Alɔdlɛndonǔ Kplé Gbɛzán kpo Sinsɛnzɔ́ kpo Tɔn Sín Azɔ̌wema Tɔn Lɛ
4-10 SEPTEMBRE
DƆKUN MAWUXÓ Ɔ TƆN ÐÉ LƐ | EZEKIYƐLI 42-45
“È Vɔ́ Sinsɛn-Biblo Mimɛ̌ ɔ Ð’ayi!”
it-2-F 1052 akpá. 8
Tɛmpli
Tɛmpli e Ezekiyɛli mɔ ɖò nǔmimɔ mɛ é. Ðò 593 J.H.M. tɔn, hwenu e è sú kún dó nú Jeluzalɛmu kpo tɛmpli Salomɔ́ɔ tɔn kpo b’ɛ ɖó xwè 14 gudo é ɔ, Ezekiyɛli, ee nyí vɔsanúxwlémawutɔ́ bo lɛ́ nyí gbeyiɖɔ ɖé é, mɔ tɛmpli Jehovah tɔn aditi ɖé ɖò nǔmimɔ ɖé mɛ ɖò só ɖaxó ɖé jí. (Eze 40:1, 2) Bo na dó sixu dó winnya Jwifu e yì kannumɔgbenu lɛ é, bo sísɛ́ ye bonu ye na lɛkɔ sín hwɛ yetɔn lɛ gudo, lobo dó wusyɛn lanmɛ nú mɛ e ɖò gbeji lɛ é ɔ, è byɔ Ezekiyɛli ɖɔ é ni wlí nǔ e é mɔ lɛ é bǐ ɖɔ nú “Izlayɛli-ví lɛ.” (Eze 40:4; 43:10, 11) Nǔmimɔ ɔ tɛɖɛ̌ jlɛ̌ e nǔ ɖokpo ɖokpo ɖó é jí tɛnwin lɛnwin. Ðò nùwlanwlan dòdó lɛ mɛ ɔ, nùjlɛnú e è zán lɛ é wɛ nyí “fánkpo” (fánkpo gaga ɔ, mɛtlu 3,11) kpo “awagba” (awagba gaga ɔ, santimɛtlu 51,8) kpo. (Eze 40:5, nwt, tinmɛ e ɖò dò é) Ga, gblo, kpo jǐyiyi kpo nǔ ɖokpo ɖokpo tɔn e è gbajɛ̌mɛ na mɔ̌ é zɔ́n bɔ mɛɖé lɛ ɖɔ ɖɔ tɛmpli enɛ e Ezekiyɛli mɔ ɖò nǔmimɔ mɛ é ɖó na nyí kpɔ́ndéwú ɖé nú tɛmpli e Zolobabɛli wá gbá ɖò nukɔnmɛ ɖò kannumɔgbenu ninɔ gudo sín táan mɛ é. É ɖò mɔ̌ có, kúnnuɖenú tawun ɖě ɖè bo dó zǒgbe linlin enɛ jí ǎ.
Nǔ Xɔ Akwɛ Biblu Tɔn lɛ Biba
it-2-F 412 akpá. 8
Nyikɔ
Gbeji e Izlayɛli ma nɔ nú gbeɖiɖe jlɔjlɔ Mawu tɔn lɛ ǎ é zɔ́n b’ɛ kɔn cí dó nyikɔ Mawu tɔn wu alǒ hɛn kwiji, ɖó togun enɛ wɛ ɖó nyikɔ Mawu tɔn ɖò ta. (Eze 43:8; Am 2:7) Ðó gbejimanɔ Izlayɛli-ví lɛ tɔn zɔ́n bɔ Mawu dɔn tó nú ye wutu ɔ, é sín enɛ wutu bɔ akɔta ɖevo lɛ ɖó sísí nú nyikɔ Jehovah tɔn ǎ. (Sɔ́ jlɛ́ dó Ðɛ 74:10, 18; Eza 52:5 wu.) Akɔta enɛ lɛ tuùn ɖɔ Jehovah wɛ dɔn tó nú Izlayɛli-ví lɛ ǎ, bo ɖɔ ɖɔ Jehovah kún kpéwú bo cyɔn alɔ togun tɔn jí ó wɛ zɔ́n bɔ awě xò ye. Bonu Jehovah na dó klɔ́ cí enɛ sín nyikɔ wu wɛ é dó dɔn tó nú ye, bo lɛkɔ nú Izlayɛli-ví e kpò lɛ é wá yì xwé.—Eze 36:22-24.
it-2-F 87
Hwɛjijɔ
Enɛ wu ɔ, Jehovah nɔ byɔ hwebǐnu kpo hwɛjijɔ kpo ɖɔ mɛ ɖěɖee ba ɖɔ nǔ yetɔn ni nyɔ́ nukún emitɔn mɛ lɛ é ɖó na mɔ nukúnnú jɛ nugbodòdó nǔjlɔjlɔwiwa tɔn emitɔn wu lobo nɔ xwedó. (Eza 1:17, 18; 10:1, 2; Jel 7:5-7; 21:12; 22:3, 4; Eze 45:9, 10; Am 5:15; Micée 3:9-12; 6:8; Zak 7:9-12)
11-17 SEPTEMBRE
DƆKUN MAWUXÓ Ɔ TƆN ÐÉ LƐ | EZEKIYƐLI 46-48
Nǔ Xɔ Akwɛ Biblu Tɔn lɛ Biba
it-1-F 903
Gbɛtɔ́ví
Ðò Akpáxwé Biblu Tɔn E È Wlan Dó Ebléegbe Mɛ É mɛ ɔ, wema Ezekiyɛli tɔn mɛ wɛ è zán xógbe enɛ ɖè hugǎn, bɔ Mawu ylɔ gbeyiɖɔ ɔ ɖɔ “gbɛtɔ́” alǒ “gbɛtɔ́ví” azɔn 90 jɛji. (Eze 2:1, 3, 6, 8) É cí ɖɔ è ylɔ ɛ ɖɔ mɔ̌ bo na dó tɛɖɛ̌ jí ɖɔ ayikúngban jí tɔn kpowun wɛ gbeyiɖɔ ɔ nyí, enɛ wu ɔ, nyikɔ enɛ xlɛ́ ɖɔ mɛ e ɖò wɛn ɔ dó wɛ é gbɔn vo tawun nú wɛn e dó wɛ é ɖè é sín Jɔtɛn, é wɛ nyí Mawu Ajalɔnnɔ ɔ. È lɛ́ ylɔ gbeyiɖɔ Daniyɛli lɔ ɖɔ mɔ̌ ɖò Daniyɛli 8:17 mɛ.
18-24 SEPTEMBRE
DƆKUN MAWUXÓ Ɔ TƆN ÐÉ LƐ | DANIYƐLI 1-3
Nǔ Xɔ Akwɛ Biblu Tɔn lɛ Biba
it-2-F 267
Mɛcaki
Nǔ e wu ye mɔ ɖɔ axɔsu ɔ sín nùɖuɖu lɛ nyí ‘nùblibli’ é sixu ko sín hwɛjijɔ atɔn elɔ lɛ ɖě wu: (1) Babilɔnunu lɛ nɔ ɖu kanlin ɖěɖee Mɔyizi Sɛ̀n ɔ ɖɔ ɖɔ ye nyí kanlin blíblí lɛ é; (2) ye nɔ gbò gbè kanlin lɛ lee é jɛxa gbɔn é ǎ, vlafo ye nɔ glɔ́n agbɔ̌n nú ɖé lɛ; (3) hwɛhwɛ ɔ, pagáwùn lɛ nɔ tó xwlé kanlin lɛ nǔmɛsɛn yetɔn lɛ hwɛ̌, bo nɔ ɖɔ ɖɔ kanlin enɛ lɛ ɖuɖu nyí akpáxwé ɖé ɖò nǔmɛsɛn enɛ lɛ sinsɛn mɛ.—Da 1:8; sɔ́ jlɛ́ dó 1Kɔ 10:18-20, 28 wu.
25 SEPTEMBRE–1 OCTOBRE
DƆKUN MAWUXÓ Ɔ TƆN ÐÉ LƐ | DANIYƐLI 4-6
Nǔ Xɔ Akwɛ Biblu Tɔn lɛ Biba
w88-F 1/10 30 akpá. 3-5
Nǔ E Nǔxatɔ́ lɛ Kanbyɔ lɛ É
Ee è kplá Eblée e nɔ nyí Daniyɛli é wá é ɔ, axɔsu ɔ vɔ́ ajɔ e é sɔ́ ɖó te é ɖɔ, é wɛ nyí ɖɔ è na zé axɔsu sín awu dó nú Daniyɛli, bo na dó wlɔ e è sɔ́ siká dó bló na é kɔ n’i, lobo na zé è ɖó tɛn atɔngɔ ɔ mɛ ɖò axɔsuɖuto ɔ mɛ. Gbeyiɖɔ ɔ yí gbè nú axɔsu ɔ kpo sísí kpo ɖɔ: “Sɛ́mɛɖó, mɛ ni hɛn nǔ e na na mì wɛ mɛ ɖè lɛ wu, é gló hǔn, mɛ ni na mɛ ɖevo. Amɔ̌, un ka na xà nǔ e è wlan ɔ, bo na tinmɛ nú mɛ.”—Daniyɛli 5:17.
Daniyɛli jló ɖɔ è ni dó akwɛ nu nú emi alǒ sú axɔ́ emi bonu emi na tín dlɔ̌ ɔ mɛ ǎ. Axɔsu ɔ sixu hɛn nùnina tɔn lɛ alǒ bɛ́ ye nú mɛ ɖevo. Daniyɛli na tín dlɔ̌ ɔ mɛ, ɖó è na d’ajɔ ɛ wutu ǎ, loɔ, ɖó Jehovah, Mawu nugbǒ ɔ, ee ko ɖó hwɛ nú Babilɔnu b’ɛ na jɛnu malin-malin mɛ é na ɛ hlɔnhlɔn tɔn wutu wɛ.
Lee mǐ xà gbɔn ɖò Daniyɛli 5:29 mɛ é ɔ, hwenu e Daniyɛli xà nùwlanwlan ɔ bo tinmɛ dlɔ̌ ɔ lee é ko ɖɔ gbɔn é gudo é ɔ, axɔsu ɔ ɖegbe ɖɔ è ni vɛ́ bɛ́ nùnina lɛ nú Daniyɛli. Daniyɛli ɖesunɔ wɛ dó awu ɔ kpo wlɔ ɔ kpo ǎ. Axɔsu Bɛlucasáa wɛ ɖegbe ɖɔ è ni dó nǔ lɛ n’i. Amɔ̌, enɛ t’afɔ xó e ɖò Daniyɛli 5:17 mɛ é jí ǎ, finɛ ɔ, gbeyiɖɔ ɔ ɖexlɛ́ céɖécéɖé ɖɔ é kún nyí cejɛnnabi wutu wɛ emi na tín dlɔ̌ ɔ mɛ ó.