1 Kronika
19 Sɛɛ mli lɛ, Amonbii lɛ amaŋtsɛ Nahash gbo, ni ebinuu baye maŋtsɛ yɛ esɛɛ.+ 2 Kɛkɛ ni David kɛɛ akɛ: “Majie suɔmɔ ni tsakeee kpo+ matsɔɔ Hanun, Nahash binuu lɛ, ejaakɛ etsɛ jie suɔmɔ ni tsakeee kpo etsɔɔ mi.” No hewɔ lɛ, David tsu etsuji lɛ kɛtee koni amɛyashɛje emii yɛ etsɛ gbele lɛ hewɔ. Shi be ni David tsuji lɛ yashɛ Amonbii+ lɛ ashikpɔŋ lɛ nɔ koni amɛyashɛje Hanun mii lɛ, 3 Amonbii lɛ alumɛi lɛ bi Hanun akɛ: “Ani osusuɔ akɛ opapa hiɛ nyam ni David taoɔ awo lɛ hewɔ ni etsu miishɛjelɔi kɛba nɛɛ? Aso jeee koni amɛbakwɛ maŋ lɛ shikamɔ ni amɛkpá maŋ lɛ shi ni amɛbaŋɔ hewɔ ni etsuji lɛ eba oŋɔɔ nɛɛ?” 4 No hewɔ lɛ, Hanun mɔmɔ David tsuji lɛ ni eshɛshɛɛ amɛhetsɔi+ ni efolɔfolɔɔ amɛtadei lɛ anɔ yɛ teŋ tuuntu yɛ amɛdunaa* ni ewo amɛ gbɛ. 5 Be ni abakɛɛ David nɔ ni afee hii lɛ, etsu mɛi krokomɛi amrɔ nɔŋŋ koni amɛkɛ amɛ ayakpe, ejaakɛ ashwie hii lɛ ahiɛ shi waa; ni maŋtsɛ lɛ kɛɛ amɛ akɛ: “Nyɛhia Yeriko+ kɛyashi nyɛtsɛŋ lɛ baatsa ekoŋŋ dani nyɛku nyɛsɛɛ kɛba.”
6 Be ko sɛɛ lɛ, Amonbii lɛ na akɛ amɛhe eje fu ewo David, no hewɔ lɛ, Hanun kɛ Amonbii lɛ kɛ jwiɛtɛi talɛntai* 1,000 tsu koni akɛyabɔ shwiilii kɛ okpɔŋɔi apaa kɛjɛ Mesopotamia,* kɛ Aram-maaka, kɛ Zoba.+ 7 No hewɔ lɛ, amɛyabɔ shwiilii 32,000 apaa kɛfata Maaka maŋtsɛ lɛ kɛ emaŋbii lɛ ahe. Ni amɛbabɔ nsara yɛ Medeba+ hiɛ. Amonbii lɛ bua amɛhe naa yɛ amɛmaji lɛ amli ni amɛje kpo kɛba kɛhã ta.
8 Be ni David nu he lɛ, etsu Yoab+ kɛ asraafoi lɛ fɛɛ, kɛ etawulɔi kãkãlɔi ni fe fɛɛ lɛ kɛtee.+ 9 Ni Amonbii lɛ je kpo ni amɛyabua amɛhe naa kɛhã ta yɛ maŋ lɛ agbó lɛ naa, ni no mli lɛ, maŋtsɛmɛi ni kɛ amɛba lɛ sɔŋŋ yɛ afã yɛ ŋa lɛ nɔ.
10 Be ni Yoab na akɛ mɛi ni ekɛyaawu lɛ miiba yɛ ehiɛ kɛ esɛɛ fɛɛ lɛ, ehala Israel asraafoi lɛ ateŋ mɛi ni he esa fe fɛɛ lɛ ekomɛi, ni ebua amɛnaa koni amɛkɛ Siriabii lɛ awu.+ 11 Ekɛ hii ni shwɛ lɛ wo enyɛmi nuu Abishai shishi,*+ koni ebua amɛnaa ni amɛkɛ Amonbii lɛ awu. 12 Kɛkɛ ni ekɛɛ: “Kɛ́ ona akɛ Siriabii+ lɛ anine miitsɔ minɔ lɛ, ba ni obaye obua mi; shi kɛ́ mi hu mina akɛ Amonbii lɛ anine miitsɔ onɔ lɛ, mi hu maba mabaye mabua bo. 13 Esa akɛ wɔhe awa ni wɔfee ekãa+ yɛ wɔmaŋbii lɛ kɛ wɔ-Nyɔŋmɔ lɛ maji lɛ ahewɔ, ni Yehowa hu baafee nɔ ni sa ehiɛ.”
14 Kɛkɛ ni Yoab kɛ ehii lɛ tee amɛhiɛ kɛyanina Siriabii lɛ, ni amɛkɛ amɛ wu, ni amɛjo foi yɛ Yoab hiɛ.+ 15 Be ni Amonbii lɛ na akɛ Siriabii lɛ ejo foi lɛ, amɛ hu amɛjo foi yɛ Yoab nyɛmi nuu Abishai hiɛ ni amɛyabote maŋ lɛ mli. No sɛɛ lɛ, Yoab ba Yerusalem.
16 Be ni Siriabii lɛ na akɛ Israel eye amɛnɔ kunim lɛ, amɛtsu koni ayatsɛ Siriabii ni yɔɔ Faa*+ lɛ kpokpaa lɛ nɔ lɛ kɛba, ni Shofak ni ji Hadadezer tatsɛ lɛ nyiɛ amɛhiɛ.+
17 Be ni ayabɔ David amaniɛ lɛ, amrɔ nɔŋŋ ni ebua Israel fɛɛ naa ni efo Yordan lɛ ni ebanina amɛ, ni ebua Israelbii lɛ anaa koni amɛkɛ amɛ awu. David bua amɛnaa koni amɛkɛ Siriabii lɛ awu, ni amɛkɛ lɛ wu.+ 18 Shi Siriabii lɛ jo foi yɛ Israel hiɛ; ni David gbe hii 7,000 ni taraa shwiilii amli kɛ asraafoi 40,000 ni nyiɛɔ amɛnane nɔ, ni egbe Shofak, ni ji tatsɛ lɛ. 19 Be ni Hadadezer tsuji lɛ, na akɛ Israel eye amɛnɔ kunim lɛ,+ amrɔ nɔŋŋ ni amɛkɛ David kpaŋ toiŋjɔlɛ kpaŋmɔ ni amɛbatsɔmɔ etsuji;+ ni Siriabii lɛ sumɔɔɔ akɛ amɛbaaye amɛbua Amonbii lɛ dɔŋŋ.