔ, ni ma ɖɔ Mawu wɛ ɖò emi tɛnkpɔn wɛ ó. Ðó nǔ nyanya sixu tɛ́n Mawu kpɔ́n ǎ; Mawu ɖesu ka nɔ tɛ́n mɛ ɖebǔ kpɔ́n ǎ.” (Ja. 1:13) Enyi mǐ kú dó nǔgbo enɛ jí ɔ, mǐ nɔ sɛkpɔ́ Tɔ́ mǐtɔn jixwé tɔn wanyiyinɔ ɔ d’eji.—Ja. 4:8.

²¹ Jehovah “nɔ huzu ǎ.” (Ja. 1:17) É d’alɔ Klisanwun xwè kanweko nukɔntɔn ɔ tɔn lɛ bɔ ye gbɔn mɛtɛnkpɔn yetɔn lɛ mɛ. Égbé ɖesu ɔ, é na lɛ́ d’alɔ mǐ mɛ ɖokpo ɖokpo. Byɔ̌ Jehovah dó nǔjɔnǔ mɛ ɖɔ é ni d’alɔ we bonu a na ɖó nǔnywɛ, nǔɖiɖi, kpo akɔ́nkpinkpan kpo. É na na sinkɔn nú ɖɛ towe lɛ. Mɔ̌ mɛ ɔ, a sixu kúdeji ɖɔ é na d’alɔ we bɔ a na kpò ɖò awǎ jɛ wɛ hwenu e a ɖò didɛ wɛ ɖò mɛtɛnkpɔn lɛ nu é!