2 Maŋtsɛmɛi
14 Yɛ Israel maŋtsɛ Yehoash,+ Yehoahaz binuu lɛ nɔyeli afi ni ji enyɔ lɛ nɔ lɛ, Yuda maŋtsɛ Yehoash binuu Amazia batsɔ maŋtsɛ. 2 Be ni ebatsɔ maŋtsɛ lɛ, no mli lɛ eye afii 25, ni eye nɔ afii 29 yɛ Yerusalem. Atsɛɔ emami Yehoadin, ni ejɛ Yerusalem.+ 3 Etee nɔ efee nɔ ni ja yɛ Yehowa hiɛ, shi jeee tamɔ bɔ ni etsɛ David fee lɛ.+ Bɔ ni etsɛ Yehoash fee lɛ, nakai pɛpɛɛpɛ lɛ hu efee.+ 4 Shi ajieee hei grɔŋŋi lɛ,+ ni no mli lɛ, maŋbii lɛ miishã afɔlei kɛ lasu afɔlei yɛ hei grɔŋŋi lɛ lolo.+ 5 Be ni emaŋtsɛyeli lɛ ma shi nɔŋŋ lɛ, egbe etsuji ni gbe etsɛ ni ji maŋtsɛ lɛ.+ 6 Shi mɛi ni gbe etsɛ lɛ abii lɛ egbeee amɛ, ejaakɛ Yehowa kitã ni aŋma yɛ Mose Mla wolo lɛ mli lɛ kɛɔ akɛ: “Akagbe tsɛmɛi yɛ amɛbii ahewɔ, ni akagbe bii hu yɛ amɛtsɛmɛi ahewɔ; shi agbe mɔ fɛɛ mɔ yɛ lɛ diɛŋtsɛ ehe esha hewɔ.”+ 7 Egbe Edombii+ lɛ ateŋ hii 10,000 yɛ Ŋoo Jɔɔ+ lɛ mli, ni eŋɔ Sela yɛ ta lɛ mli,+ ni atsɛ Sela gbɛ́i akɛ Yokteel kɛbashi ŋmɛnɛ.
8 Kɛkɛ ni Amazia tsu mɛi kɛtee Israel maŋtsɛ Yehoash, Yehu binuu Yehoahaz binuu lɛ ŋɔɔ ekɛɛ: “Ba, ni wɔkɛ wɔhe awu ta.”*+ 9 Israel maŋtsɛ Yehoash tsu ayakɛɛ Yuda maŋtsɛ Amazia akɛ: “Lebanon ŋmei tso lɛ tsu ayakɛɛ Lebanon tseneduru tso lɛ akɛ, ‘Okɛ obiyoo ahã mibinuu gbãla.’ Shi Lebanon kooloo awuiyelɔ ko baho ni enaanaa ŋmei tso lɛ nɔ. 10 Anɔkwa, otswia Edom nii,+ no hewɔ lɛ, otsui ewó ehe nɔ. Shwãa yɛ no hewɔ, shi hii omaŋtsɛ shĩa lɛ. Mɛni hewɔ otaoɔ ni amanehulu aba onɔ, ni okɛ Yuda fɛɛ agbee shi nɛɛ?” 11 Shi Amazia booo toi.+
No hewɔ lɛ, Israel maŋtsɛ Yehoash kwɔ kɛtee, ni ekɛ Yuda maŋtsɛ Amazia yawu yɛ Bet-shemesh,+ ni ji Yuda nɔ lɛ.+ 12 Israel ye Yuda nɔ kunim, ni mɔ fɛɛ mɔ jo foi kɛtee eshĩa.* 13 Israel maŋtsɛ Yehoash mɔ Yuda maŋtsɛ Amazia, Ahazia binuu Yehoash binuu lɛ, yɛ Bet-shemesh. Kɛkɛ ni amɛba Yerusalem, ni ekumɔ Yerusalem gbogbo lɛ kɛjɛ agbó ni atsɛɔ lɛ Efraim Agbó+ lɛ naa kɛyashi agbó ni atsɛɔ lɛ Koŋ Agbó+ lɛ naa, gbogbo ni ekumɔ lɛ kɛlɛ ji ninetalɔi 400.* 14 Eloo shika tsuru kɛ jwiɛtɛi lɛ fɛɛ kɛ nibii fɛɛ ni ana yɛ Yehowa shĩa lɛ kɛ maŋtsɛ shĩa lɛ jwetritoohei lɛ kɛ mɛi ni emɔmɔ yɛ ta lɛ mli lɛ hu. Ni eku esɛɛ etee Samaria.
15 Yehoash shihilɛ mli saji krokomɛi fɛɛ, nibii ni efee kɛ enitsumɔi wuji lɛ, kɛ bɔ ni ekɛ Yuda maŋtsɛ Amazia wu lɛ, aŋmala yɛ Israel maŋtsɛmɛi ayinɔsaji awolo lɛ mli. 16 Kɛkɛ ni Yehoash gbo* ni afu lɛ yɛ Samaria+ yɛ Israel maŋtsɛmɛi lɛ amasɛi; ni ebinuu Yeroboam*+ baye maŋtsɛ yɛ esɛɛ.
17 Yuda maŋtsɛ Amazia,+ Yehoash binuu lɛ, hi shi afii 15 yɛ Israel maŋtsɛ Yehoash,+ Yehoahaz binuu lɛ gbele sɛɛ.+ 18 Amazia shihilɛ mli saji krokomɛi fɛɛ lɛ, aŋmala yɛ Yuda maŋtsɛmɛi ayinɔsaji awolo lɛ mli. 19 Sɛɛ mli lɛ, akpaŋ eyi nɔ+ yɛ Yerusalem, ni ejo foi kɛtee Lakish, shi atsu hii komɛi kɛtiu lɛ kɛtee Lakish, ni amɛyagbe lɛ yɛ jɛmɛ. 20 Ni amɛwó lɛ amɛfɔ̃ okpɔŋɔi anɔ ni amɛku amɛsɛɛ, ni ayafu lɛ yɛ Yerusalem yɛ etsɛmɛi lɛ amasɛi yɛ David Maŋ+ lɛ mli. 21 Kɛkɛ ni Yuda maŋ muu lɛ fɛɛ mɔ Azaria*+ ni amɛwó lɛ maŋtsɛ yɛ etsɛ Amazia sɛɛ;+ no mli lɛ, eye afii 16.+ 22 Etswa Elat+ maŋ lɛ ekoŋŋ ni esaa ekɛhã Yuda be ni maŋtsɛ* lɛ egbo* lɛ sɛɛ.+
23 Yuda maŋtsɛ Amazia, Yehoash binuu lɛ nɔyeli afi ni ji 15 lɛ nɔ lɛ, Israel maŋtsɛ Yehoash binuu Yeroboam+ batsɔ maŋtsɛ yɛ Samaria, ni eye nɔ afii 41. 24 Etee nɔ efee efɔŋ yɛ Yehowa hiɛ. Etsiii ehe kɛjeee eshai fɛɛ ni Yeroboam, Nebat binuu lɛ hã Israel fee lɛ he.+ 25 Lɛ ehã Israel nine shɛ ehusui lɛ anɔ ekoŋŋ, kɛjɛ Lebo-hamat*+ aahu kɛyashi Araba lɛ Ŋshɔ*+ lɛ naa tamɔ bɔ ni Yehowa, Israel Nyɔŋmɔ lɛ tsɔ etsulɔ Yona,+ Amitai binuu lɛ, ni ji gbalɔ ni jɛ Gat-hefer+ lɛ nɔ ewie lɛ. 26 Ejaakɛ Yehowa na akɛ Israel miina nɔ waa.+ Mɔ ko mɔ ko bɛ ni baaye abua Israel, mɛi ni abuuu po bɛ. 27 Shi Yehowa ewo shi akɛ egbeŋ Israel gbɛ́i kɛjeŋ ŋwɛi shishi.+ No hewɔ lɛ, etsɔ Yeroboam, Yehoash binuu lɛ nine nɔ ehere amɛ.+
28 Yeroboam shihilɛ mli saji krokomɛi fɛɛ, nibii fɛɛ ni efee kɛ enitsumɔi wuji lɛ, kɛ bɔ ni ewu ni ekɛ Damasko+ kɛ Hamat+ ku sɛɛ ehã Yuda yɛ Israel lɛ, aŋmala yɛ Israel maŋtsɛmɛi ayinɔsaji awolo lɛ mli. 29 Kɛkɛ ni Yeroboam gbo* ni afu lɛ yɛ Israel maŋtsɛmɛi lɛ amasɛi; ni ebinuu Zakaria+ baye maŋtsɛ yɛ esɛɛ.