2 Maŋtsɛmɛi

11 Agbɛnɛ, be ni Ahazia mami Atalia+ na akɛ ebinuu lɛ egbo lɛ,+ ete shi koni ekpãtã maŋtsɛ seshibii lɛ fɛɛ* ahiɛ.+ 2 Shi Yehosheba, Maŋtsɛ Yehoram biyoo lɛ ni ji Ahazia nyɛmi yoo lɛ, mɔ Ahazia binuu Yehoash+ ni eju lɛ kɛjɛ maŋtsɛ bihii ni abaagbe amɛ lɛ ateŋ, ni ekɛ Yehoash kɛ yoo ni kwɛɔ lɛ lɛ yato sɛɛtsu ko mli. Amɛbɔ mɔdɛŋ amɛkɛ lɛ yato koni Atalia akana lɛ, no hewɔ lɛ agbeee lɛ. 3 Ehi eŋɔɔ yɛ Yehowa shĩa lɛ afii ekpaa, ni akɛ lɛ etee yɛ jɛmɛ. Nakai beiaŋ lɛ, Atalia miiye shikpɔŋ lɛ nɔ.

4 Yɛ afi ni ji kpawo lɛ nɔ lɛ, Yehoiada tsu ayatsɛ mɛi oha nɔkwɛlɔi ni kwɛɔ maŋtsɛ hebulɔi* kɛ maŋtsɛ shĩa bulɔi*+ lɛ anɔ lɛ koni amɛba eŋɔɔ yɛ Yehowa shĩa lɛ. Ekɛ amɛ kpaŋ kpaŋmɔ ni ehã amɛkã he kitã yɛ Yehowa shĩa lɛ, ni ekɛ maŋtsɛ binuu lɛ tsɔɔ amɛ.+ 5 Ni ewo amɛ kitã akɛ: “Nɔ ni nyɛbaafee nɛ: Nyɛjaa nyɛmli nyɛwoa kui etɛ mli. Kuu kome baabu yɛ Hejɔɔmɔ Gbi lɛ nɔ, ni amɛbaabu maŋtsɛ shĩa lɛ he jogbaŋŋ,+ 6 kuu kroko baabu agbó ni atsɛɔ lɛ Faneshi Agbó lɛ naa, ni kuu ni ji etɛ lɛ baabu agbó ni yɔɔ maŋtsɛ shĩa bulɔi lɛ asɛɛ lɛ naa. Nyɛbaato naa kɛbu shĩa lɛ he. 7 Nyɛteŋ bulɔi akui enyɔ ni tsuuu nii yɛ Hejɔɔmɔ Gbi lɛ nɔ lɛ baabu Yehowa shĩa lɛ he jogbaŋŋ koni mɔ ko mɔ ko akata maŋtsɛ lɛ he. 8 Nyɛbaabɔle maŋtsɛ lɛ he kɛkpe, ni nyɛteŋ mɔ fɛɛ mɔ baahiɛ etawuu nii yɛ edɛŋ. Mɔ fɛɛ mɔ ni baatsɔ asraafoi lɛ ateŋ lɛ abaagbe lɛ. Nyɛhia maŋtsɛ lɛ he kɛyaa he fɛɛ he ni ebaaya.”*

9 Mɛi oha nɔkwɛlɔi+ lɛ fee nɔ ni osɔfo Yehoiada wo amɛ kitã yɛ he lɛ pɛpɛɛpɛ. No hewɔ lɛ, amɛteŋ mɔ fɛɛ mɔ yatsɛ ehii ni baatsu nii yɛ Hejɔɔmɔ Gbi lɛ nɔ lɛ, kɛ mɛi ni tsuuu nii yɛ Hejɔɔmɔ Gbi lɛ nɔ lɛ fɛɛ, ni amɛtee osɔfo Yehoiada ŋɔɔ.+ 10 Kɛkɛ ni osɔfo lɛ kɛ Maŋtsɛ David akpɔlɔi kɛ etsɛŋi koklobii lɛ ni yɔɔ Yehowa shĩa lɛ hã mɛi oha nɔkwɛlɔi lɛ. 11 Kɛkɛ ni maŋtsɛ shĩa bulɔi+ lɛ yadamɔ amɛgbɛhei lɛ, kɛjɛ shĩa lɛ ninejurɔgbɛ kɛyashi shĩa lɛ abɛkugbɛ, yɛ afɔleshaa latɛ+ lɛ kɛ shĩa lɛ he, ni amɛbɔle maŋtsɛ lɛ he kɛkpe, mɔ fɛɛ mɔ hiɛ etawuu nii yɛ edɛŋ. 12 Kɛkɛ ni Yehoiada kɛ maŋtsɛ binuu+ lɛ je kpo ni ekɛ maŋtsɛ fai* lɛ bu lɛ ni ekɛ Odase*+ lɛ fɔ̃ enɔ, ni amɛwó lɛ maŋtsɛ ni amɛfɔ lɛ mu. Kɛkɛ ni amɛbɔi amɛdɛ̃ tswaa ni amɛkɛɛ akɛ: “Maŋtsɛ yi aná wala!”+

13 Be ni Atalia nu maŋbii ni hiɛ foi lɛ ahoofeemɔ lɛ he lɛ, amrɔ nɔŋŋ ni etee maŋbii lɛ aŋɔɔ yɛ Yehowa shĩa lɛ.+ 14 Ni ena maŋtsɛ lɛ ni edamɔ akulashiŋ lɛ he tamɔ bɔ ni afeɔ yɛ kusum naa lɛ.+ No mli lɛ, tatsɛmɛi lɛ kɛ tɛtɛrɛmantɛrɛ kpãlɔi+ lɛ yɛ maŋtsɛ lɛ masɛi, ni shikpɔŋ lɛ nɔ bii lɛ fɛɛ miinya ni amɛmiikpã tɛtɛrɛmantɛrɛi lɛ. Kɛkɛ ni Atalia gbála etadei lɛ ni ebo akɛ: “Akpaŋ miyi nɔ! Akpaŋ miyi nɔ!” 15 Shi osɔfo Yehoiada fã mɛi oha nɔkwɛlɔi+ lɛ, ni ji mɛi ni ahala akɛ amɛkwɛ asraafoi lɛ anɔ lɛ, ni ekɛɛ amɛ akɛ: “Nyɛmɔa lɛ kɛjea asraafoi lɛ ateŋ, ni mɔ fɛɛ mɔ ni baanyiɛ esɛɛ lɛ, nyɛkɛ klante agbea lɛ!” Ejaakɛ osɔfo lɛ ekɛɛ akɛ: “Akagbe lɛ yɛ Yehowa shĩa lɛ.” 16 No hewɔ lɛ, amɛmɔ lɛ, ni be ni amɛkɛ lɛ shɛ* he ni okpɔŋɔi lɛ boteɔ maŋtsɛ lɛ shĩa+ lɛ mli yɛ lɛ, amɛgbe lɛ yɛ jɛmɛ.

17 Kɛkɛ ni Yehoiada hã maŋtsɛ lɛ kɛ maŋbii lɛ kɛ Yehowa kpaŋ kpaŋmɔ+ akɛ amɛbaaya nɔ amɛhi shi akɛ Yehowa maŋ, ni ehã maŋtsɛ lɛ kɛ maŋbii lɛ hu kpaŋ kpaŋmɔ.+ 18 No sɛɛ lɛ, shikpɔŋ lɛ nɔ bii lɛ fɛɛ tee Baal jamɔhe* lɛ, ni amɛyakumɔ efɔleshaa latɛi lɛ amɛshwie shi,+ ni amɛkumɔ emagai lɛ dukuduku,+ ni amɛgbe Matan, Baal osɔfo+ lɛ yɛ afɔleshaa latɛi lɛ ahiɛ.

Kɛkɛ ni osɔfo lɛ hole nɔkwɛlɔi koni amɛkwɛ Yehowa shĩa lɛ nɔ.+ 19 Agbɛnɛ hu, ehã mɛi oha nɔkwɛlɔi+ lɛ, kɛ maŋtsɛ hebulɔi lɛ, kɛ maŋtsɛ shĩa bulɔi+ lɛ, kɛ shikpɔŋ lɛ nɔ bii lɛ fɛɛ fata ehe koni amɛkɛ maŋtsɛ lɛ akpeleke shi kɛjɛ Yehowa shĩa lɛ kɛyajie lɛ gbɛ, ni amɛtsɔ maŋtsɛ shĩa bulɔi lɛ agbó lɛ naa gbɛ lɛ nɔ kɛtee maŋtsɛ shĩa lɛ. Ni eyata maŋtsɛmɛi asɛi lɛ nɔ.+ 20 No hewɔ lɛ, shikpɔŋ lɛ nɔ bii lɛ fɛɛ nya, ni maŋ lɛ mli jɔ, ejaakɛ amɛkɛ klante egbe Atalia yɛ maŋtsɛ shĩa lɛ.

21 Be ni Yehoash+ batsɔ maŋtsɛ lɛ, no mli lɛ eye afii kpawo.+