Ðu Ðò Mɛ̌ Sísɔ́ Dó D’ayihun Jí

Mɛ̌ sísɔ́ dó d’ayihun nyí walɔ ɖé bo nɔ nyɔ́ Mawu nukúnmɛ ǎ; é nɔ dɔn mɛ dó ce jɛn na bí mɛ bo nɔ zɔ́n bɔ è nɔ lin nǔ kpɔ́n dó nùblibli lɛ jí.a Mɛ e nɔ sɔ́ mɛ̌ tɔn dó d’ayihun é lɛ́ hɛn ɔ é na nɔ kpɔ́n mɛ ɖevo lɛ dó mɔ mɛ e è sixu ɖóxó xá bo dó gbɔ zɛn e ɖò mɛ sɔ́ wɛ é ɖé kpowun na. Mɛ mɔhun sɔ́ nɔ kpɔ́n xóɖóxámɛ dó mɔ wanyiyi ɖiɖexlɛ́ sín nǔ ǎ, loɔ, é nɔ kpɔ́n dó mɔ nǔ e nɔ hɛn vivǐ hwenu klewun ɖé tɔn wá bo nɔ bló bɔ jlǒ xóɖóxámɛ tɔn nɔ ɖekpo é ɖé. Amɔ̌, táan klewun ɖé jɛn jlǒ enɛ nɔ ɖekpo na. È na ɖɔ xó jɔ xó ɔ, mɛ̌ sísɔ́ dó d’ayihun nɔ zɔ́n bonu è nɔ sú nǔ e nyí ayikúngban jí tɔn lɛ é, ɖi “agalilɛ, nùblibliwiwa, [kpo] jlǒ agbaza tɔn [kwijikwiji] lɛ” kpo sín kún dó ǎ, é nyɔ́ wà ɔ, é nɔ fɔ́n nǔ enɛ lɛ dó jǐ wɛ.​—Kolosinu lɛ 3:5.

Mɛsɛ́dó Pɔlu wlan ɖɔ: “Mɛ vívɛ́ná ce lɛ mi . . . mǐ ni sla wǔ nú agbaza kpo [gbigbɔ] kpo, bo dó gǎn, bo ɖi xɛsi nú Mawu ɖò gbɛzán mǐtɔn mɛ, lobo na nyí mɛ mímɛ́ yì fó.” (2 Kɔlɛntinu lɛ 7:1) Enyi wěɖexámɛ enɛ xwixwedó ɖò wuvɛ̌ nú we wɛ hǔn, ma lin ɖɔ vɔ jɛn é ko vɔ nɛ ó. Jehovah “ɖò gbesisɔmɛ bo na sɔ́ hwɛ kɛ mɛ” hwebǐnu lobo na lɛ́ d’alɔ mɛ. (Ðɛhan 86:5; Luki 11:9-13) Nugbǒ ɔ, ayi towe e ɖò hwɛ dó we wɛ é kpo gǎn ɖěɖee dó wɛ a ɖè bo na jó walɔ enɛ dó lɛ é kpo xlɛ́ ɖɔ a ɖó linlin ɖagbe, enyi a na bo nɔ wá hwe d’ewu hweɖelɛnu ɔ nɛ. Lɛ̌vɔ hɛn dó ayi mɛ ɖɔ “Mawu hugǎn ayi mǐtɔn, lobo tuùn nǔ bǐ.” (1 Jaan 3:20) Mawu nɔ mɔ nǔ zɛ hwɛ mǐtɔn lɛ wu; nǔ e mǐɖesunɔ ɔ blebu nyí é wɛ é nɔ kpɔ́n. Ðó é tuùn nǔ bǐ dó mǐ wu wutu ɔ, é hɛn ɔ é na ɖótó vo e sà wɛ mǐ ɖè kpo ayijlɔjlɔ kpo ɖɔ é ni kú nǔblawu nú mǐ é, lobo sè wuvɛ̌ xá mǐ. Enɛ wu ɔ, lee vǐ ɖé nɔ hɔn yì sù tɔ́ tɔn ɖò adǎngbomɛ hwenu é ɖɔhun ɔ, hwiɖée zízé hwe bo xoɖɛ vívɛ́ sɛ́dó Mawu ni ma nɔ cikɔ nú we gbeɖé ó. Jehovah na na we ayixa mímɛ́ ɖé. (Ðɛhan 51:3-14, 19; Ezayíi 1:18) É ɖò wɛn ɖɔ nùɖé lɛ ɖò dandan bɔ a na wà sɔgbe kpo ɖɛ e a nɔ xò lɛ é kpo. Ði kpɔ́ndéwú ɔ, a na tɛnkpɔn bo nyì alɔ nú fɔtóo nùblibliwiwa tɔn alɔkpa lɛ bǐ kpinkpɔn, bo lɛ́ nyì alɔ nú gbɛ̌ nyanya didó.b

Enyi a ɖò xwi ɖí xá mɛ̌ sísɔ́ dó d’ayihun wɛ bonu è ɖò glogló wɛ jɛn wɛ hǔn, kɛnklɛn bo tinmɛ nú mɛjitɔ́ Klisanwun ɖé alǒ xɔ́ntɔn e zin ɖò gbigbɔ lixo bɔ nǔ towe ka nɔ lɛ́ ɖu ayi mɛ na é ɖé.c​—Nùnywɛxó 1:8, 9; 1 Tɛsalonikinu lɛ 5:14; Titu 2:3-5.