ALƆDÓ NÚ XWÉDO LƐ́ | ALƆWLÍWLÍ
Lěe è ná zé azɔ̌ “ɖó tɛn tɔn mɛ” gbɔn é
Kpó nǔnywɛ́ xwítíxwítí gayɛnu tɔn kpó ɔ, gǎn towe, azɔ̌gbɛ́ towe lɛ́, alǒ axisinɔ lɛ́ sixú nɔ ɖó nukún ɖɔ hwi ní nɔ ɖo gbesisɔmɛ hweɖěbǔnu ɖo gan ɖěbǔ mɛ nú azɔ̌. Amɔ̌, énɛ́ ná zɔ́n bɔ é ná vɛ́ wǔ bɔ a ná ɖe azɔ̌ towe ɖó vo nú nǔ ɖěvo lɛ́ ɖo gbɛzán towe mɛ, káká jɛ alɔwlíwlí towe jí. É sixú lɛ́ vɛ́ wǔ bɔ a ná nɔ sɔ́ ayi ɖó nǔ e ɖo tají hú gǎn ɖo gbɛzán towe mɛ lɛ́ é jí.
Nǔ e a ɖó ná tuun é
Nǔnywɛ́ xwítíxwítí sixú cyɔ́n yɛ dogbó e ɖo azɔ̌ towe kpó alɔwlíwlí towe kpó tɛ́ntin é jí. Wǎgbɔ tɔn ɔ, mɛ ylɔ́ylɔ́, wěmasɛ́dómɛ gbɔn Ɛntɛnɛ́ti jí, alǒ wěmasɛ́dómɛ ɖěbǔ e kúnkplá azɔ̌ ɔ, bó wá ɖo azɔ̌ ganmɛ gúdo é sixú cí myɔ e è ɖó ná yá wǔ xo cí é ɖé ɖɔhun.
“È ná wá xwégbe ɖo azɔ̌ gúdo bó zán hwenu ɖó kpɔ́ xá xwédo mɛtɔn cí nǔ e ma sixú nyɔ́ bló ǎ é ɖé ɖɔhun ɖo égbé, ɖó nú wěmasɛ́dómɛ kpó mɛ ylɔ́ylɔ́ kpó e kúnkplá azɔ̌ ɔ lɛ́ é ɖo wǐwá wɛ ɔ, è nɔ sɔ́ ayi ɖo yědɛɛ lɛ́ jí, bó sɔ́ nɔ sɔ́ ayi ɖó mɛ e è da é jí ǎ.”—Jeanette.
Nú a ná nɔ jlɛ̌ jí ɖo azɔ̌ towe kpó xwédo towe kpó tɛ́ntin ɔ, é byɔ́ ɖɔ a ní ɖe afɔ ɖé. Ényí a ma bló tuto ɖé ǎ ɔ, azɔ̌ towe ná ɖibla yí ta sín xwédo towe sí.
“Hwɛhwɛ ɔ, mɛ e è da é wɛ nɔ nyí mɛ nukɔntɔn e è nɔ dóvɛ̌ ná é, ɖó è nɔ lin nǔ gbɔn lě: ‘Ɔɔɔ, é ná mɔ nukúnnú jɛ mɛ. É ná sɔ́ hwɛ kɛ mì. Un ná wá zán hwenu ɖó kpɔ́ xá ɛ ɖo nukɔnmɛ.’”—Holly.
Wěɖexámɛ lɛ́ dó jlɛ̌jíninɔ dó azɔ̌ wú wú
Alɔwlíwlí towe ní ɖo tají nú we jɛ nukɔn. Biblu ɖɔ: “Gbɛtɔ́ ní bó ma klán nǔ e Mawu dɔn cá ɔ ó.” (Matíe 19:6) Nú a ma ná lɔn nú mɛɖé ná “klán” we sín mɛ e a da é wú ǎ ɔ, étɛ́wú a ka nɔ lɔn bɔ azɔ̌ towe ná wa mɔ̌?
“Axisinɔ ɖé lɛ́ nɔ lin ɖɔ ɖó émí nɔ sú axɔ́ mɛ wútu ɔ, è ɖó ná nɔ wa azɔ̌ nú émí hweɖěbǔnu e émí ɖó hudó mɛtɔn dó é. Ðó alɔwlíwlí ce ɖo tají nú mì wútu ɔ, un nɔ ɖɔ nú yě ɖɔ un kún nɔ wa azɔ̌ ɖo azǎn e ma nyí azɔ̌zán ce jí ǎ lɛ́ é ó, lé un ná wá ylɔ́ yě ɖo malín malín mɛ.”—Mark.
Kanbyɔ́ hwiɖée ɖɔ: ‘Nǔwiwa ce lɛ́ ka nɔ xlɛ́ ɖɔ alɔwlíwlí ce ɖo tají nú mì hú azɔ̌ ce a?’
Nú é byɔ́ ɖó mɔ̌ hǔn, ɖɔ éǒ. Biblu ɖɔ: “Nǔ wa ɖó jlɛ̌ jí ɔ, nǔnywɛ́tɔ́ lɛ́ sí wɛ è nɔ mɔ ɖe.” (Nǔnywɛ́xó 11:2) Nú a ɖo jlɛ̌ jí ɔ, a sixú mɔ ɖɔ é ná nyɔ́ hú gǎn ɖɔ émí ní nya ta ɖo azɔ̌ ɖé lɛ́ nu, alǒ zé yě nú mɛ ɖěvo.
“Plɔnbyé wɛ nú mì, énɛ́ wú ɔ, nú mɛɖé ba ɖɔ nyi ná wa azɔ̌ ɖé nú émí cacaca ɔ, ado nɔ ɖo huhu i wɛ. Nú un ma sixú kpé wú ɖo gan e mɛ ba dó wɛ é ɖe é ǎ ɔ, un nɔ sɛ́ ɛ dó mɛ ɖěvo gɔ́n.”—Christopher.
Kanbyɔ́ hwiɖée ɖɔ: ‘Nú gbeyíyí nú azɔ̌ ɖé ná zɔ́n bɔ mɛ e un da é ná mɔ ɖɔ un dóvɛ̌ nú émí ɔ, un ka ɖo gbesisɔmɛ bó ná nya ta ɖ’é nu a? Étɛ́ mɛ e un da é ka ná ɖɔ?’
Mi blǒ tuto ɖó kpɔ́. Biblu ɖɔ: “Nǔ bǐ wɛ ɖó hwenu.” (Nǔnywɛ́tɔ́xó 3:1) Hwenu e alɔnu towe ján tawun ɖo azɔ̌mɛ é wɛ nyí hwenu e é ɖo tají tawun ɖɔ a ní bló tuto bó ná nɔ zán hwenu ɖó kpɔ́ xá mɛ e a da é é. Ka mɔ nǔ jɛ wú ɖɔ émí bló mɔ̌.
“Hwɛhwɛ ɔ, nú alɔnu mǐtɔn ján tawun ɔ, mǐ nɔ ba hwenu bó nɔ nɔ kpɔ́ ɖo fí e nǔɖé ma sixú dó ya nú mǐ ɖe ǎ é, é sixú nyí nǔ ɖu ɖó kpɔ́, alǒ afɔkanmɛ dindɛn ɖo xutó mɔ̌.”—Deborah.
Kanbyɔ́ hwiɖée ɖɔ: ‘Un ka nɔ bló tuto hwenu e un ná nɔ sixú sɔ́ ayi ɖó mɛ e un da é jí mlɛ́mlɛ́ bɔ nǔɖé ma ná fɛ́ ayi ce ǎ é tɔn a? Xósin tɛ́ mɛ e un da é ka ná na?’
Cí alǒkan towe. Biblu ɖɔ: “Mɔ do nú nǔ e nyí nǔjɔnǔ hú gǎn lɛ́ é.” (Filípunu lɛ́ 1:10, nwt) É ka sixú nyɔ́ bló bɔ a ná nɔ xo alǒkan towe cí hweɖélɛ́nu, bónú wěmasɛ́dómɛ e kúnkplá azɔ̌ towe lɛ́ é ní ma wá dó ya nú we ó a?
“Un nɔ dó gǎn ɖésú bó nɔ sɔ́ azɔ̌ ɖó tɛn tɔn mɛ. Énɛ́ gúdo ɔ, un nɔ sɔ́ alǒkan ce ɖó alɔ ɖé jí bɔ é sɔ́ nɔ fɛ́ ayi ce ǎ.”—Jeremy.
Kanbyɔ́ hwiɖée ɖɔ: ‘Dandan wɛ ɖɔ alǒkan ce ní nɔ ɖo títá jí, vlafo ɖó gǎn ce alǒ axisinɔ ɖé ná ɖó hudó ce kpowun wútu a? Xósin tɛ́ mɛ e un da é ka ná ná?’
Nɔ jlɛ̌ jí. Biblu ɖɔ: “Mi nú mɛ lɛ́ . . . ní tuun ɖɔ mi nɔ nɔ jlɛ̌ jí.” (Filípunu lɛ́ 4:5, nwt) È ná ɖɔ xó jɔ xó ɔ, é sixú wá jɛ bɔ azɔ̌ ɔ ná d’avaja tuto xwédo towe tɔn lɛ́ mɛ hweɖélɛ́nu. Ði kpɔ́ndéwú ɔ, azɔ̌ e mɛ e a da é nɔ wa é sixú byɔ́ ɖɔ alǒkan tɔn ní nɔ ɖo títá jí ɖo azɔ̌ ganmɛ gúdo. Nɔ nɔ jlɛ̌ jí, bó ma nɔ byɔ́ nǔ gěgé ɖo mɛ e a da é sí zɛ xwé wú ó.
“Asú ce nɔ wa ajɔ̌ kléwún ɖé, bɔ hwɛhwɛ ɔ, axisinɔ lɛ́ nɔ ɖó hudó tɔn ɖo azɔ̌ ganmɛ gúdo b’ɛ ɖó ná yi. Hweɖélɛ́nu ɔ, é nɔ ɖ’akpɔ nú mì, amɔ̌, ɖó mǐ ko nɔ zán hwenu gěgé ɖó kpɔ́ wútu ɔ, un nɔ mɔ nǔ jɛ xó tɔn mɛ.”—Beverly.
Kanbyɔ́ hwiɖée ɖɔ: ‘Ðó un mɔ nǔ jɛ nǔ e mɛ e un da é sín azɔ̌ nɔ byɔ́ é wú wútu ɔ, un ka nɔ gɔn nǔ byɔ́ ɖo así tɔn zɛ xwé wú a? Xósin tɛ́ mɛ e un da é ka ná ná?’
Alixlɛ́mɛ dó xóɖɔɖókpɔ́ wú
Jɛ nukɔn hwɛ̌ ɔ, mi mɛ ɖokpó ɖokpó sixú nɔ vovo bó gbéjé nǔkanbyɔ́ élɔ́ lɛ́ kpɔ́n. Énɛ́ gúdo hǔn, mi ɖɔ xó ɖó kpɔ́ dó xósin mi mɛ ɖokpó ɖokpó tɔn lɛ́ jí.
Mɛ e a da é ka ko savo kpɔ́n ɖɔ a nɔ lɛ́ hɛn azɔ̌ wá xwégbe wɛ a? Ényí mɔ̌ wɛ ɔ, a ka lin ɖɔ hwɛ tɔn jɔ à?
Ali tawun tawun tɛ́ lɛ́ nu a ka lin ɖɔ émí sixú lɛ́ dó gǎn d’é jí ɖe, bó ná dó nɔ jlɛ̌ jí ɖo azɔ̌ towe kpó gbɛzán towe kpó tɛ́ntin?
A ka ko lin ɖɔ é nɔ vɛ́ wǔ nú mɛ e émí da é, b’ɛ ná zé azɔ̌ ‘ɖó tɛn tɔn mɛ’ kpɔ́n à? Ényí mɔ̌ wɛ ɔ, kpɔ́ndéwú tɔn tɛ́ lɛ́ a ka flín?
Nú a mɔ ɖɔ é byɔ́ ɖɔ mɛ e a da é ní bló hǔzúhúzú ɖé lɛ́, bónú mi ná dó nɔ jlɛ̌ jí ɖo azɔ̌ kpó gbɛzán mitɔn kpó tɛ́ntin ɔ, hǔzúhúzú tɛ́ lɛ́ a ka ná ba ɖɔ é ní bló?