Etɛ lɛ A ka Sixu Kplɔ́n Ðò Klisanwun E Ko Mɔ Nǔ Kpɔ́n lɛ É Gɔ́n?

Nɔví ɖěɖee ɖò Jehovah sɛn wɛ b’ɛ ko bló xwè gegě lɛ é ɖò agun mǐtɔn lɛ mɛ. Lee ye ganjɛ Jehovah wu gbɔn é sixu kplɔ́n nǔ mǐ. Mǐ sixu kan nǔ byɔ ye dó tan tutoblonunu Jehovah tɔn tɔn, kpo lee Jehovah d’alɔ ye bɔ ye ɖu ɖò wuvɛ̌ e ye mɔ lɛ é jí gbɔn é kpo wu. Mǐ tlɛ sixu ylɔ́ mɛxomɔ vívɛ́ enɛ lɛ ɖé wá Sinsɛn-Biblo Xwédo tɔn mǐtɔn tɛnmɛ b’ɛ na má nǔ e é ko mɔ kpɔ́n lɛ é xá mǐ.

Enyi Klisanwun e ko mɔ nǔ kpɔ́n é ɖé wɛ a nyí hǔn, vo bo nɔ ɖɔ xó dó nǔɖiɖi towe wu nú Klisanwun winnyawinnya lɛ. Jakɔbu kpo Jozɛfu kpo má nǔ e ye mɔ kpɔ́n lɛ é xá kúnkan yetɔn lɛ. (Bǐ 48:21, 22; 50:24, 25) Jehovah ɖɔ nú tatɔ́ xwédo tɔn lɛ ɖɔ ye ni kplɔ́n nǔ vǐ yetɔn lɛ dó azɔ̌ ɖaxó ɖaxó emitɔn lɛ wu. (Sɛ́ 4:9, 10; Ðɛ 78:4-7) Ðò hwe mǐtɔn nu ɔ, mɛjitɔ́ lɛ kpo mɛ ɖevo e ɖò agun ɔ mɛ lɛ é kpo sixu ɖɔ nǔ ɖagbeɖagbe e ye mɔ bɔ Jehovah bló gbɔn tutoblonunu tɔn gblamɛ lɛ é nú mɛ winnyawinnya lɛ.

KPƆ́N VIDEO BǓNINƆ HWENU E È GBƐ́ AZƆ̌ MǏTƆN É Ɔ, ENƐ GUDO HǓN, NǍ XÓSIN NÚ NǓKANBYƆ ELƆ LƐ:

• Nɛ̌ alaxɔ Autriche tɔn ka d’alɔ nɔví mǐtɔn lɛ hwenu e è gbɛ́ azɔ̌ mǐtɔn ɖò tò ɖé lɛ mɛ é gbɔn?

• Nɛ̌ nɔví e ɖò tò enɛ lɛ mɛ lɛ é ka kpéwú bo hɛn nǔɖiɖi yetɔn syɛnsyɛn b’ɛ ma vɔ́da ǎ gbɔn?

• Etɛwu wɛnjlatɔ́ Roumanie tɔn gegě ka jó tutoblonunu Jehovah tɔn dó? Nɛ̌ ye ka lɛkɔ wá gbɔn?

• Nɛ̌ nǔ enɛ e jɛ lɛ é ka na hlɔnhlɔn nǔɖiɖi towe gbɔn?