“Wǎn Yí nú Mawu Wɛ Nyí Ðɔ”

1, 2. Etɛ lɛ ka sísɛ́ we bɔ a yí wǎn nú Jehovah Mawu?

A KA yí wǎn nú Mawu à? Enyi a ko zé hwiɖée jó nú Jehovah Mawu ɔ, é ɖò gaàn ɖɔ xósin towe na nyí ɛɛn; mɔ̌ ka wɛ nugbǒ! É ka sɔgbe nugbǒ ɖɔ mǐ ni yí wǎn nú Jehovah. Enyi mǐ yí wǎn nú Jehovah hǔn, wǎn e éyɛ yí nú mǐ é tuùn n’i wɛ mǐ ɖè nɛ. Lee Biblu ɖɔ gbɔn é ɖíe: “Mǐdɛɛ lɛ ɔ, mǐ yí wǎn nú Mawu, ɖó é wɛ yí wǎn nú mǐ jɛ nukɔn.”​—1 Jaan 4:19.

² Jehovah wɛ tò ɖè wanyiyi tɔn xlɛ́ mǐ jɛ nukɔn. É na ayikúngban ɖagbeɖagbe elɔ mǐ bɔ mǐ ɖ’eji. É nɔ kpé nukún dó hudo agbaza tɔn mǐtɔn lɛ wu. (Matie 5:45) Ee lɛ́ ɖò taji é wɛ nyí ɖɔ, é nɔ kpé nukún dó hudo gbigbɔ tɔn mǐtɔn lɛ wu. É na Xó tɔn Biblu ɔ mǐ. Gɔ́ na ɔ, é byɔ mǐ ɖɔ mǐ ni nɔ xoɖɛ sɛ́dó emi, lobo d’akpá ɖɔ emi na sè ɖɛ mǐtɔn lɛ bo na sɔ́ gbigbɔ mímɛ́ tɔn dó dalɔ mǐ. (Ðɛhan 65:3; Luki 11:13) Ee ɖò taji hú bǐ é wɛ nyí ɖɔ é sɛ́ Vǐ tɔn vívɛ́ hugǎn ɔ dó bɔ é nyí Gbɛxɔnumɛtɔ́ mǐtɔn, bonu mǐ na dó sixu gán sín hwɛ kpo kú kpo sí. Wanyiyi enɛ é Jehovah ɖexlɛ́ mǐ é d’agba tawun.​—Xà Jaan 3:16; Hlɔmanu lɛ 5:8.

3. (a) Enyi mǐ na nɔ wanyiyi Mawu tɔn mɛ ɔ, etɛ é ka byɔ ɖò mǐ sí? (b) Nùkanbyɔ taji tɛ mǐ ka ɖó na gbéjé kpɔ́n? Fitɛ xósin tɔn ka ɖè?

³ Jehovah jló ɖɔ mǐ ni ɖu wanyiyi emitɔn sín lè kaka sɔyi. Enyi mǐ na ɖu lè tɔn kpo mǐ na gbɔ kpo ɔ, é kpó ɖò mǐ mɛ ɖokpo ɖokpo sí. Xó Mawu Tɔn byɔ mǐ ɖɔ: ‘Mi hɛn miɖée ɖò wanyiyi Mawu tɔn mɛ, bo ɖò te kpɔ́n gbɛ̀ mavɔmavɔ.’ (Judi 21) Xógbe “mi hɛn miɖée” ɔ xlɛ́ ɖɔ é byɔ nǔwiwa ɖé lɛ ɖò mǐ sí cobɔ mǐ na nɔ wanyiyi Mawu tɔn mɛ. Mǐ ɖó na tuùn wǎn e é yí nú mǐ é n’i ɖò ali tawun tawun ɖé lɛ nu. Enɛ wu ɔ, nùkanbyɔ taji e mǐ ɖó na gbéjé kpɔ́n é wɛ nyí: ‘Nɛ̌ un ka sixu ɖè wǎn e un yí nú Mawu é xlɛ́ gbɔn?’ Xósin ɔ ɖò wema e mɛsɛ́dó Jaan wlan é mɛ, é ɖɔ: “Wǎn yí nú Mawu wɛ nyí ɖɔ è ni nyì sɛ́n tɔn lɛ; sɛ́n tɔn lɛ ka vɛ́ nyì ǎ.” (1 Jaan 5:3) Mǐ ɖó na gbéjé tinmɛ xógbe enɛ lɛ tɔn kpɔ́n ganji, ɖó mǐ jló na xlɛ́ Mawu ɖɔ mǐ yí wǎn n’i tawun.

“WǍN YÍ NÚ MAWU WƐ NYÍ ÐƆ”

4, 5. Tinmɛ lee wǎn e a yí nú Jehovah é jɛ syɛnsyɛn d’eji jí ɖò ayi towe mɛ gbɔn é.

⁴ “Wǎn yí nú Mawu”​—etɛ ɖɔ gbé mɛsɛ́dó Jaan ka ja bo wlan xógbe enɛ lɛ? Cobonu mǐ na mɔ xósin nùkanbyɔ enɛ tɔn ɔ, tɛnkpɔn bo flín hwenu e wǎn e a yí nú Jehovah é jɛ syɛnsyɛn d’eji jí ɖò ayi towe mɛ é.

⁵ Lin tamɛ kpɔ́n kpɛɖé dó hwenu e a bɛ́ nugbǒ Biblu tɔn lɛ kpo linlin Jehovah tɔn lɛ kpo kpinkplɔn bo jɛ nùɖiɖi towe ɖexlɛ́ jí é jí. A wá mɔ nukúnnú jɛ mɛ ɖɔ emi nyí hwɛhutɔ́ bo kún vɛ́ ɖebǔ kpo Mawu kpo ó có, é ka gbɔn Klisu gblamɛ bo hun gbɛ̀ mavɔmavɔ sín ali nú emi, bɔ emi na wá mɔ gbɛ̀ maɖóblɔ̌ e Adamu hɛn bú é. (Matie 20:28; Hlɔmanu lɛ 5:12, 18) Vɔ̌ e Jehovah sá bo sɛ́ Vǐ tɔn vívɛ́ hugǎn ɔ dó bɔ é wá kú nú we é jɛ nukún towe mɛ sù jí. Wanyiyi ɖaxó mɔhun e Mawu ɖexlɛ́ we é byɔ ayi mɛ nú we tawun, bɔ a jɛ wǎn yí n’i jí.​—Xà 1 Jaan 4:9, 10.

6. (a) Nɛ̌ è ka nɔ ɖè wanyiyi jɔ wanyiyi xlɛ́ gbɔn? (b) Etɛ wǎn yí nú Mawu ka sísɛ́ we bɔ a wà?

⁶ Wanyiyi nyí nu mɛ xó kpowun ǎ. È ɖɔ kpowun ɖɔ “Un yí wǎn nú Jehovah” ko xlɛ́ ɖɔ è ɖó wanyiyi jɔ wanyiyi n’i ǎ. Ði nùɖiɖi ɖɔhun ɔ, wanyiyi jɔ wanyiyi nɔ ɖè éɖée xlɛ́ gbɔn nǔwiwa lɛ gblamɛ. (Jaki 2:17) Mǐ nɔ xlɛ́ ɖɔ mǐ yí wǎn nú mɛɖé, gbɔn nǔ e nɔ hun xomɛ n’i lɛ é wiwa gblamɛ. Enɛ wu ɔ, hwenu e wǎn e a yí nú Jehovah é dó ɖɔ dò ɖò ayi towe mɛ é ɔ, enɛ nɔ sísɛ́ we bɔ a nɔ ba na wà nǔ e nɔ hun xomɛ nú Tɔ́ towe jixwé tɔn ɔ é. A ko bló baptɛm bo huzu Kúnnuɖetɔ́ wɛ à? Enyi mɔ̌ wɛ ɔ, wanyiyi ɖaxó enɛ kpo gbejininɔ nú Jehovah kpo ko sísɛ́ we, bɔ a bló nǔ e ɖò taji hugǎn ɖò gbɛzán towe mɛ é. A ko zé hwiɖée jó nú Jehovah bo na wà jlǒ tɔn, bo ko ɖè enɛ ɔ xlɛ́ gbɔn baptɛm biblo gblamɛ. (Xà Hlɔmanu lɛ 14:7, 8.) Akpá enɛ e a dó nú Jehovah kpo ayi ɖokpo kpo é ɖiɖe byɔ ɖɔ a ni wà nǔ e mɛsɛ́dó Jaan ɖɔ bɔ d’ewu é.

“È NI NYÌ SƐ́N TƆN LƐ”

7. Ðɔ sɛ́n Mawu tɔn ɖé lɛ. Nɛ̌ a ka sixu xlɛ́ ɖɔ a ɖò sɛ́n enɛ lɛ nyì wɛ gbɔn?

⁷ Jaan tinmɛ nǔ e wǎn yí nú Mawu nyí é bo ɖɔ: “È ni nyì sɛ́n tɔn lɛ.” Sɛ́n tɛ lɛ Mawu ka na? Jehovah gbɔn Xó tɔn Biblu ɔ gblamɛ bo na sɛ́n tawun tawun gègě mǐ. Ði kpɔ́ndéwú ɔ, é gbɛ́ ahannumu, agalilɛ, vodunsinsɛn, ajojija, kpo adingban ɖiɖó kpo. (1 Kɔlɛntinu lɛ 5:11; 6:18; 10:14; Efɛzinu lɛ 4:28; Kolosinu lɛ 3:9) Sɛ́n Mawu tɔn lɛ nyinyi nɔ byɔ ɖɔ è ni zán gbɛ̀ sɔgbe xá sɛ́n walɔ ɖagbe tɔn e ɖò Biblu mɛ lɛ é.

8, 9. Enyi mǐ na bo tlɛ ɖò ninɔmɛ ɖé lɛ mɛ, bonu sɛ́n Biblu tɔn ɖé ma kɛnu dó nǔ e mǐ na wà é wu tlɔlɔ ǎ ɔ, nɛ̌ mǐ ka sixu tuùn nǔ e na hɛn xomɛ hun Jehovah é gbɔn? Nǎ kpɔ́ndéwú ɖokpo.

⁸ É ɖò mɔ̌ có, enyi nǔ mǐtɔn na nyɔ́ Jehovah nukúnmɛ ɔ, sɛ́n e é dó tlɔlɔ lɛ é kɛɖɛ nyinyi ko kpé ǎ. Jehovah na sɛ́n mǐ dó gbɛzinzan mǐtɔn ayihɔngbe ayihɔngbe tɔn sín akpáxwé lɛ bǐ jí ǎ. Enɛ wu ɔ, mǐ nɔ wá kpannukɔn ninɔmɛ gègě bɔ nǔ e mǐ na wà tawun é ɔ, sɛ́n Biblu tɔn ɖé nɔ kɛnu d’ewu ǎ. Ðò ninɔmɛ mɔhun lɛ mɛ ɔ, nɛ̌ mǐ ka sixu tuùn nǔ e na hɛn xomɛ hun Jehovah é gbɔn? Biblu xlɛ́ lee Mawu nɔ lin nǔ gbɔn lɛ é céɖécéɖé. Hwenu e mǐ ɖò Biblu kplɔ́n wɛ é ɔ, mǐ nɔ mɔ nǔ e Jehovah yí wǎn na lɛ é kpo nǔ e é gbɛ́ wǎn na lɛ é kpo. (Xà Ðɛhan 97:10; Nùnywɛxó 6:16-19) Mǐ nɔ wá tuùn linlin kpo nùwalɔ e nɔ nyɔ́ nukún tɔn mɛ lɛ é kpo. Bǎ e mɛ mǐ kplɔ́n nǔ dó mɛ alɔkpa e Jehovah nyí é kpo nǔwiwa tɔn lɛ kpo wu ɖó é ɔ, bǎ ɖokpo enɛ ɔ mɛ wɛ mǐ na kpéwú bo jó mǐɖée dó bɔ linlin tɔn lɛ na xlɛ́ ali mǐ ɖò gbɛzinzan mǐtɔn mɛ ɖó. Enɛ wu ɔ, enyi mǐ na bo tlɛ ɖò ninɔmɛ ɖé lɛ mɛ, bonu sɛ́n Biblu tɔn ɖě ma ɖɔ nǔ e mǐ na wà tawun é ǎ ɔ, mǐ hɛn ɔ, mǐ na tuùn “nǔ e Aklunɔ jló ɖɔ [mǐ] ni wà é.”​—Efɛzinu lɛ 5:17.

⁹ Ði kpɔ́ndéwú ɖé ɔ, sɛ́n ɖě ɖò Biblu mɛ bo ɖɔ nú mǐ tlɔlɔ ɖɔ mǐ ni ma kpɔ́n video, alǒ tuto TELEVIZIƆN jí tɔn ɖěɖee mɛ è nɔ xlɛ́ adakaxixo alǒ nùblibliwiwa ɖè é ó ǎ. Amɔ̌, mǐ ka ɖó hudo sɛ́n tawun ɖé tɔn cobo na nyì alɔ nú nǔ mɔhun lɛ kpinkpɔn wɛ à? Mǐ tuùn nǔ e Jehovah nɔ lin dó nǔ enɛ lɛ wu é. Xó tɔn ɖɔ nyì wɛn nú mǐ ɖɔ: “[Jehovah] . . . gbɛ́ wǎn nú mɛ e yí wǎn nú alǎnnúwiwa é.” (Ðɛhan 11:5) É lɛ́ ɖɔ: “Mawu na ɖó hwɛ nú mɛ e nɔ ɖò nùblibli wà wɛ lɛ kpodo mɛ e nɔ ɖò aga lɛ̀ wɛ lɛ kpo.” (Eblée lɛ 13:4) Enyi mǐ lin tamɛ kpɔ́n dó xó enɛ lɛ jí ɔ, mǐ hɛn ɔ, mǐ na tuùn nǔ e jlǒ Jehovah tɔn nyí é céɖécéɖé. Enɛ wu ɔ, mǐ na nɔ sɔ́ video, tuto televiziɔn jí tɔn, ɛntɛnɛti, alǒ nǔ mɔhun ɖevo e nɔ xlɛ́ nǔ e Mawu gbɛ́ wǎn na lɛ é dó ɖè ayi ɖ’ayǐ na ǎ. Gbɛ̀ elɔ nɔ ba acɔ́ nú walɔ blíblí lɛ, bo nɔ xlɛ́ ɖɔ é kún nyla bonu è na sɔ́ ye dó ɖè ayi ɖ’ayǐ na ó. Enyi mǐ nyì alɔ nú ayiɖeɖayi enɛ lɛ ɔ, xomɛ nɔ hun Jehovah.a

10. Etɛwu mǐ ka ba na setónú nú Jehovah?

¹⁰ Hwɛjijɔ taji tɛ wu mǐ ka na nyì sɛ́n Mawu tɔn lɛ? Etɛwu mǐ ka jló na zán gbɛ̀ ayihɔngbe ayihɔngbe sɔgbe xá lee Mawu nɔ lin nǔ gbɔn é? Enyi mǐ na hɔn nú tódɔnnúmɛ, alǒ na nyì alɔ nú adǎn e nɔ gbò mɛ e ma nɔ keya nú jlǒ Mawu tɔn ǎ lɛ é kpowun wu wɛ mǐ ba na zán gbɛ̀ gbɔn mɔ̌ ǎ. (Galatinu lɛ 6:7) É nyɔ́ wà ɔ, mǐ nɔ kpɔ́n tónúsíse nú Jehovah dó mɔ alixo ɖagbe ɖé, bɔ mǐ na gbɔn dó xlɛ́ ɛ ɖɔ mǐ yí wǎn n’i. Lee vǐ ɖé nɔ jló ɖesu ɖɔ nǔ emitɔn ni nyɔ́ tɔ́ emitɔn nukúnmɛ mɛ gbɔn é ɔ, mɔ̌ wɛ mǐ lɔ nɔ jló ɖɔ nǔ mǐtɔn ni nyɔ́ Jehovah nukúnmɛ. (Ðɛhan 5:13) É wɛ nyí Tɔ́ mǐtɔn, bɔ mǐ ka yí wǎn n’i. Nǔ e nɔ dó xomɛhunhun nú mǐ hú nǔ bǐ é wɛ nyí ɖɔ Jehovah “nɔ nyɔ́ xomɛ dó” mǐ wu, ɖó gbɛ̀ e zán wɛ mǐ ɖè é wu.​—Nùnywɛxó 12:2.

11. Nɛ̌ mǐ ka nɔ setónú nú Jehovah gbɔn?

¹¹ Mǐ nɔ sɔ́ jlǒ dó setónú hwebǐnu ɖò nǔ lɛ bǐ mɛ.b Mǐ nɔ cyan sɛ́n ɖě ɖò ɖě mɛ ǎ; é nyɔ́ nyì kpo é vɛ́ nyì kpo ɔ, mǐ nɔ nyì. Mǐ nɔ “setónú kpodo ayixa [mǐtɔn] bǐ sésé kpo.” (Hlɔmanu lɛ 6:17) Lee é cí gbɔn nú mɛ e wlan Ðɛhan elɔ é wɛ é nɔ cí nú mǐ lɔ, é ɖɔ: “Nǔ e a zɔ̌n lɛ wiwa nɔ víví nú mì, ɖó un yí wǎn nú nǔ e a zɔ́n lɛ.” (Ðɛhan 119:47) Mǐ ka yí wǎn nú tónúsíse nú Jehovah nugbǒ. Mǐ tuùn ɖɔ é jɛxa ɖɔ mǐ ni setónú n’i bǐ mlɛ́mlɛ́. Nǔ e éɖesu ka byɔ ɖò mǐ sí é nɛ. (Sɛ́nflínmɛ 13:1) Mǐ jló ɖɔ Jehovah ni ɖɔ nǔ e Xó tɔn ɖɔ dó Nɔwée wu é dó mǐ lɔ wu. Biblu ɖɔ dó tɔ́gbó gbejinɔtɔ́ enɛ e xlɛ́ ɖɔ emi yí wǎn nú Mawu nú xwè mɔkpan é wu ɖɔ: “Nǔ e Nɔwée wà ɔ nɛ. É bló lee Mawu ɖɔ n’i gbɔn ɔ pɛ́pɛ́pɛ́.”​—Bǐbɛ̌mɛ 6:22.

12. Hwetɛnu tónúsíse mǐtɔn ka nɔ hun xomɛ nú Jehovah?

¹² Enyi mǐ sɔ́ jlǒ dó setónú nú Jehovah ɔ, nɛ̌ é ka nɔ cí n’i? Xó tɔn ɖɔ ɖɔ ‘xomɛ tɔn nɔ hun.’ (Nùnywɛxó 27:11) Tónúsíse mǐtɔn ka nɔ hun xomɛ nú Aklunɔ Nǔbǐwukpétɔ́ wɛkɛ ɔ tɔn dóó à? Ganji, é nɔ hun xomɛ n’i, ɖó hwɛjijɔ ɖagbe ɖé wu. Jehovah ɖó mǐ bo na mǐ mɛɖesúsínínɔ. Enɛ xlɛ́ ɖɔ mǐ vo bo na wà nǔ e jló mǐ é. Mǐ sixu ɖɔ mǐ na setónú nú Mawu, alǒ, gbɛ́ ɖɔ mǐ kún na setónú n’i ó. (Sɛ́nflínmɛ 30:15, 16, 19, 20) Enyi mǐ sɔ́ jlǒ dó setónú nú Jehovah, bɔ é ka nyí ɖɔ wǎn e mǐ yí n’i kpo ayixa mǐtɔn bǐ kpo é wɛ sísɛ́ mǐ bonu mǐ bló mɔ̌ ɔ, é nɔ hun xomɛ nú Tɔ́ mǐtɔn jixwé tɔn ɔ tawun. (Nùnywɛxó 11:20) Lee mǐ ka na lɛ́ zán gbɛ̀ mǐtɔn gbɔn bɔ é na nyɔ́ hugǎn é nɛ.

“SƐ́N TƆN LƐ KA VƐ́ NYÌ Ǎ”

13, 14. Etɛwu è ka sixu ɖɔ ɖɔ ‘sɛ́n Mawu tɔn lɛ kún vɛ́ nyì ó’? Jlɛ̌ dó nùɖé wu.

¹³ Mɛsɛ́dó Jaan ɖɔ wusyɛn dó lanmɛ nú mɛ xó ɖé nú mǐ dó nǔ e Jehovah nɔ byɔ mɛ lɛ é wu. É ɖɔ: “Sɛ́n tɔn lɛ ka vɛ́ nyì ǎ.” Xókwin Glɛki tɔn e è lilɛ dó “vɛ́ nyì” ɖò 1 Jaan 5:3 mɛ é sín tinmɛ wɛ nyí “kpɛn.”c Lilɛdogbeɖevomɛ Biblu tɔn ɖevo lilɛ akpáxwé enɛ dó lě: “Sɛ́n tɔn lɛ ka nyí agban bo nɔ kpɛn mɛ ǎ.” (Biblu Wiwe lọ—Gun Alada) Nǔ e Jehovah nɔ byɔ mǐ lɛ é nɔ vɛwǔ dín alǒ nɔ nyí agban bo na kpɛn mǐ ǎ. Mǐ nyí hwɛhutɔ́ có, sɛ́n tɔn lɛ ka hugǎn nǔwukpikpé mǐtɔn ǎ.

¹⁴ Mǐ hɛn ɔ, mǐ na sɔ́ jlɛ́ dó nǔ elɔ wu. Xɔ́ntɔn vívɛ́ ɖé ɖɔ nú we ɖɔ hwi ni d’alɔ emi, bonu emi na sɛ̀ tɛn jɛ xwé ɖevo gbè. Agban gègě wɛ é ka ɖó bɔ è na bɛ́. Ðé lɛ ɖ’emɛ bo fúɖá bɔ mɛ ɖokpo sixu zé, amɔ̌, ɖevo lɛ tíìn bo kpɛn bɔ mɛ wè jɛn na zé. Xɔ́ntɔn towe ɖɔ agban e a na bɛ́ lɛ é nú we. Agban e hú agbɔ̌n we lɛ é wɛ é na ɖɔ hwi ni bɛ́ à? Eǒ. É na lɔn bonu hwiɖokpo ni bɛ́ enɛ lɛ ǎ, ɖó a sixu gblewu. Mɔ̌ ɖokpo ɔ, Mawu wanyiyinɔ kpo xomɛnyɔtɔ́ mǐtɔn kpo nɔ byɔ mǐ ɖɔ mǐ ni nyì sɛ́n e hugǎn mǐ lɛ é ǎ. (Sɛ́nflínmɛ 30:11-14) É na jló gbeɖé ɖɔ mǐ ni bɛ́ agban kpinkpɛn mɔhun ǎ. Jehovah tuùn dogbó mǐtɔn lɛ, ɖó “é tuùn nǔ e é dó bló mǐ é; é tuùn ɖɔ kɔgudu kpowun wɛ mǐ nyí; é wɔn ǎ.”​—Ðɛhan 103:14.

15. Etɛwu mǐ ka sixu ɖeji ɖɔ lè mǐtɔn wu wɛ Jehovah na sɛ́n tɔn lɛ mǐ?

¹⁵ Nugbǒ ɔ, sɛ́n Jehovah tɔn lɛ hú agbɔ̌n mɛ ǎ; lè mǐtɔn wu wɛ é dó ye. (Xà Ezayíi 48:17.) Enɛ wu ɔ, Mɔyizi ɖɔ nú Izlayɛli hwexónu tɔn ɖɔ: “Mawu Mavɔmavɔ ɖɔ mǐ ni nyì sɛ́n enɛ lɛ bǐ, bo ɖó sísí nú emi Mawu Mavɔmavɔ, Mawu mǐtɔn; enɛ ɔ, nǔ na nyɔ́ nú mǐ tɛgbɛ, bɔ é na hɛn mǐ ɖó gbɛ̀ lee mǐ ɖè gbɔn égbé dìn é.” (Sɛ́nflínmɛ 6:24) Mǐ lɔ hɛn ɔ, mǐ na ganjɛwu ɖɔ nyɔna mavɔmavɔ mǐtɔn wɛ nɔ ɖu ayi mɛ nú Jehovah wutu wɛ zɔ́n bɔ é na mǐ sɛ́n tɔn lɛ. É ka ɖò gaàn ɖɔ Jehovah kún sixu zɔ́n nǔ e na nyí nyanya nú mǐ é ɖebǔ mǐ ó. Nùnywɛ Jehovah tɔn ɖó dogbó ǎ. (Hlɔmanu lɛ 11:33) Enɛ wu ɔ, é tuùn nǔ e na nyí ɖagbe nú mǐ é. Éɖesunɔ ɔ blebu lɛ́ nyí wanyiyi. (1 Jaan 4:8) Wanyiyi wɛ nɔ xlɛ́ ali nǔ e é nɔ ɖɔ lɛ é kpo nǔ e é nɔ wà lɛ é kpo bǐ. É jí wɛ sɛ́n e é na mɛ e nɔ sɛ̀n ɛ lɛ é bǐ junjɔn.

16. Gbɛ̀ gblègblé elɔ kpo hwɛhuhu gbaza mǐtɔn kpo nɔ jló na sɔ́ mǐ dó ɖɔ nǔ e jló ye é có, etɛ ka sixu d’alɔ mǐ bɔ mǐ na nɔ setónú tɛgbɛ?

¹⁶ Tónúsíse nú Mawu nɔ bɔkun ɖɔ wɛ è ɖè ǎ. Mǐ ɖó na ɖí xwi xá nǔ e gbɛ̀ nyanya elɔ e ɖò “Mɛnyanya ɔ sín acɛ mɛ” é nɔ ba na sɔ́ mǐ dó ɖɔ lɛ é. (1 Jaan 5:19) Mǐ ɖó na lɛ́ ɖí xwi xá hwɛhuhu gbaza mǐtɔn e nɔ sísɛ́ mǐ bɔ mǐ na gbà sɛ́n Mawu tɔn lɛ é. (Hlɔmanu lɛ 7:21-25) Amɔ̌, wǎn yí nú Mawu na zɔ́n bɔ é na kpa mǐ. Jehovah nɔ dó nú mɛ ɖěɖee nɔ ɖè wanyiyi yetɔn xlɛ́ ɛ gbɔn tónúsíse n’i gblamɛ lɛ é. É nɔ na gbigbɔ mímɛ́ tɔn “mɛ e nɔ setónú n’i lɛ é.” (Mɛsɛ́dó 5:32) Gbigbɔ enɛ ɖó sínsɛ́n ɖagbeɖagbe ɖé, bɔ è nɔ mɔ ɖò nǔwiwa mǐtɔn lɛ mɛ, é wɛ nyí jujɔ xɔ akwɛ e sixu d’alɔ mǐ bɔ mǐ na setónú lɛ é.​—Galatinu lɛ 5:22, 23.

17. Etɛ mǐ ka na gbéjé kpɔ́n ɖò wema elɔ mɛ? Hwenu e mǐ na ɖò mɔ̌ wà wɛ é ɔ, etɛ lɛ mǐ ka ɖó na hɛn dó ayi mɛ?

¹⁷ Ðò wema elɔ mɛ ɔ, mǐ na gbéjé nugbodòdó kpo sɛ́n walɔ ɖagbe tɔn Jehovah tɔn lɛ kpo kpɔ́n, gɔ́ nú nǔ e nɔ ɖè jlǒ tɔn xlɛ́ lɛ é gègě ɖevo lɛ. Hwenu e mǐ na ɖò mɔ̌ wà wɛ é ɔ, mǐ ɖó na hɛn nǔ taji ɖé lɛ dó ayi mɛ. Mǐ ni flín ɖɔ Jehovah kún nɔ hɛn mǐ gannugánnú, bonu mǐ na setónú nú sɛ́n tɔn kpo nugbodòdó tɔn lɛ kpo ó; é nɔ ba ɖɔ mǐ ni sɔ́ jlǒ dó setónú nú emi kpo ayi mǐtɔn bǐ kpo. Mǐ ni lɛ́ hɛn dó ayi mɛ ɖɔ Jehovah jló ɖɔ mǐ ni zán gbɛ̀ e na hɛn nyɔna gègě wá nú mǐ dìn, bɔ mǐ na lɛ́ wá mɔ gbɛ̀ mavɔmavɔ ɖò sɔgudo é. Mǐ ni nɔ lɛ́ kpɔ́n tónúsíse nú Jehovah dó mɔ alixo ɖagbe ɖé, bɔ mǐ na gbɔn dó xlɛ́ ɛ ɖɔ mǐ yí wǎn n’i ɖesu.

18. Etɛ jí mǐ ka na ɖɔ xó dó ɖò wemata e bɔ d’ewu é mɛ?

¹⁸ Bo na dó d’alɔ mǐ bonu mǐ na tuùn nǔ ɖagbe ɖò nǔ nyanya mɛ ɔ, Jehovah sɔ́ wanyiyi dó na mǐ ayixa. Amɔ̌, cobonu ayixa mǐtɔn na kpéwú bo xlɛ́ ali mǐ ganji ɔ, mǐ ɖó na kplɔ́n ɛ. Wemata e bɔ d’ewu é na ɖɔ xó dó lee mǐ sixu wà mɔ̌ gbɔn é jí.