Etɛ ka Nyí Nùkplɔnmɛ Nugbǒ ɔ Dó Mawu Wu?

1, 2. Etɛwu é ka nyɔ́ ɖɔ è ni nɔ kàn nǔ byɔ?

A KA ko ɖó ayi lee vǐ lɛ nɔ kàn nǔ byɔ gbɔn ɔ wu kpɔ́n à? Vǐ gègě nɔ jɛ nǔ kàn byɔ jí tlolo e ye jɛ xó nyɔ́ ɖɔ jí é. Ye nɔ kpɔ́n we kpo nukún nǔdobatɔ́ tɔn kpo bo nɔ kàn nùɖé lɛ byɔ ɖi: Fitɛ jinukúnsin ka yì fó ɖó? Fitɛ sunví lɛ ka nɔ yì ɖò kéze? Mɛ ka kplɔ́n han xɛ lɛ? A sixu tɛnkpɔn bo na xósin ɖé, loɔ, é ka nɔ fá hwebǐnu ǎ. Xósin towe e nyɔ́ hugǎn ɔ sixu lɛ́ ɖè nùkanbyɔ ɖevo tɔ́n ɖi: Etɛwu?

² Enyi vǐ lɛ kɛɖɛ wɛ nɔ kàn nǔ byɔ ǎ. Mǐ ɖò susu wɛ ɔ, mǐ nɔ kpó ɖò nǔ kanbyɔ wɛ. Mǐ nɔ wà mɔ̌ bo na dó tuùn lee mǐ na wà nǔ gbɔn é, awòvínú e mǐ na hɔn na lɛ é, alǒ bo na dó mɔ dò nú nǔ. Amɔ̌ é cí ɖɔ mɛ gègě sɔ́ nɔ kàn nǔ taji lɛ byɔ ǎ. Kabǐ ye sɔ́ nɔ ba xósin lɛ ǎ.

3. Etɛwu mɛ gègě ma ka sɔ́ nɔ ba xósin nùkanbyɔ taji lɛ tɔn à?

³ Lin tamɛ dó nùkanbyɔ e ɖò wema elɔ sín akpà jí é wu, ee è kàn byɔ ɖò wexwɛ atɔngɔ kpo ayizɛngɔ kpo jí lɛ é, alǒ ɖěɖee ɖò bǐbɛ̌mɛ wemata elɔ tɔn lɛ é wu. Nùkanbyɔ taji ɖé lɛ e a sixu kanbyɔ hwiɖee é nɛ. É ɖò mɔ̌ có, mɛ nabi ɖé sɔ́ nɔ tɛnkpɔn bo ba xósin nùkanbyɔ enɛ lɛ tɔn ǎ. Etɛwu? Biblu ka na xósin nùkanbyɔ enɛ lɛ tɔn à? Mɛɖé lɛ lin ɖɔ xósin Biblu tɔn lɛ kún bɔkun bonu è na mɔ nukúnnú jɛ mɛ ó. Mɛ ɖevo lɛ nɔ mɔ ɖɔ nǔ kinkanbyɔ ɔ winnyanú wɛ. Mɛ ɖevo lɛ nɔ lɛ́ lin ɖɔ sinsɛngán lɛ jɛn sixu na xósin nùkanbyɔ mɔhun lɛ tɔn. Etɛ a ka lin d’ewu?

4, 5. Nǔ taji tɛ lɛ mǐ ka sixu kàn byɔ ɖò gbɛ̀ ɔ mɛ? Etɛwu mǐ ka ɖó na ba xósin yetɔn lɛ?

⁴ Etɛwu mǐ ka ɖò gbɛ̀ ɔ mɛ? È jì mǐ, bɔ mǐ na sù bo na kú wu wɛ à? Mɛ alɔkpa tɛ Mawu ka nyí tawun? Bɔya a na ko kàn nǔ taji enɛ lɛ byɔ hwiɖee kpɔ́n, bo na jló na mɔ xósin yetɔn lɛ. É nyɔ́ ɖɔ è ni nɔ kàn nǔ mɔhun lɛ byɔ, bo lɛ́ nyí nǔ taji ɖɔ è ni ɖò gǎn dó wɛ kaka jɛ hwenu e è na mɔ xósin é sɔgbe, bɔ nǔ bǐ vɔ ɖ’ewu ɔ dó é. Jezu Klisu e nyí nùkplɔnmɛtɔ́ nukúnɖeji ɔ ɖɔ jí mǐ ni nɔ ɖò nǔ byɔ wɛ, è na na mǐ; mǐ ni nɔ ɖò biba wɛ, mǐ na mɔ; mǐ ni nɔ ɖò hɔn xúxú wɛ, è na hun nú mǐ.—Matie 7:7.

⁵ Enyi a kpò ɖò xósin nùkanbyɔ taji lɛ tɔn ba wɛ ɔ, a na mɔ ɖɔ dobanunǔ towe na hɛn lè gègě wá nú we. (Proverbes 2:1-5) Mɛ ɖevo lɛ na bo tlɛ ɖɔ xó ɖebǔ nú we dó nùkanbyɔ enɛ lɛ wu ɔ, xósin lɛ ɖè, bɔ a sixu mɔ ye ɖò Biblu mɛ. Nukúnnú mimɔ jɛ xósin lɛ mɛ tlɛ vɛwǔ ǎ. É nyɔ́ wà ɔ, ye nɔ zɔ́n bɔ è nɔ ɖó nukúnɖiɖo kpo awǎjijɛ kpo, bo nɔ lɛ́ d’alɔ mɛ, bɔ è nɔ zán gbɛ̀ ɖagbe e nyɔ́ hugǎn é dìn. Jɛ nukɔn hwɛ ɔ, mi nú mǐ ni ɖɔ xó dó nùkanbyɔ e nɔ gbà ayi dó nú mɛ gègě é ɖokpo jí.

MAWU KA NƆ KPÉ NUKÚN DÓ MǏ WU BO NƆ KÚ NǓBLAWU NÚ MǏ DÓÓ À?

6. Aniwu mɛ gègě ka nɔ lin ɖɔ Mawu kún nɔ kpé nukún dó mǐ wu ó?

⁶ Mɛɖé lɛ nɔ ɖó ayixa wè d’ewu. Ye nɔ ɖɔ: ‘Enyi Mawu nɔ kpé nukún dó mǐ wu ɔ, gbɛ̀ ɔ na vɛwǔ sɔ lě ǎ.’ Ahwan, wangbɛnumɛ kpo ya kpo wɛ kpé fí bǐ. Mǐ bǐ wɛ nɔ j’azɔn, nɔ mɔ wuvɛ̌, bɔ mɛ e mǐ yí wǎn na lɛ é nɔ kú dó mǐ. Enɛ wu ɔ, mɛ gègě nɔ ɖɔ: ‘Enyi Mawu nɔ kpé nukún mǐ wu ɔ, é na lɔn bonu nǔ enɛ lɛ na jɛ ǎ.’

7. (a) Nɛ̌ sinsɛngán lɛ ɖesu ka nɔ zɔ́n gbɔn, bɔ mɛ lɛ nɔ lin ɖɔ Mawu kún nɔ kú nǔblawu nú mɛ ó? (b) Etɛ Biblu ka kplɔ́n mɛ tawun dó tɛnkpɔn e mɛ mǐ nɔ jɛ lɛ é wu?

⁷ Ee nyla bǐ é wɛ nyí ɖɔ, sinsɛngán lɛ ɖesu nɔ zɔ́n hweɖelɛnu, bɔ mɛ lɛ nɔ lin ɖɔ Mawu kún nɔ kú nǔblawu nú mɛ ó. Gbɔn nɛ̌ é? Hwenu e awě xò mɛɖé é ɔ, ye nɔ ɖɔ jlǒ Mawu tɔn wɛ. Xó e ɖɔ wɛ sinsɛngán enɛ lɛ ɖé tawun é wɛ nyí ɖɔ Mawu wɛ nɔ zɔ́n bɔ nǔ nyanya lɛ nɔ jɛ. Mawu ka jɔ mɔ̌ nugbǒ à? Etɛ Biblu ka kplɔ́n mɛ tawun? Jaki 1:13 ɖɔ: “Hwenu e mɛɖé na jɛ tɛnkpɔn mɛ ɔ, ni ma ɖɔ Mawu wɛ ɖò emi tɛnkpɔn wɛ ó. Ðó nǔ nyanya sixu tɛ́n Mawu kpɔ́n ǎ; Mawu ɖesu ka nɔ tɛ́n mɛɖebǔ kpɔ́n ǎ.” Enɛ wu ɔ, nǔ nyanya e gɔ́ gbɛ̀ ɔ lɛ é gosin Mawu gɔ́n gbeɖé ǎ. (Job 34:10-12) Nugbǒ wɛ ɖɔ Mawu nɔ tin bɔ nǔ nyanya lɛ nɔ jɛ. Amɔ̌, è tin bɔ nùɖé jɛ gbɔn vo tawun nú è zɔ́n bɔ nǔ ɔ jɛ.

8, 9. (a) Nǎ kpɔ́ndéwú ɖé bo xlɛ́ ɖɔ è tin bɔ nùɖé jɛ gbɔn vo tawun nú è zɔ́n bɔ nǔ ɔ jɛ. (b) Enyi mǐ nɔ dó hwɛ Mawu ɖɔ é wɛ zɔ́n, bɔ gbɛtɔ́ lɛ wlí ali nyanya ɔ, nɛ̌ ka gbɔn bɔ é na nyla ɖesu?

⁸ Lin tamɛ kpɔ́n dó tɔ́ nùnywɛtɔ́ e nyí wanyiyinɔ é kpo vǐ tɔn e ko sù éɖesunɔ sí jɛ cobo ka kpó ɖò mɛjitɔ́ tɔn lɛ kpá é jí. Gbè ɖokpo ɔ, vǐ enɛ ɔ fɔ́n gǔ bo na tɔ́n sín xwégbe, bɔ tɔ́ ɔ ka sɔ́ dɔn nǔ xá ɛ ǎ. Vǐ ɔ jɛ gbɛ̀ gblègblé zán jí bo dɔn nǔgbomɛ gègě dó kɔ. Tɔ́ ɔ wɛ zɔ́n nǔgbomɛ enɛ lɛ à? Eǒ. (Luka 15:11-13) Mɔ̌ ɖokpo ɔ, Mawu sú ali dó gbɛtɔ́ lɛ hwenu e ye jló bo wlí ali nyanya é ǎ, amɔ̌, é wɛ zɔ́n nǔgbomɛ e wá jɛ gudo lɛ é ǎ. Enɛ wu ɔ, enyi mǐ nɔ dó hwɛ Mawu ɖɔ é wɛ nɔ zɔ́n bɔ adǎn nɔ gbò gbɛtɔ́ lɛ ɔ, é na nyla ɖesu.

⁹ Mawu ɖó hwɛjijɔ e wu é tin bɔ gbɛtɔ́ lɛ wlí ali nyanya é. Ðó é wɛ ɖó mǐ bo lɛ́ nyí nùnywɛtɔ́ wu ɔ, dandan wɛ ɖɔ é ni ɖɔ hwɛjijɔ enɛ lɛ nú mǐ ǎ. Amɔ̌, é ɖɔ ye nú mǐ, ɖó é yí wǎn nú mǐ wutu. A na kplɔ́n nǔ gègě dó hwɛjijɔ enɛ lɛ wu ɖò Wemata 11gɔ́ ɔ mɛ. Amɔ̌ dìn ɔ, kudeji ɖɔ nǔgbomɛ mǐtɔn lɛ kún nɔ gosin Mawu gɔ́n ó. É nyɔ́ wá ɔ, Mawu kɛɖɛ wɛ mǐ na ɖó nukún ɖɔ é na ɖè nǔgbomɛ mǐtɔn lɛ síìn.—Isaïe 33:2.

10. Etɛwu mǐ ka sixu ɖeji ɖɔ Mawu na jla nǔ e adakaxotɔ́ lɛ hɛn gblé lɛ é ɖó?

¹⁰ Hú mɔ̌ ɔ, Mawu nyí mɛ mímɛ́. (Isaïe 6:3) É xlɛ́ ɖɔ, Mawu mɛ́ bɔ nǔ bǐ vɔ ɖ’ewu. Blɔ̌ ɖebǔ ɖò nǔwiwa tɔn lɛ wu ǎ. Enɛ wu ɔ, mǐ sixu ɖeji dó wutu tɔn bǐ mlɛ́mlɛ́. Mǐ sixu ɖó jiɖe mɔhunkɔ dó gbɛtɔ́ lɛ wu ǎ, ɖó ye nɔ wá ɖu ahizi. Acɛkpatɔ́ e nyí gbejinɔtɔ́ hugǎn é nɔ kpé nǔ wu hwebǐnu bo nɔ jla nǔ e adakaxotɔ́ lɛ hɛn gblé lɛ é ɖó ǎ. Amɔ̌, Mawu nyí nǔbǐwukpétɔ́. É kpéwú bo lɛ́ jló na jla nǔ e adakaxotɔ́ lɛ hɛn gblé dó gbɛtɔ́ wu lɛ é ɖó. Enyi Mawu tɔ́ d’ewu ɔ, é na bló bɔ nǔnyanyawiwa ɖebǔ sɔ́ na tíìn ǎ.—Psaume 37:9-11.

ETƐ MAWU KA NƆ LIN DÓ HWƐAGƆÐIÐƆ E SÍN YA MǏ NƆ JÍ LƐ É WU?

11. (a) Etɛ Mawu ka nɔ lin dó hwɛagɔɖiɖɔ wu? (b) Etɛ Mawu ka nɔ lin dó wuvɛ̌ e a nɔ mɔ lɛ é wu?

¹¹ Etɛ Mawu ka nɔ lin dó nǔ e ɖò jijɛ wɛ ɖò gbɛ̀ ɔ mɛ lɛ é kpo e nɔ jɛ dó hwiɖesu jí lɛ é kpo wu? Biblu kplɔ́n mɛ ɖɔ Mawu “yí wǎn nú hwɛjijɔ.” (Psaume 37:28) Enɛ wu ɔ, nǔ ɖagbe kpo nǔ nyanya kpo nɔ ɖu ayi mɛ n’i tawun. É gbɛ́ wǎn nú hwɛagɔɖiɖɔ alɔkpa lɛ bǐ. Biblu ɖɔ ɖɔ hwenu e nǔnyanyawiwa gɔ́ gbɛ̀ ɔ ɖò hwexónu é ɔ, “é dó aɖì xomɛ” nú Mawu tawun. (Genèse 6:5, 6) Mawu ko huzu ǎ. (Malaki 3:6) Wuvɛ̌ mimɔ e vunbla gbɛ̀ ɔ é kpó ɖò vivɛ̌ n’i wɛ. Enyi é mɔ gbɛtɔ́ lɛ ɖò ya jì wɛ ɔ, é nɔ kú wu n’i. “É ɖò nukún kpé dó mi wu wɛ,” wɛ Biblu ɖɔ.—1 Piyɛɛ 5:7.

12, 13. (a) Etɛwu mǐ ka ɖó jijɔ ɖagbe lɛ ɖi wanyiyi? Nɛ̌ wanyiyi ka nɔ zɔ́n, bɔ mǐ nɔ kpɔ́n nǔ e ɖò jijɛ wɛ ɖò gbɛ̀ ɔ mɛ lɛ é gbɔn? (b) Etɛwu a ka na ɖeji ɖɔ Mawu na ɖè tagba gbɛ̀ ɔ tɔn lɛ bǐ síìn?

¹² Etɛ ka sixu lɛ́ na mǐ ganjɛwu ɖɔ enyi mǐ ɖò ya jì wɛ ɔ, é nɔ vɛ́ nú Mawu? Biblu kplɔ́n mɛ ɖɔ Mawu bló gbɛtɔ́ ɖó akpajlɛ éɖesu tɔn mɛ. (Genèse 1:26) Enɛ wu ɔ, mǐ ɖó jujɔ ɖagbe ɖó Mawu ɖó jujɔ ɖagbe. Kpɔ́ndéwú ɖokpo ɖíe: Enyi a mɔ xomɛvɔnɔ ɖé ɖò ya jì wɛ ɔ, é nɔ vɛ́ nú we à cé? Enyi mɔ̌ hǔn, bo tuùn ɖɔ Mawu tɔn zun kwínkwín má kwín.

¹³ Nǔ ɖagbe e gbɛtɔ́ ɖó bɔ é nyɔ́ hú nǔ bǐ é ɖokpo wɛ nyí wanyiyi. Jijɔ Mawu tɔn wɛ enɛ nyí, ɖó Biblu kplɔ́n mɛ ɖɔ “Mawu ɔ wanyiyi wɛ é nyí.” (1 Jaan 4:8) Mǐ nɔ yí wǎn nú mɛ ɖó Mawu nɔ yí wǎn nú mɛ wutu. Wanyiyi é a ɖó é ka na zɔ́n, bɔ a na ɖè yajiji kpo hwɛagɔɖiɖɔ e vunbla gbɛ̀ ɔ é kpo síìn à? Enyi a ɖó agbɔ̌n tɔn ɔ, a na bló mɔ̌. Bo ɖeji ɖɔ Mawu na ɖè yajiji kpo hwɛagɔɖiɖɔ kpo síìn. Akpá e xó è ɖɔ ɖò wexwɛ ɛnɛgɔ kpo atɔ́ɔ́ngɔ wema elɔ tɔn kpo jí lɛ é nyí dlɔ̌ abǐ nukúnɖiɖo yayǎ ɖé ǎ. Akpá Mawu tɔn lɛ na cɛ dandan. Bo na dó ɖó nùɖiɖi ɖò akpá mɔhun lɛ mɛ ɔ, é ɖò dandan ɖɔ a ni tuùn Mawu e dó ye é ganji.

MAWU JLÓ ÐƆ A NI TUÙN MƐ ALƆKPA E É NYÍ É

14. Nɛ̌ Mawu ka nɔ nyí? Etɛwu mǐ ka ɖó na zán nyikɔ enɛ?

¹⁴ Enyi a jló ɖɔ mɛɖé ni tuùn we ɔ, a na ɖɔ nyikɔ towe n’i à cé? Mawu ka ɖó nyikɔ ɖé à? Sinsɛn gègě nɔ ɖɔ ɖɔ nyikɔ tɔn nɔ nyí “Mawu” alǒ “Aklunɔ,” amɔ̌, nyikɔ tɔn ɖesu ɔ ka nɛ ǎ. Tɛnmɛ-nyikɔ kpowun wɛ nyí enɛ lɛ, lee “axɔsu” kpo “togán” kpo nyí tɛnmɛ-nyikɔ é ɖɔhun. Biblu kplɔ́n mɛ ɖɔ Mawu ɖó tɛnmɛ-nyikɔ gègě. “Mawu” alǒ “Aklunɔ” nyí ɖé lɛ ɖ’emɛ. É ɖò mɔ̌ có, Biblu lɛ́ kplɔ́n mɛ ɖɔ Mawu ɖó nyikɔ éɖesunɔ tɔn, é wɛ nyí Jehovah. Psaume 83:18 ɖɔ: “Hwɛ, mɛ e sín nyikɔ nɔ nyí Jehovah é, hwi ɖokponɔ wɛ nyí Ajalɔnnɔ ɖò ayikúngban ɔ bǐ jí.” Enyi nyikɔ enɛ ɔ ma ɖò lilɛdogbeɖevomɛ Biblu tɔn towe mɛ ǎ hǔn, yì kpɔ́n Xota Ðevo ɔ “Nyikɔ Mawu Tɔn: Yiylɔ Tɔn kpo Tinmɛ Tɔn Kpo”, bo na dó tuùn nǔ e zɔ́n é. Ðeji ɖɔ Biblu-wlantɔ́ lɛ zán nyikɔ Mawu tɔn azɔn afatɔ́ɔ́n gègě ɖò wema dòdó e ye wlan lɛ é mɛ. Enɛ wu ɔ, Jehovah jló ɖɔ a ni tuùn nyikɔ emitɔn, bo nɔ zán ɛ. Mǐ sixu ɖɔ ɖɔ é nɔ gbɔn Biblu jí dó ɖè éɖee xlɛ́ we.

15. Etɛ ka nyí tinmɛ nyikɔ Jehovah ɔ tɔn?

¹⁵ Nyikɔ e Mawu sùn éɖee é ɖó tinmɛ tawun. Nyikɔ Jehovah ɔ sín tinmɛ wɛ nyí ɖɔ Mawu kpé nǔ wu bo na ɖè akpá ɖebǔ e é dó é, bo na bló nǔ e é lin lɛ é bǐ.a Mawu sín nyikɔ ɔ gbɔn vo tawun, nyikɔ enɛ kpé wè ǎ. É ɖokpo wɛ jɛ nyǐ enɛ ɔ. Ðò ali gègě nú ɔ, Jehovah gbɔn vo. Gbɔn nɛ̌ é?

16, 17. Etɛ tɛnmɛ-nyikɔ elɔ lɛ ka kplɔ́n mǐ dó Jehovah wu: (a) “Nǔbǐwukpétɔ́”? (b) “Axɔsu mavɔmavɔ”? (c) “Gbɛɖotɔ́”?

¹⁶ Psaume 83:18 ɖɔ dó Jehovah wu ɖɔ: “Hwi ɖokponɔ wɛ nyí Ajalɔnnɔ.” Mɔ̌ ɖokpo ɔ, Jehovah ɖokpo géé wɛ Biblu ylɔ ɖɔ “Nǔbǐwukpétɔ́.” Nǔɖexlɛ́mɛ 15:3 ɖɔ: “Aklunɔ Mawu nǔbǐwukpétɔ́, azɔ̌ towe lɛ d’agba bo nyɔ́ kpɔ́n. Axɔsu [mavɔmavɔ, NW], tito towe lɛ jlɔ́ bo nyí nugbǒ.” Tɛnmɛ-nyikɔ “Nǔbǐwukpétɔ́” ɔ kplɔ́n mǐ ɖɔ Jehovah wɛ ɖó hlɔnhlɔn hugǎn nǔ bǐ. Hlɔnhlɔn tɔn kpé wè ǎ; é wɛ ɖó acɛ lɛ bǐ. Tɛnmɛ-nyikɔ “axɔsu mavɔmavɔ” ɔ flín mǐ ɖɔ Jehovah lɛ́ gbɔn vo ɖò ali ɖevo nu. É ɖokpo géé wɛ ma ɖó bìbɛ̌ ǎ. Psaume 90:2 ɖɔ: “Sín hwenu mavɔmavɔ kaka jɛ mavɔmavɔ ɔ, hwi wɛ nyí Mawu.” Xógbe enɛ lɛ xlɛ́ ɖɔ mǐ ɖó na ɖó sísí ɖaxó nú Mawu à cé?

¹⁷ Jehovah lɛ́ gbɔn vo ɖó é ɖokponɔ wɛ nyí Gbɛɖotɔ́ ɔ. Mǐ xà ɖò Nǔɖexlɛ́mɛ 4:11 mɛ ɖɔ: “Aklunɔ mǐtɔn, Mawu mǐtɔn, susu, yɛ̌yi kpo hlɔnhlɔn kpo jɛxa we, ɖó a blǒ nǔ bǐ; hwi wɛ jló bɔ ye tíìn; hwi wɛ jló bɔ ye ɖò gbɛ̀.” Nǔ ɖebǔ e wu a sixu lin tamɛ dó lɛ é tíìn ɖó Jehovah wɛ ɖó ye; ɖé lɛ wɛ nyí nùɖíɖó gbigbɔ mɛ tɔn e nukún ma nɔ mɔ ǎ lɛ é, sunví e nɔ tɔ́n zǎnmɛ lɛ é, atín sínsɛ́n lɛ, hweví e nɔ nɔ tɔxwé lɛ é.

A KA SIXU SƐKPƆ JEHOVAH À?

18. Aniwu mɛɖé lɛ ka nɔ lin ɖɔ emi kún sixu sɛkpɔ Mawu gbeɖé ó? Amɔ̌, etɛ Biblu ka kplɔ́n mɛ?

¹⁸ Nǔ e mɛɖé lɛ kplɔ́n dó jijɔ Jehovah tɔn lɛ wu é nɔ dó xɛsi ye. Ye nɔ mɔ ɖɔ Mawu hugǎn emi dín, bɔ emi kún sixu sɛkpɔ ɛ alǒ nyí nùɖé ɖò nukún tɔn mɛ gbeɖé ó. Linlin enɛ ɔ ka sɔgbe à? Nǔ vo sésé wɛ Biblu kplɔ́n mɛ. É ɖɔ dó Jehovah wu ɖɔ: “Có Mawu ka sɔ́ lín dó ɖokpo ɖokpo mǐtɔn ǎ.” (Mɛsɛ́dó 17:27) Biblu tlɛ dó wusyɛn lanmɛ nú mǐ ɖɔ: “Mi sɛkpɔ Mawu; enɛ ɔ é na sɛkpɔ mi.”—Jaki 4:8.

19. (a) Nɛ̌ mǐ ka sixu jɛ Mawu sɛkpɔ jí gbɔn? Lè tɛ ka ɖ’emɛ nú mǐ? (b) Jijɔ Mawu tɔn tɛ lɛ ka dɔn we?

¹⁹ Nɛ̌ a ka sixu sɛkpɔ Mawu gbɔn? Jɛ nukɔn hwɛ ɔ, yì nukɔn ɖò nǔ e kplɔ́n wɛ a ɖè dó Mawu wu é mɛ. Jezu ɖɔ: “Gbɛ̀ mavɔmavɔ ɔ wɛ nyí ɖɔ ye ni tuùn we, bo tuùn ɖɔ hwi wɛ nyí Mawu nugbǒ ɖokpo e tíìn é, bo lɛ́ tuùn Jezu Klisu e a sɛ́dó gbɛ̀ ɔ mɛ é.” (Jaan 17:3) Biblu kplɔ́n mɛ ɖɔ nùkplɔnkplɔn dó Jehovah kpo Jezu kpo wu na zɔ́n bɔ mǐ na mɔ “gbɛ̀ mavɔmavɔ.” Lee mǐ ko kplɔ́n gbɔn é ɔ, “Mawu ɔ wanyiyi wɛ é nyí.” (1 Jaan 4:16) Jehovah lɛ́ ɖó jijɔ e dɔn mɛ é gègě ɖevo lɛ. Kpɔ́ndéwú ɖé ɖíe, Biblu ɖɔ ɖɔ Jehovah nyí “Mawu nùblawukúnúmɛtɔ́ kpo wuvɛ̌sexámɛtɔ́ ɖé kpo, nɔ yawu sìn xomɛ ǎ, bɔ xomɛnyínyɔ́ tɔn kpo gbejininɔ tɔn kpo túnflá.” (Exode 34:6) É nyí “mɛ ɖagbe bo ɖò gbesisɔmɛ bo na sɔ́ hwɛ kɛ mɛ.” (Psaume 86:5; Eble lɛ 8:12) Mawu nɔ ɖó suúlu. (2 Piyɛɛ 3:9) Mawu ɖò gbeji. (1 Kolɛntinu lɛ 1:9) Enyi a ɖò Biblu xà wɛ yì nukɔn ɔ, a na mɔ lee Jehovah ɖè jijɔ enɛ lɛ kpo ɖevo e dɔn mɛ lɛ é kpo xlɛ́ gbɔn é.

20-22. (a) Eɖíe mǐ ma nɔ mɔ Mawu ǎ è, mǐ ka sixu sɛkpɔ ɛ à? Bo tinmɛ. (b) Etɛ mɛmɔmɛgbɔ towe ɖé lɛ ka sixu ɖɔ nú we ɖɔ a ni wà? Amɔ̌, etɛ a ka ɖó na wà?

²⁰ A sixu mɔ Mawu ǎ, ɖó gbigbɔ e nukún ma nɔ mɔ ǎ é wɛ n’i. (Jaan 1:18; 4:24; 1 Timɔtée 1:17) É ɖò mɔ̌ có, enyi a ɖò nǔ kplɔ́n dó wutu tɔn wɛ ɖò Biblu mɛ ɔ, a na wá tuùn ɖɔ mɛɖé wɛ é nyí bɔ è hɛn ɔ, è na zun xɔ́ntɔn xá ɛ. Lee mɛ e wlan Psaume é ɖɔ gbɔn é ɔ, a sixu “nɔ kpɔ́n ɖɛkpɛ̀ Jehovah tɔn.” (Psaume 27:4; Hlɔmanu lɛ 1:20) Lee a kplɔ́n nǔ dó Jehovah wu sɔ́ é ɔ, mɔ jɛn a na tuùn i sɔ é nɛ, bɔ hwɛjijɔ e wu a na yí wǎn n’i bo lɛ́ sɛkpɔ ɛ é na sukpɔ́.

²¹ Kpɛɖé kpɛɖé ɔ, a na mɔ nukúnnú jɛ nǔ e wu Biblu kplɔ́n mǐ ɖɔ Jehovah wɛ nyí Tɔ́ mǐtɔn é mɛ. (Matie 6:9) É ɖó mǐ bo ka lɛ́ jló ɖɔ mǐ ni ɖu vivǐ gbɛ̀ ɖagbe e nyɔ́ hugǎn é tɔn lee tɔ́ wanyiyinɔ ɖé nɔ jló nú vǐ tɔn lɛ é ɖɔhun. (Psaume 36:9) Biblu lɛ́ kplɔ́n mɛ ɖɔ gbɛtɔ́ lɛ sixu zun xɔ́ntɔn xá Jehovah. (Jaki 2:23) Fɛ́nú tɛ ɖíe, a na zun xɔ́ntɔn xá Gbɛɖotɔ́ ɔ!

²² Ee a na ɖò nukɔn yì wɛ ɖò Biblu kplɔnkplɔn towe mɛ é ɔ, mɛmɔmɛgbɔ towe ɖé lɛ sixu ɖɔ nú we ɖɔ a ni ɖó te. Ye sixu lin ɖɔ a na wá jó sinsɛn towe dó. Amɔ̌, ma lɔn nú mɛɖebǔ sú ali dó we bonu a na gɔn xɔ́ntɔn e nyɔ́ hugǎn é zun ó.

23, 24. (a) Aniwu a ka ɖó na kpó ɖò nùkanbyɔ dó nǔ e kplɔ́n wɛ a ɖè ɔ wu wɛ? (b) Etɛ jí wemata e bɔ d’ewu é ka na ɖɔ xó dó?

²³ Nùɖé lɛ na tíìn bɔ a na mɔ nukúnnú jɛ ye mɛ ɖò bǐbɛ̌mɛ ǎ. É na byɔ ɖɔ a ni sɔ́ hwiɖee hwe bo kàn nǔ byɔ, amɔ̌, ma lɔn bonu winnya dó awakanmɛ kú nú we ó. É nyɔ́ ɖɔ è ni nɔ sɔ́ mɛɖee hwe vǐ kpɛví ɖɔhun wɛ Jezu ɖɔ. (Matie 18:2-4) Mǐ tuùn ɖɔ, vǐ kpɛví lɛ nɔ kàn nǔ gègě byɔ. Mawu jló ɖɔ a ni mɔ xósin nùkanbyɔ towe lɛ tɔn. Biblu kpa mɛ e nùkplɔnkplɔn dó Mawu wu ko sɔ́ akpàkpà lɛ é. Ye nɔ xwè sɔ dó kije Mawuxó ɔ, bo nɔ kpɔ́n ɖɔ nǔ e kplɔ́n wɛ ye ɖè lɛ é ka sɔgbe à jí.—Mɛsɛ́dó 17:11.

²⁴ Ali ɖagbe e nyɔ́ hugǎn, bɔ a na kplɔ́n nǔ dó Jehovah wu é wɛ nyí ɖɔ a ni nɔ kije Biblu ɔ. É gbɔn vo nú wema ɖevo lɛ bǐ. Ðò ali tɛ nu? Wemata e bɔ d’ewu é na tinmɛ.