Nǔ Wɛnjlatɔ́ E Ko Mɔ Nǔ Kpɔ́n Hú We lɛ É Ni Kplɔ́n Nǔ We
Wɛnjlatɔ́ ɖěɖee ɖò agun ɔ mɛ bo ko mɔ nǔ kpɔ́n lɛ é nɔ xɔ akwɛ nú mǐ tawun. Ye mɛ ɖé lɛ ko ɖò Jehovah sɛ̀n wɛ kpo gbejininɔ kpo sín xwè mɔkpan ɖíe. Sinsɛnzɔ́ ɔ sixu ko bí alɔ nú ye mɛ ɖevo lɛ ɖò azǎnví elɔ lɛ mɛ. Wɛnjlatɔ́ enɛ lɛ ko mɔ lee Jezu xlɛ́ ali agun Klisanwun tɔn ɖò azǎn gudo gudo tɔn elɔ lɛ mɛ, bo gbló ada nú wɛnɖagbejijlazɔ́ ɔ kpo nǔ kplɔnkplɔn mɛ lɛ bonu ye ni huzu ahwanvu sín azɔ̌ ɔ kpo gbɔn é. (Mat. 28:19, 20) Gbɔn alɔɖiɖo ɖò sinsɛnzɔ́ enɛ mɛ gblamɛ ɔ, ye mɔ “hlɔnhlɔn aditi” ɔ hwenu e ye kpannukɔn wuvɛ̌ lɛ kpo mɛtɛnkpɔn lɛ kpo é. (2 Kɔ. 4:7) Nǔ gègě wɛ è sixu kplɔ́n ɖò wɛnjlatɔ́ enɛ lɛ e ko mɔ nǔ kpɔ́n é gɔ́n. Enyi ali tɔn hun nú ye ɔ, nǔ e ye tuùn lɛ é kpinkplɔn mɛ ɖevo lɛ nɔ víví nú ye. (Ðɛh. 71:18) Enɛ wu ɔ, mǐ ɖó na ba wlɛnwín lɛ bonu ye ni kplɔ́n nǔ mǐ. Nɛ̌ mǐ ka sixu wà mɔ̌ gbɔn?
Ðò Sinsɛnzɔ́ ɔ Mɛ. Wɛnjlatɔ́ yɔyɔ̌ lɛ alǒ ee ma ko mɔ nǔ kpɔ́n sɔmɔ̌ ǎ lɛ é ɖó hudo azɔ̌ kpinkplɔn tɔn bo na dó sixu wà sinsɛnzɔ́ ɔ ganji. Ayi ɖiɖó lee wɛnjlatɔ́ e ko zin lɛ é nɔ wà nǔ gbɔn ɖò sinsɛnzɔ́ ɔ mɛ é wu sixu kplɔ́n nǔ gègě mɛ. (Kpɔ́n xota “Hẹn Zohunhun Towe Go to Lizọnyizọn lọ Mẹ,” ɖò Atọ̀họ̀-Nuhihọ́ lọ Tọn 15 février 2015 tɔn mɛ, bo kpɔ́n akpáxwé atɔngɔ e ɖò xotalá “Nọ Gọalọna Mẹhe Ma Tindo Numimọ Sọmọ Lẹ” glɔ é.) Lè tɛ lɛ azɔ̌wiwa xá mɛ mɔhun lɛ ɖò sinsɛnzɔ́ ɔ mɛ ka ko hɛn wá nú we?
A ka sixu byɔ wɛnjlatɔ́ e kpé nǔ wu ganji é ɖé ɖɔ é ni w’azɔ̌ xá we ɖò sinsɛnzɔ́ ɔ mɛ à? Enyi wɔ̌nɖowǔnanɔ wɛ n’i ɔ, vlafo a sixu nɔ kplá mɛ e a nɔ kplɔ́n Biblu xá é ɖé hɛn yì xwé tɔn gbè hwɛhwɛ, bɔ mi nɔ kplɔ́n nǔ ɔ xá mɛ ɔ. Ðò nùkplɔnkplɔn ɔ gudo hǔn, kàn nǔ e wu wɛnjlatɔ́ ɔ ɖ’ayi lɛ é byɔ ɛ, bo lɛ́ byɔ ɛ ɖɔ è ni ɖè wě xá we.
Zǎn Hwenu Hwiɖesunɔ Tɔn lɛ Xá Ye: Nɔ zán hwenu kpo wɛnjlatɔ́ e ko mɔ nǔ kpɔ́n lɛ é kpo bo na dó sixu tuùn ye. Ylɔ ye mɛ ɖokpo nú é wá nɔ sinsɛn-biblo xwédo tɔn mitɔn sín tɛnmɛ xá mi, bonu mi kàn nǔ byɔ ɛ. Enyi wɔ̌nɖowǔnanɔ wɛ wɛnjlatɔ́ ɔ nyí ɔ, mi ka sixu bló tuto bo na ɖu sinsɛn-biblo xwédo tɔn ɔ sín vivǐ ɖò xwé tɔn gbè à? Kàn lee é mɔ nugbǒ ɔ gbɔn é byɔ ɛ. Nyɔna tɛ lɛ sín vivǐ é ka ko ɖu? Nukɔnyiyi tɛ wu é ka ɖó ayi ɖò xá ɔ mɛ? Awǎjijɛ tɛ é ka mɔ ɖò Jehovah sinsɛn mɛ?
Mɔ nukúnnú jɛ nǔ mɛ bo lɛ́ nɔ jlɛ̌ jí ɖò nǔ e ɖó nukún wɛ a ɖè lɛ é mɛ. Mǐ mɛ bǐ ɖɔhun ɔ, nùnina vovo wɛ mɛ e nyí wɛnjlatɔ́ b’ɛ ko lín lɛ é ɖokpo ɖokpo ɖó ɖò sinsɛnzɔ́ ɔ mɛ. (Hlɔ. 12:6-8) Ye mɛ ɖé lɛ sín xwè ko sɛyi, bɔ enɛ sixu zɔ́n bɔ hwenu e ye na zán xá mǐ é ɖó dogbó. É ɖò mɔ̌ có, ye sixu kplɔ́n nǔ gègě mǐ, ɖó nǔ ɖěɖee ye ko mɔ kpɔ́n ɖò Jehovah sinsɛn kpo gbejininɔ kpo mɛ lɛ é wutu.