Lee Asú kpo Asì kpo lɛ Sixu Hɛn Alɔwliwli Yetɔn Lidǒ Gbɔn É

Kpɔ́ndéwú ɖagbe asú kpo asì kpo e ɖè wanyiyi kpo sísí kpo xlɛ́ yeɖée é tɔn ɖé wɛ Ablaxamu kpo Sala kpo nyí. (Bǐ 12:11-13; 1Pi 3:6) Amɔ̌, alɔwliwli yetɔn nyí alɔwliwli maɖóblɔ̌ ǎ, bɔ ye ɖó na lɛ́vɔ ɖí xwi xá wuvɛ̌ gegě ɖò gbɛzán yetɔn mɛ. Etɛ kpɔ́ndéwú Ablaxamu kpo Sala kpo tɔn ka sixu kplɔ́n asú kpo asì kpo lɛ?

Mi nɔ ɖɔ xó ɖó kpɔ́. Enyi mɛ e a da é ɖò akpɔ mɔ wɛ alǒ ɖò xomɛsin jí bo ɖɔ xó hǔn, nɔ yí gbè n’i kpo gbè fífá kpo. (Bǐ 16:5, 6) Mi nɔ bló tuto bo nɔ zán hwenu ɖó kpɔ́. Nɔ ɖɔ xó, alǒ wà nǔ e na na jiɖe mɛ e a da é ɖɔ a yí wǎn n’i lɛ é hwebǐnu. Hugǎn bǐ ɔ, mi nɔ kplɔ́n nǔ ɖó kpɔ́, xoɖɛ ɖó kpɔ́, wà sinsɛnzɔ́ ɖó kpɔ́ dó na tɛn Jehovah ɖò alɔwliwli mitɔn mɛ. (Nǔt 4:12) Alɔwliwli e lidǒ lɛ é nɔ wlí yɛ̌yi nú Jehovah, ee nyí Dǒwatɔ́ tuto mímɛ́ enɛ tɔn é.

KPƆ́N VIDEO LEE A SIXU HƐN ALƆWLIWLI TOWE LIDǑ D’EJI GBƆN É Ɔ, ENƐ GUDO HǓN, NA XÓSIN NÚ NǓKANBYƆ E BƆ D’EWU LƐ É:

• Ðò nǔkpinkpɔn-dó-kplɔ́n-nǔ ɔ mɛ ɔ, nǔ ɖětɛ lɛ ka xlɛ́ ɖɔ Jowɛli kpo Lea kpo ko ɖò kínklán wɛ?

• Etɛwu lee nǔ cí nú mɛ tawun é ɖiɖɔ nú mɛɖée ka ɖò taji ɖò alɔwliwli ɖé mɛ?

• Nɛ̌ kpɔ́ndéwú Ablaxamu kpo Sala kpo tɔn ka d’alɔ Jowɛli kpo Lea kpo gbɔn?

• Afɔ tɛ lɛ Jowɛli kpo Lea kpo ka ɖè dó hɛn alɔwliwli yetɔn lidǒ?

• Etɛwu asú kpo asì kpo lɛ ma ka ɖó na ɖó nukún ɖɔ alɔwliwli yetɔn ni nyí alɔwliwli maɖóblɔ̌ ǎ?