Tagba lɛ Ðiɖeɖɛ Ðò Ajɔ̌ Linu

Ðò 1 Kɔlɛntinu lɛ 6:1-8 mɛ ɔ, mɛsɛ́dó Pɔlu ɖɔ xó dó hwɛ yiylɔ nùɖitɔ́ hàtɔ́ mɛtɔn lɛ jí. É tinmɛ ɖɔ é vɛ́ nú emi ɖɔ Klisanwun Kɔlɛnti tɔn ɖé lɛ nɔ ‘gla kaka bo nɔ yì ylɔ hwɛ ɖò hwɛɖɔtɔ́ e ma nyí Klisanwun ǎ lɛ é gɔ́n.’ (Wemafɔ 1) Pɔlu na hwɛjijɔ ɖěɖee wu Klisanwun lɛ ma ɖó na nɔ ylɔ hwɛ yeɖée ɖò hwɛɖɔxɔsa gbɛ̀ ɔ tɔn lɛ ǎ, lobo na nɔ ɖeɖɛ tagba lɛ sɔgbe xá alixlɛ́mɛ e è na agun lɛ é é. Mi nú mǐ ni ba dò nú ɖé lɛ ɖò hwɛjijɔ e wu Mawu sɔ́ xó enɛ d’ayi mɛ n’i b’ɛ wlan lɛ é mɛ. Enɛ gudo ɔ, mǐ na ɖɔ xó dó ninɔmɛ e alixlɛ́mɛ enɛ ma kàn dandan ǎ é klewun ɖé jí.

Enyi tagba ɖé byɔ mǐ kpo nùɖitɔ́ hàtɔ́ ɖé kpo tɛntin ɖò ajɔ̌ alǒ ayikúngban linu ɔ, jɛ nukɔn hwɛ̌ ɔ, mǐ ɖó na tɛnkpɔn bo wà nǔ lee Jehovah jló gbɔn é, é nyí lee mǐdɛɛ lɛ jló gbɔn é ǎ. (Nùnywɛxó 14:12) Lee Jezu xlɛ́ gbɔn é ɔ, é nyɔ́ ɖɔ è ni yawu ɖeɖɛ tagba ɖé cobonu é wá syɛn bǐ. (Matie 5:23-26) Amɔ̌, é blawu ɖɔ Klisanwun ɖé lɛ nɔ jɛ nǔ dɔn jí, kaka bo tlɛ nɔ dɔn xó ɔ sɔyi hwɛɖɔxɔsa gbɛ̀ ɔ tɔn lɛ. Pɔlu ɖɔ: “Hwɛgbe e nɔ ɖò tɛntin mitɔn ɔ kɛɖɛ ko ɖexlɛ́ ɖɔ mi jɛ ayǐ bǐ gbídígbídí.” Ðó etɛwu? Hwɛjijɔ e wu wɛ é taji ɖokpo wɛ nyí ɖɔ nǔ wà gbɔn mɔ̌ sixu hɛn nyikɔ ɖagbe agun ɔ tɔn kpo Mawu e sɛ̀n wɛ mǐ ɖè é kpo kwiji. Enɛ wu ɔ, é na nyɔ́ ɖɔ mǐ ni hɛn nùkanbyɔ Pɔlu tɔn elɔ dó ayi mɛ: “Nɛ̌ ka gbɔn bɔ mi ma gbɔ bonu è wà nǔ agɔ dó mi ǎ?”​—Wemafɔ 7.

Pɔlu lɛ́ na hwɛjijɔ ɖevo ɖɔ Mawu ko bló tuto lee è na ɖeɖɛ tagba lɛ gbɔn ganji é tɔn ɖó agun ɔ mɛ. Mɛxo agun tɔn lɛ nyí Klisanwun sunnu e ɖó nùnywɛ lɛ é, ɖó nugbǒ Biblu tɔn ɖěɖee ye tuùn lɛ é wu, lobɔ Pɔlu ɖɔ ɖɔ ye kpéwú bo “sixu dóhwɛ gbɔ nú nɔví nɔví” ɖò “gbɛ̀ elɔ mɛ sín nǔ lɛ” kɔn. (Wemafɔ 3-5) Jezu xlɛ́ ɖɔ alixo atɔn mɛ wɛ mǐ ɖó na nɔ ɖeɖɛ tagba syɛnsyɛn lɛ, ɖi jidómɛ kpo ahizi kpo ɖè: nukɔntɔn ɔ, mǐ na tɛnkpɔn bo yì mɔ mɛ e kpo mǐ kpo kpé nǔ é bo ɖɔ gbò ɖò mǐɖée tɛntin; wegɔ ɔ, enyi mǐ tɛ́n nukɔntɔn ɔ kpɔ́n bonu é gló ɔ, mǐ na kplá kúnnuɖetɔ́ ɖokpo alǒ wè dó mǐɖée jí bo yì ɖɔ gbò; atɔngɔ ɔ, enyi mǐ tɛ́n wegɔ enɛ kpɔ́n bonu é lɛ́ gló ɔ, mǐ na yì tinmɛ xó ɔ nú mɛxo agun tɔn lɛ.​—Matie 18:15-17.

É ɖò wɛn ɖɔ Klisanwun mɛxo agun tɔn lɛ kún nyí hwɛɖɔtɔ́ alǒ ajɔ̌watɔ́ dandan ó, lobɔ é ka byɔ ɖɔ ye ni wà nǔ mɛ mɔhun lɛ ɖɔhun ǎ. Ye nɔ dó sɛ́n ɖěɖee è na xwedó bo dó ɖeɖɛ tagba ajɔ̌ tɔn alǒ ayikúngban hwɛ lɛ na ɖò nɔví sunnu alǒ nɔví nyɔnu lɛ tɛntin é ǎ. É nyɔ́ wà ɔ, ye nɔ ba na d’alɔ mɛ e kpé nǔ lɛ é bonu ye na zán nugbodòdó Biblu tɔn lɛ bo ɖeɖɛ xó ɔ ɖò fífá mɛ. Ðò ninɔmɛ syɛnsyɛn lɛ mɛ ɔ, ye sixu ba nukúnkpénuwutɔ́ lɛdo tɔn alǒ alaxɔ Kúnnuɖetɔ́ Jehovah Tɔn lɛ tɔn sín alɔdo. É ɖò mɔ̌ có, wěɖexámɛ Pɔlu tɔn kàn ninɔmɛ lɛ bǐ dandan ǎ. Ðětɛ lɛ mɔ̌?

Ðò ninɔmɛ ɖé lɛ mɛ ɔ, hwɛ yiylɔ mɛ sixu nyí nǔ e sɛ́n byɔ é ɖé wiwa alǒ wlɛnwín ɖé kpowun bo na dó sixu wá gbeta e ma nyí ce jɛn na bí tɔn ǎ é kɔn ɖò fífá mɛ. Ði kpɔ́ndéwú ɔ, é sixu nyí ɖɔ hwɛ yiylɔ kɛɖɛ wɛ nyí wlɛnwín ɖokpo e ɖè bɔ è na dó sixu mɔ nùɖé lɛ é, ɖi wema mɛɖée gbigbɛ́ tɔn, acɛ nukúnkpikpe dó vǐ ɖé wu tɔn, akwɛ e nyɔnu e wlí alɔ bɔ asú tɔn jó é dó é ɖó na nɔ yí é, akwɛ e ganjɛwuxwé ɖé ɖó na sú hwenu e awovinú ɖé jɛ é, è na lɛ́n mǐ dó mɛ e è ɖu axɔ dó lɛ é mɛ hwenu e ajɔ̌ ɖé j’ayǐ é, kpo alɔdido wema gǔ mímá tɔn mɛ ɖò axɔsuxwé kpo. Ninɔmɛ ɖé lɛ lɛ́ tíìn bɔ nɔví ɖé sixu mɔ ɖɔ emi ɖó na vɔ́ hwɛ ylɔ bo na dó sixu cyɔn alɔ éɖée jí.a

Enyi mɛɖé ma ɖó linlin agbahwlɛnxámɛ tɔn ǎ bo ylɔ hwɛ mɛ ɖò ninɔmɛ enɛ lɛ mɛ ɔ, é ko t’afɔ wěɖexámɛ Pɔlu tɔn jí ǎ.b É ɖò mɔ̌ có, nǔ e ɖó na nɔ mya nukún nú Klisanwun ɖé é wɛ nyí lee é na bló gbɔn bɔ nyikɔ Jehovah tɔn na nɔ mimɛ̌ jí, lobɔ fífá kpo bǔninɔ kpo na tíìn ɖò agun ɔ mɛ é. Wanyiyi wɛ nyí wuntun nukɔntɔn e nɔ ɖè ahwanvu Klisu tɔn lɛ xlɛ́ é, lobɔ “wanyiyi . . . [ka] nɔ ba ɖɔ emiɖokponɔ géé tɔn jɛn na nyɔ́ ǎ.”​—1 Kɔlɛntinu lɛ 13:4, 5; Jaan 13:34, 35.