Jexóva ná d’alɔ we ɖo hwenu vɛ́ wǔ lɛ́ mɛ

1-2. Wǔvɛ́ tɛ́ lɛ́ mɛsɛntɔ́ Jexóva tɔn gbejínɔtɔ́ lɛ́ ka sixú mɔ?

NǓ NYANYA lɛ́ sixú jɛ bo ɖyɔ́ gbɛzán mǐtɔn ɖo ajijimɛ. Ði kpɔ́ndéwú ɔ, nɔví súnnu gbejínɔtɔ́ ɖé nɔ nyí Luisa bɔ è mɔ kansɛ́ɛzɔn e è ma nɔ yá wǔ jɛ mɔ̌ ǎ é ɖé n’i. Dotóogán ɖé ɖɔ n’i ɖɔ sun yɔywɛ ɖé jɛ́n é ná nɔ gbɛ ná. Monika kpó asú tɔn kpó hɛn alɔnu yětɔn ján ɖo nǔ gbigbɔ tɔn lɛ́ mɛ. Énɛ́ gúdo ɔ, Monika wá se gbe ɖokpó ɖɔ asú émítɔn e nyí mɛxó agun tɔn é ɖo hwɛ hu dó nǔglɔ́ wɛ sín xwe mɔ̌kpán ɖíe. Olivia e nyí nɔví nyɔ̌nu tlɛnnɔ ɖé é ɖó ná gosín xwé tɔn gbe ɖó jɔhɔn syɛ́nsyɛ́n e nɔ hɛn nǔ gblé tawun é ɖé ja nyinyi gbé wútu. Ée é lɛ́ kɔ wá é ɔ, é mɔ ɖɔ jɔhɔn ɔ ko hɛn xwé émítɔn bǐ gblé. Ajijimɛ kpowun ɔ, gbɛzán mɛ énɛ́ lɛ́ tɔn húzú bǐ mlɛ́mlɛ́. Nǔ nyanya ɖé ka ko jɛ dó jǐ we bo ɖyɔ́ gbɛzán towe ɖo ajijimɛ kpɔ́n a?

² Mɛ e ɖo gbɛ ɔ mɛ lɛ́ é bǐ ɖɔhun ɔ, mɛsɛntɔ́ Jexóva tɔn gbejínɔtɔ́ lɛ́ bǐ wɛ nɔ se wǔvɛ́ bo nɔ lɛ́ jɛ azɔn. Mǐ sixú lɛ́ dɛ ɖo gbeklánxámɛ alǒ yadónúmɛ mɛ ɖěɖěe ma yí wǎn nú togun Mawu tɔn ǎ lɛ́ é tɔn nu. Jexóva nɔ cyɔ́n alɔ mǐ jí sín wǔvɛ́ syɛ́nsyɛ́n mɔ̌hun lɛ́ sí ǎ có, é d’akpá ɖɔ émí ná d’alɔ mǐ. (Eza. 41:10) Kpó alɔdó tɔn kpó ɔ, mǐ sixú kpo ɖo awǎjijɛ ɖó wɛ, wá gbeta ɖagbe lɛ́ kɔn, bo lɛ́ kpo ɖo gbejí nɔ n’i wɛ, é ná bo tlɛ nyí ɖo ninɔmɛ e vɛ́ wǔ hú gǎn lɛ́ é mɛ ɔ nɛ́. Ðo xóta élɔ́ mɛ ɔ, mǐ ná gbéjé ali e nu Jexóva nɔ d’alɔ mǐ ɖo hwenu e d’ablu ɖo gbɛzán mǐtɔn mɛ lɛ́ é ɖe é ɛnɛ kpɔ́n. Mǐ ná lɛ́ kpɔ́n nǔ e é byɔ́ ɖɔ mǐ ní wa, bo ná ɖu alɔ e é nɔ dó mǐ lɛ́ é sín le é.

JEXÓVA NÁ CYƆ́N ALƆ JǏ WE

3. Ényí mǐ ɖo ninɔmɛ nyanya ɖé mɛ ɔ, étɛ́ lɛ́ wiwa ka sixú vɛ́ wǔ nú mǐ?

³ Wǔvɛ́ ɔ. Ényí mǐ ɖo ninɔmɛ nyanya ɖé mɛ ɔ, mǐ sixú mɔ ɖɔ é vɛ́ wǔ nú mǐ bɔ mǐ ná lin tamɛ ganjí, bo lɛ́ wá gbeta lɛ́ kɔn. Aniwú? Mǐ sixú se wǔvɛ́ syɛ́nsyɛ́n ɖo ayi mɛ. Adohu adohu sixú ɖí bú mǐ. Nǔ bǐ sixú fan dó mǐ, bɔ mǐ sɔ́ ná tuun nǔ e mǐ ná wa bɔ d’é wú é ǎ. Ð’ayi lěe nǔ cí nú nɔví nyɔ̌nu we e xó mǐ ɖɔ wá yi lɛ́ é hwenu e yě ɖo tagba yětɔn lɛ́ mɛ gbɔn wɛ é wú. Olivia ɖɔ: “Ée jɔhɔn syɛ́nsyɛ́n ɔ hɛn xɔ ce gblé gúdo é ɔ, un mɔ ɖɔ un bú bǐ, bo lɛ́ dán ɖěwagbɛn.” Monika ɖɔ dó gbejí e asú tɔn ma nɔ ǎ é wú ɖɔ: “Wǔ kú mì tawun. É cí nú mì ɖɔ è sɔ́ nǔ mì dó hǔn jí wɛ ɖɔhun. Azɔ̌ gbe bǐ gbe tɔn lɛ́ yǎyánɔ wiwa nɔ vɛ́ wǔ nú mì tawun. Un lin gbeɖé ɖɔ nǔ mɔ̌hun sixú jɛ dó wǔ ce ǎ.” Ényí mǐ dán ɖěwagbɛn ɔ, nɛ̌ Jexóva ka d’akpá ɖɔ émí ná d’alɔ mǐ gbɔn?

4. Sɔgbe xá Filípunu lɛ́ 4:6, 7 ɔ, étɛ́ sín akpá Jexóva ka dó nú mǐ?

⁴ Lěe Jexóva ná d’alɔ mǐ gbɔn é. É d’akpá ɖɔ émí ná ná mǐ nǔ e Biblu ylɔ́ ɖɔ “fífá Mawu tɔn” é. (Xa Filípunu lɛ́ 4:6, 7.) Fífá énɛ́ nɔ dó gesí vivo e è nɔ ɖó ɖo ayi mɛ, ɖó è ɖó kancícá xɔ akwɛ́ ɖé xá Jexóva wútu é. Fífá énɛ́ “zɛ nukúnnúmɔjɛnǔmɛ bǐ wú”; é nyɔ́ hú gǎn nǔ ɖěbǔ e mɛ mǐ sixú dó nukún kpɔ́n é. Ði kpɔ́ndéwú ɔ, a ka ko xo ɖɛ vívɛ́ ɖé sɛ́dó Jexóva bɔ énɛ́ gúdo ɔ, a ɖ’ayi wú ɖɔ agbɔ̌n towe jɛ do tawun a? “Fífá Mawu tɔn” wú wɛ nǔ cí mɔ̌ nú we.

5. Nɛ̌ fífá Mawu tɔn ka nɔ nya xɛ ɖo linlin mǐtɔn kpó ayi mǐtɔn kpó jí gbɔn?

⁵ Wěmafɔ ɖokpó ɔ lɛ́ ɖɔ ɖɔ fífá Mawu tɔn “ná nya xɛ” alǒ cyɔ́n alɔ “ayi mitɔn kpó linlin mitɔn kpó jí.” Xókwín dodó e è tínmɛ bɔ é nyí “nya xɛ” é ɔ, ahwanfuntɔ́ lɛ́ wɛ nɔ zán, bɔ é nɔ dó gesí sɔ́ja ɖěɖěe ɖo toxo ɖé cɔ́ wɛ, bo nɔ wa nǔ e wú yě kpé é bǐ bónú è ma wá tɔ́n ahwan ɛ ó lɛ́ é. Mɛ e ɖo toxo e jí nya xɛ ɖe wɛ è ɖe é mɛ lɛ́ é nɔ d’amlɔ ɖo ayijayǐ mɛ, ɖó yě tuun ɖɔ mɛcɔ́tɔ́ lɛ́ ɖo hɔntogbó lɛ́ ta wútu. Ðo ali ɖokpó ɔ nu ɔ, ényí fífá Mawu tɔn ɖo xɛ nya ɖo ayi mǐtɔn kpó linlin mǐtɔn kpó jí wɛ ɔ, mǐ nɔ ɖó fífá ayi mɛ tɔn, ɖó mǐ tuun ɖɔ mǐ ɖo ayijayǐ mɛ. (Ðɛh. 4:9) Lěe é nyí gbɔn nú Ana é ɔ, ényí ninɔmɛ mǐtɔn ná bo ma tlɛ húzú tlóló ǎ ɔ, mǐ sixú kpo ɖo fífá ayi mɛ tɔn ɖó wɛ. (1 Sam. 1:16-18) Gɔ́ ná ɔ, ényí ayi mǐtɔn j’ayǐ ɔ, mǐ nɔ mɔ hwɛhwɛ ɖɔ é nɔ bɔ wǔ nú mǐ hú gǎn bɔ mǐ nɔ lin tamɛ ganjí, bo nɔ lɛ́ wá gbeta e nǔnywɛ́ kpé lɛ́ é kɔn.

6. Étɛ́ mǐ ka sixú wa bo ná ɖu le fífá Mawu tɔn tɔn? (Lɛ̌ kpɔ́n fɔtóo ɔ.)

⁶ Nǔ e é byɔ́ ɖɔ mǐ ní wa lɛ́ é. Ényí a flú hǔn, ylɔ̌ Jexóva e nyí xɛnyaɖomɛjítɔ́ towe é. Gbɔn nɛ̌ é? Xo ɖɛ káká jɛ hwenu e a ná mɔ ɖɔ émí ɖó fífá Mawu tɔn dó é. (Luk. 11:9; 1 Tɛ. 5:17) Luis e xó mǐ ɖɔ wá yi é tínmɛ lěe é kpó asi tɔn Ana kpó kpé wú bo dɛ hwenu e yě se ɖɔ sun yɔywɛ ɖé jɛ́n kpo bɔ Luis ná nɔ gbɛ ná é gbɔn é. Luis ɖɔ: “Nǔ e vɛ́ wǔ hú gǎn hwenɛ́nu é wɛ nyí gbeta e kɔn è ná wá dó lanmɛ ná nɔ ganjí kpó nǔ ɖěvo lɛ́ kpó wú é. Amɔ̌, bo ná dó mɔ fífá ayi mɛ tɔn ɖo hwenu vɛ́ wǔ énɛ́ mɛ ɔ, ɖɛ nɔ tɛn tají ɖé mɛ nú mǐ.” Luis kpó asi tɔn kpó ɖɔ ɖɔ émí xo ɖɛ vívɛ́ sɛ́dó Jexóva azɔn mɔ̌kpán, bo byɔ́ ɛ ɖɔ é ní ná émí fífá ayi mɛ tɔn, vivo kpó nǔnywɛ́ kpó bónú émí ná wá gbeta ɖagbe lɛ́ kɔn. Énɛ́ gúdo ɔ, yě mɔ alɔdó tɔn. Ényí a ɖo ninɔmɛ syɛ́nsyɛ́n mɛ gbɔn wɛ hǔn, ɖǒ kan dó ɖɛxixo wú, énɛ́ ɔ, a ná ɖu le fífá Mawu tɔn e ná nya xɛ ayi towe kpó linlin towe kpó jí é tɔn.—Hlɔ̌. 12:12.

JEXÓVA NÁ BLÓ BƆ A NÁ LÍ DǑ

7. Ényí mǐ ɖo ninɔmɛ syɛ́nsyɛ́n ɖé mɛ gbɔn wɛ ɔ, nɛ̌ nǔ ka sixú cí nú mǐ?

⁷ Wǔvɛ́ ɔ. Ényí mǐ ɖo wǔvɛ́ syɛ́nsyɛ́n ɖé mɛ gbɔn wɛ ɔ, lěe nǔ nɔ cí nú mǐ é, lěe mǐ nɔ lin nǔ gbɔn é kpó lěe mi nɔ wa nǔ gbɔn é kpó sixú gbɔn vo nú lěe é ko nɔ nyí gbɔn ayǐvɔ̌gbe é. É sixú nɔ cí nú mǐ ɖɔ lěe nǔ nɔ cí nú mǐ é nɔ syɛ́n tawun, bo ka nɔ lɛ́ ɖo hǔzúhúzú wɛ gbɛmɛ. Ana e xó mǐ ɖɔ wá yi é ɖɔ ɖɔ mɔ̌ pɛ́ɛ́ wɛ nǔ cí nú émí ɖo kú asú émítɔn Luis tɔn gúdo. É ɖɔ: “Hweɖélɛ́nu ɔ, awakanmɛ nɔ kú mì, bɔ nǔ ce nɔ lɛ́ blá wǔ nú nyiɖée. Xomɛ nɔ lɛ́ sin mì dó jǒ e é jó mì dó é wú.” Gɔ́ ná ɔ, Ana nɔ lɛ́ mɔ ɖɔ émí ɖo émíɖokpó bɔ akpɔ nɔ lɛ́ ɖó è, ɖó gbeta ɖé lɛ́ tíin bɔ Luis wɛ nɔ wá kɔn ganjí ɖ’ayǐ bɔ é wɛ ka ɖó ná wá yě kɔn din. Hweɖélɛ́nu ɔ, é nɔ mɔ ɖɔ émí bú bǐ. Ényí nǔ jɛ mɔ̌ cí nú mǐ jí, bo jɛ gǎn hú mǐ jí ɔ, nɛ̌ Jexóva ka nɔ d’alɔ mǐ gbɔn?

8. Sɔgbe xá 1 Piyɛ́ɛ 5:10 ɔ, gǎnjɛwú tɛ́ Jexóva ka ná mǐ?

⁸ Lěe Jexóva ná d’alɔ mǐ gbɔn é. É ná mǐ gǎnjɛwú ɖɔ émí ná bló bɔ mǐ ná lí dǒ. (Xa 1 Piyɛ́ɛ 5:10.) Ényí jɔhɔn syɛ́nsyɛ́n ɖo nyinyi wɛ ɖo xu jí ɔ, tɔjíhún ɖé sixú jɛ xixo yi ɖisí amyɔ jí. Bo ná dó ɖí xwi xá nǔ mɔ̌hun ɔ, tɔjíhún gěgé ɖó nǔ e nɔ zɔ́n bɔ tɔjíhún ma nɔ xo dín ǎ lɛ́ é ɖo awa yětɔn vovo lɛ́ xwé, bɔ è nɔ sɔ́ dó tɔ ɔ mɛ bo ná dó hɛn yě ɖó te. Nǔ énɛ́ lɛ́ sixú ɖe xo e xo yi ɖisí amyɔ wɛ tɔjíhún ɔ ɖe é kpo tawun, bo lɛ́ zɔ́n bɔ mɛ e ɖo tɔjíhún ɔ mɛ lɛ́ é ná nɔ ayijayǐ mɛ, bo lɛ́ vo hú gǎn ɖo tomɛyiyi ɔ hwenu. É ɖo mɔ̌ có, hwenu e tɔjíhún ɔ ɖo yiyi wɛ é wɛ nǔ énɛ́ lɛ́ gěgé nɔ w’azɔ̌ hú gǎn. Ðo ali ɖokpó ɔ nu ɔ, ée mǐ lɔ ná ɖo didɛ ɖo wǔvɛ́ lɛ́ nu wɛ kpó gbejíninɔ kpó é ɔ, Jexóva ná bló bɔ mǐ ná lí dǒ.

9. Nɛ̌ azɔ̌wanú dobanúnǔ tɔn mǐtɔn lɛ́ ka sixú d’alɔ mǐ bɔ mǐ ná kpo ɖo jlɛ̌ jí nɔ wɛ gbɔn? (Lɛ̌ kpɔ́n fɔtóo ɔ.)

⁹ Nǔ e é byɔ́ ɖɔ mǐ ní wa é. Hwenu e wǔvɛ́ lɛ́ ná ɖí bú we bǐ é ɔ, wa nǔ e wú a kpé é bǐ bo kpo ɖo nǔ e mǐ nɔ wa dó sɛn Mawu lɛ́ é wa wɛ. É ɖo wɛn ɖɔ, a kún sɔ́ sixú kpé wú bo wa nǔ lɛ́ lěe a nɔ ko wa gbɔn ɖ’ayǐ é ó, amɔ̌, flín ɖɔ Jexóva kún nɔ ɖó nukún nǔ ɖo mǐ sí zɛ nǔ e wú mǐ kpé é wú ó. (Sɔ́ jlɛ́ dó Luki 21:1-4 wú.) Gbɔn vo nú nǔ e a ko nɔ wa dó sɛn Mawu lɛ́ é ɔ, nɔ lɛ́ ba hwenu bo nɔ kplɔ́n nǔ, lobo nɔ lɛ́ lin tamɛ. Aniwú? Jexóva gbɔn tutoblónúnǔ tɔn gblamɛ, bo sɔ́ nǔ nú xóta kpó video kpó gěgé, éé sixú d’alɔ mǐ bɔ mǐ ná ɖu ɖo lěe nǔ nɔ cí nú mǐ ɖo hwenu vɛ́ wǔ lɛ́ mɛ lɛ́ é jí é. Bo ná dó mɔ nǔ e sín hudó a ɖó lɛ́ é ɔ, a sixú zán azɔ̌wanú dobanúnǔ tɔn e tíin ɖo gbe towe mɛ lɛ́ é, ɖi JW Library^®, Index des publications des Témoins de Jéhovah, kpó Anademẹwe Dodinnanu Tọn Na Kunnudetọ Jehovah Tọn lẹ kpó. Monika e xó mǐ ɖɔ wá yi é ɖɔ ɖɔ émí ba wěɖexámɛ ɖo azɔ̌wanú dobanúnǔ tɔn énɛ́ lɛ́ mɛ hwenu e linkpɔ́n ɖí bú émí é. Ði kpɔ́ndéwú ɔ, é ba xókwín “xomɛsin.” Hwe ɖěvo lɛ́ nu ɔ, é ba xókwín “gbejímanɔ” alǒ “gbejíninɔ.” Énɛ́ gúdo ɔ, é nɔ ɖo xixa wɛ káká jɛ hwenu e é mɔ éɖée mɛ dó é. É ɖɔ: “Ényí un jɛ do ba nú nǔ jí ɔ, un nɔ flú tawun, amɔ̌, ényí un ɖo nǔ xa wɛ ɔ, é nɔ cí nú mì ɖɔ Jexóva kplá así kɔ nú mì wɛ ɖɔhun. Ényí un ɖo nǔ xa wɛ ɔ, un nɔ wá mɔ ɖɔ Jexóva mɔ nukúnnú jɛ lěe nǔ cí nú mì é bǐ wú, bo ɖo alɔ dó mì wɛ.” Alɔ mɔ̌hun e Jexóva nɔ dó mɛ é sixú lɛ́ zɔ́n bɔ è ná kpo ɖo jlɛ̌ jí nɔ wɛ káká jɛ hwenu e è ná ɖó fífá ayi mɛ tɔn dó é.—Ðɛh. 119:143, 144.

JEXÓVA NÁ NƆ GǓDO NÚ WE

10. Ényí nǔ e ná zɔ́n bɔ mǐ ná jɛ aluwɛ mɛ tawun é ɖé xá mǐ ɔ, nɛ̌ nǔ ka sixú cí nú mǐ?

¹⁰ Wǔvɛ́ ɔ. Ényí nǔ e ná zɔ́n bɔ mǐ ná jɛ aluwɛ mɛ tawun é ɖé xá mǐ ɔ, mǐ sixú ba gǎn kpo ɖo agbaza kpó lěe nǔ nɔ cí nú mɛ é kpo linu nú azǎn ɖé lɛ́. É sixú cí nú mǐ ɖɔ mǐ cí wezunkántɔ́ e nɔ kán wezun ganjí, bɔ din ɔ, tɔn wɛ é nɔ tɔn é ɖɔhun. É sixú vɛ́ wǔ nú mǐ bɔ mǐ ná wa azɔ̌ e mǐ ko nɔ wa ɖ’ayǐ faa lɛ́ é, alǒ akpakpa e nɔ sɔ́ mǐ dó nǔ e mǐ nɔ ko wa ɖ’ayǐ, bo nɔ ɖu vǐví tɔn lɛ́ é wú é sixú ɖe kpo. Elíi ɖɔhun ɔ, mǐ sixú mɔ ɖɔ é vɛ́ wǔ tawun bɔ mǐ ná sí te. Nǔ e ba wɛ mǐ ɖe kpowun é wɛ nyí ɖɔ, mǐ ná d’amlɔ. (1 Axɔ́. 19:5-7) Étɛ́ sín akpá Jexóva ka dó bá wa nú mǐ hwenu e mǐ mɔ ɖɔ gǎn hwedó mǐ é?

11. Ali ɖěvo tɛ́ nú Jexóva ka nɔ d’alɔ mǐ ɖe? (Ðɛhan 94:18)

¹¹ Lěe Jexóva ná d’alɔ mǐ gbɔn é. Jexóva d’akpá bo ná nɔ gǔdo nú mǐ. (Xa Ðɛhan 94:18.) Lěe wezunkántɔ́ e gblé wǔ é ɖé nɔ ɖó hudó alɔdó tɔn bo ná dó kpo ɖo nukɔn yi wɛ gbɔn é ɔ, mǐ sixú ɖó hudó alɔdó tɔn bo ná dó kpo ɖo nukɔn yi wɛ ɖo sinsɛnzɔ́ Jexóva tɔn mɛ. Ðo ninɔmɛ mɔ̌hun lɛ́ mɛ ɔ, Jexóva nɔ ná mǐ gǎnjɛwú élɔ́: ‘Nyɛ Jexóva ɔ, nyi wɛ nyí Mawu towe. Un hɛn alɔ towe bo ɖo ɖiɖɔ nú we wɛ ɖɔ: “Ma ɖi xɛsi ó, un ná gɔ́ alɔ nú we.”’ (Eza. 41:13) Axɔ́sú Davídi ɖu alɔdó mɔ̌hun sín le. Hwenu e é gbɔn wǔvɛ́ lɛ́ mɛ, lobo lɛ́ ɖu ɖo kɛntɔ́ tɔn lɛ́ jí é ɔ, é ɖɔ nú Jexóva ɖɔ: “Aɖisí lɔ towe nɔ hɛn mì ɖó te.” (Ðɛh. 18:36) Amɔ̌, nɛ̌ Jexóva ka nɔ nɔ gǔdo nú mɛ gbɔn?

12. Mɛ̌ mɛ̌ e Jexóva ka sixú zán dó d’alɔ mǐ hwenu e mǐ ba gǎn kpo é?

¹² Hwɛhwɛ ɔ, Jexóva nɔ nɔ gǔdo nú mǐ gbɔn sísɛ́ e é nɔ sísɛ́ mɛ ɖěvo lɛ́ bɔ yě nɔ d’alɔ mǐ é gblamɛ. Ði kpɔ́ndéwú ɔ, é wá su gbe ɖokpó bɔ Davídi mɔ ɖɔ gǎn hwedó émí, lobɔ xɔ́ntɔn tɔn Jonatáan yi ba ɛ kpɔ́n bo xo hwihwɛ́ ɛ ɖo lěe nǔ nɔ cí nú mɛ é linu, lobo lɛ́ ɖɔ xó dó dó wǔsyɛ́n lanmɛ n’i. (1 Sam. 23:16, 17) Ðo ali ɖokpó ɔ nu ɔ, Jexóva sɔ́ Elizée bɔ é dó alɔ tawun tawun ɖé lɛ́ Elíi. (1 Axɔ́. 19:16, 21; 2 Axɔ́. 2:2) Égbé ɖésú ɔ, Jexóva sixú zán xwedó mǐtɔn, xɔ́ntɔn mǐtɔn lɛ́, alǒ mɛxó agun tɔn mǐtɔn lɛ́ dó nɔ gǔdo nú mǐ. Amɔ̌, ényí mǐ ɖo wǔvɛ́ se wɛ ɖo lěe nǔ nɔ cí nú mɛ é linu ɔ, mǐ sixú ba ná nɔ zɔ nú mɛ ɖěvo lɛ́. Mǐ nɔ ba kpowun ɖɔ è ní jó mǐ dó bónú mǐ ná nɔ mǐɖokpó. É ka sɔgbe ɖɔ nǔ ní cí mɔ̌ nú mǐ. Étɛ́ mǐ ka sixú wa bo ná ɖu le gǔdo e Jexóva nɔ nɔ nú mɛ é tɔn?

13. Étɛ́ é ka byɔ́ ɖɔ mǐ ní wa bá dó ɖu gǔdo e Jexóva nɔ nɔ nú mɛ é sín le? (Lɛ̌ kpɔ́n fɔtóo ɔ.)

¹³ Nǔ e é byɔ́ ɖɔ mǐ ní wa é. Tɛ́n kpɔ́n bo ma nɔ ɖó wǔ zɔ nú mɛ ɖěvo lɛ́ ó. Ényí mǐ nɔ ɖó wǔ zɔ nú mɛ ɖěvo lɛ́ ɔ, hwɛhwɛ ɔ, mǐ nɔ lin tamɛ ganjí ǎ, bɔ mǐɖésúnɔ kpó tagba mǐtɔn lɛ́ kpó kɛ́ɖɛ́ jí jɛ́n mǐ nɔ lin tamɛ dó. Nǔ lin gbɔn mɔ̌ sixú wa nǔ dó gbeta e kɔn mǐ nɔ wá lɛ́ é wú. (Nǔx. 18:1) É ɖo wɛn ɖɔ, mǐ bǐ wɛ nɔ ba ná nɔ mǐɖokpónɔ hweɖélɛ́nu, tají ɔ, hwenu e mǐ ɖo aluwɛ mɛ é. Amɔ̌, ényí mǐ ɖó wǔ zɔ nú mɛ ɖěvo lɛ́ nú hwenu gěgé ɔ, é sixú cí ɖɔ alɔ ɖěɖěe dó mǐ wɛ Jexóva ɖe é gbɛ́ wɛ mǐ ɖe ɖɔhun. Énɛ́ wú ɔ, é ná bo vɛ́ wǔ nú we gbɔn ɖěbǔ hǔn, yǐ gbe nú alɔdó xwédo towe, xɔ́ntɔn towe lɛ́ kpó mɛxó agun tɔn lɛ́ kpó tɔn. Mɔ ɖɔ Jexóva wɛ ɖo yě zán dó nɔ gǔdo nú we wɛ.—Nǔx. 17:17, nwt; Eza. 32:1, 2.

JEXÓVA NÁ DÓ GBƆ NÚ WE

14. Ninɔmɛ tɛ́ lɛ́ ka sixú dó xɛsi mǐ?

¹⁴ Wǔvɛ́ ɔ. Mǐ sixú gbɔn ninɔmɛ e ná dó xɛsi nú mǐ lɛ́ é mɛ. Ðo Biblu mɛ ɔ, mɛsɛntɔ́ gbejínɔtɔ́ Mawu tɔn lɛ́ ɖɔ xó dó hwenu e xɛsi ɖi yě bɔ yě sísɔ́ ɖó kɛntɔ́ yětɔn lɛ́, alǒ ɖó kɔgbídínúmɛ ɖěvo lɛ́ wútu lɛ́ é wú. (Ðɛh. 18:5; 55:2, 6) Ðo ali ɖokpó ɔ nu ɔ, è sixú ɖo gbe klán xá mǐ wɛ ɖo wěmaxɔmɛ, ɖo azɔ̌mɛ, alǒ ɖo xwédo mɛ; mɛ e ɖo tɛn acɛkpikpa tɔn mɛ lɛ́ é lɔ tlɛ sixú wa nǔ xá mǐ gbɔn mɔ̌. Lanmɛzɔn syɛ́nsyɛ́n ɖé sixú zɔ́n bɔ xɛsi ná ɖi mǐ ɖɔ mǐ ná kú. Ðo hwe énɛ́ lɛ́ nu ɔ, mǐ sixú mɔ ɖɔ mǐ kún kpé nǔɖé wú ó vǐ kpɛví ɖé ɖɔhun. Nɛ̌ Jexóva ka nɔ d’alɔ mǐ ɖo ninɔmɛ mɔ̌hun lɛ́ mɛ gbɔn?

15. Sɔgbe xá Ðɛhan 94:19 ɔ, étɛ́ Jexóva ka ná wa nú mǐ?

¹⁵ Lěe Jexóva ná d’alɔ mǐ gbɔn é. É nɔ dó gbɔ nú mǐ, bo nɔ lɛ́ bló bɔ mǐ nɔ ɖó fífá ayi mɛ tɔn. (Xa Ðɛhan 94:19.) Ðɛhan énɛ́ sixú flín mǐ nyɔ̌nuví kpɛví e é sín jǐ dó gbe ɖaxó ɖé wú bɔ é ɖo xɛsi ɖi wɛ, bo ma sixú d’amlɔ ǎ é. Tɔ́ tɔn wá, bo sɔ́ ɛ lobo hɛn ɛ dó awa tɔn lɛ́ mɛ káká jɛ hwenu e é d’amlɔ dó é. Jɔhɔn syɛ́nsyɛ́n ɔ kpo ɖo nyinyi wɛ có, gbɔ e tɔ́ tɔn dó n’i, bo sɔ́ ɛ dó awa tɔn lɛ́ mɛ é zɔ́n bɔ é mɔ ɖɔ émí ɖo ayijayǐ mɛ. Ényí mǐ ɖo ninɔmɛ e nɔ dó xɛsi nú mǐ lɛ́ é mɛ gbɔn wɛ ɔ, mǐ sixú ɖó hudó Tɔ́ mǐtɔn jǐxwé tɔn ɔ tɔn bónú ɖo nǔjlɛ́dónǔwú linu ɔ, é ná hɛn mǐ dó awa tɔn lɛ́ mɛ, káká jɛ hwenu e agbɔ̌n mǐtɔn ná jɛ do dó é. Nɛ̌ Jexóva ka sixú dó gbɔ mɔ̌hun nú mǐ gbɔn?

16. Étɛ́ mǐ ka sixú wa, bo ná ɖu gbɔ e Jexóva nɔ dó nú mǐ é sín le? (Lɛ̌ kpɔ́n fɔtóo ɔ.)

¹⁶ Nǔ e é byɔ́ ɖɔ mǐ ní wa é. Nɔ zán hwenu ɖó kpɔ́ xá Jexóva hwɛhwɛ gbɔn ɖɛ xixo sɛ́dó è kpó Xó tɔn xixa kpó gblamɛ. (Ðɛh. 77:2, 13-15) Énɛ́ gúdo ɔ, ényí a ɖo linkpɔ́n mɛ ɔ, nǔ nukɔntɔn e é sixú byɔ́ ɖɔ a ní wa é wɛ nyí ɖɔ, a ní yi Tɔ́ towe jǐxwé tɔn ɔ gɔ́n, bo byɔ́ alɔdó. Nɔ ɖɔ nǔ e ɖo xɛsi dó nú we wɛ lɛ́ é kpó nǔ e ɖo adohu adohu ɖó nú we wɛ lɛ́ é kpó nú Jexóva. Yǐ gbe nú é ní ɖɔ xó nú we, bo lɛ́ dó gbɔ nú we gbɔn Xó tɔn Biblu gblamɛ. (Ðɛh. 119:28) Akpáxwé Mawuxówéma ɔ tɔn ɖé lɛ́ sixú dó gbɔ nú we, tají ɔ, hwenu e xɛsi ɖi we é. Ði kpɔ́ndéwú ɔ, a sixú mɔ wǔsyɛ́n dó lanmɛ nú mɛ sín xó lɛ́ ɖo wěma Biblu tɔn élɔ́ lɛ́ mɛ: Jɔbu, Ðɛhan kpó Nǔnywɛ́xó kpó; a sixú lɛ́ mɔ ɖo xó ɖěɖěe Jezu ɖɔ bɔ é ɖo Matíe wěmata 6​gɔ́ ɔ mɛ lɛ́ é mɛ. Ée a ná ɖo ɖɛ xo sɛ́dó Jexóva wɛ, bo ná ɖo Xó tɔn xa wɛ é ɔ, a ná mɔ gbɔ e é nɔ dó nú mɛ é.

17. Gǎnjɛwú tɛ́ mǐ ka sixú ɖó?

¹⁷ Mǐ sixú kú d’é jí ɖɔ Jexóva ná ɖo fínɛ́ nú mǐ ɖo hwenu e d’ablu ɖo gbɛzán mǐtɔn mɛ lɛ́ é. Mǐ ná nɔ mǐɖokpónɔ gbeɖé ǎ. (Ðɛh. 23:5; 94:14) Jexóva d’akpá bo ná nya xɛ ɖo mǐ jí, bló bɔ mǐ ná lí dǒ, nɔ gǔdo nú mǐ, bo lɛ́ dó gbɔ nú mǐ. Ezayíi 26:3 ɖɔ xó élɔ́ dó Jexóva wú: “Mɛ e ɖeji dó wǔ we kpó ayi tɔn bǐ kpó, bo ma nɔ húzú ǎ ɔ, a nɔ ná ɛ ayi jɛ ayǐ.” Énɛ́ wú ɔ, ɖeji dó Jexóva wú bo ɖu le nǔ ɖěɖěe é nɔ wa dó d’alɔ we lɛ́ é tɔn. Ényí a nɔ wa mɔ̌ ɔ, a ná nɔ lɛ́ mɔ hlɔ̌nhlɔ́n, é ná bo tlɛ nyí ɖo hwenu vɛ́ wǔ lɛ́ mɛ ɔ nɛ́.