Alɔdlɛndónǔ Kplé Gbɛzán kpo Sinsɛnzɔ́ kpo Tɔn Sín Azɔ̌wema Tɔn Lɛ
4-10 NOVEMBRE
DƆKUN MAWUXÓ Ɔ TƆN ÐÉ LƐ | 1 JAAN 1-5
“Mi Ma Yí Wǎn nú Gbɛ̀ ɔ Alǒ Nǔ E Nyí Gbɛ̀ ɔ Tɔn lɛ É Ó”
w05 1/1 10 akpá. 13
Xwedó Kpɔ́ndéwú E Jezu Sɔ́ Ð’ayǐ É
13 Mɛɖé lɛ sixu ɖɔ ɖɔ nǔ e ɖò gbɛ̀ ɔ mɛ lɛ é bǐ kún nyla ó. É na bo tlɛ nyí mɔ̌ ɔ, gbɛ̀ ɔ kpo jlǒ tɔn kpo sixu fɛ́ ayi mǐtɔn sín Jehovah sinsɛn kɔn, b’ɛ na yá kaka. Nǔ e gbɛ̀ ɔ nɔ ɖetɔ́n lɛ é ɖě nɔ dɔn mǐ sɛkpɔ Mawu ǎ. Enɛ wu ɔ, nú wanyiyi e mǐ ɖó nú gbɛ̀ ɔ sín nǔ lɛ é, é na bo tlɛ nyí nǔ e ma nyla ǎ lɛ é, ɖò jijɛji wɛ ɔ, ali nyanya ɖé jí wɛ mǐ ɖè nɛ. (1 Timɔtée 6:9, 10) Gɔ́ na ɔ, nǔ gegě ɖò gbɛ̀ ɔ mɛ bo nyla tawun bo sixu wà nǔ dó mǐ wu. Enyi mǐ nɔ kpɔ́n fímu alǒ tito televiziɔn jí tɔn ɖěɖee nɔ sɔ́ dakaxixo, dɔkun jijɛ, kabǐ agalilɛ ɖ’ajo lɛ é ɔ, nǔ enɛ lɛ sixu wá jɛ nukún mǐtɔn mɛ nyɔ́ jí, bɔ gudo mɛ ɔ, mǐ na wá jɛ tɛnkpɔn mɛ. Enyi mǐ nɔ dó gbɛ̌ xá mɛ ɖěɖee gbɛzinzan yetɔn ni kpɔ́n te, alǒ akwɛ mimɔ sín ali ni hun nú ye nɔ gbovɛ̌ na lɛ é ɔ, nǔ enɛ lɛ sixu wá huzu nǔ taji hugǎn nú mǐ lɔmɔ̌.—Matie 6:24; 1 Kɔlɛntinu lɛ 15:33.
w13 15/8 27 akpá. 18
Gbějé Mɛ Alɔkpa E A Ðó Na Nyí É Kpɔ́n
18 Wlɛnwín ɖevo e mǐ na zán dó ɖu ɖò “nǔ e nyí gbɛ̀ ɔ tɔn lɛ” é jí é wɛ nyí ɖɔ mǐ ni kpó ɖò xó elɔ lɛ é Mawu sɔ́ d’ayi mɛ nú Jaan b’ɛ wlan lɛ é hɛn d’ayi mɛ wɛ: “Gbɛ̀ elɔ ɔ, wiwáyi wɛ é ɖè, bɔ mɛ e nɔ bló jlǒ gbɛ̀ elɔ tɔn lɛ lɔ ɖò wiwáyi wɛ; mɛ e nɔ bló jlǒ Mawu tɔn ɔ ka nɔ nɔ gbɛ̀ kaka sɔyi.” (1 Jaan 2:17) Tutoblonunu Satáan tɔn nɔ cí nǔ e na nɔ ayǐ kaka sɔyi é ɖɔhun. É ɖò mɔ̌ có, xó tɔn na fó gbè ɖokpo. Nǔ e gbɛ̀ Satáan tɔn na xwlé mǐ lɛ é ɖě na nɔ ayǐ kaka sɔyi ǎ. Enɛ flínflín na d’alɔ mǐ bɔ mǐ na lɔn nú tɛnkpɔn Awoví tɔn lɛ na flú mǐ ǎ.
Nǔ Xɔ Akwɛ Biblu Tɔn Lɛ Biba
w13 15/9 10 akpá. 14
Nǔflínmɛ Jehovah Tɔn lɛ Ðó Ganjɛwu
14 Nǔflínmɛ ɖò Akpáxwé Biblu Tɔn E È Wlan Dó Glɛkigbe Mɛ É mɛ nú mǐ kpɔ́, bonu mǐ na yí wǎn nú mǐɖée lɛ. Jezu ɖɔ ɖɔ gbeɖiɖe taji wegɔ́ ɔ wɛ nyí “a na yí wǎn nú nɔzo towe hwiɖesu ɖɔhun.” (Mat. 22:39) Mɔ̌ ɖokpo ɔ, nɔví Jezu tɔn Jaki ylɔ́ wanyiyi ɖɔ “sɛ́n axɔ́su tɔn ɔ.” (Ja. 2:8, nwt) Mɛsɛ́dó Jaan wlan ɖɔ: “Mɛ vívɛ́ná ce lɛ mi, sɛ́n yɔyɔ̌ ɖevo wlan sɛ́dó mi wɛ un ɖè ǎ; sɛ́n xóxó e mi ko ɖó sín hwenu e mi ɖi nǔ nú Klisu é wɛ.” (1 Jaan 2:7, 8) Etɛ dó gesí wɛ Jaan ka ɖè ɖɔ é nyí “sɛ́n xóxó”? Gbeɖiɖe e ɖɔ è ni yí wǎn nú mɛ é dó gesí wɛ é ɖè. Gbeɖiɖe enɛ nyí “xóxó” ɖò ali ɖé nu, ɖó Jezu ko ɖè gbè ɔ sín xwè mɔkpan ɖíe. É lɛ́ nyí “yɔyɔ̌,” ɖó é byɔ ɖɔ ahwanvu lɛ ni ɖó wanyiyi mɛɖée sísɔ́ dó savɔ̌ tɔn e sín hudo ye sixu ɖó, hwenu e ye na kpannukɔn ninɔmɛ yɔyɔ̌ lɛ é é. Ðó mǐ nyí ahwanvu Klisu tɔn lɛ wutu ɔ, akpágbánúmɛ ɖěɖee nɔ d’alɔ mǐ bonu mǐ na ɖí xwi xá nǔ sísɔ́ nú gbigbɔ cejɛnnabi tɔn e è dó tuùn gbɛ̀ elɔ na, b’ɛ sixu vɔ́ da nú wǎn e mǐ yí nú nɔzo mǐtɔn lɛ é é nɔ sù nukún mǐtɔn mɛ ǎ cé?
it-2 491 akpá. 1
Hwɛsɔ́kɛmɛ
É sɔgbe ɖɔ mǐ ni nɔ xoɖɛ bo byɔ hwɛsɔ́kɛmɛ Mawu tɔn dó mɛ ɖevo lɛ tamɛ, é tlɛ sixu nyí dó agun ɔ bǐ tamɛ. Mɔyizi wà mɔ̌ dó togun Izlayɛli tɔn tamɛ bo ɖɔ hwɛ e ye hu é, lobo byɔ hwɛsɔ́kɛ; Jehovah ka jɔwǔ i bo sè ɖɛ tɔn. (Kɛ́ 14:19, 20) Hwenu e Salomɔ́ɔ lɔmɔ̌ ɖò tɛmpli ɔ sɔ́ dó alɔ mɛ nú Jehovah wɛ é ɔ, é xoɖɛ sɛ́dó Jehovah ɖɔ nú togun ɔ hu hwɛ, bo lɛkɔ sín hwɛ tɔn lɛ gudo hǔn, é ni sɔ́ hwɛ kɛ ɛ. (1Ax 8:30, 33-40, 46-52) Ɛsidlasi wà nǔ afɔsɔ́ɖótetɔ́ ɖɔhun bo ɖɔ hwɛ e Jwifu ɖěɖee è lɛkɔ na wá tò yetɔn mɛ lɛ é hu lɛ é ɖò agbawungba. Ðɛ e é xò kpo ayi tɔn bǐ kpo é kpodo nǔbyɔbyɔ tɔn lɛ kpo zɔ́n bɔ togun ɔ yawǔ lɛkɔ sín hwɛ tɔn lɛ gudo, bo na dó mɔ hwɛsɔ́kɛmɛ Jehovah tɔn. (Ɛsd 9:13–10:4, 10-19, 44) Jaki byɔ mɛ e ɖò azɔn jɛ wɛ ɖò gbigbɔ lixo é ɖé ɖɔ é ni ylɔ́ mɛxo agun tɔn lɛ nú ye ni xoɖɛ n’i, enɛ ɔ, “enyi hwɛ ɖé ɖò kɔ tɔn ɔ, Mawu na sɔ́ kɛ ɛ.” (Ja 5:14-16) É ɖò mɔ̌ có, “hwɛ ɖokpo tíìn bo nɔ dɔn mɛ yì kú,” é wɛ nyí hwɛ huhu dó gbigbɔ mímɛ́, hwɛ ɖé wɛ bɔ è sɔ́ jlǒ dó hu b’ɛ ɖó hwɛsɔ́kɛ ǎ. Klisanwun ɖé ɖó na xoɖɛ dó mɛ ɖěɖee hu hwɛ mɔhun lɛ é tamɛ ǎ.—1Jn 5:16; Mt 12:31; Eb 10:26, 27.
ZĚ HWIÐÉE BǏ JÓ NÚ MAWUXÓÐIÐƆZƆ́ Ɔ
w04 1/10 29
Nǔ E Nǔxatɔ́ lɛ Nɔ Kanbyɔ lɛ É
Hwenu e mɛsɛ́dó Jaan wlan ɖɔ “wanyiyi e sɔgbe bɔ nǔ bǐ vɔ ɖ’ewu ɔ nɔ nya xɛsi tɔ́n” é ɔ, etɛ ɖɔ wɛ é ka ɖè bo ɖɔ “wanyiyi e sɔgbe bɔ nǔ bǐ vɔ ɖ’ewu ɔ”? “Xɛsi” tɛ wanyiyi mɔhun ka nɔ nya tɔ́n?
Mɛsɛ́dó Jaan wlan ɖɔ: “Xɛsi ɖò wanyiyi mɛ ǎ; wanyiyi e sɔgbe bɔ nǔ bǐ vɔ ɖ’ewu ɔ nɔ nya xɛsi tɔ́n. Tódɔnnúmɛ wɛ nɔ dɔn xɛsi wá; ɖó mɛ e ɖò xɛsi ɖi wɛ ɔ, mɛ enɛ ɔ ɖó wanyiyi bɔ nǔ bǐ vɔ ɖ’ewu ǎ.”—1 Jaan 4:18.
Nǔ ɖěɖee lɛlɛ̌ dó wemafɔ ɔ lɛ é xlɛ́ ɖɔ xó ɖiɖɔ kpo jiɖiɖe kpo xó ɖɔ wɛ Jaan ɖè, taji ɔ, kancica e ɖò wǎn yí nú Mawu kpo xó ɖiɖɔ n’i kpo jiɖiɖe kpo tɛntin é. Nǔ e mǐ xà ɖò 1 Jaan 4:17 mɛ é xlɛ́ mɔ̌, é ɖɔ: “Enyi wanyiyi ɔ sɔgbe ɖò ayi mǐtɔn mɛ bɔ nǔ bǐ vɔ ɖ’ewu ɔ, mǐ na ɖó ganjɛwu kpíkpé ɖò hwɛɖɔzángbe.” Bǎ e mɛ Klisanwun ɖé yí wǎn nú Mawu ɖó é kpo bǎ e mɛ é mɔ ɖɔ Mawu yí wǎn nú emi ɖó é kpo sixu zɔ́n bɔ é xoɖɛ sɛ́dó Mawu kpo jiɖiɖe kpo alǒ gbɔ mɔ̌ wà.
Xógbe “wanyiyi e sɔgbe bɔ nǔ bǐ vɔ ɖ’ewu ɔ” ɖó tinmɛ gegě. Lee è zán gbɔn ɖò Biblu mɛ é ɔ, xógbe “sɔgbe bɔ nǔ bǐ vɔ ɖ’ewu ɔ” nɔ xlɛ́ hwebǐnu ɖɔ blɔ̌ kún hán ɖ’ewu bǐ gbídígbídí ó ǎ, amɔ̌, hwɛhwɛ ɔ, é nɔ ɖó dogbó. Ði kpɔ́ndéwú ɔ, ɖò Mawuxóɖiɖɔ só jí tɔn ɔ mɛ ɔ, Jezu ɖɔ: “Mi ɖó na nyí mɛ maɖóblɔ̌, lee Tɔ́ mitɔn e ɖò jixwé é lɔ nyí mɛ maɖóblɔ̌ gbɔn é.” Jezu ɖò xó ɖɔ nú ahwanvu tɔn lɛ wɛ ɖɔ nú ye nɔ yí wǎn nú mɛ e nɔ yí wǎn nú ye lɛ é kɛɖɛ hǔn, wanyiyi yetɔn kún ɖò blebu alǒ nyí adodwé ɔ ó. Bonu wanyiyi yetɔn na ɖò blebu alǒ xó bǐ na fó ɖ’ewu ɔ, ye ɖó na yí wǎn nú kɛntɔ́ yetɔn lɛ lɔmɔ̌. Mɔ̌ ɖokpo ɔ, hwenu e Jaan ɖɔ xó dó “wanyiyi e sɔgbe bɔ nǔ bǐ vɔ ɖ’ewu ɔ” wu é ɔ, wǎn e Mawu yí nú mǐ kpo ayi tɔn bǐ kpo bɔ nǔ bǐ fó ɖ’ewu bo kúnkplá gbɛzán mɛɖé tɔn sín akpáxwé lɛ bǐ é wu ɖɔ xó dó wɛ é ɖè.—Matie 5:46, 47; 5:48, nwt; 19:20, 21.
Nú Klisanwun ɖé ɖò ɖɛ xò sɛ́dó Mawu wɛ ɔ, é nɔ tuùn ganji ɖɔ hwɛ ɖò kɔ nú emi, bɔ emi lɛ́ ɖó blɔ̌. É ɖò mɔ̌ có, enyi wǎn e é yí nú Mawu é ɖò blebu, b’ɛ lɛ́ mɔ nǔ jɛ wu ɖɔ Mawu yí wǎn nú emi ganji ɔ, ado sɔ́ nɔ hu i ɖɔ è na ɖó hwɛ n’i alǒ gbɛ́ ɛ ǎ. É nyɔ́ wà ɔ, é na vo bo ɖɔ nǔ e ɖò ayi tɔn mɛ é faa, bo na byɔ hwɛsɔ́kɛ gbɔn vɔsisa gbɛxɔnúmɛ tɔn Jezu Klisu tɔn e Jehovah sɔnǔ na kpo wanyiyi kpo é gblamɛ. É na ganjɛwu ɖɔ Mawu na sè ɖɛ emitɔn.
Nɛ̌ mɛɖé ka sixu “ɖó wanyiyi bɔ nǔ bǐ vɔ ɖ’ewu,” bɔ mɔ̌ mɛ ɔ, é na “nya” xɛsi e na zɔ́n bɔ é na lin ɖɔ è na ɖó hwɛ nú emi alǒ gbɛ́ emi é “tɔ́n” gbɔn? Mɛsɛ́dó Jaan ɖɔ ɖɔ: “Mɛ e nɔ setónú nú xó tɔn ɔ, mɛ enɛ ɖó wanyiyi titewungbe bɔ nǔ bǐ vɔ ɖ’ewu.” (1 Jaan 2:5) Kpɔ́ndéwú ɖé ɖíe: Enyi Mawu yí wǎn nú mǐ hwenu e mǐ kpó ɖò hwɛhutɔ́ nyí wɛ é ɔ, nú mǐ lɛkɔ sín hwɛ mǐtɔn lɛ gudo nǔgbo nǔgbo, bo nɔ “setónú nú xó tɔn” ganji ɔ, é na lɛ́ yí wǎn nú mǐ d’eji à cé? (Hlɔmanu lɛ 5:8; 1 Jaan 4:10) Nǔgbo ɔ, nú mǐ kpó ɖò gbeji jɛn wɛ ɔ, mǐ sixu ɖó ganjɛwu ɖokpo ɔ e mɛsɛ́dó Pɔlu ɖó hwenu e é ɖɔ xó elɔ dó Mawu wu é: “Éyɛ mɛ e ma hwlɛn Vǐ éɖesunɔ tɔn ǎ, bo sɔ́ ɛ jó dó mǐ bǐ tamɛ ɔ, nɛ̌ é ma ka na na nǔ bǐ mǐ kpo Vǐ tɔn kpo ǎ gbɔn?”—Hlɔmanu lɛ 8:32.
KLISANWUN GBƐ̀ ZINZAN
“Nyi Alɔ nú Nǔwiwa Gbɛ̀ ɔ Tɔn lɛ Hwenu E A Ðò Nǔ Sɔ́ nú Alɔwliwli Wɛ É”
w06 15/10 25 akpá. 10
Ðè Nǔɖiɖi Towe Xlɛ́ Gbɔn Gbɛzinzan Towe Gblamɛ
10 Asú kpo asì kpo Klisanwun lɛ nɔ ba na ɖó linlin e ɖò jlɛ̌ jí é, Biblu ka sixu d’alɔ ye. Nǔgbo wɛ ɖɔ alɔwliwlizán ɔ ɖò taji, amɔ̌, ye nɔ tuùn ɖɔ asú kpo asì kpo Klisanwun ɖé sín gbɛzán wɛ emi bɛ́ vlɛ́kɛsɛ́ɛ bo na nɔ mɔ̌ kaka sɔyi. É byɔ ɖɔ ye ni ɖu agɔ̌ gɛnnyii ǎ. Enyi ye jló na yí jonɔ wɛ ɔ, ye na lɛ́n akwɛzinzan e é na byɔ ɖò ye sí é, bo kpɔ́n lee ye na bló gbɔn é. (Luki 14:28) Sɔgbe xá Mawuxówema ɔ ɔ, hwenu e ye na jɛ kpɔ́ é ɔ, asú ɔ wɛ na nyí ta. (1 Kɔlɛntinu lɛ 11:3; Efɛzinu lɛ 5:22, 23) Hǔn, asú ɔ wɛ nyí mɛ e sín ta jonɔyiyi ɔ sín agban ɖè é. Amɔ̌, kpo wanyiyi kpo ɔ, é na kan nǔ byɔ asixɔ́ntɔn tɔn dó xó mɔhun lɛ wu, ɖi mɛ e ye ba na ylɔ́ lɛ é, alǒ mɛ nabi e wu ye kpé bo na ylɔ́ wá alɔwliwli sín agɔ̌ ɔ tɛnmɛ lɛ é. É sixu nɔ ma nyɔ́ bló, alǒ nɔ ma sɔgbe ɖɔ ye ni ylɔ́ xɔ́ntɔn yetɔn lɛ bǐ kpo hɛ̌nnumɔ yetɔn lɛ bǐ kpo; enɛ wu ɔ, é sixu byɔ ɖɔ ye ni nɔ jlɛ̌ jí hwenu e ye ɖò gbeta ɖé lɛ kɔn wá wɛ é. Asisúnɔ ɔ kpo asì tɔn kpo ɖó na gan- jɛwu ɖɔ nú emi ma sixu ylɔ́ nǔɖitɔ́ hatɔ́ ɖé lɛ ǎ ɔ, ye na mɔ nukúnnú jɛ mɛ bo na wá sin xomɛ ǎ.—Nǔnywɛtɔ́xó 7:9
11-17 NOVEMBRE
DƆKUN MAWUXÓ Ɔ TƆN ÐÉ LƐ | 2 JAAN 1– JUDI
“Mǐ Ðó Na Dó Gǎn Bá Nɔ Nǔgbo ɔ Mɛ”
w04 15/9 11-12 akpá. 8-9
“Mi Ba Hlɔnhlɔn Mitɔn Ðò Bǔ E Mi Ðè Ðò Aklunɔ Mɛ ɔ Mɛ”
8 Mǐ dɛ́n wlɛnwín Satáan tɔn lɛ ǎ, ɖó Mawu- xówema ɔ ɖè wlɛnwín tɔn taji lɛ xlɛ́. (2 Kɔlɛntinu lɛ 2:11) Awoví zán akwɛyózó syɛnsyɛn, kú mɛvívɛ́ mɛtɔn tɔn, gbeklánxámɛ xwédo tɔn, azɔn kpo xómɔɖɔdómɛwu ma xwè ali xɔ́ntɔn enyíì lɛ tɔn kpo dó tɔ́n ahwan Jɔbu nǔjlɔjlɔwatɔ́ ɔ. Jɔbu wá flú bǐ bo mɔ ɖɔ Mawu ɖè alɔ sín kan emitɔn mɛ. (Jɔbu 10:1, 2) Satáan sɔ sixu dó tagba enɛ lɛ nú mǐ égbé tlɔlɔ ǎ có, wuvɛ̌ syɛnsyɛn mɔhun lɛ nɔ wà nǔ dó Klisanwun gegě wu, bɔ Awoví sixu zán ye dó wà nǔ dó mǐ wu.
9 Awovínú e na wà nǔ dó mǐ wu ɖò gbigbɔ lixo lɛ é wá sukpɔ́ ɖò azǎn gudogudo tɔn elɔ lɛ mɛ. Gbɛ̀ e mɛ nǔ agbaza tɔn lɛ gbé nyinya yí ta sín nǔ gbigbɔ tɔn lɛ gbé nyinya sí é ɖé mɛ wɛ mǐ ɖè. Xójlawema lɛ kpo nǔ mɔhun ɖevo lɛ kpo nɔ ɖexlɛ́ hwɛhwɛ ɖɔ nǔbliblíwiwa e ɖó na nyí wǔbla sín nǔ é nyí jɔtɛn awǎjijɛ tɔn. Mɛ gegě wá “yí wǎn nú gbɛɖuɖu hú ye na yí wǎn nú Mawu.” (2 Timɔtée 3:1-5) Nǔ lin gbɔn mɔ̌ sixu wà nǔ dó lee mǐ ɖè ɖò gbigbɔ lixo é wu, nú mǐ ma “fun ahwan nú nǔɖiɖi” ǎ ɔ nɛ.—Judi 3.
Nǔ Xɔ Akwɛ Biblu Tɔn lɛ Biba
it-1 879
Wanyiyi Ðiɖexlɛ́ Sín Agɔ̌ Lɛ
Biblu tinmɛ wanyiyi ɖiɖexlɛ́ sín agɔ̌ enɛ lɛ ǎ, mɔ̌ jɛn é ma ka lɛ́ ɖɔ lee è nɔ ɖu gbɔn é ǎ é nɛ. (Judi 12, nwt) Aklunɔ Jezu Klisu, alǒ mɛsɛ́dó tɔn lɛ ɖegbe tɔn nú mɛ ǎ, é ka lɛ́ cí ɖɔ è kún ɖó na mɔ ye dó mɔ dandan alǒ tɛgbɛ sín nǔ ó. Mɛɖé lɛ ɖɔ ɖɔ xwè enɛ lɛ wɛ nyí hwenu e Klisanwun e alɔnu kpɔ́n te na lɛ é nɔ ylɔ́ agɔ̌ bo nɔ ylɔ́ nǔɖitɔ́ hatɔ́ yetɔn ɖěɖee ɖě ma ɖò ɖě na ǎ lɛ é é. Tɔ́cyɔvǐ lɛ, asúkúsi lɛ, dɔkunnɔ lɛ kpo mɛ e ma jɛ dɔkun kaka ɖé ǎ lɛ é kpo nɔ nɔ nɔví nɔví yí, bo nɔ ɖu nǔ ɖó kpɔ́.
it-1 805
Awinnya
É ɖò wɛn ɖɔ xókwín Glɛkigbe tɔn ɖevo e nɔ nyí spilas é ɖò awinnya e ɖò hwlahwlá ɖò sin glɔ́ é dó gesí wɛ. Judi zán xókwín enɛ bo jlɛ́ dó gbɛtɔ́ hǔnmɛ ɖěɖee lun byɔ agun Klisanwun tɔn mɛ, kpo linlin ɔ kpo bo na wà nǔ dó wǔ tɔn lɛ é wu. Lee awinnya e ɖò hwlahwlá ɖò sin glɔ́ lɛ é nɔ dóya nú tɔjihun lɛ gbɔn é ɔ, mɔ̌ wɛ mɛ enɛ lɛ lɔ huzu akóba bo jɛ kɔ nú mɛ ɖěɖee ɖò agun ɔ mɛ lɛ é gbɔn é nɛ. É ɖɔ dó mɛ mɔhun lɛ wu ɖɔ: “Mɛ enɛ lɛ nyí awinnya e ɖò hwlahwlá ɖò sin glɔ́ ɖò wanyiyi ɖiɖexlɛ́ sín agɔ̌ mitɔn lɛ tɛnmɛ é, hwenu e ye ɖò nǔ ɖu xá mi wɛ é.” —Judi 12, nwt.
‘Nǔ Tɔn Nyɔ́ Mawu Nukúnmɛ’
Etɛ ka nyí nǔɖɔɖ’ayǐ Henɔci tɔn ɔ? Lee é ɖɔ gbɔn é ɖíe: “Mi kpɔ́n! Aklunɔ kpo wɛnsagun mímɛ́ tɔn wɔbuwɔbu lɛ kpo ja, bo na ɖɔhwɛ xá mɛ bǐ, bo na ɖó hwɛ nú mɛdídá lɛ bǐ; ye na bló mɔ̌, ɖó nǔ nyanya e mɛdídá lɛ wà hwenu e ye fɔ́n gǔ dó Mawu jí lɛ bǐ, kpodo xó baɖabaɖa e hwɛhutɔ́ enɛ lɛ e ma nɔ ɖó sísí nú Mawu ǎ lɛ ɖɔ dó Mawu wu ɔ bǐ kpo wutu.” (Judi 14, 15) Henɔci ɖó nǔɖiɖi ɖaxó ɖɔ nǔ enɛ lɛ na jɛ dandan. É cí n’i ɖɔ Mawu ko bló nǔ e nǔɖɔɖ’ayǐ ɔ ɖɔ lɛ é wɛ ɖɔhun. Nǔ ɔ wɛ nyí ɖɔ: Gbeyiɖɔ ɔ ɖò xó ɖɔ dó nǔ e jí é kú dó ɖɔ é na jɛ dandan é ɖé wu wɛ ɖó alɔkpa ɖé bɔ é cí ɖɔ nǔ ɔ ko jɛ wɛ ɖɔhun!—Ezayíi 46:10.
‘Nǔ Tɔn Nyɔ́ Mawu Nukúnmɛ’
Nǔɖiɖi Henɔci tɔn sixu sísɛ́ mǐ bɔ mǐ na kanbyɔ mǐɖée ɖɔ mǐ ka nɔ ɖó linlin ɖokpo ɔ xá Mawu dó gbɛ̀ elɔ wu à jí. Hwɛɖónúmɛ e Henɔci jla kpo akɔ́nkpinkpan kpo é kpó ɖò te; lee é nyí gbɔn nú gbɛ̀ Henɔci hwenu tɔn é ɔ, mɔ̌ ɖokpo ɔ wɛ é na nyí nú gbɛ̀ égbé tɔn. Sɔgbe kpo akpágbánúmɛ Henɔci tɔn kpo ɔ, Jehovah sɔ́ Sinvɔgbɛ ɔ dó sú kún dó nú gbɛ̀ nyanya Nɔwée hwenu tɔn. Amɔ̌, gbɛvivɔ enɛ ɔ nyí kpɔ́ndéwú ɖé nú gbɛvivɔ ɖaxó e jawě é. (Matie 24:38, 39; 2 Piyɛ́ɛ 2:4-6) Égbé ɖesu ɔ, Mawu ko ɖò gbesisɔmɛ, é kpo wɛnsagun mímɛ́ tɔn wɔbuwɔbu lɛ kpo, bo na sɔ́ hwɛjijɔ dó sú kún dó nú gbɛ̀ nyanya elɔ. Ðokpo ɖokpo mǐtɔn ɖó na hɛn akpágbánúmɛ Henɔci tɔn dó ayi mɛ lobo má xá mɛ ɖevo lɛ. Hɛ̌nnumɔ mǐtɔn kpo xɔ́ntɔn mǐtɔn lɛ kpo sixu klán gbè xá mǐ. Mǐ sixu mɔ ɖɔ mǐ ɖò mǐɖokpo hweɖelɛnu. Amɔ̌, Jehovah jó Henɔci dó gbeɖé ǎ; égbé ɖesu ɔ, é na jó mɛsɛntɔ́ tɔn gbejinɔtɔ́ lɛ dó gbeɖé ǎ!
18-24 NOVEMBRE
DƆKUN MAWUXÓ Ɔ TƆN ÐÉ LƐ | NǓÐEXLƐ́MƐ 1-3
“Un Tuùn Nǔ E A Wà ɔ Bǐ”
w12 15/10 14 akpá. 8
Gbigbɔ Alɔkpa Tɛ Ðexlɛ́ Wɛ A Ðè?
8 Bo na dó nyi alɔ nú gbigbɔ alɔkpa enɛ ɔ, mǐ sixu flín ɖɔ è dó gesí Jezu ɖò Biblu mɛ ɖɔ “é hɛn sunví tɛnwe dó alɔ tɔn ɖisí ɔ mɛ.” “Sunví” lɛ nɔte nú nukúnkpénuwutɔ́ yí ami dó ɖè lɛ, bo gbló ada kaka jɛ nukúnkpénuwutɔ́ e ɖò agun lɛ bǐ mɛ lɛ é jí. Jezu sixu xlɛ́ ali “sunví” e ɖò alɔ tɔn mɛ lɛ é lee é mɔ ɖɔ é sɔgbe gbɔn é bǐ. (Nǔɖe. 1:16, 20) Ðó é nyí Ta nú agun Klisanwun tɔn wutu ɔ, é ɖó acɛ dó kplékplé mɛxo lɛ tɔn bǐ jí. Enyi mɛɖé ɖò kplékplé mɛxo lɛ tɔn ɖé mɛ bo ɖó hudo nǔgbɛnúmɛ tɔn nǔgbo ɔ, Mɛ e “nukún tɔn lɛ nɔ kán zo myɔ ɖɔhun” é na bló bɔ nǔ na nyí mɔ̌ ɖò hwenu e é ɖó dó é kpo lee É jló gbɔn é kpo. (Nǔɖe. 1:14) Dìn hwɛ̌ ɔ, mǐ nɔ ɖó sísí jɔ sísí nú mɛ ɖěɖee gbigbɔ mímɛ́ sɔ́ lɛ é, ɖó Pɔlu wlan ɖɔ: “Mi setónú nú agunnukɔntɔ́ mitɔn lɛ, bo hwíhwɛ́ miɖée ɖò glɔ̌ yetɔn; ye nɔ ɖò nukún kpé dó mi wu wɛ hwebǐnu, ɖó ye ɖó na ɖó azɔ̌ e ye wà ɔ sín gbè nú Mawu. Enyi mi setónú nú ye ɔ, ye na wà azɔ̌ yetɔn kpodo xomɛhunhun kpo; enyi mi ma ka setónú nú ye ǎ ɔ, ye na wà azɔ̌ yetɔn wǔɖéwúɖé; enɛ ɔ, mi ka sɔ́ na mɔ lè ɖebǔ ɖ’emɛ ǎ.”—Ebl. 13:17.
w12 15/4 29 akpá. 11
Jehovah Nɔ Nya Xɛ Ðò Mǐ Jí Bo Na Dó Hwlɛn Mǐ Gán
11 Ðò nǔmimɔ e ɖò Nǔɖexlɛ́mɛ wemata 2 kpo 3 kpo mɛ é mɛ ɔ, Jezu Klisu susunɔ ɔ ɖò agun tɛnwe e ɖò Azíi Kpɛví ɔ lɛ é gbéjé kpɔ́n wɛ. Nǔmimɔ ɔ xlɛ́ ɖɔ Klisu kún nɔ sò agun lɛ bǐ ɖó bǔ ɖó glo ɖokpo ɔ mɛ ó, loɔ, é nɔ gbéjé ninɔmɛ lɛ ɖokpo ɖokpo kpɔ́n. Ðò ninɔmɛ ɖé lɛ mɛ ɔ, é tlɛ dó gesí mɛ ɖokpo ɖokpo, bɔ ɖò ninɔmɛ ɖokpo ɖokpo mɛ ɔ, é nɔ kpa mɛ lee é jɛxa gbɔn é alǒ ɖè wě xá mɛ. Etɛ enɛ ka xlɛ́? Nǔmimɔ ɔ sín jijɛnu xlɛ́ ɖɔ agun tɛnwe lɛ nɔte nú Klisanwun yí ami dó ɖè lɛ ɖò 1914 gudo, bɔ wě e è ɖè xá agun tɛnwe lɛ é nɔ lɛ́ nyɔ́ zán nú agun mɛ Mawu tɔn lɛ tɔn e gbɔn gbɛ̀ ɔ bǐ mɛ é. Nú mɔ̌ wɛ é nyí ɔ, é sɔgbe ɖɔ è ni wá gbeta ɔ kɔn ɖɔ Jehovah nɔ gbɔn Vǐ tɔn jí bo ɖò ali xlɛ́ togun tɔn wɛ tawun. Nɛ̌ mǐ ka sixu ɖu lè alixlɛ́mɛ enɛ tɔn gbɔn?
w01 15/1 20-21 akpá. 20
Zɔn Xúsúxusu Xá Tutoblonunu Jehovah Tɔn
20 Xúsúxusu zinzɔn xá tutoblonunu Jehovah tɔn e ɖò azɔ̌ wà wɛ é nɔ byɔ ɖɔ mǐ ni tuùn azɔ̌ e Mawu zɔ́n Jezu Klisu e “kpa acɛ nú agun” ɔ é. (Efɛzinu lɛ 5:22, 23) É lɛ́ jɛxa ɖɔ è ni ɖó ayi Ezayíi 55:4 wu, è ɖɔ nú mǐ ɖò finɛ ɖɔ: “Ðó Davidi wɛ un sɔ́, bɔ é nyí acɛkpikpa ce sín kpɔ́ndéwú nú togun lɛ; é wɛ un sɔ́ bɔ é nyí gǎn, bo kpa acɛ nú togun lɛ.” È ɖò wɛn ɖɔ Jezu tuùn lee è nɔ kp’acɛ gbɔn é. É lɛ́ tuùn lɛngbɔ̌ tɔn lɛ kpo nǔ e wà wɛ ye ɖè lɛ é bǐ kpo. Nǔgbo ɔ, hwenu e é gbéjé agun tɛnwe e ɖò Azíi Kpɛví ɔ lɛ é kpɔ́n é ɔ, azɔn atɔ́ɔ́n wɛ é ɖɔ: “Un tuùn nǔ e a wà ɔ bǐ.” (Nǔɖexlɛ́mɛ 2:2, 19; 3:1, 8, 15) Jezu lɛ́ tuùn hudo mǐtɔn lɛ Tɔ́ tɔn Jehovah ɖɔhun. Hwɛ̌ cobɔ é na sɔ́ Ðɛ Sín Kpɔ́ndéwú ɔ ɖ’ayǐ ɔ, é ɖɔ: “Tɔ́ mitɔn ko tuùn nǔ e hudo mi ɔ, cobɔ mi wá ja byɔbyɔ ɛ gbé.”—Matie 6:8-13.
Nǔ Xɔ Akwɛ Biblu Tɔn lɛ Biba
Axɔ́suɖuto Mawu Tɔn Na Ðè Kɛntɔ́ Tɔn lɛ Síìn
10 Lɛngbɔ̌ lɛ kínklán ɖó vo nú gbɔ̌ lɛ. È na hɛn kɛntɔ́ Axɔ́suɖuto Mawu Tɔn tɔn lɛ bǐ gannugánnú bɔ ye na mɔ nǔ ɖevo e na lɛ́ zɔ́n bɔ adohu adohu yetɔn na jɛji é. Jezu ɖɔ: “È na mɔ Gbɛtɔ́ví ɔ ɖò akpɔ́kpɔ́ jí jawě, kpodo hlɔnhlɔn ɖaxó kpo, kpodo susu kpo.” (Mak. 13:26) Nǔdabaɖa enɛ e na jɛ é na xlɛ́ ɖɔ Jezu wá bo na ɖɔ hwɛ xá gbɛtɔ́ lɛ. Ðò nǔɖɔɖ’ayǐ ɖokpo enɛ e kúnkplá azǎn gudogudo tɔn lɛ é mɛ ɔ, Jezu tín nǔ ɖevo lɛ mɛ dó hwɛ e è na ɖɔ ɖò hwenɛnu é wu. Mǐ mɔ tinmɛ enɛ lɛ ɖò lǒ e é dó dó lɛngbɔ̌ lɛ kpo gbɔ̌ lɛ kpo wu é mɛ. (Xà Matie 25:31-33; Ðɛhan 37:9-11.) Mɛ ɖěɖee nɔ nɔ gudo nú Axɔ́suɖuto Mawu Tɔn kpo gbejininɔ kpo lɛ é ɔ, è na dá hwɛ nú ye ɖɔ ye nyí “lɛngbɔ̌ lɛ,” lobɔ ye na “jlɔ́, bo kpɔ́n jǐ” lobo na mɔ ɖɔ “hwenu e Mawu na hwlɛn [ye] é ko sɛya.” (Luk. 21:28) Amɔ̌, mɛ ɖěɖee klán gbè xá Axɔ́suɖuto ɔ lɛ é ɔ, è na dá hwɛ nú ye ɖɔ ye nyí “gbɔ̌ lɛ,” bɔ ye na “jɛ alě na jí” lobo na mɔ ɖɔ kú wɛ ɖò te kpɔ́n emi.—Mat. 24:30; Nǔɖe. 1:7.
w09 15/1 31 akpá. 1
Nǔ Taji Ðěɖee Ðò Wema Nǔɖexlɛ́mɛ Tɔn Mɛ Lɛ É—I
2:7—Etɛ ka nyí “Mawu sín jikpá” ɔ? Ðó Kli- sanwun yí ami dó ɖè lɛ wɛ è ɖɔ xó enɛ lɛ na wutu ɔ, jikpá elɔ ɖò gesí dó palaɖisi jixwé tɔn wɛ, ɖò Mawu ɖesunɔ nukɔn. È na d’ajɔ mɛ yí ami dó ɖè gbejinɔtɔ́ lɛ bɔ ye na ɖu “atín e nɔ na gbɛ̀ jɔ gbɛ̀ mɛ” é. È na sɔ́ jɔmakú dó d’ajɔ ye.—1 Kɔ. 15:53.
25 NOVEMBRE–1er DÉCEMBRE
DƆKUN MAWUXÓ Ɔ TƆN ÐÉ LƐ | NǓÐEXLƐ́MƐ 4-6
“Sɔ́xátɔ́ Ɛnɛ Ðò Wezun Jí lɛ É”
Sɔ́xátɔ́ Ɛnɛ Lɛ: Mɛ̌ Mɛ̌ É ka nú Ye?
Mɛ̌ ka ɖò sɔ́ wewé ɔ kun wɛ? È mɔ nǔ e na d’alɔ mǐ bɔ mǐ na tuùn mɛ ɔ é ɖò wema Biblu tɔn ɖokpo ɔ e nyí Nǔɖexlɛ́mɛ é mɛ; é wɛ wá ɖexlɛ́ ɖɔ sɔ́xátɔ́ jixwé tɔn enɛ nyí “Mawuxó” ɔ. (Nǔɖexlɛ́mɛ 19:11-13) Jezu Klisu wɛ è na tɛnmɛ-nyikɔ enɛ, ɖó é wɛ nyí ɖɛ̌mɛnu Mawu tɔn wutu. (Jaan 1:1, 14) Gɔ́ na ɔ, è ylɔ́ ɛ ɖɔ “Axɔ́su axɔ́su lɛ tɔn; Aklunɔ aklunɔ lɛ tɔn” bo lɛ́ ɖɔ dó wǔ tɔn ɖɔ é nɔ nyí “Gbejinɔtɔ́, bo nɔ nyí Titewungbe.” (Nǔɖexlɛ́mɛ 19:11, 16) É ɖò wɛn ɖɔ, é ɖó acɛ bo na wà nǔ axɔ́su ahwanfuntɔ́ ɖé ɖɔhun, bo ka na zán hlɔnhlɔn tɔn ɖò ali masɔgbe ɖebǔ nu ǎ. Amɔ̌, nǔkanbyɔ ɖé lɛ ɖíe.
wp17.3 4 akpá. 5
Sɔ́xátɔ́ Ɛnɛ Lɛ: Mɛ̌ Mɛ̌ É ka nú Ye?
Hwetɛnu sɔ́xátɔ́ lɛ ka jɛ sɔ́ yetɔn lɛ kun jí? Ðǒ ayi wu ɖɔ sɔ́xátɔ́ nukɔntɔn ɔ ee nyí Jezu é jɛ sɔ́ tɔn kun jí hwenu e è na ɛ axɔ́sugbakún é. (Nǔɖexlɛ́mɛ 6:2) Hwetɛnu è ka sɔ́ Jezu axɔ́su ɖò jixwé? É nyí hwenu e é lɛkɔ yì jixwé ɖò kú tɔn gudo é ǎ. Biblu xlɛ́ ɖɔ é nɔte bɔ táan ɖé wá yì hwɛ̌. (Eblée lɛ 10:12, 13) Jezu ɖɔ nǔ e na zɔ́n bɔ ahwanvu tɔn lɛ na tuùn vivɔnu táan enɛ tɔn kpo bǐbɛ̌mɛ axɔ́suɖuɖu tɔn tɔn ɖò jixwé kpo é nú ye. É ɖɔ ɖɔ hwenu e emi na jɛ acɛ kpa jí é ɔ, ninɔmɛ gbɛ̀ ɔ tɔn na huzu bo na tlɛ́n asá bǐ. Ahwan na tɔ́n, adɔ na tɔ́n, bɔ jɛmɛji lɛ na gbà nǔ. (Matie 24:3, 7; Luki 21:10, 11) Tlolo e Wɛkɛ Hwan Nukɔntɔn ɔ bɛ́ ɖò 1914 é ɔ, é jɛ wě ɖɔ gbɛ̀ ɔ bǐ byɔ hwenu wuvɛ̌ tɔn e Biblu ylɔ́ ɖɔ “azǎn gudogudo tɔn lɛ” é mɛ.—2 Timɔtée 3:1-5.
Sɔ́xátɔ́ Ɛnɛ Lɛ: Mɛ̌ Mɛ̌ É ka nú Ye?
Sɔ́xátɔ́ enɛ nɔte nú ahwanfunfun. Ð’ayi wu ɖɔ é kún nyí akɔta ɖé lɛ kpowun tɛntin wɛ é ɖè fífá sín ó, loɔ, ayikúngban ɔ bǐ jí wɛ é bló bɔ ahwanfunfun gbakpé. Ðò 1914 ɔ, azɔn nukɔntɔn e è fun ahwan ɖé gbɔn gbɛ̀ ɔ bǐ mɛ ɖò hwenuxó mɛ é nɛ. Wɛkɛ hwan wegɔ́ e tlɛ vívá nǔ hú mɔ̌ é jɛ túnú tɔn. Gbeɖiɖó ɖé lɛ ɖɔ ɖɔ gbɛtɔ́ e ahwanfunfun hu gbɔn gbɛ̀ ɔ mɛ sín 1914 é hú livi 100! Gɔ́ na ɔ, mɛ wɔbuwɔbu ɖevo lɛ tíìn bɔ ahwan zɔ́n bɔ ye nyí wɔ̌nɖowǔnanɔ.
wp17.3 5 akpá. 4-5
Sɔ́xátɔ́ Ɛnɛ Lɛ: Mɛ̌ Mɛ̌ É ka nú Ye?
“Un kpɔ́n, lobo mɔ sɔ́ wiwi ɖokpo; mɛ e ɖò sɔ́ ɔ jí ɔ hɛn nǔdagan ɖokpo alɔ mɛ. Un sè gbè ɖé gosin nǔɖogbɛ ɛnɛ lɛ tɛntin, bo ɖɔ: ‘Blěe kilóo ɖokpo géé jɛn è nɔ zé azɔ̌kwɛ gbè ɖokpo tɔn ɔ bǐ dó xɔ na; ɔji kilóo atɔn wɛ è nɔ zé azɔ̌kwɛ gbè ɖokpo tɔn ɔ bǐ dó xɔ na. Amɔ̌, ma ɖ’alɔ ami kpo vɛ̌ɛn kpo wu ó.’”—Nǔɖexlɛ́mɛ 6:5, 6.
Sɔ́xátɔ́ enɛ nɔte nú adɔ. Ðò fí ɔ, mǐ mɔ ɖɔ adɔ tɔ́n kaka bɔ è nɔ sɔ́ azɔ̌kwɛ gbè ɖokpo tɔn ɔ bǐ dó xɔ blěe kilóo ɖokpo na! (Matie 20:2) Azɔ̌kwɛ ɖokpo enɛ sixu xɔ ɔji e ma xɔ akwɛ sɔ blěe ɖebǔ ǎ é kilóo atɔn géé. Fitɛ enɛ ka sixu jɛ nú xwédo ɖaxó ɖé? Enɛ wu ɔ, è gb’akpá nú gbɛtɔ́ lɛ ɖɔ ye ni ma zán nǔɖuɖu ayihɔngbe ayihɔngbe tɔn lɛ hannyahannya ó; nǔɖuɖu ayihɔngbe ayihɔngbe tɔn hwenɛnu tɔn e mɛ lɛ nɔ yawǔ zán é wɛ ami ɔ kpo vɛ̌ɛn ɔ kpo nɔte na.
wp17.3 5 akpá. 8-10
Sɔ́xátɔ́ Ɛnɛ Lɛ: Mɛ̌ Mɛ̌ É ka nú Ye?
Sɔ́xátɔ́ ɛnɛgɔ́ ɔ nɔte nú kú e azɔn kpo nǔ ɖevo lɛ kpo nɔ dɔn wá é. Ðò 1914 gudo tlolo ɔ, azɔn e nɔ nyí grippe espagnole é hu gbɛtɔ́ livi mɔkpan. Ðibla yì gbɛtɔ́ livi 500 mɔ̌ wɛ bɛ́ azɔn ɔ, é bló ɖibla yì mɛ e ɖò gbɛ̀ hwenɛnu lɛ é 1 ɖò 3 jí.
Amɔ̌, bǐbɛ̌mɛ azɔn lɛ tɔn kpowun wɛ grippe espagnole ɔ nyí. Dobanúnǔtɔ́ lɛ lin ɖɔ gbɛtɔ́ livi kanweko wɛ azɔn e nyí sakpata é (variole) hu ɖò xwè kanweko 20gɔ́ ɔ mɛ. Kaka jɛ égbé ɔ, è ɖò dò ba nú nǔ wɛ tawun ɖò lanmɛ na nɔ ganji linu có, gbɛtɔ́ livi mɔkpan wɛ SIDA, kpɛ́nwé kpo zǎnsukpɛzɔn kpo ko gblé gbɛ̀ dó na.
Nǔ ɖokpo ɔ mɛ jɛn é nɔ tɔ́n kɔ dó, é wɛ nyí kú; ahwan ɖò étɔn wu, adɔ lɔmɔ̌ ɖ’ewu, bɔ azɔn lɔ ɖò étɔn ɖɔ wɛ. Yɔdo ɖò mɛ lɛ bɛ́ kplé wɛ magbokɔ, bɔ nukúnɖiɖó ɖě ɖè ǎ.
Nǔ Xɔ Akwɛ Biblu Tɔn lɛ Biba
re 76-77 akpá. 8
Axɔ́suzinkpo Jixwé Tɔn Jehovah Tɔn Sín Susu
8 Jaan tuùn ɖɔ è nɔ sɔ́ vɔsanúxwlémawutɔ́ lɛ bonu ye na wà sinsɛnzɔ́ ɖò goxɔ xóxó ɔ mɛ. Enɛ wu ɔ, nǔ e é mɔ bo tinmɛ bɔ d’ewu é sixu ko kpaca ɛ: “Axɔ́suzinkpo ko nukún ɛnɛ ɖevo lɛ lɛ́ dó axɔ́suzinkpo enɛ, bɔ mɛxo ko nukún ɛnɛ ɖò ayǐ jinjɔn ɖò axɔ́suzinkpo enɛ lɛ jí. Ye dó awu wewé, bo xwè axɔ́sugbakún e è sɔ́ siká dó bló na é.” (Nǔɖexlɛ́mɛ 4:4) Vɔsanúxwlémawutɔ́ lɛ tɛnmɛ ɔ, mɛxo 24 wɛ è sɔ́ ɖó axɔ́suzinkpo lɛ jí bo xwè axɔ́sugbakún nú ye axɔ́su ɖɔhun. Mɛ̌ mɛ̌ e ka nyí mɛxo enɛ lɛ? Klisanwun yí ami dó ɖè ɖěɖee fɔ́n sín kú lobo ɖò tɛn e sín akpá Jehovah dó nú ye ɖò jixwé é mɛ lɛ é wɛ. Nɛ̌ mǐ ka wà gbɔn bo tuùn mɔ̌?
re 80 akpá. 19
Axɔ́suzinkpo Jixwé Tɔn Jehovah Tɔn Sín Susu
19 Etɛ nǔɖogbɛ enɛ lɛ ka nɔte na? Nǔmimɔ e xó gbeyiɖɔ ɖevo e nɔ nyí Ezekiyɛli é ɖɔ é ɖé d’alɔ mǐ bɔ mǐ mɔ xósin ɔ. Ezekiyɛli mɔ Jehovah ɖò axɔ́suzinkpo jí ɖò ahwankɛkɛ jixwé tɔn ɖé mɛ, bɔ nǔɖogbɛ ɖěɖee cí ee xó Jaan ɖɔ lɛ é ɖɔhun lɛ é ɖò gudo tɔn. (Ezekiyɛli 1:5-11, 22-28) Nukɔnmɛ ɔ, Ezekiyɛli lɛ́ mɔ ahwankɛkɛ enɛ, bɔ nǔɖogbɛ lɛ ɖò gudo tɔn. Amɔ̌ dìn tɔn ɔ, é ɖɔ ɖɔ nǔɖogbɛ enɛ lɛ nyí celubɛ́ɛn lɛ. (Ezekiyɛli 10:9-15, nwt) Enɛ wu ɔ, nǔɖogbɛ ɛnɛ e Jaan mɔ lɛ é nɔte nú celubɛ́ɛn Mawu tɔn maxamaxa lɛ; nǔɖiɖó e ɖò tɛn nukúnɖeji mɛ ɖò tutoblonunu jixwé tɔn Mawu tɔn mɛ lɛ é wɛ nú ye. Mɔ e Jaan mɔ bɔ celubɛ́ɛn lɛ ɖò tɛn e sɛkpɔ Jehovah sɔmɔ̌ é ɖé mɛ é na nyí nǔ yɔyɔ̌ n’i ǎ, ɖó ɖò goxɔ Mawu tɔn hwexónu tɔn ɔ mɛ ɔ, è sɔ́ siká dó bló celubɛ́ɛn we na dó akɔjijɛgbá ɔ jí; akɔjijɛgbá ɔ wɛ ka nɔte nú axɔ́suzinkpo Jehovah tɔn. Jehovah nɔ na sɛ́n lɛ akɔta ɔ gbɔn avla celubɛ́ɛn enɛ lɛ tɔn mɛ.—Tíntɔ́n 25:22; Ðɛhan 80:2.
cf 36 akpá. 5-6
“Kpɔ́n: Kinnikinni E Ðò Akɔta Judáa Tɔn Mɛ” É
5 Hwɛhwɛ ɔ, kinnikinni nɔ nɔte nú akɔ́nkpinkpan. A ko nɔte ɖò kinnikinni’sú ɖaxó ɖé nukɔn kpɔ́n à? Nú mɔ̌ wɛ é nyí ɔ, vlafo aja e mɛ nǔwlikanlin ɔ ɖè é wɛ gbò mi mɛ we lɛ bɔ a ɖò zɔ d’è. É ɖò mɔ̌ có, nǔ mɔhun sixu dó xɛsi tawun. Ee a ɖò kanlin ɖaxó agbɔ̌nɖowǔnanɔ enɛ kpɔ́n wɛ, bɔ é lɔmɔ̌ ɖò kpinkpɔn we wɛ, bo ɖò sisɛkpɔ we wɛ é ɔ, é na vɛwǔ tawun ɖɔ a ni lin ɖɔ é na ɖi xɛsi, bo hɔn. Biblu ɖɔ xó dó “kinnikinni” wu, bo ɖɔ “é wɛ kpan akɔ́n hú lan lɛ bǐ; é nɔ hɔn ɖò nǔɖe nukɔn ǎ.” (Nǔnywɛxó 30:30) Akɔ́nkpinkpan e ɖɔhunkɔ Klisu ɖó é nɛ.
6 Mǐ ni ɖɔ xó dó ali e nu Jezu ɖè akɔ́nkpinkpan xlɛ́ kinnikinni ɖɔhun ɖè é atɔn jí: é jɛhun dó nǔgbo ɔ jí, flɔ́ zo dó glɔ̌ nú nǔjlɔjlɔwiwa, bo lɛ́ dɛ ɖò gbeklánxámɛ nu. Mǐ na mɔ ɖɔ nú mǐ nyí akɔ́nkpantɔ́ ɖò jɔwamɔ linu alǒ gbɔ ɔ, mǐ bǐ sixu xwedó kpɔ́ndéwú Jezu tɔn ɖò akɔ́nkpinkpan ɖiɖexlɛ́ mɛ.