1 Maŋtsɛmɛi

16 Kɛkɛ ni Yehowa tsɔ Yehu,+ Hanani+ binuu lɛ nɔ egba* eshi Baasha akɛ: 2 “Miwó onɔ kɛjɛ mulu mli ni mifee bo mimaŋ Israel hiɛnyiɛlɔ,+ shi otee nɔ onyiɛ Yeroboam gbɛ lɛ nɔ, ni ohã mimaŋ Israel fee esha koni amɛkɛ amɛhe eshai lɛ awo mimli la.+ 3 No hewɔ lɛ, mibabɛɛ Baasha kɛ eshĩa lɛ hiahia, ni mahã eshĩa lɛ atsɔ tamɔ Yeroboam,+ Nebat binuu lɛ shĩa lɛ. 4 Kɛ́ Baasha mɔ ko gbo yɛ maŋ lɛ mli lɛ, gbei baaye lɛ; ni kɛ́ emɔ ko gbo yɛ ŋa nɔ lɛ, ŋwɛi loofɔji baaye lɛ.”

5 Baasha shihilɛ mli saji krokomɛi fɛɛ, nibii ni efee kɛ enitsumɔi wuji lɛ, aŋmala yɛ Israel maŋtsɛmɛi ayinɔsaji awolo lɛ mli. 6 Kɛkɛ ni Baasha gbo* ni afu lɛ yɛ Tirza;+ ni ebinuu Ela baye maŋtsɛ yɛ esɛɛ. 7 Agbɛnɛ hu, Yehowa tsɔ gbalɔ Yehu, Hanani binuu lɛ nɔ egba eshi Baasha kɛ eshĩa lɛ, yɛ eshai fɛɛ ni etsɔ eninenaa nitsumɔ nɔ efee yɛ Yehowa hiɛ ni ekɛwo emli la, ni no hã etsɔ tamɔ Yeroboam shĩa lɛ, kɛ agbɛnɛ hu yɛ gbe ni egbe lɛ* lɛ hu hewɔ.+

8 Yɛ Yuda maŋtsɛ Asa nɔyeli afi ni ji 26 lɛ nɔ lɛ, Ela, Baasha binuu lɛ batsɔ Israel maŋtsɛ yɛ Tirza, ni eye nɔ afii enyɔ. 9 Etsulɔ Zimri, ni ji esraafoi ni taa shwiili mli lɛ mlijaa fã kome nɔ tatsɛ lɛ, kpaŋ eyi nɔ be ni eyɔɔ Tirza ni eenu dãa ni etɔ yɛ Arza shĩa lɛ; Arza nɛɛ ji mɔ ni kwɛɔ maŋtsɛ lɛ shĩabii lɛ anɔ. 10 Zimri ba shĩa lɛ mli ni ebatswa Ela nɔ,+ ni egbe lɛ yɛ Yuda maŋtsɛ Asa nɔyeli afi ni ji 27 lɛ nɔ, ni ebatsɔ maŋtsɛ yɛ esɛɛ. 11 Be ni ebatsɔ maŋtsɛ ni eta maŋtsɛ sɛi lɛ nɔ nɔŋŋ pɛ lɛ, etswia Baasha shĩabii lɛ fɛɛ nii. Eshiii nuu ko nuu ko,* Baasha wekunyo* jio, enaanyo jio. 12 No hewɔ lɛ, Zimri kpãtã Baasha shĩabii lɛ fɛɛ ahiɛ, tamɔ bɔ ni Yehowa tsɔ gbalɔ Yehu nɔ egba eshi Baasha lɛ.+ 13 Enɛ ba lɛ nakai yɛ eshai fɛɛ ni Baasha kɛ ebinuu Ela fee kɛ eshai ni amɛhã Israel tsɔ nyɔŋmɔi* ni he bɛ sɛɛnamɔ lɛ anɔ amɛfee kɛwo Yehowa, Israel Nyɔŋmɔ lɛ mli la lɛ hewɔ.+ 14 Ela shihilɛ mli saji krokomɛi fɛɛ, nibii fɛɛ ni efee lɛ, aŋmala yɛ Israel maŋtsɛmɛi ayinɔsaji awolo lɛ mli.

15 Yɛ Yuda maŋtsɛ Asa nɔyeli afi ni ji 27 lɛ nɔ lɛ, Zimri batsɔ maŋtsɛ yɛ Tirza be ni Israel asraafoi lɛ ebɔ nsara amɛwo Gibeton,+ ni ji Filistibii lɛ anɔ lɛ he koni amɛkɛ Gibeton awu lɛ, ni eye maŋtsɛ gbii kpawo. 16 Sɛɛ mli lɛ, asraafoi lɛ ni ebɔ nsara lɛ nu ni aawie akɛ: “Zimri ekpaŋ maŋtsɛ lɛ yi nɔ ni egbe maŋtsɛ lɛ hu.” No hewɔ lɛ, Israel fɛɛ wó Omri,+ ni ji tatsɛ lɛ, Israel maŋtsɛ yɛ nakai gbi lɛ nɔ yɛ nsara lɛ mli. 17 Omri kɛ Israel fɛɛ shi Gibeton ni amɛkwɔ kɛtee Tirza ni amɛyawo he ka. 18 Be ni Zimri na akɛ aŋɔ maŋ lɛ, eyabote maŋtsɛ shĩa lɛ mɔɔ lɛ mli ni ewo shĩa lɛ mli la, ni ekɛ shĩa lɛ fɛɛ shã, ni egbo.+ 19 Enɛ ba lɛ nakai yɛ eshai ni lɛ diɛŋtsɛ efee lɛ hewɔ, ejaakɛ enyiɛ Yeroboam gbɛ lɛ nɔ kɛ esha ni ehã Israel fee lɛ, ni ekɛfee efɔŋ yɛ Yehowa hiɛ lɛ mli.+ 20 Zimri shihilɛ mli saji krokomɛi fɛɛ, kɛ maŋtsɛ lɛ yi nɔ ni ekpaŋ lɛ, aŋmala yɛ Israel maŋtsɛmɛi ayinɔsaji awolo lɛ mli.

21 Kɛkɛ ni Israelbii lɛ amli gba enyɔ. Mɛi komɛi yafĩ Tibni, Ginat binuu lɛ sɛɛ ni amɛmiitao ni amɛwó lɛ maŋtsɛ, ni mɛi krokomɛi yafĩ Omri sɛɛ. 22 Shi mɛi ni yafĩ Omri sɛɛ lɛ ye mɛi ni yafĩ Tibni, Ginat binuu lɛ sɛɛ lɛ anɔ kunim. No hewɔ lɛ, Tibni gbo ni Omri batsɔ maŋtsɛ.

23 Yɛ Yuda maŋtsɛ Asa nɔyeli afi ni ji 31 lɛ nɔ lɛ, Omri batsɔ Israel maŋtsɛ, ni eye nɔ afii 12. Eye maŋtsɛ afii ekpaa yɛ Tirza. 24 Ekɛ jwiɛtɛi talɛntai* enyɔ he Samaria gɔŋ lɛ yɛ Shemer dɛŋ, ni etswa maŋ ko ema gɔŋ lɛ nɔ. Ewo maŋ ni etswa lɛ gbɛ́i akɛ Samaria,*+ ejaakɛ ekɛ Shemer, ni ji gɔŋ lɛ nɔtsɛ* lɛ gbɛ́i ni wo maŋ lɛ. 25 Omri tee nɔ efee efɔŋ yɛ Yehowa hiɛ, ni efee efɔŋ fe mɛi fɛɛ ni tsɔ ehiɛ lɛ po.+ 26 Enyiɛ Yeroboam, Nebat binuu lɛ gbɛi lɛ fɛɛ anɔ kɛ eshai ni ehã Israel tsɔ nyɔŋmɔi* ni he bɛ sɛɛnamɔ lɛ anɔ amɛfee kɛwo Yehowa, Israel Nyɔŋmɔ lɛ mli la lɛ mli.+ 27 Omri shihilɛ mli saji krokomɛi fɛɛ, nibii ni efee kɛ enitsumɔi wuji lɛ, aŋmala yɛ Israel maŋtsɛmɛi ayinɔsaji awolo lɛ mli. 28 Kɛkɛ ni Omri gbo* ni afu lɛ yɛ Samaria; ni ebinuu Ahab+ baye maŋtsɛ yɛ esɛɛ.

29 Ahab, Omri binuu lɛ batsɔ Israel maŋtsɛ yɛ Yuda maŋtsɛ Asa nɔyeli afi ni ji 38 lɛ nɔ, ni Ahab, Omri binuu lɛ ye Israel nɔ maŋtsɛ afii 22 yɛ Samaria.+ 30 Ahab, Omri binuu lɛ fee efɔŋ yɛ Yehowa hiɛ fe mɛi fɛɛ ni tsɔ ehiɛ lɛ.+ 31 Oookɛɛ nɔ ni efaaa hãaa lɛ akɛ eeefee eshai ni Yeroboam,+ Nebat binuu lɛ fee lɛ,* ekɛ Etbaal, Sidonbii+ lɛ amaŋtsɛ lɛ biyoo ni atsɛɔ lɛ Yezebel+ lɛ hu bote gbalashihilɛ mli, ni ebɔi Baal sɔɔmɔ ni ekoto Baal.+ 32 Agbɛnɛ hu, ema afɔleshaa latɛ ehã Baal yɛ Baal jamɔhe*+ ni ema yɛ Samaria lɛ. 33 Ahab fee wɔŋ tso*+ hu. Ahab fee nibii gbohii babaoo kɛwo Yehowa, Israel Nyɔŋmɔ lɛ mli la fe Israel maŋtsɛmɛi fɛɛ ni tsɔ ehiɛ lɛ.

34 Yɛ Ahab gbii lɛ amli lɛ, Hiel, Betelnyo lɛ tswa Yeriko ekoŋŋ. Ekromɔbi Abiram gbo yɛ faneshi lɛ tswaa mli, ni enakutsoŋbi Segub gbo yɛ enaa agbói lɛ ataramɔ mli, tamɔ bɔ ni Yehowa tsɔ Yoshua, Nun binuu lɛ nɔ ewie lɛ.+