NǓ E MƐ WÍNNYÁWÍNNYÁ LƐ́ NƆ KANBYƆ́ LƐ́ É
Xɔ́ntɔnmɛninɔ: Akpáxwé 2: Étɛ́ un ka ɖó ná ɖó nukún ɖo xɔ́ntɔnmɛninɔ hwenu?
Mɛ e a xo go é ɖé sín nǔ jɛ towe jí, bɔ mi mɛ we lɛ́ bǐ wá gbeta ɔ kɔn bo ná byɔ́ xɔ́ntɔn mɛ, bo ná mɔ tɛn dó kpɔ́n ɖɔ mi ná nyí asú alǒ asi ɖagbe nú miɖée lɛ́ a jí. Ée mi ná ɖo kplɔ́nkplɔ́n wɛ bo ná tuun mǐɖée lɛ́ d’é jí é ɔ, étɛ́ a ka ɖó ná ɖó nukún?
Ðo xóta élɔ́ mɛ ɔ, mǐ ná ɖɔ xó dó nǔ élɔ́ lɛ́ jí:
Ðǒ nukún ɖɔ mi ná nɔ ɖɔ nǔgbó nú mǐɖée lɛ́
Ée hwi kpó xɔ́ntɔn towe kpó ná ɖo hwenu zán ɖó kpɔ́ wɛ é ɔ, mi ná kplɔ́n bo ná tuun nǔ gěgé dó miɖée lɛ́ wú. A ná kplɔ́n nǔɖé lɛ́ gbɔn lěe mɛ ɖě ɔ nɔ wa nǔ gbɔn é kpínkpɔ́n gblamɛ.
É ɖo mɔ̌ có, nǔɖé lɛ́ tíin bɔ é ná byɔ́ ɖɔ mi mɛ we lɛ́ ní ɖɔ xó d’é wú nyi wɛn. Ée a ná ɖo mɔ̌ wa wɛ é ɔ, tɛ́n kpɔ́n bo nɔ sɔ́ gbeta e kɔn a ná wá dó mɛ ɖě ɔ wú lɛ́ é jínjɔ́n nǔ e a tuun lɛ́ é jí, é ní ma nyí dó lěe nǔ cí nú we é jí ó.
Nǔ élɔ́ lɛ́ ɖo nǔ ɖěɖěe jí mi mɛ we lɛ́ ɖó ná ɖɔ xó dó lɛ́ é mɛ:
Akwɛ́. Axɔ́ ɖé ɖo kɔ nú we wɛ a? É nɔ vɛ́ wǔ nú we bónú a ná zán akwɛ́ towe kpó nǔnywɛ́ kpó wɛ a? Ényí a wlí alɔ ɔ, nɛ̌ hwi kpó mɛ e a da é kpó ka ná nɔ wá gbeta akwɛ́ e mi ná nɔ mɔ é kpó akwɛ́zínzán lɛ́ kpó tɔn lɛ́ kɔn gbɔn?
Lanmɛ ná nɔ ganjí. A ka ɖó lanmɛ syɛ́n hunsin ɖagbe a? A ka jɛ azɔn syɛ́nsyɛ́n ɖé kpɔ́n wɛ a?
Nǔ e gbé nya wɛ a ɖe lɛ́ é. Étɛ́ a ka jló ná sɔ́ gbɛ towe dó wa? Nǔ e gbé nya wɛ a ɖe lɛ́ é ka xo nǔ dó akpa ɖokpó ɔ mɛ xá nyɔ̌nu xɔ́ntɔn alǒ súnnu xɔ́ntɔn towe tɔn lɛ́ a? Ényí a wlí alɔ, bɔ ninɔmɛ ɖé lɛ́ wá zɔ́n bɔ a ma sɔ́ wá kpé nǔ e gbé nya wɛ a ɖe lɛ́ é wú ǎ ɔ, a ka ná kpo ɖo awǎjijɛ ɖó wɛ a?
Xwédo. A ɖo nukún kpé dó hǎgbɛ́ xwédo towe tɔn ɖé lɛ́ wú wɛ ɖo alɔnu din wɛ a? Nukúnkpédómɛwú mɔ̌hun ɖětɛ́ ka sixú lɛ́ wá xwetɔ́n ɖo sɔgúdo? A ba ná ɖó vǐ wɛ a? Ényí mɔ̌ wɛ ɔ, nabí?
Ényí mi ɖo xó ɖɔ dó nǔ énɛ́ lɛ́ jí wɛ ɔ, nɔ ɖɔ nǔgbó bo nɔ lɛ́ ɖɔ xó nyi wɛn. Ma hwlá xó ɖé alǒ sló kɔ ná, bo ná mɔ tɛn dó bló mɛ ɖagbe ɖo mɛ ɖě ɔ nukúnmɛ ó.—Eblée lɛ́ 13:18.
Ðo tamɛ lin d’é wú wɛ: Étɛ́ é ka byɔ́ ɖɔ a ní tuun dó mɛ e a ɖo xɔ́ntɔn mɛ xá é wú? Étɛ́ é ka ɖó ná tuun dó wǔ we? Ényí mi nɔ ɖɔ xomɛ nú miɖée lɛ́ ɔ, nɛ̌ énɛ́ ka ná zɔ́n bɔ mi ná wá kpé wú bo ná nɔ ɖɔ nǔgbó nú miɖée lɛ́ hwenu e mi ná wá gbeta ɔ kɔn bo ná wlí alɔ é gbɔn?
Nǔgbódodó Biblu tɔn: “Mɛ ɖokpó ɖokpó ní ɖɔ nǔgbó nú nɔzo tɔn.”—Efɛ́zinu lɛ́ 4:25, MAWUXÓWÉMA.
“Nyɔ̌nu ɔ sixú lin ɖɔ: ‘Ðo sun ayizɛ́n mɛ ɔ, mǐ ná ɖibla dó akpá nú mǐɖée lɛ́ ɖɔ mǐ ná wlí alɔ,’ amɔ̌, súnnu ɔ sixú ko ɖo xwe ɖokpó lin wɛ. Ðo ninɔmɛ énɛ́ mɛ ɔ, akpɔ sixú ɖó nyɔ̌nu ɔ, bɔ é lɛ́ flú, ɖó éyɛ́ ɖo nukún ɖó wɛ ɖɔ è ná yá wǔ dó akpá ɔ. É ɖo tají ɖɔ yě mɛ we lɛ́ bǐ ní tuun nǔ e mɛ ɖě ɔ nɔ lin dó xó énɛ́ wú é.”—Ariana, éé wlí alɔ xwe ɖokpó ɖíe é.
Ðǒ nukún ɖɔ linlin mitɔn ɖé lɛ́ ná nɔ gbɔn vovo
Gbɛtɔ́ ɖokpó ɔ pɛ́ɛ́ we ɖe ǎ. Énɛ́ wú ɔ, ma nɔ lin ɖɔ mɛ e kpó hwi kpó ɖo xɔ́ntɔn mɛ é ná nɔ ɖó gbe kpɔ́ xá we dó nǔ lɛ́ bǐ jí, bɔ lěe nǔ ná nɔ cí nú mi dó nǔ lɛ́ wú é ná nyí ɖokpó ɔ ó. Ði kpɔ́ndéwú ɔ, lěe a nɔ kpɔ́n nǔ lɛ́ gbɔn é sixú sín fí e a su ɖe é sín nǔwalɔ lɛ́ kpó kplɔ́n e a yí é kpó wú.
Ðo tamɛ lin d’é wú wɛ: Ényí linlin mitɔn lɛ́ gbɔn vovo ɖo xó kléwún kléwún lɛ́ kɔn, bɔ é ma ka t’afɔ nǔgbódodó Biblu tɔn e ɖo wɛn é ɖé jí ǎ ɔ, mi mɛ we lɛ́ bǐ ka nɔ ɖo gbesisɔmɛ bo ná jó xó dó bá dó xo fífá kan a?
Nǔgbódodó Biblu tɔn: “Mi nú mɛ lɛ́ bǐ ní mɔ ɖɔ mi nɔ nɔ jlɛ̌ jí.”—Filípunu lɛ́ 4:5.
“Ényí a tlɛ nɔ lin ɖɔ mi jɛxá miɖée lɛ́ bɔ ‘nǔ bǐ vɔ́ ɖ’é wú’ ɔ, gbemanɔkpɔ́ lɛ́ ná wá xwetɔ́n. É ɖo tají ɖɔ mi ní jɛxá miɖée lɛ́ có, jijɔ ɖagbe e ɖokpó ɖokpó mitɔn nɔ ɖe xlɛ́ hwenu e gbemanɔkpɔ́ lɛ́ wá xwetɔ́n é lɛ́vɔ́ ɖo tají hú gǎn.”—Matthew, éé wlí alɔ sín xwe atɔ́ɔ́n ɖíe é.
Ðǒ nukún ɖɔ xɔ́ntɔnmɛninɔ ná byɔ́ nǔ gěgé ɖo así we
É ɖo wɛn ɖɔ xɔ́ntɔnmɛninɔ ná yí hwenu gěgé ɖo así towe, bo sixú lɛ́ ɖó adohu adohu kpɛɖé nú we. Étɛ́ ka sixú d’alɔ we?
Ðǒ dogbó e ɖo jlɛ̌ jí lɛ́ é. Ma nú xɔ́ntɔnmɛninɔ ɔ yí tɛn sɔmɔ̌ káká bónú a wɔn ya nú azɔ̌ e nyí towe lɛ́ é wiwa, alǒ xɔ́ntɔn towe ɖě lɛ́ ó. Alana, éé wlí alɔ sín xwe atɔ́ɔ́n ɖíe é ɖɔ: “Ðo alɔwlíwlí towe gúdo ɔ, a ná kpo ɖo xɔ́ntɔn towe lɛ́ sín hudó ɖó wɛ, bɔ yě lɔ ná kpo ɖo hudó towe ɖó wɛ. Ma wɔn ya nú yě din, ɖó a byɔ́ xɔ́ntɔn mɛ kpowun wútu ó.”
Flín ɖɔ ényí a wlí alɔ ɔ, é ná byɔ́ ɖɔ a ní nɔ jlɛ̌ jí ɖo akpáxwé gbɛzán towe tɔn lɛ́ bǐ mɛ. Étɛ́wú a ma ka ná tɛ́n kpɔ́n bá kpé jlɛ̌jíninɔ énɛ́ wú din e a ɖo xɔ́ntɔn mɛ é ǎ?
Ðo tamɛ lin d’é wú wɛ: A ka nɔ byɔ́ ɖo mɛ e a ɖo xɔ́ntɔn mɛ xá é sí ɖɔ é ní zán hwenu ɖó kpɔ́ xá we zɛ xwé wú, alǒ sɔ́ ayi ɖó jǐ towe zɛ xwé wú wɛ a? É nɔ cí nú we ɖɔ é lɔ nɔ byɔ́ nǔ ɖo así towe dín wɛ a? Nɛ̌ mi mɛ we lɛ́ bǐ ka sixú nɔ jlɛ̌ jí gbɔn, bɔ xɔ́ntɔnmɛninɔ ɔ ma ná kpé agbɔ̌n, alǒ xá kɔ nú mi mɛ we lɛ́ ɖě ǎ?
Nǔgbódodó Biblu tɔn: “Nǔ bǐ wɛ ɖó hwenu. Nǔ ɖokpó ɖokpó ɖó hwenu tɔn.”—Nǔnywɛ́tɔ́xó 3:1.
“Ényí ayiɖeɖayǐ tɔn kɛ́ɖɛ́ jɛ́n hwenu e mɛ e ɖo xɔ́ntɔn mɛ lɛ́ é nɔ zán ɖó kpɔ́ é nɔ nyí ɔ, nǔ lɛ́ ná ɖibla fyán yě ɖo alɔwlíwlí gúdo. É nyɔ́ nú mɛ e ɖo xɔ́ntɔn mɛ lɛ́ é ɖɔ yě ní nɔ zán hwenu ɖó kpɔ́ ɖo gbɛzínzán gbe bǐ gbe tɔn sín azɔ̌ lɛ́ kɔn, ɖi axi xwíxwlé, xwégbezɔ́ lɛ́ wiwa kpó Mawu sinsɛn ɖó kpɔ́ kpó. Énɛ́ sixú d’alɔ yě tawun bɔ yě ná dó alɔwlíwlí yětɔn do nyi dodónú e lí dǒ é ɖé jí.”—Daniel, éé wlí alɔ sín xwe we ɖíe é.
Flín ɖɔ xɔ́ntɔnmɛninɔ ɔ, nǔ e è nɔ wa nú hwenu ɖé bo ná dó wá gbeta ɔ kɔn ɖɔ è ná wlí alɔ, alǒ ɖó kancícá wǎnyíyí tɔn ɔ te a jí é wɛ. Akpáxwé 3gɔ́ xóta ɖěbɔdóɖěwú élɔ́ tɔn ná ɖɔ xó dó nǔ ɖěɖěe a ɖó ná gbéjé kpɔ́n hwenu e a ná ɖo gbeta énɛ́ kɔn wá wɛ é wú.